1-2. Apa tatěbusẹ̌ ene, kụ kawe nụe i kitẹ perlu tatěbusẹ̌?

SU TEMPONG i Adam někoạ dosa, i sie kinailangengu pěbawiahẹ̌ kěkalẹ̌. Kụ bal᷊inẹ kětạeng i sie, katewe lai manga hitene. Apa nikoạ i Adam ene tawe kaampungang. I sie němile někoạ dosa. Katewe, kerea dingangu manga hitene? I sire tawe něngal᷊ạ bageang su dosang i Adam. (Rm. 5:12, 14) I Adam pantasẹ̌ mate. Katewe, apa piạ hal᷊ẹ̌ nikoạ i Yehuwa gunang manga hiteng i Adam tadeạu botonge měbiahẹ̌ kěkalẹ̌? Piạ. Tawe nararěna bọu i Adam někoạ dosa, Yehuwa něnětạ něnodẹ kerea i Sie měnal᷊amatẹ̌ jutane hiteng i Adam bọu rosa dingangu papate. (Kej. 3:15) Su tempone, Yehuwa sarung měndolohẹ̌ Ahus’E bọu sorga gunang ”měgělị pěbawiahe makoạ tatěbusẹ̌ gunang lawọ taumata”.​—Mrk. 10:45; Yoh. 6:51.

² Apa tatěbusẹ̌ ene? Su Manga Bukẹ̌ Yunani Kristen, tatěbusẹ̌ mangal᷊ene nilai seng niwaehi Yesus gunang saụ měměli apa seng nipakailang i Adam. (1 Kor. 15:22) Kawe nụe i kitẹ perlu tatěbusẹ̌? Ual᷊ingu i Yehuwa piạ atorang maadilẹ̌ su Hukung nělahẹ pěbawiahẹ̌ gantiěngu pěbawiahẹ̌. (Kel. 21:23, 24) I Adam nikailangengu pěbawiahe nasukụ. Gunang měnodẹ kal᷊aadilu Mawu, Yesus něgělị pěbawiahe nasukụ. (Rm. 5:17) I sie makoạ ”Amang Kěkalẹ̌” si sire apang mangimang su tatěbuse.​—Yes. 9:6; Rm. 3:23, 24.

3. Tumuhụ Yohanes 14:31 dingangu 15:13, kawe nụe i Yesus mapulu měgělị pěbawiahe nasukụ?

³ Yesus mapulu měgělị pěbawiahe makoạ tatěbusẹ̌ ual᷊ingu i sie sěbạe makěndagẹ̌ si Amange su sorga dingangu su taumata. (Basa Yohanes 14:31; 15:13.) Ual᷊ingu i Yesus sěbạe makěndagẹ̌ si Yehuwa dingangu su taumata, i sie nẹ̌tawakal᷊i gunang tatapẹ̌ satia su kanandụu pěbawiahe dingangu někoạ kapulung i Amange. Ual᷊ingu apa nikoạe kapulung i Yehuwa gunang taumata dingangu dunia ini sarung mariadi. Su pěngangěndungang  ini, i kitẹ sarung měngěndung kawe nụe Mawu němala si Yesus sěbạe nasigěsạ maraning papatene. I kitẹ lai měngěndung contoh bọu sěngkatau měmamohẹ Alkitapẹ̌ kụ sěbạe měngẹ̌ngarěga tatěbusẹ̌. Kụ i kitẹ sarung měngěndung kerea i kitẹ měnodẹ tatarimakasẹ ual᷊ingu tatěbusẹ̌ dingangu kerea i kitẹ měnoghasẹ̌ pěngangarěga su pengorbanan seng nikoạ i Yehuwa dingangi Yesus gunang i kitẹ.

