1. Kěbị ělangu Mawu mapulu měkoạ apa, kụ kawe nụe? (Pěmanda gambarẹ̌ sampul.)

YESUS KRISTUS nẹ̌parenta su manga tumatol᷊ene, ”Dakọe . . . kụ koạko taumata bọu haghing bangsa mariadi muritẹ̌ku.” (Mat. 28:19) Kěbị ělangu Mawu tantu mapulu měngěndung kerea i sire botonge ’měkoạ pakapia’ pelayanan ini. (2 Tim. 4:5) Bọu kěbị hal᷊ẹ̌, hal᷊ẹ̌ ini kai limembong penting, limembong mal᷊awọ gunane, dingangu harusẹ̌ lighạ koateng. Katewe, tawe gampang měnadia tempo kere ikẹ̌kapulung i kitẹ gunang pelayanan.

2. Su tempong měkoạ pelayanan, situasi kerea tẹ̌tatěngong i kitẹ?

² Piạ lawọ kegiatan penting makapakẹ tempo dingangu katatoghasi kitẹ. I kitẹ aramanung harusẹ̌ měhal᷊ẹ̌ pirang kaorasẹ̌ su ral᷊ungu sahěllo tadeạu piạ doitẹ̌ gunang měměli kebutuhan i kitẹ dingangu keluarga. I kitẹ ěndịu harusẹ̌ mẹ̌tawakal᷊i ual᷊ingu i kitẹ arau kěluargang i kitẹ masakị, depresi, arau nasigěsạ ual᷊ingu seng kakạgurange. Kerea tadeạu botonge měkoạ pakapia pelayanan i kitẹ maning tụtatěngo haghing situasi ini?

3. Bọu bawerang i Yesus su Matius 13:23, apa kaěndungang i kitẹ?

³ Mạeng situasing i kitẹ nakaal᷊ạ tempo botonge paketang i kitẹ gunang hal᷊ẹ̌ i Yehuwa, abe makadodọ naung. Yesus masingkạ tawe kěbị bọu i kitẹ botonge makaghělị tempo dingangu katatoghasẹ̌ mẹ̌sul᷊ung kal᷊awọe gunang měmahiạ habarẹ̌ mapia Kararatuang. (Basa Matius 13:23.) Yehuwa sěbạe měngẹ̌ngarěga kěbị apa seng nikoạ i kitẹ gunang hal᷊ẹ̌’E, asal᷊ẹ̌ i kitẹ seng někoạ kapaelange. (Ibr. 6:10-12) I kitẹ lai ěndịu nẹ̌pěndang situasing i kitẹ nakakoạ si kitẹ botonge měkoạ limembong mal᷊awọ gunang pelayanan. Su pěngangěndungang ini,i kitẹ sarung měngěndung kerea i kitẹ botonge měngal᷊imona pelayanan su pěbawiahẹ̌,  měndiagạ pěbawiahẹ̌ tatapẹ̌ sederhana, dingangu limembong matahuěna měnginjilẹ̌ lai měněntiro. Maning kerene, humotong, apa mangal᷊ene měkoạ pakapia pelayanan i kitẹ?

4. Apa mangal᷊ene měkoạ pakapia pelayanan i kitẹ?

⁴ Měkoạ pakapia pelayanan mangal᷊ene i kitẹ mẹ̌tawakali měpakẹ kalawọe tempong i kitẹ gunang měnginjilẹ̌ dingangu měněntiro. Katewe ene bal᷊inẹ kětạeng soal u tempo. Alasang i kitẹ měnginjilẹ̌ lai penting si Yehuwa. Ual᷊ingu makěndagẹ̌ si Yehuwa dingangu taumata wal᷊inẹ, i kitẹ měkoạ pelayanan Kristen dingangu kaguwạu pěbawiahi kitẹ. * (Mrk. 12:30, 31; Kol. 3:23) Mẹ̌tahamawu si Yehuwa dingangu kaguwạu pěbawiahẹ̌ mangal᷊ene měgělị watangeng i kitẹ, měpakẹ katatoghasẹ̌ tadeạu botonge měkoạ kapaelange su pelayanan si Sie. Mạeng i kitẹ měngarěga hak istimewa měnginjilẹ̌, i kitẹ sarung měkoạ kapaelange gunang měhabarẹ̌ habarẹ̌ mapia su lawọ taumata.

