Kakělaěng tala. Su tempong Setang němintaugẹ̌ si Hawa gunang kumaěng buah nisědingu Mawu, i sie tawe naul᷊ị badang i Hawa sarung mate kụ piạ himukudi Hawa sarung měbiahẹ̌ su tampạ wal᷊inẹ. Limiung tempu, Setang nẹ̌bera mạeng i Hawa kumaěng buang kalu ene, i sie ”tawe mate”. Hakị u ene, Setang mẹ̌sul᷊ungu naul᷊ị i Hawa sarung turusẹ̌ měbiahẹ̌ su dunia, kụ makapěndang pěbawiahẹ̌ limembong mapaelẹ̌, pěbawiahẹ̌ nawebasẹ̌ bọu Mawu.​—Kej. 2:17; 3:3-5.

Mạeng těntiro palsu taumata piạ himukude tawe nitětạ su Taman Eden, kange těntiro ene něnětạ siměpụ? I kitẹ běga. Katewe, i kitẹ masingkạ kěbị těntiro palsu nailang su tempong Lěba Maihạ nariadi su zaman i Noakẹ̌. Tawẹ apa těntiro palsu nal᷊ěmbe, ual᷊ingu kětạeng i Noakẹ̌ dingangu kěluargane nasal᷊amatẹ̌, kụ i sire kěbị měnẹ̌němbah si Yehuwa.

Hakị u ene, těntiro soal u taumata piạ himukude tantu něnětạ siměpụ nal᷊iu wọu Lěba Maihạ. Su tempong Mawu němal᷊ui manga bawerang taumata su Babelẹ̌ kụ taumata ”nẹ̌kal᷊iaesẹ̌ sarang patikụ dunia”, kakělaěng i sire nẹ̌bawa těntiro soal u taumata piạ himukude. (Kej. 11:8, 9) Tawẹ soale kange těntiro palsu ini něnětạ siměpụ, i kitẹ mangimang Setang, ”amangu konti”, kai simbul᷊u konti ene kụ i sie sěbạe mal᷊uasẹ̌ nakasilo konti ene nasawuhẹ̌.​—Yoh. 8:44.