1-2. (a) Apa pěpandaěng i Yehuwa su tempong jutane taumata nẹ̌komol᷊ẹ̌ su acara Hěbing Perjamuan Tuang? (Pěmanda foto sampul.) (b) Apa sarung ěndungang i kitẹ su pěngangěndungang ini?

KĚNANG pẹ̌tiněna apa pẹ̌pandaěng i Yehuwa su tempong taumata bọu kaguwạu dunia nẹ̌tampung gunang acara Hěbing Perjamuan Tuang. Yehuwa tawe němanda si sire kere sěmbaụ komol᷊ang, katewe i Sie němanda si sire sěmbaụ-sěmbaụ. Contone, Yehuwa masingkạ i sai sěntiniạ dụděnta sabang taung. Bọu tal᷊oarang i sire aramanung piạ u tatapẹ̌ dụděnta maning masigěsạ. Piạ lai nẹ̌pěndang Hěbing Perjamuan Tuang ene sěbạe penting koateng, katewe i sire tawe dụděnta su pěngangibadang sabang misa. Yehuwa lai masingkạ i sire apang buhudeng diměnta su Hěbing Perjamuan Tuang, ěndịu diměnta ual᷊ingu mapulu masingkạ soal u acara ene.

² Tantu Yehuwa mal᷊uasẹ̌ ual᷊ingu piạ lawọ diměnta su acara Hěbing Perjamuan Tuang. (Luk. 22:19) Katewe, penting si Yehuwa bal᷊inẹbe pira kal᷊awọe taumata diměnta. I Sie němanda alasang i sire diměnta. Su pěngangěndungang ini, i kitẹ sarung měngěndung sěmbaụ kakiwal᷊o sěbạe penting: Kawe nụe i kitẹ tawe kětạeng duměnta su acara Hěbing Perjamuan Tuang, katewe lai duměnta su pěngangibadang sabang misa, kụ seng nisadiang i Yehuwa gunang taumata apang makěndagẹ̌ si Sie?

3-4. (a) Kawe nụe i kitẹ duměnta su pěngangibadang? (b) Sipatẹ̌ apa makawahansang si kitẹ gunang duměnta su pěngangibadang? (c) Tumuhụ 1 Korintus 11:23-26, kawe nụe i kitẹ harusẹ̌ duměnta su acara Pẹ̌tatahěndungang?

³ Alasang kahumotongange i kitẹ duměnta su pěngangibadang ual᷊ingu ene kai bageang bọu ibadang i kitẹ su Mawu.  Alasang wal᷊inẹ lai ual᷊ingu su pěngangibadang i kitẹ sarung těntiroěng i Yehuwa. Taumata maobotẹ̌ madiri těntiroěng. (3 Yoh. 9) Katewe, i kitẹ mapulu těntiroěng i Yehuwa dingangu organisasi-Ne.​—Yes. 30:20; Yoh. 6:45.

⁴ Duměnta su pěngangibadang něnodẹ i kitẹ kai masanạ naung—sadia dingangu mapulu těntiroěng. I kitẹ duměnta su Pẹ̌tatahěndungang papateng i Yesus bal᷊inẹ kětạeng mẹ̌pěndang ene kai kewajiban, katewe ual᷊ingu i kitẹ masanạ naung tumol᷊e parentang i Yesus, ”Turusẹ̌e pěkoạ ini gunang mẹ̌tahěndung si siạ.” (Basa 1 Korintus 11:23-26.) Pẹ̌tatahěndungang makatoghasẹ̌ pělaharapi kitẹ soal u ěllo mahi dingangu makakoạ si kitẹ mẹ̌tahěndung i Yehuwa sěbạe makěndagẹ̌ si kitẹ. Katewe, i Yehuwa masingkạ i kitẹ harusẹ̌ toghaseng bal᷊inẹ kětạeng sěnsul᷊ẹ sěntaung. Hakị u ene i Sie něnadia pěngangibadang sabang misa, kụ i Sie mapulu i kitẹ duměnta. Kasasanạu naung makawahansang si kitẹ gunang duměnta sene. I kitẹ měgělị tempo sabang misa gunang měnadia dingangu duměnta su acara pěngangibadang.