5-6. Apa taumata apang mahal᷊i tempone botonge měmělọ hal᷊ẹ̌ měnginjilẹ̌ su tampạ kahumotongange su pěbawiahe? Gělịko sasihinge.

⁵ Pẹ̌tiněna piạ sěngkatau umbaseng puluang měnalang gitarẹ̌. I sie puluang měnalang su tempong i sie botonge. Samurine, sabang Kaehẹ̌ dingangu Misa i sie něhal᷊ẹ̌ něnalang gitarẹ̌ su sěmbaụ kafe. Katewe gajine mahal᷊i. Hakị u ene i sie něhal᷊ẹ̌ nakoạ kasirẹ̌ su sěmbaụ toko bọu Mandakẹ̌ sarang Sambaiang. Maning kal᷊awọkange tempone nipakẹ gunang měhal᷊ẹ̌ su toko, měnalang gitarẹ̌ tatapẹ̌ ene su naunge. I sie sěbạe mapulu makoạ měnanalang gitarẹ̌ mapaelẹ̌ dingangu mapulu ene makoạ hal᷊ẹ̌e. Hakị u ene, sabang piạ tempo maning kětạeng kadodọ, i sie mang měnalang gitarẹ̌.

⁶ Kerene lai, aramanung temponu gunang měnginjilẹ̌ kětạeng mahal᷊i. Katewe i kau puluang měkoạ ene. I kau nẹ̌tawakal᷊i tadeạu limembong mapaelẹ̌ měhabarẹ̌ habarẹ̌ mapia su taumata. Ual᷊ingu i kau harusẹ̌ měngurusẹ̌ lawọ hal᷊ẹ̌, i kau aramanung mětẹ̌tiněna kerea tadeạu hal᷊ẹ̌ měnginjilẹ̌ makoạ kahumotongange su pěbawiahu.

7-8. Kerea i kitẹ botonge mẹ̌těno si Yesus su pelayanan?

⁷ Yesus něgělị contoh mapaelẹ̌ soal u měmanda pelayanan. Mẹ̌bisara soal u Kararatuangu Mawu nakoạ hal᷊ẹ̌ paling penting su pěbawiahe. (Yoh. 4:34, 35) I sie rụdal᷊eng hasụe su kilometere gunang měnginjilẹ̌ su lawọ taumata. I sie mědẹ̌deạ cara gunang mẹ̌bisara su taumata su wal᷊eng i sire dingangu su tampạ piạ lawọ taumata. Yesus nẹ̌taho pelayanan su tampạ kahumotongange su pěbawiahe.

⁸ I kitẹ botonge mẹ̌těno si Kristus mạeng mědeạ cara gunang mẹ̌bisara su taumata soal u habarẹ̌ mapia su tampạ dingangu tempo i kitẹ botonge. I kitẹ mapulu měkoạ pengorbanan gunang měnginjilẹ̌. (Mrk. 6:31-34; 1 Ptr. 2:21) Pirang katau su sidang seng nakoạ perintis ekstra, perintis biasa, dingangu perintis istimewa. Sěnggạ lai seng něngěndung bawera wal᷊inẹ arau něngal᷊ing sarang tampạ mahal᷊i penyiar. Maning kerene, kal᷊awọkange hal᷊ẹ̌ měnginjilẹ̌ kẹ̌koatengu penyiar apang tawe nakakoạ manga hal᷊ẹ̌ ene. Tawẹ soale i kitẹ makakoạ mal᷊awọ arau mahal᷊i, Yehuwa tawe mẹ̌dorong mal᷊awọ bọu apa wotonge gělịkang i kitẹ. I Sie mapulu i kitẹ kěbị mal᷊uasẹ̌ měhabarẹ̌ ”habarẹ̌ mapia mawantugẹ̌ bọu Mawu mal᷊uasẹ̌”.​—1 Tim. 1:11; Ul. 30:11.

