1-2. (a) Kawe nụe i kitẹ tawe maherang Yesus něhabarẹ̌ si kitẹ cara sederhana gunang mẹ̌tahěndung papatene? (b) Manga sipatẹ̌ i Yesus sude sarung ěndungang i kitẹ?

APA i kau botonge mělahẹ apa kẹ̌koateng su acara Pẹ̌tatahěndungang papateng i Kristus? Kal᷊awokange bọu i kitẹ nakatahěndung apa kẹ̌koateng su acara Hěbing Perjamuan Tuang. Kawe nụe? Ual᷊ingu acara ene sederhana. Katewe acara ini penting. Hakị u ene i kitẹ aramanung mětẹ̌tiněna, ’Kawe nụe acara ini sěbạe sederhana?’

² Su pelayanan nikoạe su dunia, Yesus sěntiniạ měnẹ̌něntiro katěngadẹ̌ penting dingangu cara sederhana, mal᷊ahẹ, dingangu gampang kaěnang. (Mat. 7:28, 29) Kerene lai, i sie naul᷊ị si kitẹ cara sederhana katewe sěbạe penting gunang měkoạ pẹ̌tatahěndungang * papatene. Mahịe i kitẹ měngěndung pakapia soal u acara Pẹ̌tatahěndungang dingangu piram baụ hal᷊ẹ̌ niul᷊ị dingangu nikoạ i Yesus. I kitẹ sauneng makaěna Yesus sěbạe masanạ naung, bahani, dingangu makěndagẹ̌. I kitẹ lai sarung měngěndung kerea i kitẹ botonge limembong mapaelẹ̌ mẹ̌těno si sie.

3. Kere niwěke su Matius 26:26-28, kerea acara Pẹ̌tatahěndungang nikoạ i Yesus ene sederhana, kụ darua barang apa nipakẹ i Yesus?

³ Yesus někoạ acara Pẹ̌tatahěndungang papatene su tempong i sie ene dingangu 11 rasule masatia. I sie něngal᷊ạ apa seng nal᷊ěmbe wọu acara Paskah kụ někoạ acara pẹ̌tatahěndungang sederhana. (Basa Matius 26:26-28.) I sie  kětạeng něpakẹ borotẹ̌ tawẹ ragine dingangu anggorẹ̌ seng piạ su tempo ene. Yesus nẹ̌bera su manga rasule, darua barang sederhana ene nakoạ lambang badang dingangu dahane masukụ, kụ seng mal᷊ighạ sarung gělịkange gunang kapiang i sire. Manga rasulẹ̌ ěndịu tawe naherang su tempong acara penting ene nikoạ sederhana. Kawe nụe?

4. Kerea sasasa nighělị i Yesus si Marta nakatul᷊ung si kitẹ nakaěna alasang i Yesus někoạ acara Pẹ̌tatahěndungang sederhana?

⁴ Pẹ̌tiněna apa nariadi pira wul᷊ang kal᷊imona, su taung katělune bọu pelayanan i Yesus. Su tempo ene, i sie nakoạ sarang bal᷊eng hapịe, i Lazarus, Marta, dingangi Maria. Su tempo santai ene, Yesus něnětạ něněntiro. Marta lai ene sene, katewe tiněnane napahiạ ual᷊ingu něnadia lawọ kaěng gunang sakẹ lẹ̌adatenge ene. Su tempong nakasilo ene, Yesus něněgorẹ̌ si sie dingangu kapiang naung. I sie nẹ̌tul᷊ung si Marta makaěna měnadia kaěng ene tawe harusẹ̌ mẹ̌dal᷊ahaghi. (Luk. 10:40-42) Bọu ene, kětạeng pirang kaorasẹ̌ těntal᷊ang i sie bědang tawe nate makoạ sasěmbah, Yesus někoạ sasasane ini. I sie někoạ acara Pẹ̌tatahěndungang sederhana. Apa kaěndungang i kitẹ soal i Yesus bọu hal᷊ẹ̌ ini?