5. Apa koatengu taumata masanạ naung su tempong něnarimạ undangan bọu i Yehuwa?

⁵ Sabang taung, lawọ taumata masanạ naung něnarimạ undangan gunang těntiroěng i Yehuwa. (Yes. 50:4) I sire mal᷊uasẹ̌ su acara Pẹ̌tatahěndungang, kụ i sire lai něnětạ diměnta su pěngangibadang sabang misa. (Za. 8:20-23) Sěngkasio, i kitẹ mal᷊uasẹ̌ těntiroěng i Yehuwa ual᷊ingu i Sie kai ’Mẹ̌tatul᷊ung i kitẹ dingangu Měnanal᷊amati kitẹ’. (Mz. 40:17) Sěběnarẹ̌e, tawẹ apa limembong penting dingangu mapia sul᷊ungu těntiroěng i Yehuwa dingangi Yesus, Ahusẹ̌ ikẹ̌kěndag’E.​—Mat. 17:5; 18:20; 28:20.

6. Kerea kasasanạu naung nakatul᷊ung sěngkatau esẹ diměnta su acara Pẹ̌tatahěndungang?

⁶ Sabang taung, i kitẹ mětẹ̌tawakal᷊i měgausẹ̌ lawọ taumata duměnta su Pẹ̌tatahěndungang papateng i Yesus. Lawọ taumata masanạ naung nakaěbạ gunane ual᷊ingu něnarimạ undangan i kitẹ. Contone, pira taung tamai sěngkatau esẹ něnarimạ undangan Pẹ̌tatahěndungang bọu sěngkatau saudara. I sie naul᷊ị su saudara ene i sie tawe makarěnta. Katewe, su hěbing Pẹ̌tatahěndungang, saudara ene himěkosẹ̌ ual᷊ingu tau ene diměnta su Banalang Kararatuang. Tau ene sěbạe mal᷊uasẹ̌ ual᷊ingu anạu sěmbaụ něněnsomahẹ̌ si sie. Kụ bọu ene i sie něnětạ diměnta su pěngangibadang sabang misa. Su ral᷊ungu sěntaung i sie kětạeng tělung sul᷊ẹ tawe nakarěnta su pěngangibadang. Apa nakakoạ si sie něnětạ diměnta něngibadah? Ual᷊ingu i sie masanạ naung dingangu mapulu mẹ̌bal᷊ui. Saudara něgělị undangan si sie naul᷊ị, ”I sie kai sěbạe masanạ naung.” Yehuwa tantu němol᷊eng si sie gunang maněmbah si Sie, hakị u ene orasẹ̌ ini i sie seng nisahani.​—2 Sam. 22:28; Yoh. 6:44.

7. Kerea tatěntiro seng niěndungang i kitẹ su pěngangibadang dingangu su Alkitapẹ̌ makatul᷊ung si kitẹ masanạ naung?

⁷ Apa niěndungang i kitẹ su pěngangibadang dingangu su Alkitapẹ̌ makatul᷊ung si kitẹ masanạ naung. Pirang kamisa maraning acara Pẹ̌tatahěndungang, pěngangibadang sabang misa sarung hanesẹ̌ mělahẹ soal i Yesus dingangu kasasanạu naung nitodẹe su tempong něgělị pěbawiahe nakoạ tatěbusẹ̌. I kitẹ lai gẹ̌gausang mẹ̌basa běke su Alkitapẹ̌ soal u manga peristiwa nikahombangeng i Yesus těntal᷊ang bědang tawe nipate dingangu su tempong i sie saụ nipěbiahẹ̌. Apa niěndungang i kitẹ su pěngangibadang dingangu Alkitapẹ̌, makakoạ si kitẹ limembong měngarěga apa seng nikoạ i Yesus gunang i kitẹ. I kitẹ lai mapulu mẹ̌těno kasasanạu naung i Yesus dingangu měkoạ kapulung Yehuwa maning ene masigěsạ.​—Luk. 22:41, 42.