4. Lahẹko kerea i Yesus nate.

⁴ Pẹ̌tiněna kerea i Yesus su ěllo pěngěngsuenge i sie su dunia. I sie sěběnarẹ̌e botonge makitul᷊ung su lawọ malaekatẹ̌ gunang měndiagạ si sie. Katewe, i sie tawe někoạ ene. I sie němala prajurit Roma měnamẹ dingangu měndariha si sie. (Mat. 26:52-54; Yoh. 18:3; 19:1) I sire něměbahu cambokẹ̌ kụ nakakoạ badange naral᷊esẹ. Bọu ene, i sire něngoro i sie pěmikul᷊ẹ̌ kalu, maning běmbange naral᷊esẹ. Yesus něnětạ nẹ̌bawa kalu ene makoạ sarang tampạ i sie sarung pateng. Katewe, tawe nararěna bọu ene prajurit Roma něngoro taumata wal᷊inẹ gunang měmikul᷊ẹ̌ ene. (Mat. 27:32) Su tempong i Yesus nahumpạ su tampạ i sie sarung pateng, manga prajurit němaku lima dingangu laede su rihi. Ual᷊ingu běhạu wadang i Yesus, lesẹu pakụ kanini sauneng naguwạ. Manga hapịe nasusah naung ku imamạe sụsangị. Katewe, manga těmbonangu tau Yahudi mělẹ̌heghesẹ̌ si Yesus. (Luk. 23:32-38; Yoh. 19:25) Diọ pirang kaorasẹ̌ i Yesus sěbạe natědụ-tědụ. Ene nakakoạ jantung dingangu paru-parune masulitẹ̌, kụ i sie masigěsạ sumindạ. Yesus masingkạ i sie seng masatia kụ maraning papatene i sie nẹ̌doa pěngěngsuenge si Yehuwa. Bọu ene i sie kimakurung kụ něnarakang pěbawiahe. (Mrk. 15:37; Luk. 23:46; Yoh. 10:17, 18; 19:30) Cara i Yesus nate tawe masahawụ, kụ sěbạe natědụ-tědụ dingangu nakamea.

5. Apa limembong mawěhạ si Yesus sul᷊ungu i sie nipate?

⁵ Si Yesus, carane i sie nipate ene bal᷊inẹ sasal᷊ukạ kawěhạkenge. Kawěhạkenge ene kai alasang i sire němate si sie. I sie nitoke mělẹ̌hinakang Mawu arau areng’E. (Mat. 26:64-66) Alasang i sire něnoke si Yesus nakakoạ i sie sěbạe nasusah naung kụ i sie mělẹ̌harapẹ̌ i Amange tawe měmala i sie nipakamea dingangu cara kerene. (Mat. 26:38, 39, 42) Kawe nụe Yehuwa němala Ahus’E ikẹ̌kěndagẹ̌ nasigěsạ dingangu nate? Mahịe měmanda tatělu alasange.

6. Kawe nụe i Yesus harusẹ̌ gantongang su rihi?

⁶ Humotong, i Yesus harusẹ̌ nighantong su rihi gunang mapakawebasẹ̌ tau Yahudi bọu kakutukẹ̌. (Gal. 3:10, 13) I sire su al᷊ungu kakutukẹ̌ ual᷊ingu i sire seng nẹ̌diandi tumuhụ Hukungu Mawu, katewe i sire tawe timuhụ. Hasile, i sire harusẹ̌ mate ual᷊ingu i sire hiteng i Adam, kụ i sire lai nakaěbạ kakutukẹ̌. (Rm. 5:12) Hukungu Mawu su tau Israel naul᷊ị mạeng sěngkatau někoạ dosa kụ hukumange papate, i sie harusẹ̌ pateng. Bọu ene mayate harusẹ̌ gantongang su sěmbaụ dihi. * (Ul. 21:22, 23; 27:26) Ual᷊ingu i Yesus nighantong su rihi, i sie nakakoạ tau Yahudi madiri si sie botonge makaěbạ gunane bọu tatěbuse.

