1-2. (a) Kerea bawera su Yesaya 41:10 piạ pěngarune si saudari Yoshiko? (b) Tatanatang i Yehuwa kạbawohẹ su Yesaya 41:10 ene gunang i sai?

SĚNGKATAU saudari masatia arenge Yoshiko nakatarimạ habarẹ̌ dal᷊akị. Dokterẹ̌ naul᷊ị i sie měbiahẹ̌ kate pira wul᷊ang. Apa nikoạe? Yoshiko nẹ̌tahěndung ayatẹ̌ ikẹ̌kapuluange, Yesaya 41:10. (Basa.) Bọu ene i sie naul᷊ị su dokterẹ̌ i sie tawe matakụ, ual᷊ingu Yehuwa měnẹ̌něngal᷊ẹ̌ limane. * Bawera makahiborẹ̌ su ayatẹ̌ ene seng nakatul᷊ung si saudari ini gunang mangimang si Yehuwa dingangu kaguwạu naunge. Ayatẹ̌ ene lai botonge makatul᷊ung si kitẹ tumatěngo haghing sasal᷊ukạ. Tadeạu makaěna kerea ene makahiborẹ̌, mahịe i kitẹ měmanda kal᷊imona alasang i Yehuwa něgělị tatanata ini si Yesaya.

² Humotong, Yehuwa něngoro si Yesaya pěmohẹ bawera ene gunang měhiborẹ̌ tau Yahudi apang nitaweng sarang Babelẹ̌. Tatanatang i Yehuwa ene bal᷊inẹ kětạeng gunang tau Yahudi apang nitaweng, katewe lai gunang kěbị ělang’E apang něbiahẹ̌ sarang orasẹ̌ ini. (Yes. 40:8; Rm. 15:4) Orasẹ̌ ini, i kitẹ měbẹ̌biahẹ̌ su tempo ”masigěsạ tatěngong”, kụ i kitẹ perlu makaěbạ katatoghasẹ̌ bọu bawera su bukẹ̌ Yesaya.​—2 Tim. 3:1.

3. (a) Diandi apa kạbawohẹ su Yesaya 41:10, ayat tahunan gunang 2019? (b) Kawe nụe i kitẹ perlu jaminan ini?

³ Su pěngangěndungang ini, i kitẹ měngěndung tatělu dianding Yehuwa kạbawohẹ su Yesaya 41:10, kụ sarung makatoghasẹ̌ pangangimang i kitẹ: (1) Yehuwa duměndingang  si kitẹ, (2) i Sie Mawung kitẹ, dingangu (3) i Sie sarung mẹ̌tul᷊ung si kitẹ. I kitẹ perlu jaminan * ini ual᷊ingu, kere i Yoshiko, i kitẹ tụtatěngo sasal᷊ukạ su pěbawiahẹ̌. I kitẹ lai nakahombang kasasigěsạ ual᷊ingu barang dal᷊akị nariadi su dunia ini. Pirang katau bọu i kitẹ lai dẹ̌darihangu pěměrenta. Mahịe i kitẹ měmanda tatělu jaminan ini.

4. (a) Apa jaminan humotong nighělị i Yehuwa? (Pěmanda lai catatan kaki.) (b) Kerea Yehuwa něnodẹ pěndang’E si kitẹ? (c) Apa pěngarune si kitẹ?

⁴ Humotong Yehuwa něhiborẹ̌ si kitẹ dingangu bawera: ”Abe katakụ, ual᷊ingu Iạ duměndingang si kau.” * Yehuwa něnodẹ i Sie dụděndingang si kitẹ su tempong i Sie sěbạe nẹ̌padul᷊i dingangu kiměndagẹ̌ si kitẹ. Pěmanda kerea i Sie něnodẹ pěndang’E si kitẹ. I Sie naul᷊ị, ”I kau maarěga su mata-Ku”, i kau lẹ̌adateng, dingangu Iạ makěndagẹ̌ si kau.” (Yes. 43:4) Su alam semesta ini, tawẹ apa makaědo si Yehuwa kuměndagẹ̌ si kitẹ. Kasasatia-Ne si kitẹ tawe mělome. (Yes. 54:10) Kakěndagẹ̌ dingangu pẹ̌dal᷊ahapị dingang’E nakakoạ si kitẹ bahani. I Sie měndiagạ si kitẹ orasẹ̌ ini, kere i Sie seng něndiagạ si Abram (Abraham) hapị’E. Yehuwa naul᷊ị si sie, ”Abe katakụ Abram, Iạ sarung makoạ perisai gunang i kau.”​—Kej. 15:1.

