Maraning papatene, kawe nụe i Yesus něngutip bawerang i Daud su Mazmur 22:1?

Maraning papatene, i Yesus nẹ̌bera bawera su Matius 27:46: ”Mawuku, Mawuku, kawe nụe i Kau něněntang si siạ?” Su tempong i Yesus nẹ̌bera ene, i sie něngganapẹ̌ bawera pemazmur Daud su Mazmur 22:1. (Mrk. 15:34) Sěbạe nẹ̌sal᷊a mạeng mẹ̌pikirẹ̌ i Yesus něngutip bawera ene ual᷊ingu i sie nẹ̌sasěsilẹ̌ arau ual᷊ingu kadodọ tempo nikailangengu pangangimang. Yesus masingkạ kawe nụe i sie harusẹ̌ mate, kụ i sie sadia tumatěngo ene. (Mat. 16:21; 20:28) Yesus lai masingkạ su tempong i sie mate, Yehuwa seng tawe ’měndiagạ’ si sie. (Ayb. 1:10) Yehuwa tawe něndiagạ si Yesus, tadeạu i sie botonge měnodẹ i sie tatapẹ̌ satia tawẹ soale kerea katědụe papatene.​—Mrk. 14:35, 36.

Hakị u ene, kawe nụe i Yesus něpakẹ bawera su Mazmur? Maning i kitẹ běga, mahịe i kitẹ měngěndung ěndịu piram baụ alasange. *

Su tempong nẹ̌bera ene, i Yesus ěndịu měnodẹ Yehuwa tawe lumaụ urusangu papatene. Yesus harusẹ̌ měmaehẹ̌ tatěbusẹ̌ kụ tawe makaěbạ tul᷊umang bọu i Yehuwa. I sie harusẹ̌ mate tadeạu ’makapěndang papate gunang kěbị taumata’.​—Ibr. 2:9.

Su tempong něngutip piram baụ bawera su Mazmur 22, Yesus ěndịu mapulu taumata mẹ̌pikirẹ̌ kěbị lohong Mazmur ene. Su  tempo ene, tau Yahudi wiasa měhapalẹ̌ lawọ lohong Mazmur. Su tempong i sire makaringihẹ̌ sěmbaụ ayatẹ̌ bọu sěmbaụ Mazmur, i sire biasane sarung mẹ̌pikirẹ̌ kěbị ayatẹ̌ su Mazmur ene. Mạeng ene tẹ̌tiněnang i Yesus, sěběnarẹ̌e i sie mapulu mẹ̌tul᷊ung tau Yahudi apang dimaringihẹ̌ gunang mẹ̌tahěndung lawọ těbal᷊ẹ̌ soal u manga peristiwa mariadi maraning papatene su Mazmur ene. (Mz. 22:7, 8, 15, 16, 18, 24) Bọu ene lai, ayatẹ̌ pěngěngsuenge su Mazmur ene nẹ̌dalo Yehuwa dingangu nělahẹ i Sie kai Datung patikụ dunia.​—Mz. 22:27-31.

Su tempong něngutip bawerang i Daud ene, i Yesus ěndịu měnodẹ i sie tawe nẹ̌sal᷊a. Maraning papatene, i Yesus timatěngo pengadilan tawe sah, kụ i sie nitoke tahapěhinakang. (Mat. 26:65, 66) Pengadilan ene nikoạ pakasahawụ su tempong hěbi, kụ hal᷊ẹ̌ ene limawang hukung. (Mat. 26:59; Mrk. 14:56-59) Su tempong Yesus nẹ̌bera ”Mawuku, Mawuku, kawe nụe i Kau něněntang si siạ?” Yesus ěndịu mapulu mẹ̌bera i sie tawe někoạ pẹ̌sasal᷊a, kụ tawẹ apa alasang gunang měmate si sie.

Yesus lai ěndịu něgělị laingatẹ̌ su taumata maning i Daud, měmamohẹ Mazmur ini niwala nasigěsạ, ene bal᷊inẹ mangal᷊ene i Yehuwa seng tawe mal᷊uasẹ̌ si Daud. Kakiwal᷊ong i Daud bal᷊inẹ mangal᷊ene i sie kinailangengu pangangimang su Mawu. Su apang bọu nẹ̌kiwal᷊o, i sie něnodẹ i sie mangimang Yehuwa sarung měndiagạ manga ělang’E kụ i Yehuwa turusẹ̌ měngal᷊amatẹ̌ si sie. (Mz. 22:23, 24, 27) Kerene lai, maning i Yesus ”Ahusi Daud” nasigěsạ kạgaghantong su rihi, ene bal᷊inẹ mangal᷊ene Yehuwa seng tawe mal᷊uasẹ̌ si sie.​—Mat. 21:9.

Yesus ěndịu měnodẹ i sie sěbạe nasusah naung ual᷊ingu Yehuwa seng tawe něndiagạ si sie tadeạu i sie botonge měnodẹ kasasatiane. Sěběnarẹ̌e bal᷊inẹ kapulung i Yehuwa Ahus’E masigěsạ dingangu mate. Katewe ene nakoạ perlu su apang i Adam dingangi Hawa limawang si Yehuwa. Yesus tawe někoạ pẹ̌sasal᷊a, katewe i sie harusẹ̌ masigěsạ dingangu mate tadeạu makasimbahẹ̌ kakiwal᷊ong i Setang kụ měnadia nilai tatěbusẹ̌ gunang saụ měměli apa seng nipakailangu taumata. (Mrk. 8:31; 1 Ptr. 2:21-24) Yesus botonge makakoạ ene kětạeng mạeng Yehuwa tawe měndiagạ si sie, kụ ene kahumotongange su pěbawiahe.

Yesus ěndịu mapulu mẹ̌tul᷊ung manga tumatol᷊ene mẹ̌tiněna soal u kawe nụe Yehuwa němala i sie mate kạgaghantong su rihi. * Yesus masingkạ mate kạgaghantong su rihi makoạ taumata dal᷊akị ene makoạ kasasangkonang su lawọ taumata. (1 Kor. 1:23) Mạeng manga tumatol᷊ene fokus su alasang sěběnarẹ̌e kawe nụe i sie nate, i sire sarung makaěna timona sěběnarẹ̌e. (Gal. 3:13, 14) Bọu ene, i sire makasingkạ i Yesus kai Měnanal᷊amati sire, bal᷊inẹ sěngkatau taumata dal᷊akị.

Tawẹ soale apa alasang i Yesus něngutip bawera ene, i sie masingkạ apa nikahombangenge ene kai bageang bọu apa ikẹ̌kapulung i Yehuwa gunang i sie. Su apang bọu něngutip bawera Mazmur ini, i Yesus nẹ̌bera, ”Seng naghanapẹ̌!” (Yoh. 19:30; Luk. 22:37) Ual᷊ingu Yehuwa něngědo nẹ̌tul᷊ung si Yesus kadodọ tempo, ene nakakoạ i sie botonge mapakasue kěbị tugase su dunia. Ene lai nakakoạ kěbị těbal᷊ẹ̌ soal i sie ”su ral᷊ungu Hukung Musa, Bohẹu Manga Nabi, dingangu Mazmur” naghanapẹ̌.​—Luk. 24:44.