1-2. Kawe nụe i Yesus sěbạe nasigěsạ?

SU PĚNGĚNSUENGU pěbawiahe su dunia, i Yesus sěbạe nasigěsạ. Seng mal᷊ighạ i sie sarung mate su limang taumata dal᷊akị. Katewe bal᷊inẹ kětạeng ene nakaghěnggang si Yesus. I sie sěbạe makěndagẹ̌ dingangu mapulu makal᷊uasẹ̌ naung i Amange. Yesus masingkạ mạeng i sie masatia su sasal᷊ukạ mawěhạ ene, i sie sarung makawurěsi areng i Yehuwa. Yesus lai makěndagẹ̌ su taumata, kụ i sie masingkạ taumata botonge měbiahẹ̌ kěkalẹ̌ mạeng i sie masatia si Yehuwa sarang mate.

² Maning i Yesus sěbạe nasigěsạ, i sie nakapěndang dame su naung. I sie naul᷊ị su manga rasule, ”Iạ měgělị si kamene pẹ̌darameku.” (Yoh. 14:27) Si sie piạ ”pẹ̌darame bọu Mawu”, arau pěndang matěnang ual᷊ingu nědal᷊ahapị mapia dingangi Yehuwa. Kụ pẹ̌darame ene nakakoạ si Yesus tawe giměnggang.​—Flp. 4:6, 7.

3. Apa sarung ěndungang i kitẹ su pěngangěndungang ini?

³ Tawẹ apa bọu i kitẹ nakahombang kasasigěsạ kere i Yesus. Katewe kěbị apang timol᷊e si Yesus sarung makahombang sasal᷊ukạ. (Mat. 16:24, 25; Yoh. 15:20) Kụ kere i Yesus, i kitẹ sarung makapěndang sigěsạ. Apa wotonge koateng i kitẹ tadeạu tawe tumanịu guměnggang dingangu kailangengu pẹ̌darame su naung? Mahịe měngěndung tatělu hal᷊ẹ̌ nikoạ i Yesus su kanandụu pelayanan kẹ̌koatenge su dunia dingangu kerea i kitẹ botonge mẹ̌těno si sie su tempong tumatěngo sasal᷊ukạ.

4. Nẹ̌tatahino dingangu 1 Tesalonika 5:17, contoh apa něnodẹ i Yesus masau mẹ̌doa su kanandụu pěngěnsuengu pěbawiahe su dunia?

⁴ Basa 1 Tesalonika 5:17. Su kanandụu pěngěnsuengu pěbawiahe su dunia, Yesus masau mẹ̌doa. Su tempong někoạ pẹ̌tatahěndungang papatene, i sie nẹ̌doa gunang borotẹ̌ dingangu anggorẹ̌. (1 Kor. 11:23-25) Su tempong seng měněntang tampạ i sire někoạ Paskah, i sie nẹ̌doa dingangu manga murite. (Yoh. 17:1-26) Su tempong i sie dingangu manga murite nahumpạ su Wul᷊udu Zaitun su tempong hěbi, i sie pirang sul᷊ẹ nẹ̌doa. (Mat. 26:36-39, 42, 44) Kụ bawerang i Yesus pěngěnsuenge su tempong seng mate, ene lai daroa. (Luk. 23:46) Su ěllo sěbạe penting su pěbawiahe, Yesus nẹ̌doa si Yehuwa.

5. Kawe nụe manga rasulẹ̌ nikailangengu kawawahani?

⁵ Sěmbaụ alasang i Yesus botonge nẹ̌tatahang su tempong piạ sasal᷊ukạ ute ual᷊ingu i sie mědẹ̌doa si Amange. Katewe manga murite tawe turusẹ̌ nẹ̌doa su hěbị ene. Tětal᷊e, i sire nikailangengu kawawahani su tempong piạ sasal᷊ukạ. (Mat. 26:40, 41, 43, 45, 56) Su tempong tumatěngo sasal᷊ukạ, i kitẹ sarung tatapẹ̌ masatia mạeng i kitẹ mẹ̌těno si Yesus dingangu ’turusẹ̌ mẹ̌doa’. I kitẹ botonge mẹ̌doa soal u apa?

6. Kerea pangangimang makatul᷊ung si kitẹ makapěndang dame su naung?

⁶ I kitẹ botonge mẹ̌doa tadeạu Yehuwa měkoạ ’pangangimang i kitẹ matamba’. (Luk. 17:5; Yoh. 14:1) Si kitẹ harusẹ̌ piạ pangangimang ual᷊ingu Setang sarung měnal᷊ukạ taumata apang tumol᷊e si Yesus. (Luk. 22:31) Kerea pangangimang  makatul᷊ung si kitẹ tatapẹ̌ piạ dame su naung su tempong tụtatěngo sěmbaụ masalah? Su tempong i kitẹ seng nẹ̌tawakal᷊i timatěngo sasal᷊ukạ ene, pangangimang sarung makatul᷊ung si kitẹ měnarakang masalah ene si Yehuwa. Ual᷊ingu mangimang Yehuwa limembong masingkạ apa harusẹ̌ koateng, i kitẹ nakapěndang dame su naung dingangu tiněna.​—1 Ptr. 5:6, 7.