9. (a) Maning harusẹ̌ měhal᷊ẹ̌, kerea i Paulus němělo hal᷊ẹ̌ měnginjilẹ̌ su tampạ kahumotongange? (b) Kerea Kisah 28:16, 30, 31 něnodẹ pěndang i Paulus soal u pelayanan kẹ̌koatenge?

⁹ Rasul Paulus nakoạ pẹ̌tatěnong mapaelẹ̌ su soal u měngalimona pelayanan. Su perjalanan utusan injil karuane, doite kate mahal᷊i kụ i sie harusẹ̌ měhal᷊ẹ̌ měkoạ tenda su Korintus. Katewe, měkoạ tenda tawe nakoạ hal᷊ẹ̌ paling penting si sie. I sie něhal᷊ẹ̌ tadeạu botonge tatapẹ̌ měnginjilẹ̌ su Korintus, ual᷊ingu i sie madiri makoạ bawawangu anạu sěmbaụ su Korintus. (2 Kor. 11:7) Maning harusẹ̌ měhal᷊ẹ̌, i Paulus turusẹ̌ nẹ̌taho pelayanan su tampạ kahumotongange, kụ měngẹ̌nginjilẹ̌ sabang ěllong Sabatẹ̌. Su tempong situasine nakoạ limembong mapaelẹ̌, i Paulus botonge něpakẹ lawọ tempo gunang měnginjilẹ̌. I sie ”sibukẹ̌ mělẹ̌habarẹ̌ hengetang. I sie nẹ̌sahidi su tau Yahudi gunang měgělị bukti i Yesus kai Kristus”. (Kis. 18:3-5; 2 Kor. 11:9) Samurine, su tempong nakoạ tahanan rumah su Roma karěngụe dua taung, Paulus něnginjilẹ̌ su taumata apang nẹ̌tiwo si sie kụ i sie lai němohẹ suratẹ̌. (Basa Kisah 28:16, 30, 31.) Paulus tawe němala barang bal᷊inẹ makoạ limembong penting sul᷊ungu pelayanan kẹ̌koatenge. I sie němohẹ, ”Ual᷊ingu i kami nakaěbạ tugasẹ̌ pelayanan ini . . . , i kami tawe měngědo.” (2 Kor. 4:1) Mẹ̌sul᷊ung i Paulus, maning i kitẹ něpakẹ lawọ tempo gunang měhal᷊ẹ̌, hal᷊ẹ̌ Kararatuang harusẹ̌ makoạ hal᷊ẹ̌ paling penting su pěbawiahi kitẹ.

10-11. Kerea i kitẹ botonge měkoạ pakapia pelayanan maning i kitẹ masakị?

¹⁰ Maning tawe makapěnginjilẹ̌ bọu wal᷊e sarang bal᷊e kere ikẹ̌kapulung i kitẹ ual᷊ingu masakị arau seng maghurang, i kitẹ bědang botonge měnginjilẹ̌ měpakẹ cara wal᷊inẹ. Tau Kristen su abad humotong něnginjilẹ̌ su kěbị taumata tawẹ soale su apa i sire. I sire něnginjilẹ̌ su haghing tempo dingangu tampạ, kere bọu wal᷊e sarang bal᷊e dingangu su tampạ piạ lawọ taumata. (Kis. 17:17; 20:20) Mạeng tawe makaral᷊eng marau, i kitẹ botonge kumaiang su tampạ piạ lawọ taumata kụ měnginjilẹ̌ si sire apang sụsahe. Arau i kitẹ botonge měnginjilẹ̌ tawe resmi, měmohẹ suratẹ̌, arau měnginjilẹ̌ bọu telepon. Lawọ penyiar  apang tawe nakapěnginjilẹ̌ bọu wal᷊e sarang bal᷊e ual᷊ingu masakị arau piạ masalah wal᷊inẹ, tatapẹ̌ nakapěndang karal᷊uasẹ̌ ual᷊ingu něnginjilẹ̌ dingangu manga cara ini.