5-6. (a) Kerea i kitẹ masingkạ Yehuwa mapulu mẹ̌tul᷊ung si kitẹ tumatěngo sasal᷊ukạ? (b) Apa kaěndungang i kitẹ bọu i Yoshiko?

⁵ I kitẹ masingkạ Yehuwa mapulu mẹ̌tul᷊ung si kitẹ su tempong piạ sasal᷊ukạ ual᷊ingu i Sie nẹ̌diandi su umat’E, ”Su tempong i kau lumiu laudẹ̌, Iạ sarung duměndingang si kau, kụ su tempong i kau lumiu sal᷊ụ, akẹe tawe makaonodẹ̌ si kau. Mạeng i kau lumiu putung, i kau tawe mahěngisẹ̌, kụ putunge tawe makatutung si kau.” (Yes. 43:2) Apa mangal᷊ene bawera ini?

⁶ Yehuwa tawe nẹ̌diandi sarung mapakailang kěbị masalah nakakoạ pěbawiahi kitẹ masigěsạ. Katewe i Sie tawe měmala ”sal᷊ụ” u masalah makal᷊ěmisẹ̌ si kitẹ arau  ”putung” sasal᷊ukạ makakoạ si kitẹ masilakạ secara rohani. I Sie něgělị jaminan sarung duměndingang si kitẹ, mẹ̌tul᷊ung si kitẹ ”lumiu” manga sasal᷊ukạ ene. Apa sarung koateng i Yehuwa? I Sie mẹ̌tul᷊ung si kitẹ tatapẹ̌ matěnang tadeạu botonge tatapẹ̌ masatia si Sie, maning lai tumatěngo papate. (Yes. 41:13) Yoshiko nisěbạ kanini, nakapěndang ene kahěngang. Anạe wawine nẹ̌běke, ”I kami naherang nakasilo si Mamạ tatapẹ̌ matěnang. I kami nakasilo Yehuwa něgělị dame su naunge. Sarang i sie nate, Mamạ měbẹ̌běke soal i Yehuwa dingangu diandi-Ne su suster dingangu pasien bal᷊inẹ.” Apa kaěndungang i kitẹ bọu i Yoshiko? Mạeng i kitẹ mangimang su dianding Mawu ”Iạ sarung duměndingang si kau”, i kitẹ lai sarung mawahani dingangu matoghasẹ̌ tumatěngo sasal᷊ukạ.

7-8. (a) Apa jaminan karuane, kụ apa mangal᷊ene bawera ene? (b) Kawe nụe Yehuwa naul᷊ị su tau Yahudi, ”Abe ghěnggang”? (c) Kerea bawera su Yesaya 46:3, 4 nakatul᷊ung ělangu Mawu tadeạu tawe matakụ?

⁷ Jaminan karuane niwohẹ i Yesaya ute: ”Abe ghěnggang, ual᷊ingu Iạ Mawunu.” Apa mangal᷊ene bawera ghěnggang su ayatẹ̌ ini? Su werang asline, ”ghěnggang” ene mangal᷊ene ”i kitẹ masau měmanda sarang bělakange ual᷊ingu matakụ sarung piạ barang arau taumata měnilakạ si kitẹ”.