8. Kerea i Yesus něnodẹ kawawahani?

⁸ I kitẹ lai mapulu mẹ̌těno kawawahaning i Yesus. Pẹ̌tiněna kawawahani nitodẹe su tempong bědang tawe nipate. I sie sěbạe masingkạ manga sědụe sarung měhinakang, mẹ̌tingkaị, dingangu měmate si sie. (Mat. 20:17-19) Maning kerene, i Yesus sadia mate. Su taman Getsemani i sie naul᷊ị su manga rasule, ”Darisịe, bọete i kitẹ matamai. Pěmanda! Taumata tawe satia si siạ seng diměnta.” (Mat. 26:36, 46) Su tempong lawọ taumata diměnta měnamẹ si sie, i sie dimal᷊eng sarang těngong i sire kụ naul᷊ị i sie kai i Yesus, i sie lai nẹ̌parenta su manga prajurit tadeạu tawe měnamẹ manga rasule. (Yoh. 18:3-8) Ini kai kawawahani sěbạe makạlaherang! Orasẹ̌ ini, tau Sahani apang nilanisẹ̌ dingangu domba wal᷊inẹ lai nẹ̌těno kawawahaning i Yesus. Kerea carane?

9. (a) Kawe nụe si kitẹ harusẹ̌ piạ kawawahani tadeạu sěntiniạ duměnta měngibadah? (b) Kerea kakanoạ i kitẹ piạ pěngarune su anạu sěmbaụ apang niselẹ̌ ual᷊ingu pangangimang i sire?

⁹ Tadeạu sěntiniạ duměnta su pěngangibadang, i kitẹ harusẹ̌ bahani su tempong piạ kasasigěsạ. Lawọ anạu sěmbaụ tatapẹ̌ diměnta su pěngangibadang maning lụlahunsusah, nakadodọ naung, arau piạ sakị. Piạ lai nakahombang sasal᷊ukạ mawěhạ bọu keluarga arau pěměrenta. Pẹ̌tiněna kerea kakanoạ i kitẹ piạ pěngarune su anạu sěmbaụ i kitẹ apang niselẹ̌ ual᷊ingu pangangimang i sire. (Ibr 13:3) Su tempong i sire masingkạ i kitẹ tatapẹ̌ satia maning nakahombang kasasigěsạ, i sire lai sarung matoghasẹ̌ měndiagạ pangangimang, kawawahani, dingangu kasasatiang i sire. Rasul Paulus nakapěndang hal᷊ẹ̌ ene. Su tempong i sie niselẹ̌ su Roma, i sie mal᷊uasẹ̌ sabang makaringihẹ̌ anạu sěmbaụe tatapẹ̌ masatia. (Flp. 1:3-5, 12-14) Maraning tempone i sie mawebasẹ̌, i sie němohẹ suratẹ̌ gunang tau Ibrani. Su ral᷊ungu suratẹ̌ ene, i sie němahansang tau Sahani apang masatia tadeạu ’turusẹ̌ měnodẹ kakěndagẹ̌ su anạu sěmbaụ’ dingangu turusẹ̌ duměnta su pěngangibadang.​—Ibr. 10:24, 25; 13:1.

10-11. (a) I sai-sai sarung gausang i kitẹ sarang acara Pẹ̌tatahěndungang? (b) Tumuhụ Efesus 1:7, kawe nụe i kitẹ měgausẹ̌ taumata wal᷊inẹ sarang acara Pẹ̌tatahěndungang?