7. Apa kaěndungangu bọu bawerang i Robert?

⁷ Daroa makatul᷊ung si kitẹ tatapẹ̌ piạ dame su naung tawẹ soale sasal᷊ukạ apa tẹ̌tatěngong i kitẹ. Pẹ̌tiněna contoh Robert, sěngkatau penatua kụ orasẹ̌ ini umure nal᷊iu wọu 80 su taunge. I sie naul᷊ị, ”Sasasa su Filipi 4:6, 7 nakatul᷊ung si siạ timatěngo lawọ sasal᷊ukạ su pěbawiahẹ̌ku. Iạ harusẹ̌ tumatěngo masalah roitẹ̌. Kụ su sěngkatempo iạ lai kinailangengu hak istimewa makoạ penatua.” Apa nakatul᷊ung si Robert tatapẹ̌ piạ dame su naung? I sie naul᷊ị, ”Sabang guměnggang, iạ apidu mẹ̌doa. Iạ mangimang kakạsaune iạ mẹ̌doa, iạ limembong makapěndang dame su naung.”

8. Kere niul᷊ị su Yohanes 8:29, apa alasang bal᷊inẹ i Yesus nakapěndang dame su naung?

⁸ Basa Yohanes 8:29. Maning dẹ̌darihang, Yesus tatapẹ̌ nakapěndang dame su naung ual᷊ingu masingkạ i sie nakal᷊uasẹ̌ naung i Amange. I sie tatapẹ̌ matuhụ, maning ene masigěsạ koatenge. I sie makěndagẹ̌ si Amange dingangu něpakẹ kěbị pěbawiahe gunang mẹ̌tahamawu si Yehuwa. Těntal᷊ang bědang tawe diměnta su dunia, i sie kai ”mělahal᷊ẹ̌ matahuěna” nipakẹ u Mawu. (Amsal 8:30)  Kụ su tempong su dunia, i sie masěmangatẹ̌ měněntiro taumata soal i Amange. (Mat. 6:9; Yoh. 5:17) Hal᷊ẹ̌ ene nakakoạ si Yesus sěbạe mal᷊uasẹ̌.​—Yoh. 4:34-36.

9. Kerea masibukẹ̌ su hal᷊ẹ̌ měnginjilẹ̌ makatul᷊ung si kitẹ tatapẹ̌ piạ dame su naung?

⁹ I kitẹ botonge mẹ̌těno si Yesus, carane ute tumuhụ si Yehuwa dingangu ”sěntiniạ masibukẹ̌ měkoạ lawọ hal᷊ẹ̌ gunang Tuang”. (1 Kor. 15:58) Mạeng i kitẹ ”sibukẹ̌” su hal᷊ẹ̌ měnginjilẹ̌, i kitẹ limembong positif měmanda masalang i kitẹ. (Kis. 18:5) Contone, taumata nipẹ̌sombangeng su tempong něnginjilẹ̌ biasane nakahombang masalah limembong mawěhạ bọu masalang i kitẹ. Katewe, su tempong i sire něngěndung kiměndagẹ̌ si Yehuwa dingangu někoạ sasasa-Ne, pěbawiahi sire nakoạ limembong mapaelẹ̌ kụ i sire limembong mal᷊uasẹ̌. Su tempong nakasilo ene, i kitẹ limembong mangimang Yehuwa sarung mẹ̌padul᷊i si kitẹ. Kụ pangangimang ene makatul᷊ung si kitẹ tatapẹ̌ piạ dame su naung. Sěngkatau saudari lụlawang pěndang tawe maarěga dingangu depresi su kanandụu wiahe, něngakui hal᷊ẹ̌ ene. I sie naul᷊ị, ”Mạeng iạ masibukẹ̌ su pelayanan, iạ limembong makaatorẹ̌ pěndangku dingangu limembong mal᷊uasẹ̌. Su pěndangku ini ual᷊ingu hal᷊ẹ̌ měnginjilẹ̌ nakakoạ si siạ limembong marani dingangi Yehuwa.”