7. Apa alasang karuane Mawu němala Ahus’E nasigěsạ?

⁷ Pẹ̌tiněna alasang karuane kawe nụe Mawu němala Ahus’E nasigěsạ. I Sie nělatih si Yesus gunang makoạ Imang Mawantugi kitẹ. Su tempong nakahombang sasal᷊ukạ mawěhạ tawe gampang si Yesus gunang matuhụ su Mawu. I sie nẹ̌pěndang  sěbạe nasusah kụ i sie nẹ̌doa nẹ̌dorong tul᷊ung ”dingangu tingihẹ̌ maihạ lai sasangị”. Ual᷊ingu i Yesus seng nakapěndang kerea sěbạe stres, i sie nakaěna kebutuhan i kitẹ kụ ”botonge mẹ̌tul᷊ung [si kitẹ]” su tempong i kite ”sẹ̌sal᷊ukateng”. I kitẹ sěbạe makitarimakasẹ si Yehuwa ual᷊ingu seng němile Imang Mawantugẹ̌ matal᷊ěntụ kụ botonge ”makaěna kurang i kitẹ”.​—Ibr. 2:17, 18; 4:14-16; 5:7-10.

8. Apa alasang katělune Mawu němala i Yesus nakahombang sasal᷊ukạ sěbạe mawěhạ?

⁸ Katělune, Yehuwa němala si Yesus nasigěsạ gunang sumimbahẹ̌ sěmbaụ kakiwal᷊o penting ini: Apa taumata botonge tatapẹ̌ satia si Yehuwa maning nakahombang sasal᷊ukạ mawěhạ? Setang simimbahẹ̌ tala! I sie nẹ̌bera taumata mẹ̌tahamawu si Yehuwa kětạeng tadeạu makaěbạ al᷊amatẹ̌. Kụ i sie mangimang i sire tawe makěndagẹ̌ si Yehuwa, kere i Adam. (Ayb. 1:9-11; 2:4, 5) Ual᷊ingu i Yehuwa mangimang i Yesus sarung tatapẹ̌ satia, i Sie němala Ahus’E nakahombang sasal᷊ukạ sěbạe mawěhạ. Yesus tatapẹ̌ satia kụ něgělị bukti i Setang kai tahakontiang.

9. Rasul Yohanes nakoạ pẹ̌tatěnoěng apa si kitẹ?

⁹ Tatěntiro soal u tatěbusẹ̌ nakatoghasẹ̌ pangangimangu lawọ tau Kristen. I sire turusẹ̌ něnginjilẹ̌ maning piạ sasal᷊ukạ dingangu kasasigěsạ su kanandụu pěbawiahi sire. Pẹ̌tiněna contoh Rasul Yohanes. Ěndịu nal᷊iu bọu 60 su taunge, i sie tatapẹ̌ satia něhabarẹ̌ katěngadẹ̌ soal i Kristus dingangu tatěbusẹ̌. Su tempong umure maraning 100 su taunge, pěměrentang Roma nẹ̌pikirẹ̌ i sie taumata makawahaya, hakị u ene i sie niwembang sarang pulo Patmos. Apa pẹ̌sasal᷊ane? ”Nẹ̌bisara soal u Mawu dingangu něhabarẹ̌ soal i Yesus”. (Why. 1:9) Yohanes nakoạ tatěnoěng sěbạe mapaelẹ̌ soal u pangangimang dingangu mẹ̌tatahang.

10. Apa buktine i Yohanes sěbạe měngẹ̌ngarěga tatěbusẹ̌?

¹⁰ Bọu apa niwohẹ i Yohanes, i sie něnodẹ i sie sěbạe makěndagẹ̌ si Yesus dingangu měngẹ̌ngarěga tatěbusẹ̌. I sie nẹ̌bisara nal᷊iu bọu 100 su sul᷊ẹe soal u tatěbusẹ̌ arau apa gunane tatěbusẹ̌. Contone, Yohanes němohẹ, ”Mạeng piạ u někoạ dosa, i kitẹ piạ mẹ̌tatul᷊ung ene su rěduhi Amang, i sie kai Yesus Kristus, kụ kakanoạe nihino.” (1 Yoh. 2:1, 2) Apa niwohẹ i Yohanes lai něnodẹ sěbạe penting ”měhabarẹ̌ soal i Yesus”. (Why. 19:10) Nal᷊ahẹ, i Yohanes sěbạe měngẹ̌ngarěga tatěbusẹ̌. Kerea i kitẹ měnodẹ i kitẹ lai měngẹ̌ngarěga tatěbusẹ̌?

