1. Apa niul᷊ị i Yehuwa soal u manga hal᷊ẹ̌ sarung mariadi su zaman i kitẹ ini?

YEHUWA něněbal᷊ẹ̌ soal u zaman i kitẹ: ”Mapul᷊o esẹ bọu kěbị bangsa dingangu bawera sarung měněngal᷊ẹ̌ matoghasẹ̌ lakụu sěngkatau Yahudi, kụ maul᷊ị, ’I kami mapulu tumol᷊e si kamene, ual᷊ingu i kami nakaringihẹ̌ Mawu rụděndingang si kamene.’” (Za. 8:23) ”Sěngkatau Yahudi” ene mangal᷊ene i sire apang nilanisu rohkẹ̌ u Mawu. I sire lai isẹ̌sěbạ ”Israel tataghuanengu Mawu”. (Gal. 6:16) ”Mapul᷊o esẹ” mangal᷊ene i sire apang piạ pělaharapẹ̌ měbiahẹ̌ kěkalẹ̌ su dunia. I sire masingkạ Yehuwa dụděndingang si sire apang nilanisẹ̌, kụ i sire mal᷊uasẹ̌ botonge sěngkasio měněmbah si Yehuwa dingangi sire apang nilanisẹ̌.

2. Kerea carane ”mapul᷊o esẹ” tumol᷊e si sire apang nilanisẹ̌?

² Maning běga i sai-sai taumata apang nilanisẹ̌ orasẹ̌ ini, * i sire apang piạ pělaharapẹ̌ měbiahẹ̌ kěkalẹ̌ su dunia botonge ”tumol᷊e” si sire apang nilanisẹ̌. Kerea carane? Alkitapẹ̌ naul᷊ị ”mapul᷊o esẹ” sarung ”měněngal᷊ẹ̌ matoghasẹ̌ lakụu sěngkatau Yahudi, kụ maul᷊ị, ’I kami mapulu tumol᷊e si kamene, ual᷊ingu i kami nakaringihẹ̌ Mawu rụděndingang si kamene.’” Ayatẹ̌ ini nẹ̌sěbạ ”sěngkatau Yahudi”. Katewe, bawera ”si kamene” ene mangal᷊ene lawọ taumata. Hakị u ene, sěngkatau Yahudi ene bal᷊inẹ kětạeng sěngkatau, katewe mangal᷊ene sěngkomol᷊ang tau Kristen apang nilanisẹ̌. Taumata apang  tawe nilanisẹ̌ nẹ̌tahamawu si Yehuwa sěngkasio dingangu taumata apang nilanisẹ̌. Katewe, i sire tawe mẹ̌pěndang taumata apang nilanisẹ̌ kai těmbonang i sire, ual᷊ingu masingkạ i Yesus kai Těmbonang i sire.​—Mat. 23:10.

3. Manga kakiwal᷊o apa sarung simbaheng su pěngangěndungang ini?

³ Ual᷊ingu su tal᷊oarang i kitẹ bědang piạ tau Kristen apang nilanisẹ̌, aramanung i kitẹ měkẹ̌kiwal᷊o: (1) Kerea taumata apang nilanisẹ̌ harusẹ̌ měmanda watangeng i sire? (2) Kerea cara i kitẹ měkoạ si sire apang kimaěng borotẹ̌ dingangu něnginung anggorẹ̌ su acara Pẹ̌tatahěndungang? (3) Apa i kitẹ harusẹ̌ guměnggang mạeng taumata apang něngal᷊ạ bageang turusẹ̌ natambah kakạl᷊awọe? Manga kakiwal᷊o ini sarung simbaheng su pěngangěndungang ini.

4. Sasasa apa su 1 Korintus 11:27-29 harusẹ̌ kahěngang-hěngang tiněnaěngu taumata apang nilanisẹ̌, kụ kawe nuẹ?

⁴ Taumata apang nilanisẹ̌ harusẹ̌ kahěngang-hěngang mẹ̌tiněna sasasa su 1 Korintus 11:27-29. (Basa.) Aramanung, kerea sěngkatau apang nilanisẹ̌ měngal᷊ạ bageang dingangu cara ”tawe layak” su Pẹ̌tatahěndungang? I sie měngal᷊ạ bageang  dingangu cara ”tawe layak” mạeng kimaeng borotẹ̌ dingangu něnginung anggorẹ̌ sěmbal᷊ia i sie tawe měbẹ̌biahẹ̌ tuhụ standar i Yehuwa. (Ibr. 6:4-6; 10:26-29) Taumata apang nilanisẹ̌ masingkạ i sire harusẹ̌ tatapẹ̌ satia mạeng mapulu měnarimạ ”hadiah bọu Mawu, ene kai kakui sarang sorga lumiung Yesus Kristus”.​—Flp. 3:13-16.