¹¹ Maning tạ sehate, i kau botonge měkoạ pakapia pelayanan kẹ̌koatengu. Kěnang saụ pẹ̌tiněna soal i Rasul Paulus. I sie naul᷊ị, ”Iạ botonge timatěngo kěbị haghi ual᷊ingu katatoghasẹ̌ nikaěbạku bọu Mawu.” (Flp. 4:13) I Paulus membutuhkan katatoghasẹ̌ kerene su tempong i sie masakị su sěmbaụ perjalanan utusan injil. I sie naul᷊ị su tau Galatia, ”Ual᷊ingu sakịku, iạ piạ kesempatan humotong gunang měhabarẹ̌ habarẹ̌ mapia si kamene.” (Gal. 4:13) Kerene lai, sakị aramanung nakakoạ si kau botonge měnginjilẹ̌ su taumata wal᷊inẹ, kere su dokterẹ̌, perawat, dingangu taumata apang nẹ̌tul᷊ung si kau. Kal᷊awọkange bọu i sire ene su tampạ pělahal᷊ẹ̌kang su tempong penyiar wal᷊inẹ něnginjilẹ̌ su wal᷊eng i sire.

12. Apa mangal᷊ene měndiagạ mata tatapẹ̌ ”fokus”?

¹² Yesus naul᷊ị, ”Mata kai sol᷊o gunang wadang. Hakị u ene mạeng matanu fokus [arau ”sederhana”, ctk.], kěbị badangu sarung matualagẹ̌.” (Mat. 6:22) Apa mangal᷊ene hal᷊ẹ̌ ene? I sie mapulu i kitẹ měndiagạ pěbawiahẹ̌ tatapẹ̌ sederhana dingangu kětạeng mẹ̌tiněna sěmbaụ cita-cita, arau timona, kụ tawe masahaghe ual᷊ingu hal᷊ẹ̌ bal᷊inẹ. Yesus nakoạ pẹ̌tatěnong mapaelẹ̌ ual᷊ingu něpakẹ pěbawiahe gunang pelayanan, kụ i sie něněntiro manga murite gunang turusẹ̌ fokus mẹ̌tahamawu si Yehuwa dingangu měkoạ hal᷊ẹ̌ u Kararatuang’E.  I kitẹ nẹ̌těno si Yesus mạeng hal᷊ẹ̌ měnginjilẹ̌ makoạ hal᷊ẹ̌ paling penting su pěbawiahẹ̌. I kitẹ harusẹ̌ ’mědeạ kal᷊imona Kararatuang dingangu manga hal᷊ẹ̌ nihino tumuhụ Mawu’.​—Mat. 6:33.

13. Apa makatul᷊ung si kitẹ fokus su pelayanan?

¹³ Sěmbaụ cara i kitẹ botonge fokus su pelayanan ute měpakẹ mahal᷊i tempo gunang hal᷊ẹ̌ tawe tumanịu penting, tadeạu botonge piạ lawọ tempo gunang mẹ̌tul᷊ung taumata makasingkạ dingangu kuměndagẹ̌ si Yehuwa. * Contone, i kitẹ botonge měngatorẹ̌ jadwalu hal᷊ẹ̌ tadeạu piạ lawọ tempo gunang měnginjilẹ̌ su ral᷊ungu sěngkamisa ene. I kitẹ lai botonge měngurang rekreasi makasue lawọ tempo.

14. Penyesuaian apa nikoạ u sěngkawingang tadeạu botonge piạ lawọ tempo gunang pelayanan?

¹⁴ Ini nikoạ u sěngkatau penatua arenge Elias dingangu kawinge. I sie nẹ̌běke, ”I kami tawe langsung nakoạ perintis, katewe piạ piram baụ hal᷊ẹ̌ botonge koateng i kami tadeạu piạ lawọ tempo gunang pelayanan. I kami někoạ hal᷊ẹ̌ dararodọ tadeạu botonge masau měnginjilẹ̌. Contone, i kami něhematẹ̌, něngurang tempo gunang rekreasi, dingangu nẹ̌dorong su bosẹ̌ gunang měmal᷊ui jadwalu hal᷊ẹ̌ tadeạu botonge měnginjilẹ̌. Hasile, i kami botonge měnginjilẹ̌ hěbi, měněntiro Alkitapẹ̌, dingangu nakapěnginjilẹ̌ duang sul᷊ẹ sěmbul᷊ang su wělạu Mandakẹ̌ dingangu Sambaiang. I kami sěbạe mal᷊uasẹ̌!”