11. Apa makatul᷊ung si kitẹ lumawang kapulu měkoạ dosa?

¹¹ Lumawang kapulu měkoạ dosa. Mạeng i kitẹ kahěngang-hěngang měngarěga tatěbusẹ̌, i kitẹ tawe mẹ̌tiněna, ’Su tempong nisal᷊ukateng, iạ tawe harusẹ̌ mẹ̌tawakal᷊i lumawang kapulu měkoạ dosa. Iạ botonge měkoạ dosa, bọu ene iạ hědo mẹ̌dorong ampung.’ Katewe, su tempong piạ kapulu gunang měkoạ pẹ̌sasal᷊a, i kitẹ sarung mẹ̌bera, ’Tala! Lawọ seng nikoạ i Yehuwa dingangi Yesus gunang iạ, kụ iạ tawe wotonge měkoạ hal᷊ẹ̌ kere ini.’ I kitẹ lai botonge mẹ̌dorong katatoghasẹ̌ si Yehuwa kụ mẹ̌bera, ’Abe wala iạ měngědo su sasal᷊ukạ.’​—Mat. 6:13.

12. Kerea i kitẹ botonge měkoạ sasasa su 1 Yohanes 3:16-18?

¹² Kěndageko anạu sěmbaụ i kitẹ. Su tempong i kitẹ měnodẹ kakěndagẹ̌ kerene, i kitẹ lai něnodẹ pěngangarěga su tatěbusẹ̌. Kawe nụe? Ual᷊ingu Yesus něgělị  pěbawiahe bal᷊inẹ kětạeng gunang i kitẹ, katewe lai gunang anạu sěmbaụ. Yesus sadia mate gunang i sire. Hakị u ene nal᷊ahẹ, i sie sěbạe makěndagẹ̌ si sire. (Basa 1 Yohanes 3:16-18.) I kitẹ měnodẹ kakěndagẹ̌ su anạu sěmbaụ bọu cara i kitẹ měkoạ si sire. (Ef. 4:29, 31–5:2) Contone, i kitẹ mẹ̌tul᷊ung si sire su tempong i sire masakị arau su tempong i sire nakahombang sasal᷊ukạ mawěhạ kere bencana alam. Katewe, apa harusẹ̌ koateng i kitẹ su tempong piạ anạu sěmbaụ su sidang nẹ̌bera arau někoạ sěmbaụ hal᷊ẹ̌ makakoạ i kitẹ mẹ̌pědu?

13. Kawe nụe i kitẹ harusẹ̌ měgělị ampung?

¹³ Apa i kau pẹ̌sěngsul᷊ẹ masulitẹ̌ měgělị ampung su anạu sěmbaụ? (Im. 19:18) Mạeng iya, tol᷊e sasasa ini: ”Maning piạ alasang gunang mẹ̌pědu, i kamene harusẹ̌ tatapẹ̌ masabarẹ̌ sěmbaụ su wal᷊inẹ lai mẹ̌papangampung dingangu kaguwạu naung. Kere i Yehuwa dingangu kaguwạu naung měngampung si kamene, pěkoạ ene lai.” (Kol. 3:13) Sabang i kitẹ měgělị ampung su anạu sěmbaụ, i kitẹ měnodẹ si Amang su sorga i kitẹ kahěngang-hěngang měngẹ̌ngarěga tatěbusẹ̌. Kerea tadeạu i kitẹ limembong měngarěga gaghělị bọu Mawu?

14. Kerea carane i kitẹ limembong měngarěga tatěbusẹ̌?

¹⁴ Pẹ̌tarimakasẹ si Yehuwa ual᷊ingu tatěbusẹ̌. Sěngkatau saudari arenge Joanna, umure 83 su taunge kụ mětẹ̌tanạ su India, nẹ̌bera, ”Su pěndangku penting mẹ̌doa sabang ěllo soal u tatěbusẹ̌ dingangu mẹ̌tarimakasẹ si Yehuwa.” Sabang ěllo, su tempong i kitẹ mẹ̌doa hala, paul᷊ị si Yehuwa apa pẹ̌sasal᷊a nikoạ i kitẹ kụ pẹ̌dorong ampung si Sie. Tantu mạeng i kau někoạ dosa gěguwạ, i kau harusẹ̌ mẹ̌dorong tul᷊ung su manga penatua. I sire sarung dumaringihẹ̌ dingangu měgělị sasasa makěndagẹ̌ bọu Hengetangu Mawu. I sire sarung mẹ̌doa dingangu kụ mẹ̌dorong si Yehuwa měgělị ampung tadeạu i kau saụ mědal᷊ahapị mapia dingang’E.​—Yak. 5:14-16.