5. Acara sederhana ini něnodẹ apa soal i Yesus, kụ kerea ini nẹ̌tatahino dingangu Filipi 2:5-8?

⁵ Kěbị apa niwera dingangu apa nikoạ i Yesus něnodẹ i sie masanạ naung. Hakị u ene i kitẹ tawe maherang su tempong i sie něnodẹ kasasanạu naung makạlaherang su hěbi pěngěnsuenge bọu pěbawiahe su dunia. (Mat. 11:29) I Yesus masingkạ i sie sarung měgělị sasěmbah kaguwạkenge su kanandụu sejarang taumata. I sie lai masingkạ Yehuwa sarung saụ mapakawiahẹ̌ si sie gunang makoạ datu su sorga. Maning kerene, i sie tawe nědeạ daralo gunang watangenge kụ někoạ acara matahuki gunang mẹ̌tahěndung papatene. Katewe, i sie naul᷊ị su manga murite sěntaung sěnsul᷊ẹ i sire harusẹ̌ mẹ̌tahěndung si sie bọu acara sederhana ene. (Yoh. 13:15; 1 Kor. 11:23-25) Acara sederhana katewe penting ini něnodẹ i Yesus tawe maobotẹ̌. I kitẹ mal᷊uasẹ̌ ual᷊ingu kasasanạu naung kai sěmbaụ sipatẹ̌ makạlaherang bọu Datung i kitẹ su sorga.​—Basa Filipi 2:5-8.

6. Kerea i kitẹ mẹ̌těno kasasanạu naung i Yesus su tempong tumatěngo kasasigěsạ?

⁶ Kerea i kitẹ mẹ̌těno kasasanạu naung i Yesus? Carane ute měngal᷊imona kapulung taumata wal᷊inẹ sul᷊ungu kapulung i kitẹ hala. (Flp. 2:3, 4) Pẹ̌tiněna hěbi pěngěnsuenge bọu pěbawiahi Yesus su dunia. Yesus masingkạ i sie sarung  makapěndang matědu-tědu maraning papatene. Katewe, i sie sěbạe mapadul᷊i su manga rasule masatia, kụ sarung masusah naung su apang i sie mate. Hakị u ene, su hěbi pěngěnsuenge ene, i sie něněntiro, něnoghasẹ̌, dingangu něhiborẹ̌ si sire. (Yoh. 14:25-31) Dingangu kasasanạu naung, i Yesus limembong mẹ̌tiněna situasing taumata wal᷊inẹ sul᷊ungu watangenge hala. Ene kai contoh sěbạe mapaelẹ̌ gunang i kitẹ!

7. Kerea i Yesus něnodẹ kawawahani gěguwạ su apang i sie bọu někoạ acara Hěbing Perjamuan Tuang?

⁷ Tawe nararěna bọu i Yesus někoạ acara Hěbing Perjamuan Tuang, i sie něnodẹ kawawahani gěguwạ. Kerea i sie něnodẹ ene? Yesus mapulu tumol᷊e kapulung i Amange gunang koatenge, maning i sie masingkạ mạeng měkoạ ene i sie sarung makaěbạ hukumang papate ual᷊ingu nitokẹ někoạ karal᷊akisẹ̌ gěguwạ, něhinakang Mawu. (Mat. 26:65, 66; Luk. 22:41, 42) Yesus tatapẹ̌ masatia tadeạu botonge makawantugẹ̌ areng i Yehuwa dingangu měnodẹ Mawu piạ hakẹ̌e mẹ̌parenta. Kasasatiane lai němuka ral᷊eng gunang taumata apang mẹ̌tobatẹ̌ tadeạu makaěbạ pěbawiahẹ̌ kěkalẹ̌. Su tempo mẹ̌sul᷊ung lai, i Yesus něnadia manga murite gunang tumatěngo manga hal᷊ẹ̌ sarung kahombangeng i sire.

8. (a) Apa niul᷊ị i Yesus su manga rasule masatia? (b) Taunge bọu papateng i Yesus, kerea manga muriti Yesus nẹ̌těno kawawahanine?