⁸ Kawe nụe Yehuwa naul᷊ị su tau Yahudi apang nitaweng su Babelẹ̌ tadeạu abe ”ghěnggang”? Ual᷊ingu taumata su tampạ ene sarung měngkatakụ. Kawe nụe i sire matakụ? Su pěngěnsuengu 70 su taunge tau Yahudi nitaweng, tau Media-Persia sarung měnekẹ Babelẹ̌. Yehuwa sarung měpakẹ manga tentara ene gunang mapakawebasẹ̌ umat’E bọu Babelẹ̌. (Yes. 41:2-4) Su tempong tau Babelẹ̌ dingangu taumata bọu bangsa wal᷊inẹ apang měbẹ̌biahẹ̌ su tempo ene nakasingkạ sědụ sarung duměnta, i sire nẹ̌tawakal᷊i měnoghasẹ̌ sěmbaụ su wal᷊inẹ. I sire naul᷊ị, ”Pakatoghasẹ̌”. I sire lai někoạ limembong mal᷊awọ berhala ual᷊ingu nẹ̌tiněna ene sarung makariagạ si sire. (Yes. 41:5-7) Katewe su tempo ene Yehuwa napakatěnang naungu tau Yahudi kụ naul᷊ị, ”I kamene kai ělang-Ku, oh Israel [nẹ̌tatěntang dingangu taumata wal᷊inẹ]. Abe ghěnggang, ual᷊ingu Iạ Mawunu.” (Yes. 41:8-10) Su ayatẹ̌ ini Yehuwa naul᷊ị, ”Iạ Mawunu.” Bọu bawera ini Yehuwa něgělị jaminan i Sie tawe niwul᷊e su manga ělang’E. I Sie tatapẹ̌ Mawung i sire, kụ i sire tatapẹ̌ ělang’E. I Sie nẹ̌bera si sire, ”Iạ sarung mẹ̌bawa si kau . . . dingangu mẹ̌tul᷊ung si kau.” Jaminan ini tantu nakatoghasẹ̌ tau Yahudi apang nitaweng.​—Basa Yesaya 46:3, 4.

9-10. Kawe nụe i kitẹ tawe harusẹ̌ matakụ? Gělịko sasihinge.

⁹ Orasẹ̌ ini, taumata sěbạe gụgěnggang ual᷊ingu keadaan dunia sauneng kakạdal᷊akịe. Tantu i kitẹ lai nakahombang masalah. Katewe i kitẹ tawe harusẹ̌ guměnggang. Yehuwa seng naul᷊ị si kitẹ, ”Iạ Mawunu”. Kawe nụe bawera ini makakoạ si kitẹ matěnang?

¹⁰ Pẹ̌tiněna sasihing ini: Darua penumpang, i Jim dingangi Ben ene su pěsawatẹ̌ kụkiọ ual᷊ingu anging maihạ. Su tempong pesawatẹ̌ turusẹ̌ kụkiọ, pilot nẹ̌bera su kěbị taumata su ral᷊ungu pesawatẹ̌, ”Pakẹe pakatoghasẹ̌ sabuk pengaman. I kitẹ sarung lumiu turbulensi arau makahombang guncangan.” I Jim sěbạe natakụ. Katewe bọu ene pilot nẹ̌bera, ”Iạ pilot pesawatẹ̌ ini, kěbị bědang aman hakị u ene abe katakụ.” Su tempo ene, i Jim kimiling, kụ nẹ̌bera, ”Bọu apa i sie masingkạ  kěbị bědang aman?” I sie němanda i Ben tawe natakụ sarang kadodọ. Jim nẹ̌kiwal᷊o si sie, ”Kawe i kau tatapẹ̌ matěnang?” Ben himěming kụ simimbahẹ̌, ”Ual᷊ingu iạ sěbạe masingkạ i sai pilot ini. I sie kai i papạku!” Bọu ene i Ben naul᷊ị, ”Iạ mẹ̌běke si kau kerea i papạku. Mạeng i kau makasingkạ si sie dingangu kerea kapaele i sie mẹ̌bawa pěsawatẹ̌, i kau lai sarung matěnang.”