10. Apa kaěndungangu bọu bawerang i Brenda?

¹⁰ Pẹ̌tiněna lai soal i saudari Brenda. I sie dingangu tuarine nasigěsạ ual᷊ingu sakị sěbạe mawěhạ. I Brenda harusẹ̌ měpakẹ kursi roda kụ mal᷊ighạ mal᷊owe. Mạeng botonge, i sie měnginjilẹ̌ bọu wal᷊e sarang bal᷊e. Katewe kasauange i sie měnginjilẹ̌ měpakẹ suratẹ̌. I sie naul᷊ị, ”Su tempong iạ nakaěna dingangu něnarimạ sakịku tawe mapia orasẹ̌ ini, iạ limembong fokus su pelayanan. Sěběnarẹ̌e, hal᷊ẹ̌ měnginjilẹ̌ nakakoạ si siạ tawe nẹ̌tiněna kaghaghěnggangku. Ene nakakoạ si siạ fokus mẹ̌tul᷊ung taumata su daerah dinasku. Kụ ene lai nakakoa si siạ turusẹ̌ mẹ̌tiněna soal u pělaharapẹ̌ kaěbạkengku su tempo mahi.”

11-13. (a) Kerea manga rasulẹ̌ dingangu taumata wal᷊inẹ nakoạ hapị tutune gunang i Yesus? (b) Apa pengaruh pẹ̌dal᷊ahapị ene si Yesus?

¹¹ Su kanandụu pelayanan kẹ̌koateng i Yesus, manga rasulẹ̌ masatia něnodẹ i sire kai hapị tutune gunang i Yesus. I sire kai hapị kere niwohẹ su Amsal: ”Piạ hapị limembong marěduhẹ̌ sul᷊ungu anạu sěngkatau.” (Amsal 18:24) Yesus měngẹ̌ngarěga hapị kerene. Su kanandụu pelayanan kẹ̌koatenge, tawẹ apa anạu sěngkataune mangimang si sie. (Yoh. 7:3-5) Su sěngkatempo, anạu sěngkataune nẹ̌tiněna i sie seng nẹ̌pulu. (Mrk. 3:21) Katewe nẹ̌tatěntang bọu anạu sěngkataune, Yesus nẹ̌bera su manga rasule masatia su hěbi maraning papatene: ”I kamene kai taumata dụděndingang si siạ su tempong iạ nakahombang sasal᷊ukạ.”​—Luk. 22:28.

¹² Manga rasulẹ̌ pẹ̌sěnsulẹ nakasusah naung i Yesus, katewe i sie tawe kětạeng němanda pẹ̌sasal᷊ang i sire, i sie měmẹ̌manda i sire mangimang si sie. (Mat. 26:40; Mrk. 10:13, 14; Yoh. 6:66-69) Su hěbi maraning papatene, Yesus nẹ̌bera su manga esẹ masatia ene, ”Iạ mẹ̌sěbạ i kamene hapị, ual᷊ingu iạ seng naul᷊ị si kamene kěbị hal᷊ẹ̌ takụ nikaringihang bọu i Amangku.” (Yoh. 15:15) Manga hapị i Yesus tantu sěbạe nakatoghasẹ̌ si sie. Tul᷊umang i sire su pelayanan i Yesus, nakakoạ si sie sěbạe mal᷊uasẹ̌.​—Luk. 10:17, 21.

¹³ Hapị i Yesus bal᷊inẹ kětạeng manga rasulẹ̌. I sie lai piạ hapị bal᷊inẹ, esẹ dingangu  wawine, kụ mětẹ̌tul᷊ung si sie su hal᷊ẹ̌ měnginjilẹ̌. Sěnggạ něnadia wal᷊eng i sire gunang i Yesus tadeạu i sie botonge kumaěng sene. (Luk. 10:38-42; Yoh. 12:1, 2) Sěnggạ lai timol᷊e si Yesus kụ něpakẹ arětạ i sire gunang mẹ̌tul᷊ung si sie. (Luk. 8:3) Yesus nakaěbạ hapị mapia ual᷊ingu i sie nakoạ hapị mapia gunang i sire. I sie měkẹ̌koạ barang mapia gunang i sire dingangu tawe nẹ̌dorong si sire měkoạ barang tawe ikakoạ i sire. Yesus nasukụ, katewe i sie měngẹ̌garěga tul᷊umang bọu hapịe tawe nasukụ. Kụ i sire tantu nakatul᷊ung si sie tatapẹ̌ piạ dame su naung.

14-15. Kerea tadeạu makaěbạ hapị mapia, kụ kerea i sire sarung mẹ̌tul᷊ung si kitẹ?