15-16. Tumuhụ 1 Timotius 4:13, 15, kerea tadeạu i kitẹ limembong matahuěna arau mapaelẹ̌ měnginjilẹ̌? (Pěmanda kotak ” Cita-Cita Makatul᷊ung si Siạ Měkoạ Pakapia Pelayananku.”)

¹⁵ Cara wal᷊inẹ měkoạ pakapia pelayanan ene kai měngěndung tadeạu limembong  matahuěna měnginjilẹ̌. Taumata apang mělẹ̌hal᷊ẹ̌ su bidang tertentu harusẹ̌ turusẹ̌ makaěbạ pelatihan. Kerene lai dingangu penyiar Kararatuang. I kitẹ harusẹ̌ turusẹ̌ měngěndung tadeạu limembong matahuěna arau mapaelẹ̌ měnginjilẹ̌.​—Amsal 1:5; basa 1 Timotius 4:13, 15.

¹⁶ Mạeng kerene, kerea tadeạu i kitẹ limembong mapaelẹ̌ su pelayanan? Daringihẹ̌ sasasa su pěngangibadang Pelayanan dingangu Pěbawiahẹ̌ Kristen. Su pěngangibadang ene piạ pelatihan makatul᷊ung si kitẹ limembong mapaelẹ̌ měnginjilẹ̌. Contone, su tempong ketua něgělị sasasa su siswa, i kitẹ botonge měngěndung manga hal᷊ẹ̌ makatul᷊ung si kitẹ makoạ limembong mapaelẹ̌ měnginjilẹ̌. I kitẹ botonge měkoạ manga sasasa ene su tempong měnginjilẹ̌. I kitẹ botonge makitul᷊ung su pengawas dinas lapangan arau měnginjilẹ̌ dingange. I kitẹ lai botonge měnginjilẹ̌ dingangu penyiar seng piạ lawọ pengalaman, perintis, arau pengawas wilayah. Kakạpaele i kitẹ měpakẹ manga alatẹ̌ su bageang Alat Bantu Pengajaran, i kitẹ sarung limembong puluang měnginjilẹ̌ dingangu měněntiro.

17. Apa sarung kapěndangengu mạeng i kau měkoạ pakapia pelayanan?

¹⁷ Sěbạe hak istimewa gěguwạ si kitẹ ual᷊ingu Yehuwa němala i kitẹ makoạ ”hapị sěngkapěhal᷊ẹ̌” dingang’E! (1 Kor. 3:9) Mạeng i kau ’měmarikěsa sude limembong penting’ dingangu fokus su pelayanan, i kau sarung ”mẹ̌tahamawu si Yehuwa dingangu ral᷊uasẹ̌”. (Flp. 1:10; Mz. 100:2) Ual᷊ingu i kau kai ělangu Mawu, i kau botonge mangimang i Sie sarung měgělị katatoghasẹ̌ tadeạu i kau makakoạ mapia pelayanan tawẹ soale apa sasal᷊ukạ arau kasasigěsạ tẹ̌tatěngongu. (2 Kor. 4:1, 7; 6:4) Tawẹ soale situasinu makakoạ si kau měpakẹ lawọ arau mahal᷊i tempo gunang pelayanan, i kau ”sarung mal᷊uasẹ̌” ual᷊ingu seng někoạ pelayanan ene dingangu kaguwạu pěbawiahẹ̌. (Gal. 6:4) Mạeng i kau někoạ pakapia pelayanan, ene něnodẹ i kau makěndagẹ̌ si Yehuwa dingangu su taumata. ”Mạeng měkoạ ene i kau sarung makasal᷊amatẹ̌ watangengu dingangu i sire apang dimaringihẹ̌ si kau.”​—1 Tim. 4:16.