11. Apa kaěndungang i kitẹ bọu sasihing soal u darua penumpang?

¹¹ Apa kaěndungang i kitẹ bọu sasihing ini? Kere i Ben, i kitẹ lai matěnang ual᷊ingu sěbạe masingkạ si Amang i kitẹ su sorga, i Yehuwa. I kitẹ masingkạ i Sie sarung mẹ̌tul᷊ung si kitẹ mẹ̌tatahang maning piạ masalah sěbạe masigěsạ tatěngong. (Yes. 35:4) I kitẹ mangimang si Yehuwa, haki u ene i kitẹ tatapẹ̌ matěnang maning taumata su dunia ini sěbạe matakụ. (Yes. 30:15) I kitẹ lai nẹ̌těno si Ben mạeng i kitẹ mẹ̌běke su taumata wal᷊inẹ alasang i kitẹ mangimang su Mawu. Ene makakoạ si sire mangimang tawẹ soale apa sasal᷊ukạ tatěngong i sire, Yehuwa sarung mẹ̌tul᷊ung si sire.

12. (a) Apa jaminan katělune? (b) Bawera ’takiahi Yehuwa’ nakakoạ si kitẹ mẹ̌tahěndung apa?

¹² Pẹ̌tiněna jaminan katělune niwohẹ i Yesaya: ”Iạ sarung měndiagạ si kau, Iạ sarung mẹ̌tul᷊ung si kau.” Yesaya seng bọu nělahẹ kerea Yehuwa sarung měndiagạ, arau měnoghasẹ̌, manga ělang’E. I sie naul᷊ị, ”Yehuwa sarung duměnta dingangu kawasa-Ne, takiah’E sarung mẹ̌parenta gunang i Sie.” (Yes. 40:10) Alkitapẹ̌ masau měpakẹ bawera ”takiahẹ̌” gunang mělahẹ katatoghasẹ̌. Hakị u ene bawera ”[takiahi Yehuwa] sarung mẹ̌parenta” nakakoạ si kitẹ mẹ̌tahěndung Yehuwa kai Datu sěbạe matoghasẹ̌. I Sie  něpakẹ katatoghasẹ̌ tawe ikal᷊awang su tempong nẹ̌tul᷊ung dingangu timatawang manga ělang’E su tempong tamai. Orasẹ̌ ini, i Sie lai turusẹ̌ měnẹ̌noghasẹ̌ dingangu měndiagạ taumata apang mangimang si Sie.​—Ul. 1:30, 31; Yes. 43:10.

13. (a) Su tempo kerea i Yehuwa měkoạ diandi-Ne gunang měndiagạ si kitẹ? (b) Jaminan apa makakoạ si kitẹ matoghasẹ̌ dingangu tawe ghuměnggang?

¹³ Něngělembo su tempong sědụ měndariha si kitẹ, Yehuwa sarung měkoạ apa seng niriandi-Ne: ”Iạ sarung měndiagạ si kau.” Su piram baụ tampạ, sědụ i kitẹ mětẹ̌tawakal᷊i mẹ̌sěding hal᷊ẹ̌ měnginjilẹ̌ arau lai mẹ̌sěding organisasing i kitẹ. Maning kerene, i kitẹ tawe tumanịu matakụ su tempong ene mariadi. Yehuwa seng něgělị jaminan makatoghasẹ̌ dingangu tawe ghuměnggang. I Sie nẹ̌diandi, ”Maning senjata apa nikoạ gunang mělawang si kau, ene makoạ tawẹ gunane.” (Yes. 54:17) Bawera ini makakoạ si kitẹ mẹ̌tahěndung tatělu fakta penting.

14. Kawe nụe i kitẹ tawe huměkosẹ̌ su tempong sědụu Mawu mělawang si kitẹ?

¹⁴ Humotong, ual᷊ingu i kitẹ kai tumatol᷊eng i Kristus, taumata sarung mawěnsing si kitẹ. (Mat.10:22) Yesus seng něněbal᷊ẹ̌ manga murite sarung darihang su kanandụu ěllo pěngěnsuenge. (Mat. 24:9; Yoh. 15:20) Karuane, těbal᷊ẹ̌ i Yesaya něgělị laingatẹ̌. Sědụ tawe kětạeng mawěnsing si kitẹ, katewe lai sarung měpakẹ haghing senjata gunang mělawang si kitẹ. Aramanung i sire měmuni konting i sire tadeạu kakělaěng kahěngang, arau i sire mẹ̌konti soal i kitẹ arau i sire ěndịu sěbạe matingkaị měndarihạ si kitẹ. (Mat. 5:11) Yehuwa tawe mẹ̌sěding su sědụ měpakẹ manga senjata ene gunang lumawang si kitẹ. (Ef. 6:12; Why. 12:17) Katewe i kitẹ tawe matakụ. Kawe nụe?