¹⁰ I kitẹ měnodẹ kawawahani su tempong měgausẹ̌ keluarga, hapị su pělahal᷊ẹ̌kang, dingangu lampung gunang duměnta su acara Pẹ̌tatahěndungang. Kawe nụe i kitẹ měgausẹ̌ si sire? Ual᷊ingu i kitẹ sěbạe měngẹ̌ngarěga apa seng nikoạ i Yehuwa dingangi Yesus gunang i kitẹ, hakị u ene i kitẹ sěbạe mapulu měgausẹ̌ si sire sarang acara Pẹ̌tatahěndungang. I kitẹ mapulu i sire makaěbạ gunane bọu ”kapiang naung [i Yehuwa] sěbạe makạlaherang” ene kai tatěbusẹ̌.​—Basa Efesus 1:7; Why. 22:17.

¹¹ Su tempong i kitẹ bahani duměnta su pěngangibadang, i kitẹ lai něnodẹ sěmbaụ sipatẹ̌ maarěga wal᷊inẹ. I Yehuwa dingangi Yesus lai něnodẹ sipatẹ̌ ini dingangu cara makạlaherang.

12. (a) Kerea pěngangibadang makatoghasẹ̌ kakěndagi kitẹ si Yehuwa dingangi Yesus? (b) Kerea 2 Korintus 5:14, 15 makakoạ si kitẹ mapulu mẹ̌těno si Yesus?

¹² Ual᷊ingu makěndagẹ̌ si Yehuwa dingangi Yesus, i kitẹ duměnta su pěngangibadang. Pul᷊ise, apa niěndungang i kitẹ su pěngangibadang nakakoạ si kitẹ limembong makěndagẹ̌ si Yehuwa dingangu Ahuse. Su pěngangibadang, i kitẹ masau těntiroěng soal u apa seng nikoạ i rẹ̌dua gunang i kitẹ. (Rm. 5:8) Su acara Pẹ̌tatahěndungang, i kitẹ makatahěndung kerea kaguwạe kakěndagi rẹ̌dua su taumata, sarang lai su taumata apang bědang tawe něngarěga tatěbusẹ̌. Ual᷊ingu i kitẹ sěbạe měngẹ̌ngarěga kakěndagi rẹ̌dua, i kitẹ mětẹ̌tawakal᷊i mẹ̌těno si Yesus sabang ěllo. (Basa 2 Korintus 5:14, 15.) Bọu ene lai, naung i kitẹ mapulu mẹ̌dalo si Yehuwa ual᷊ingu i Sie seng něnadia tatěbusẹ̌. Sěmbaụ cara mẹ̌dalo si Sie ute měgělị komentarẹ̌ bọu dal᷊ungu naung i kitẹ su pěngangibadang.

13. Kerea i kitẹ měnodẹ i kitẹ kahěngang-hěngang makěndagẹ̌ si Yehuwa dingangu Ahuse? Lahẹko.

¹³ I kitẹ měnodẹ i kitẹ kahěngang-hěngang makěndagẹ̌ si Yehuwa dingangu Ahuse mạeng i kitẹ sadia měkoạ pengorbanan gunang i rẹ̌dua. Kasauange, i kitẹ harusẹ̌ měkoạ pengorbanan gunang duměnta su pěngangibadang. Lawọ sidang něngatorẹ̌ acara pěngangibadang koateng bawělo masueng hal᷊ẹ̌e, ěndịu kal᷊awokange bọu i kitẹ seng nal᷊owe. Pěngangibadang wal᷊inẹ nikoạ su Misa, su tempong kal᷊awokange taumata mapulu měngirul᷊e. Apa i Yehuwa masingkạ i kitẹ seng nẹ̌tawakal᷊i duměnta měngibadah maning seng nal᷊owe? Tantu i Sie masingkạ! Sěběnarẹ̌e, limembong mal᷊awọ pengorbanan nikoạ i kitẹ, Yehuwa lai limembong měngarěga kakěndagi kitẹ si Sie.​—Mrk. 12:41-44.

