Tala. Alkitapẹ̌ dingangu manga bukẹ̌ sejarah tawe pernah nẹ̌bisara soal u hal᷊ẹ̌ ene.

Cara ayatẹ̌ ini nitěrjěmah su lawọ Alkitapẹ̌ nakakoạ taumata nẹ̌pikirẹ̌ su zaman i Paulus piạ taumata nibaptisẹ̌ gunang taumata nate. Contone, terjemahan New International Version něněrjěmah ayatẹ̌ ini: ”Mạeng taumata nate tawe saụ ipěbiahẹ̌, apa sarung koateng i sire apang nibaptisẹ̌ gunang taumata nate?”

Katewe, pěmanda komentarẹ̌ bọu darua pakar Alkitapẹ̌. Dr. Gregory Lockwood naul᷊ị Alkitapẹ̌ dingangu bukẹ̌ sejarah tawe něnodẹ piạ taumata nibaptisẹ̌ gunang taumata nate. Kerene lai, Profesor Gordon D. Fee němohẹ, ”Su bukẹ̌ sejarah arau Alkitapẹ̌, tawẹ apa baptisan kerene. Pẹ̌dariandi Wuhu lai tawe nẹ̌bisara apa-apa soal u hal᷊ẹ̌ ene. Hasụe su taunge bọu manga rasulẹ̌ nate, tawẹ apa bukti něnodẹ gaheda někoạ baptisan kerene.”

Alkitapẹ̌ naul᷊ị manga muriti Yesus harusẹ̌ ’měkoạ taumata bọu haghing bangsa mariadi muritẹ̌. Měmbaptisẹ̌ si sire . . . Měněntiro si sire měkoạ kěbị apa seng’ niparentang i Yesus. (Mat. 28:19, 20) Tadeạu botonge ibaptisẹ̌, taumata harusẹ̌ měngěndung soal i Yehuwa dingangi Yesus, mangimang si rẹ̌dua, dingangu tumuhụ si rẹ̌dua. Taumata apang seng nate kụ ene su kubul᷊ẹ̌ tawe makakoạ hal᷊ẹ̌ ene. Kụ, tau Kristen apang biahẹ̌ lai tawe makakoạ hal᷊ẹ̌ ene gunang tau seng nate.​—Pkh. 9:5, 10; Yoh. 4:1; 1 Kor. 1:14-16.

Mạeng kerene, apa mangal᷊ene bawerang i Paulus?

Pirang katau su Korintus, tawe mangimang taumata nate sarung saụ ipěbiahẹ̌. (1 Kor. 15:12) Paulus něnodẹ tiněnang i sire ene nẹ̌sal᷊a. I sie naul᷊ị i sie ”ěllo-ěllo tụtatěngo papate”. Katewe, maning nakahombang bahaya, i sie mangimang, mạeng i sie mate, i sie sarung saụ ipěbiahẹ̌ makoạ makhluk roh kere i Yesus.​—1 Kor. 15:30-32, 42-44.

Tau Korintus harusẹ̌ makaěna mariadi tau Kristen nilanisẹ̌ ene mangal᷊ene i sire sarung makahombang sasal᷊ukạ ěllo-ěllo kụ mate těntal᷊ang bědang tawe nipěbiahẹ̌. ”Nibaptisẹ̌ su ral᷊ung i Kristus Yesus” ene lai mangal᷊ene ”nibaptisẹ̌ su ral᷊ungu papatene”. (Rm. 6:3) Ini mangal᷊ene kere i Yesus, i sire sarung makahombang sasal᷊ukạ kụ mate tadeạu botonge saụ ipěbiahẹ̌ sarang sorga.

Nal᷊iu bọu dua taung i Yesus nibaptisẹ̌, i sie nẹ̌bera su darua rasule, ”Dingangu baptisan nitarimạku, i kamene lai harusẹ̌ ibaptisẹ̌.” (Mrk. 10:38, 39) Su tempong nẹ̌bera ene, Yesus tawe nibaptisẹ̌ su ral᷊ungu akẹ. Bawerane ene mangal᷊ene ual᷊ingu i Yesus masatia su Mawu, samurine i sie sarung mate. Paulus němohẹ tau Kristen apang nilanisẹ̌ lai sarung ”masigěsạ sěngkasio dingangi Kristus [tadeạu botonge] ipakawantugẹ̌ sěngkasio lai dingangi sie”. (Rm. 8:16, 17; 2 Kor. 4:17) Hakị u ene, i sire lai harusẹ̌ mate tadeạu botonge saụ ipěbiahẹ̌ gunang mẹ̌tanạ su sorga.

Hakị u ene, bawerang i Paulus su ayatẹ̌ ene botonge itěrjěmah kere ini: ”Mạeng taumata nate tawe saụ ipěbiahẹ̌, kerea dingangu taumata apang nibaptisẹ̌ gunang makoạ taumata nate? Tawẹ gunane i sire nibaptisẹ̌ gunang timona kerene.”