15-16. (a) Apa fakta katělune harusẹ̌ tahěndungang i kitẹ, kụ kerea Yesaya 25:4, 5 nělahẹ hal᷊ẹ̌ ene? (b) Kerea Yesaya 41:11, 12 nẹ̌běke apa sarung kaěbakengu taumata apang mělawang si kitẹ?

¹⁵ Fakta katělune harusẹ̌ tahěndungang  ute, Yehuwa naul᷊ị maning ”senjata” apa nikoạ gunang mělawang si kitẹ, ene makoạ ”tawẹ gunane”. Kere darěndung makal᷊indung si kitẹ bọu tahiti dingangu anging maihạ, Yehuwa lai sarung měndiagạ si kitẹ bọu ”pědung taumata matingkaị”. (Basa Yesaya 25:4, 5.) Sědụ i kitẹ tawe makarěntang silakạ kěkalẹ̌ si kitẹ.​—Yes. 65:17.

¹⁶ Yehuwa lai něnoghasẹ̌ pangangimang i kitẹ si Sie. I Sie nělahẹ apa sarung mariadi su taumata apang ”nẹ̌pědu” si kitẹ. (Basa Yesaya 41:11, 12.) Tawẹ soale kerea sědụ mělawang si kitẹ arau kerea kasigěsạe sekẹ, hasile tatapẹ̌ mẹ̌sul᷊ung: Kěbị sědụu ělangu Mawu ”sarung makoạ tawẹ gunane dingangu mawinasa”.

17-18. (a) Kerea mẹ̌basa Alkitapẹ̌ makatoghasẹ̌ pangangimang i kitẹ su Mawu? Gělịko contone. (b) Kerea mẹ̌tiněna ayat tahunan 2019 makakoạ si kitẹ matoghasẹ̌?

¹⁷ Pangangimang i kitẹ si Yehuwa sarung makoạ matoghasẹ̌ mạeng i kitẹ masingkạ mal᷊awọ soal i Sie. Kụ carane ute kětạeng měngěndung Alkitapẹ̌ pakapia dingangu mẹ̌tiněna apa seng niwasa. Su Alkitapẹ̌ piạ lawọ běke něnodẹ kerea i Yehuwa něndiagạ manga ělang’E su tempong tamai. Manga běke ene makakoạ si kitẹ mangimang i Sie sarung měndiagạ si kitẹ orasẹ̌ ini.

¹⁸ Pẹ̌tiněna bawera mapaelẹ̌ nipakẹ i Yesaya gunang měnodẹ kerea Yehuwa měndiagạ si kitẹ. I sie naul᷊ị i Yehuwa mẹ̌sul᷊ungu měngangahạ domba kụ manga ělang’E mẹ̌sul᷊ungu domba. Yesaya nẹ̌bera soal i Yehuwa: ”Dingangu takiah’E, i Sie sarung měngomol᷊ẹ̌ manga anạu domba, kụ i Sie sarung mẹ̌bawa si sire su sěbạ’E”. Mạeng i kitẹ nakapěndang takiahi Yehuwa matoghasẹ̌ nělahěkụ si kitẹ, i kitẹ sarung makapěndang aman dingangu matěnang. Gunang mẹ̌tul᷊ung si kitẹ tadeạu tatapẹ̌ matěnang maning tụtatěngo sasal᷊ukạ, ělang masatia dingangu matahuěna seng němile Yesaya 41:10 makoạ ayat tahunan i kitẹ 2019, ”Abe ghěnggang, ual᷊ingu Iạ Mawunu”. Pẹ̌tiněna manga bawerane. Ene sarung makatoghasẹ̌ si kau tumatěngo haghing sasal᷊ukạ su tempo mahi.