14. Kerea i Yesus něgělị contoh si kitẹ carane měnodẹ kakěndagẹ̌ dingangu sipatẹ̌ rela berkorban?

¹⁴ Yesus něgělị contoh si kitẹ kerea carane měnodẹ kakěndagẹ̌ dingangu sipatẹ̌ rela berkorban. Yesus tawe kětạeng sadia mate gunang manga murite, katewe i sie lai limembong mapadul᷊i si sire bal᷊inẹ su watangenge. Contone, i sie tatapẹ̌ něgělị tempone gunang manga murite maning i sie nal᷊owe dingangu nasusah naung. (Luk. 22:39-46) Kụ, i sie masau  mẹ̌tiněna apa botonge gělịkange su taumata wal᷊inẹ, bal᷊inẹ mẹ̌tiněna apa botonge kaěbakenge bọu taumata wal᷊inẹ. (Mat. 20:28) Mạeng i kitẹ makěndagẹ̌ si Yehuwa dingangu su anạu sěmbaụ, i kitẹ sarung mẹ̌tawakal᷊i duměnta su acara Pẹ̌tatahěndungang dingangu su pěngangibadang sabang misa.

15. I kitẹ kahumotongange mẹ̌tul᷊ung si sai?

¹⁵ Si kitẹ dingangu su anạu sěmbaụ i kitẹ su patikụ dunia piạ kakěndagẹ̌ tutune. I kitẹ mapulu měpakẹ lawọ tempong i kitẹ gunang měgausẹ̌ taumata wuhu mẹ̌komol᷊ẹ̌ dingangi kitẹ. Katewe, i kitẹ kahumotongange mapulu mẹ̌tul᷊ung ”anạu sěmbaụ i kitẹ tamba pangangimang” apang tawe aktif. (Gal. 6:10) I kitẹ měnodẹ kakěndagẹ̌ si sire su tempong měmahansang si sire gunang duměnta su pěngangibadang dingangu su acara Pẹ̌tatahěndungang. Kere i Yehuwa dingangi Yesus, i kitẹ sěbạe mal᷊uasẹ̌ su tempong i sire apang tawe aktif saụ nẹ̌bal᷊ị si Yehuwa, i Amang dingangu Měngangahạ makěndagẹ̌.​—Mat. 18:14.

16. (a) Kerea i kitẹ mẹ̌tatoghasẹ̌ sěmbaụ su wal᷊inẹ, kụ apa gunane pěngangibadang si kitẹ? (b) Kawe nụe ini kai tempo nẹ̌tatahino gunang mẹ̌tahěndung bawerang i Yesus su Yohanes 3:16?

¹⁶ Seng mal᷊ighạ i kitẹ sarung měgausẹ̌ lawọ taumata gunang duměnta su acara Pẹ̌tatahěndungang su Sambaiang bawělo, 19 April 2019. (Pěmanda kotak ”Apa i Kau Sarung Měgausẹ̌ si Sire?”) Su kanandụu taung ini, karimạko i kitẹ měnoghasẹ̌ sěmbaụ su wal᷊inẹ, carane ute duměnta su kěbị acara pěngangibadang seng nisadiang i Yehuwa gunang i kitẹ. Ual᷊ingu pěngěnsuengu dunia ini seng kakạranine, i kitẹ harusẹ̌ duměnta su pěngangibadang tadeạu i kitẹ tatapẹ̌ masanạ naung, bahani, dingangu makěndagẹ̌. (1 Tes. 5:8-11) Dingangu kaguwạu naung, mahịe i kitẹ měnodẹ pěngangarěga si Yehuwa dingangu Ahuse ual᷊ingu i rẹ̌dua seng kiměndagẹ̌ si kitẹ!​—Basa Yohanes 3:16.