5. Kerea taumata apang nilanisẹ̌ harusẹ̌ měmanda watangeng i sire?

⁵ Rohkẹ̌ i Yehuwa mẹ̌tul᷊ung manga ělang’E gunang masanạ naung. (Ef. 4:1-3; Kol. 3:10, 12) Hakị u ene, taumata apang nilanisẹ̌ tawe mẹ̌pěndang watangenge limembong marangẹ sul᷊ungu taumata wal᷊inẹ. I sire masingkạ Yehuwa tawe něgělị rohkẹ̌ masusi si sire limembong mal᷊awọ sul᷊ungu su ělang’E wal᷊inẹ. I sire tawe nẹ̌pěndang i sire limembong masingkạ soal u Alkitapẹ̌ sul᷊ungu taumata wal᷊inẹ. I sire lai tawe naul᷊ị su taumata wal᷊inẹ i sire seng nilanisẹ̌ kụ sarung měngal᷊ạ bageang su acara Pẹ̌tatahěndungang. Katewe, i sire masanạ naung měngakui taumata botonge makoạ sarang sorga ual᷊ingu nipileng i Yehuwa.

6. Tumuhụ 1 Korintus 4:7, 8, harusẹ̌ kerea kakanoạu tau Kristen apang nilanisẹ̌?

⁶ Maning pělaharapẹ̌ sarang sorga ene sěbạe luar biasa, i sire apang nilanisẹ̌ tawe mělẹ̌harapẹ̌ taumata wal᷊inẹ měkoạ si sire dingangu cara istimewa. (Flp. 2:2, 3) I sire lai masingkạ, Yehuwa tawe naul᷊ị su taumata wal᷊inẹ su tempong i Sie nělanisẹ̌ si sire. Hakị u ene, tau nilanisẹ̌ tawe huměkosẹ̌ mạeng taumata wal᷊inẹ tawe langsung mangimang i sie seng nilanisẹ̌. I sie sadarẹ̌, Alkitapẹ̌ seng naul᷊ị si kitẹ abe langsung mangimang mạeng piạ taumata maul᷊ị i sie kai nakaěbạ tugasẹ̌ bọu Mawu. (Why. 2:2) Tau Kristen apang nilanisẹ̌ lai madiri maul᷊ị su taumata buhudeng nikěnal᷊ẹ̌e i sie kai seng nilanisẹ̌ ual᷊ingu i sie madiri taumata wal᷊inẹ měkoạ si sie dingangu cara istimewa. Kụ, i sie madiri měngobotu watangenge hala.​—Basa 1 Korintus 4:7, 8.

7. Tau Kristen apang nilanisẹ̌ madiri měkoạ apa, kụ kawe nụe?

⁷ Tau Kristen apang nilanisẹ̌ tawe nẹ̌tiněna i sire harusẹ̌ mědal᷊ahapị kětạeng dingangu taumata apang nilanisẹ̌, arau mẹ̌pěndang i sire kai bageang bọu kelompok istimewa. I sire tawe nědeạ taumata wal᷊inẹ apang nilanisẹ̌ gunang mẹ̌bisara soal u hak istimewang i sire arau gunang měkoạ kelompok pěngangěndungang Alkitapẹ̌ khusus. (Gal. 1:15-17) Sidang tawe masěmbaụ mạeng i sire měkoạ manga hal᷊ẹ̌ ene. Ual᷊ingu měkoạ manga hal᷊ẹ̌ ene mẹ̌sul᷊ungu lumawang rohkẹ̌ masusi seng nẹ̌tul᷊ung ělangu Mawu masěmbaụ dingangu mararame.​—Rm. 16:17, 18.

8. Kawe nụe i kitẹ tawe wotonge mapakawantugẹ̌ si sire apang něngal᷊ạ bageang su acara Pẹ̌tatahěndungang? (Pěmanda lai catatan kaki.)