¹⁴ Hapị mapia makatul᷊ung si kitẹ tatapẹ̌ masatia si Yehuwa. Kụ cara kapaelange makaěbạ hapị mapia ute makoạ hapị mapia gunang i sire. (Mat. 7:12) Contone, Alkitapẹ̌ němahansang si kitẹ měpakẹ tempo lai katatoghasẹ̌ gunang mẹ̌tul᷊ung taumata wal᷊inẹ, kahumotongange si sire apang masusah. (Ef. 4:28) Apa i kau botonge mẹ̌tiněna i sai su sidangu botonge itul᷊ung? Apa i kau botonge mẹ̌tul᷊ung mẹ̌bělanja gunang anạu sěmbaụ apang tawe makasěbang bọu wal᷊e? Apa i kau botonge měgělị kaěng su keluarga masusah? Mạeng i kau masingkạ měpakẹ situs jw.org^® dingangu aplikasi JW Library^®, apa i kau botonge mẹ̌tul᷊ung anạu sěmbaụ měpakẹ ene? Mạeng i kitẹ sibukẹ̌ mẹ̌tul᷊ung taumata wal᷊inẹ, i kitẹ sarung limembong mal᷊uasẹ̌.​—Kis. 20:35.

¹⁵ Hapị i kitẹ sarung mẹ̌tul᷊ung su tempong i kitẹ makahombang kasasigěsạ dingangu mẹ̌tul᷊ung si kitẹ tatapẹ̌ piạ dame  su naung. Kere i Elihu dụdaringihẹ̌ su tempong i Ayub nẹ̌bisara, hapị i kitẹ lai sarung masabarẹ̌ dumaringihẹ̌ su tempong i kitẹ mẹ̌běke pěndang i kitẹ. (Ayb. 32:4) I kitẹ tawe wotonge měharapẹ̌ hapị i kitẹ měkoạ putusang gunang i kitẹ. Katewe i kitẹ matahuěna mạeng dumaringihẹ̌ sasasa dasare bọu Alkitapẹ̌. (Amsal 15:22) Kụ kere i Datu Daud masanạ naung něnarimạ tul᷊umang bọu manga hapịe, i kitẹ lai tawe mẹ̌těngkaobotẹ̌. Katewe i kitẹ měnarimạ tul᷊umang bọu hapị i kitẹ. (2 Sam. 17:27-29) Nal᷊ahẹ, manga hapị mapia ene kai hadiah bọu Yehuwa.​—Yak. 1:17.

16. Tumuhụ Filipi 4:6, 7, kětạeng dingangu cara apa i kitẹ botonge makatarimạ pẹ̌darame? Lahẹko.

¹⁶ Basa Filipi 4:6, 7. Kawe nụe Yehuwa naul᷊ị i kitẹ sarung makatarimạ pẹ̌darame bọu i Sie ”lumiung Kristus Yesus”? Ual᷊ingu i kitẹ kětạeng botonge makapěndang pẹ̌darame su naung dingangu tiněna mạeng i kitẹ makaěna dingangu mangimang su tugasẹ̌ i Yesus. Contone, ual᷊ingu tatěbusẹ̌ i Yesus, kěbị dosang i kitẹ botonge ampungang. (1 Yoh. 2:12) Ene sěbạe nakahiborẹ̌ si kitẹ! Ual᷊ingu Yesus kai Datung Kararatuangu Mawu, i sie sarung mapakailang kasasigěsạ nikahombangeng i kitẹ ual᷊ingu kakakoạ u Setang dingangu duniane. (Yes. 65:17; 1 Yoh. 3:8; Why. 21:3, 4) Ene kai pělaharapẹ̌ sěbạe mapaelẹ̌! Kụ maning i Yesus něgělị tugasẹ̌ masigěsạ si kitẹ, i sie duměndingang dingangu mẹ̌tul᷊ung si kitẹ lumiu pěngěnsuengu sistem ini. (Mat. 28:19, 20) Ini sěbạe nakatoghasẹ̌ si kitẹ! Pělahiborẹ̌, pělaharapẹ̌, dingangu katatoghasẹ̌, ene kai hal᷊ẹ̌ sěbạe pěnting tadeạu i kitẹ piạ dame su naung.

17. (a) Kerea tau Kristen botonge tatapẹ̌ piạ dame su naung? (b) Kere diandi su Yohanes 16:33, apa wotonge koateng i kitẹ?

¹⁷ Mạeng kerene, kerea tadeạu i kau tatapẹ̌ piạ dame su naung maning nasigěsạ ual᷊ingu tụtatěngo sasal᷊ukạ? Carane ute mẹ̌těno si Yesus. Humotong, pẹ̌doa, dingangu turusẹ̌ pẹ̌doa tawẹ soale apa mariadi. Karuane, pakatuhụ si Yehuwa dingangu pakasěmangatẹ̌ měnginjilẹ̌ maning ene masigěsạ koateng. Kụ katělune, pẹ̌dorong tul᷊ung su hapịu gunang tumatěngo sasal᷊ukạ. Hasile, pẹ̌darame bọu Mawu sarung měndiagạ naung dingangu tiněnanu. Kụ kere i Yesus, i kau sarung makawatạ haghing sasal᷊ukạ.​—Basa Yohanes 16:33.