⁸ Yesus lai něnodẹ kawawahani ual᷊ingu tawe kětạeng nẹ̌tiněna soal u kaghaghěnggange, katewe i sie nẹ̌tiněna kebutuhan manga rasule masatia. Acara sederhana ini nikoạ i Yesus su tempong i Yudas seng tawe dịe. Kụ ini makakoạ manga tumatol᷊ene apang sarung lanisang makatahěndung gunane dahang i Yesus dingangu pẹ̌dariandi wuhu. (1 Kor. 10:16, 17) Gunang mẹ̌tul᷊ung si sire tatapẹ̌ masatia dingangu botonge mẹ̌parenta dingange su sorga, Yesus  naul᷊ị si sire apa dẹ̌dorongange dingangu dẹ̌dorongang i Amange bọu i sire. (Yoh. 15:12-15) Yesus lai naul᷊ị su manga rasulẹ̌ sasal᷊ukạ apa sarung kahombangeng i sire. Bọu ene, i sie němahansang si sire mẹ̌těno si sie, kụ i sie něngoro si sire gunang tatapẹ̌ ’bahani’. (Yoh. 16:1-4a, 33) Taunge bọu ene, manga muriti Yesus bědang tụtol᷊e sipatẹ̌ rela berkorban dingangu bahani. Maning harusẹ̌ masigěsạ, i sire měnẹ̌noghasẹ̌ sěmbaụ su wal᷊inẹ su tempong tumatěngo haghing sasal᷊ukạ.​—Ibr. 10:33, 34.

9. Kerea i kitẹ mẹ̌těno si Yesus kụ měnodẹ kawawahani?

⁹ Kerene lai orasẹ̌ ini, i kitẹ mẹ̌těno si Yesus su tempong měnodẹ kawawahani. Contone, i kitẹ bahani mẹ̌tul᷊ung anạu sěmbaụ apang dẹ̌darihang ual᷊ingu pangangimang i sire. Pẹ̌sěnsul᷊ẹ, aramanung anạu sěmbaụ i kitẹ niselẹ̌. Mạeng ene nariadi, i kitẹ harusẹ̌ mẹ̌tawakal᷊i mẹ̌tul᷊ung si sire, contone tumatawang si sire. (Flp. 1:14; Ibr. 13:19) Cara wal᷊inẹ měnodẹ kawawahani ute turusẹ̌ měnginjilẹ̌ ”dingangu kawawahani”. (Kis. 14:3) Kere i Yesus, i kitẹ tatapẹ̌ měhabarẹ̌ habaru Kararatuang, maning taumata mẹ̌sěding dingangu měndariha si kitẹ. Katewe pẹ̌sěnsul᷊ẹ, aramanung i kitẹ matakụ. Apa botonge koateng i kitẹ?

10. Su pirang kamisa maraning Pẹ̌tatahěndungang, apa harusẹ̌ koateng i kitẹ, kụ kawe nụe?

¹⁰ I kitẹ botonge mawahani mạeng mẹ̌tiněna pělaharapẹ̌ kaěbakeng i kitẹ ual᷊ingu piạ tatěbusẹ̌ i Kristus. (Yoh. 3:16; Ef. 1:7) Su pirang kamisa maraning tempong Pẹ̌tatahěndungang, si kitẹ piạ kesempatan mapaelẹ̌ gunang limembong měngarěga tatěbusẹ̌. Su tempo ene, tol᷊ẹe pẹ̌bawasang Alkitapẹ̌ gunang Pẹ̌tatahěndungang dingangu pẹ̌tiněna pakapia peristiwa nariadi maraning papateng i Yesus. Bọu ene, su tempong duměnta su Hěbing Perjamuan Tuang, i kitẹ limembong makaěna kawe nụe manga lambang su Pẹ̌tatahěndungang ene penting dingangu sasěmbah nilahẹu manga lambang ene. Mạeng i kitẹ makaěna  apa nikoạ i Yesus dingangi Yehuwa gunang i kitẹ dingangu taumata ikẹ̌kěndagi kitẹ, pělaharapi kite sauneng mal᷊ahẹ. I kitẹ lai limembong mapulu mẹ̌tatahang dingangu mawahani sarang pěngěnsuenge.​—Ibr. 12:3.

11-12. Apa seng niěndungang i kitẹ?

