Su apang bọu nẹ̌basa Měhabarẹ̌ taung 2019, apa i kau botonge sumimbahẹ̌ manga kakiwal᷊o ini?

Apa mangal᷊ene dianding Mawu ini: ”Maning senjata apa nikoạ gunang mělawang si kau, ene makoạ tawẹ gunane”? (Yes. 54:17)

I kitẹ botonge mangimang Mawu sarung měndiagạ si kitẹ bọu ”pědung taumata matingkaị”. (Yes. 25:4, 5) Sědụ i kitẹ tawe makarěntang silakạ kěkalẹ̌ si kitẹ.​—w19.01, hlm. 6-7.

Kerea kal᷊aadilu Mawu nal᷊ahẹ bọu cara i Sie měkoạ tau Kanaan dingangu tau Israel apang tawe matuhụ?

Mawu něhukung si sire apang měkẹ̌koạ kakanoạ amoral sěbạe makạdarěnting dingangu si sire apang dal᷊akị měkoạ manga wawine lai manga rariọ. I Sie měngal᷊amatẹ̌ manga ělang’E mạeng i sire masatia si Sie dingangu maadilẹ̌ měkoạ taumata wal᷊inẹ.​—w19.02, hlm. 22-23.

Apa koateng i kitẹ mạeng tau nirorongang mẹ̌doa ene bal᷊inẹ ělang i Yehuwa?

I kitẹ botonge tatapẹ̌ marěmasẹ̌ dingangu měngadatẹ̌ si sire. Katewe, i kitẹ tawe maul᷊ị ”amin” arau tumol᷊e mẹ̌dal᷊aumbelẹ lima dingangi sire su kanandụu daroa ene. I kitẹ botonge mẹ̌doa hala su ral᷊ungu naung.​—w19.03, hlm. 31.

Kerea kaguwạe dosa měkoạ pelecehan su manga rario?

Měkoạ pelecehan su manga rariọ ene kai dosa su korban, dosa su těngong sidang, dosa su pěměrenta, dingangu dosa su těngong Mawu. Su tampạ piạ hukung něngatorẹ̌ pelecehan seksual harusẹ̌ ilaporẹ̌, manga penatua sarung tumol᷊e hukung ene.​—w19.05, hlm. 9-10.

Kerea carane měmal᷊ui tiněna dingangu naung i kitẹ?

Piạ piram baụ hal᷊ẹ̌ penting harusẹ̌ koateng: Pẹ̌doạe si Yehuwa. Pěnadia tempo gunang mẹ̌tiněna tadeạu i kau limembong makasingkạ kurangu. Pakapia měmile hapị.​—w19.06, hlm. 11.

Apa harusẹ̌ koateng i kitẹ orasẹ̌ ini tadeạu sadia su tempong darihang?

I kitẹ harusẹ̌ měnoghasẹ̌ pẹ̌dal᷊ahapị dingangi Yehuwa. Pangimangke i Sie makěndagẹ̌ si kitẹ kụ lai tawe měněntang si kitẹ. Pẹ̌basa Alkitapẹ̌ ěllo-ěllo, kụ pakasau mẹ̌doa. Pangimangke al᷊amatu Kararatuangu Mawu sarung mariadi. Hafalẹ̌ko manga ayatẹ̌ ikẹ̌kapuluangu dingangu manga kakantarị su bukẹ̌ kakantarị lai su situs web i kitẹ.​—w19.07, hlm. 2-4.

Kerea i kitẹ botonge mẹ̌tul᷊ung kěluargang i kitẹ tadeạu masal᷊amatẹ̌?

I kitẹ harusẹ̌ mẹ̌tiněna pěndang i sire, měgělị kesaksian bọu kakanoạ mapia, dingangu masabarẹ̌ lai tatapẹ̌ mapia si sire.​—w19.08, hlm. 15-17.

Kerea i kitẹ makaěbạ karal᷊ungsemahẹ̌ kere niul᷊ị i Yesus su Matius 11:28?

Si kitẹ piạ měnanahimata kapaelange, hapị kapaelange, dingangu hal᷊ẹ̌ kapaelange.​—w19.09, hlm. 23.

Kerea Mawu měgělị si kitẹ kapulu dingangu katatoghasẹ̌ gunang měkoạ kapulu-Ne? (Flp. 2:13)

Su tempong mẹ̌basa dingangu mẹ̌tiněna Hengetangu Mawu, Mawu sarung měnoghasẹ̌ si kitẹ, kụ měgělị si kitẹ kapulu dingangu katatoghasẹ̌ gunang měkoạ kapulu-Ne. I Sie lai botonge měgělị rohkẹ̌ masusi gunang meningkatkan kemampuan dingangu bakat i kitẹ.​—w19.10, hlm. 21.

Hal᷊ẹ̌ apa harusẹ̌ koateng i kitẹ těntal᷊ang bědang tawe někoạ putusang penting?

Piạ lima hal᷊ẹ̌: Pědeạ informasi pakal᷊awọ. Pẹ̌doa mẹ̌dorong pelesa. Parikěsa alasang i kau někoạ putusang. Pakal᷊ahẹ rencana koatengu. Masuẹ̌ su akal᷊ẹ̌.​—w19.11, hlm. 27-29.

Apa těntiro taumata piạ himukude něnětạ nisawuhu Setang su tempong i sie nẹ̌bisara si Hawa?

Kakělaěng tala. Setang tawe naul᷊ị si Hawa kětạeng badang i Hawa sarung mate. Katewe Setang nẹ̌bera i Hawa ”tawe mate”. Bọu ene lai, su tempong Lěba Maihạ nariadi, kěbị těntiro palsu seng nailang. Těntiro soal u taumata piạ himukude aramanung něnětạ siměpụ těntal᷊ang Mawu bědang tawe něngal᷊iaesẹ̌ taumata apang měkẹ̌koạ menara Babelẹ̌.​—w19.12, hlm. 15.