15. Kawe nụe i kitẹ harusẹ̌ měnadia tempo gunang mẹ̌basa dingangu mẹ̌tiněna soal u tatěbusẹ̌?

¹⁵ Pẹ̌tiněna soal u tatěbusẹ̌. Sěngkatau saudari arenge Rajamani, umure 73 su taunge nẹ̌bera, ”Sabang iạ mẹ̌basa soal u kasasigěsạ nikahombangeng i Yesus, iạ sụsangị.” I kau aramanung nasusah naung su tempong nẹ̌tiněna soal u kerea Ahusu Mawu sěbạe nasigěsạ. Katewe, su tempong  i kau mẹ̌tiněna soal u tatěbusi Yesus, kakěndagu si sie dingangu si Amange sarung limembong matoghasẹ̌. Gunang mẹ̌tul᷊ung si kau mẹ̌tiněna soal u tatěbusẹ̌, pakẹ topik ini gunang pěngangěndungang hala.

16. Kerea měněntiro taumata wal᷊inẹ soal u tatěbusẹ̌ piạ gunane si kitẹ? (Pěmanda gambarẹ̌ sampul.)

¹⁶ Těntiroi taumata wal᷊inẹ soal u tatěbusẹ̌. Sabang i kitẹ mẹ̌běke su taumata wal᷊inẹ soal u tatěbusẹ̌, pěngangarěgang i kitẹ sauneng kakạguwạe. Si kitẹ piạ piram baụ publikasi dingangu video gunang měněntiro taumata wal᷊inẹ soal u kawe nụe i Yesus harusẹ̌ mate. Contone, i kitẹ botonge měpakẹ pěngangěndungang 4 bọu brosur Habarẹ̌ Mapia bọu Mawu! Tatěmbọu pěngangěndungang ene ”I Sai Yesus Kristus?” Arau i kitẹ botonge měpakẹ pasalẹ̌ 5 bọu bukẹ̌ Alkitapẹ̌ Něněntiro Apa si Kitẹ? Tatěmbọu pasalẹ̌ ene ”Tatěbusẹ̌—Gaghělị Kapaelange bọu Mawu”. Kụ sabang taung i kitẹ měnodẹ pěngangarěga su tatěbusẹ̌ dingangu duměnta su Pẹ̌tatahěndungang Papateng Yesus lai masěmangatẹ̌ měgausẹ̌ taumata wal᷊inẹ gunang duměnta. Yehuwa seng něgělị kesempatan maarěga si kitẹ gunang měněntiro taumata wal᷊inẹ soal u Ahus’E.

17. Kawe nụe tatěbusẹ̌ ene gaghělị kapaelange bọu Mawu gunang taumata?

¹⁷ I kitẹ piạ alasang nihino gunang měnoghasẹ̌ pěngangarěgang i kitẹ su tatěbusẹ̌ kụ turusẹ̌ měkoạ ene. Ual᷊ingu tatěbusẹ̌, i kitẹ botonge piạ pẹ̌dal᷊ahapị mapia dingangi Yehuwa maning i kitẹ tawe nasukụ. Ual᷊ingu tatěbusẹ̌, kěbị hal᷊ẹ̌ nikoạu Setang sarung ipakawinasa. (1 Yoh. 3:8) Ual᷊ingu tatěbusẹ̌, kěbị kapulung Yehuwa humotong gunang dunia ini sarung mariadi. Patikụ dunia sarung makoạ firdaus. Taumata apang sarung mẹ̌sombang dingangu makěndagẹ̌ lai mětẹ̌tahamawu si Yehuwa. Hakị u ene, mahịe i kitẹ sabang ěllo mědeạ cara gunang měnodẹ pěngangarěgang i kitẹ su tatěbusẹ̌, gaghělị kapaelange bọu Mawu gunang taumata.