¹¹ I kitẹ seng něngěndung Hěbing Perjamuan Tuang tawe kětạeng něnodẹ tatěbusẹ̌ ene maarěga, katewe lai něnodẹ kasasanạu naung dingangu kawawahaning i Yesus makạlaherang. I kitẹ tantu sěbạe makitarimakasẹ ual᷊ingu i Yesus, Imang Mawantugẹ̌ kụ mědẹ̌dorong gunang kapiang i kitẹ, turusẹ̌ měnẹ̌nodẹ manga sipatẹ̌ ini! (Ibr. 7:24, 25) Gunang měnodẹ pěngangarěgang i kitẹ, i kitẹ harusẹ̌ masatia mẹ̌tahěndung papateng Yesus, kere seng niorone. (Luk. 22:19, 20) I kitẹ měkoạ ene su ěllo nẹ̌tatahino dingangu 14 Nisan, ene kai tanggalẹ̌ paling penting sabang taung.

¹² Bọu Hěbing Perjamuan Tuang seng nikoạ sederhana, i kitẹ makaěndung sipati Yesus wal᷊inẹ kụ nakakoạ si sie mapulu mate gunang i kitẹ. Su tempong su dunia, taumata masingkạ si Yesus piạ sipatẹ̌ ene. Apa ene?

13. Kerea Yohanes 15:9 dingangu 1 Yohanes 4:8-10 něnodẹ kakěndagi Yehuwa dingangi Yesus, kụ i sai nakaěbạ gunane bọu kakěndagi rẹ̌dua?

¹³ Yehuwa makěndagẹ̌ si kitẹ, kụ i Yesus sěbạe masukụ nẹ̌těno kakěndagi Yehuwa su kěbị apa nikoạe. (Basa Yohanes 15:9; 1 Yohanes 4:8-10.) Katewe limembong penting, i sie něgělị pěbawiahe gunang i kitẹ ual᷊ingu ene lai kapulu bọu dal᷊ungu naunge hala. Tawẹ soale i kitẹ nilanisẹ̌ arau ”domba wal᷊inẹ”, i kitẹ makaěbạ gunane bọu kakěndagi Yehuwa dingangu Ahuse kụ seng nitodẹ si kitẹ bọu tatěbusẹ̌. (Yoh. 10:16; 1 Yoh. 2:2) Pẹ̌tiněna lai manga barang nipakẹ gunang acara Pẹ̌tatahěndungang. Ene lai něnodẹ i Yesus makěndagẹ̌ dingangu mětẹ̌tiněna situasing manga murite. Kawe kerene?

14. Dingangu cara kerea i Yesus něnodẹ kakěndagẹ̌ su manga murite?

¹⁴ Yesus něnodẹ kakěndagẹ̌ su manga murite apang nilanisẹ̌ ual᷊ingu i sie někoạ acara Pẹ̌tatahěndungang ene sederhana, bal᷊inẹ matahuki. Nal᷊iu bọu ene, manga murite apang nilanisẹ̌ harusẹ̌ měkoạ acara Pẹ̌tatahěndungang sabang taung su haghing situasi, kere su penjara. (Why. 2:10) Apa i sire botonge tumuhụ parentang i Yesus? Iya, i sire botonge!

15-16. Kerea pirang katau anạu sěmbaụ někoạ Hěbing Perjamuan Tuang maning situasing i sire masigěsạ?

¹⁵ Dongkeng abad humotong sarang orasẹ̌ ini, tau Sahani tutune mětẹ̌tawakal᷊i mẹ̌tahěndung papateng i Yesus. I sire timol᷊e prosedur gunang Hěbing Perjamuan Tuang, pẹ̌sěnsul᷊ẹ su situasi masigěsạ. Pěmanda contoh ini. Su tempong niselẹ̌ sẹ̌sane su penjara su Cina, Saudara Harold King harusẹ̌ mědeạ cara gunang měkoạ Pẹ̌tatahěndungang. I sie marěma-rěmasẹ̌ něnadia manga lambang Pẹ̌tatahěndungang kụ něpakẹ bahan piạ si sie. I sie něndekeng pakapia tanggalu Pẹ̌tatahěndungang. Su tempong ěllong Pẹ̌tatahěndungang narěnta, i sie nẹ̌kantarị, nẹ̌doa, dingangu něnasẹ̌. Kěbị ene nikoạe sẹ̌sane su ral᷊ungu selẹ̌.

¹⁶ Ini contoh wal᷊inẹ. Saudari-saudari apang niselẹ̌ su kamp konsentrasi su Perang Dunia II tawe matakụ mate su tempong někoạ acara Hěbing Perjamuan Tuang. Katewe, ual᷊ingu barang paketang gunang acara ene sěbạe sederhana, i sire botonge někoạ Pẹ̌tatahěndungang. I sire nẹ̌běke, ”I kami dimarisị mararani nělikụ sěmbaụ bangkọ niěmpahengu hekạ mawira,  kụ su wowone piạ anggorẹ̌ dingangu borotẹ̌. I kami něpakẹ lilin gunang měnualagẹ̌ selẹ̌ ual᷊ingu sol᷊o listrikẹ̌ makakoạ si kami kasingkateng. . . . I kami saụ nẹ̌sěbạ dianding i kami si Amang i kami gunang měpakẹ kěbị katatoghasi kami gunang tumatawang areng’E masusi.” Pangangimang i sire sěbạe makạlaherang! Kụ, kakěndagi Yesus si kitẹ sěbạe makạlaherang ual᷊ingu i sie nakakoạ si kitẹ botonge měkoạ acara Pẹ̌tatahěndunang maning situasine masigěsạ!

17. Kakiwal᷊o apa harusẹ̌ tahěndungang i kitẹ?

¹⁷ Seng mal᷊ighạ i kitẹ sarung měkoạ acara Pẹ̌tatahěndungang. Hakị u ene, i kitẹ kěbị harusẹ̌ mẹ̌tiněna manga kakiwal᷊o ini: ’Kerea iạ botonge limembong mapia mẹ̌těno si Yesus su tempong měnodẹ kakěndagẹ̌? Apa iạ limembong mětẹ̌tiněna kebutuhan anạu sěmbaụku sul᷊ungu kebutuhanku? Apa iạ mělẹ̌harapẹ̌ anạu sěmbaụ měkoạ limembong mal᷊awọ bọu apa wotonge ikakoạ i sire, arau apa iạ mětẹ̌tiněna kurangi sire?’ Karimạko i kitẹ sěntiniạ mẹ̌těno si Yesus dingangu měnodẹ sipatẹ̌ ”sěngkanaung”.​—1 Ptr. 3:8.

18-19. (a) I kitẹ mangimang apa? (b) I kau mapulu mẹ̌tawakal᷊i měkoạ apa?

¹⁸ Seng mal᷊ighạ tempone, Pẹ̌tatahěndungang papateng Kristus seng tawe koateng. Su tempong i Yesus ”duměnta” su kasasusah masaria, i sie sarung měngomol᷊ẹ̌ ”taumata apang nipilene” sarang sorga. Bọu ene, acara pẹ̌tatahěndungang seng tawe koateng.​—1 Kor. 11:26; Mat. 24:31.

¹⁹ Maning Pẹ̌tatahěndungang seng tawe saụ koateng, i kitẹ mangimang manga ělang i Yehuwa sarung mẹ̌tahěndung acara sederhana ini kai tatialang kasasanạu naung, kawawahani, dingangu kakěndagẹ̌ kaguwạkenge seng nitodẹu taumata. Su tempo ene, i sire apang bọu diměnta su acara luar biasa ini sarung mẹ̌běke su taumata wal᷊inẹ apang měbẹ̌biahẹ̌ su tempo ene, tadeạu i sire lai makaěbạ gunane. Katewe, tadeạu orasẹ̌ ini i kitẹ makaěbạ gunane bọu acara ini, i kitẹ harusẹ̌ mẹ̌tawakal᷊i mẹ̌těno kasasanạu naung, kawawahani, dingangu kakěndagi Yesus. Mạeng měkoạ ene, i kitẹ mangimang i kitẹ sarung makatarimạ hadiah bọu Yehuwa.​—2 Ptr. 1:10, 11.