⁸ Kerea cara i kitẹ měkoạ si sire apang nilanisẹ̌? Maning i sire anạu sěngkataung i Kristus, nẹ̌sal᷊a mạeng i kitẹ mapakawantugẹ̌ si sire. (Mat. 23:8-12) Su tempong Alkitapẹ̌ nẹ̌bisara soal u manga penatua, Alkitapẹ̌ něgausẹ̌ si kitẹ gunang ’mẹ̌těno pangangimang i sire’ bal᷊inẹ měhengkẹ taumata makoạ těmbonang i kitẹ. (Ibr. 13:7) Memang, Alkitapẹ̌ naul᷊ị piạ taumata harusẹ̌ adateng i kitẹ ”duang sul᷊ẹ limembong mal᷊awọ”. Katewe, ini ual᷊ingu i sire ”měngangahạ mapaelẹ̌” dingangu mělẹ̌hal᷊ẹ̌ masěghadẹ̌ gunang ”měhabarẹ̌ lai měněntiro” bal᷊inẹ ual᷊ingu i sire seng nilanisẹ̌. (1 Tim. 5:17) Mạeng i kitẹ tumanịu mal᷊awọ mẹ̌dalo dingangu měgělị perhatian si sire apang nilanisẹ̌, i kitẹ makakoạ si sire mamea. * Kụ, limembong dal᷊akị lai, ene makakoạ si sire maobotẹ̌. (Rm. 12:3) I kitẹ madiri měkoạ anạu sěngkataung i Kristus apang nilanisẹ̌ měkoạ pẹ̌sasal᷊a gěguwạ.​—Luk. 17:2.

9. Kerea měnodẹ i kitẹ měngẹ̌ngadatẹ̌ tau Kristen apang nilanisẹ̌?

⁹ Kerea i kitẹ měnodẹ i kitẹ měngẹ̌ngadatẹ̌ si sire apang nilanisẹ̌ i Yehuwa? I kitẹ tawe mẹ̌kiwal᷊o si sire kerea sarang i sire nilanisẹ̌. Ini kai urusange hala, kụ i kitẹ tawẹ apa hakẹ̌ gunang makasingkạ soal u ene. (1 Tes. 4:11; 2 Tes. 3:11) Kụ, abe pẹ̌tiněna kawinge, matimade, arau anggota kěluargane lai nilanisẹ̌. Pělaharapẹ̌ měbiahẹ̌ su sorga bal᷊inẹ pusakạ bọu keluarga. I sie něnarimạ ene bọu Mawu. (1 Tes. 2:12) I kitẹ lai madiri mẹ̌kiwal᷊o kakiwal᷊o makakadodọ naunge. Contone, i kitẹ tawe mẹ̌kiwal᷊o su kawingu tau apang nilanisẹ̌ kerea pěndange mẹ̌biahẹ̌ kěkalẹ̌ su dunia mạeng kawinge tawe dịe. I kitẹ botonge mangimang su dunia wuhu, Yehuwa sarung ”mapakawatụ kěbị kapulung apang biahẹ̌”.​—Mz. 145:16.

10. Apa gunane mạeng i kitẹ tawe mapakawantugẹ̌ taumata?

¹⁰ Mạeng i kitẹ tawe mẹ̌pěndang tau Kristen apang nilanisẹ̌ limembong penting sul᷊ungu taumata wal᷊inẹ, ini piạ gunane si kitẹ hala. Kawe nụe? Alkitapẹ̌ naul᷊ị piạ taumata apang nilanisẹ̌ nakoạ tawe satia. (Mat. 25:10-12; 2 Ptr. 2:20, 21) Mạeng i kitẹ madiri mapakawantugẹ̌ taumata, i kitẹ tawe mariadi tumatol᷊eng taumata, maning lai i sire nilanisẹ̌, arau taumata terkenal, arau i sire apang seng marěngụ nakoạ ělang i Yehuwa. (Yud. 16) Hasile, su tempong i sire nakoạ tawe satia arau siměbang bọu sidang, i kitẹ tawe kailangengu pangangimang i kitẹ si Yehuwa arau měngědo mẹ̌tahamawu si Sie.

11. Soal u kal᷊awọe apang něngal᷊a bageang su acara Pẹ̌tatahěndungang, apa nariadi su ral᷊ungu pira taung ini?

¹¹ Su tempong tamai, taumata apang něngal᷊ạ bageang su acara Pẹ̌tatahěndungang turusẹ̌ kakạhal᷊ine. Katewe, su ral᷊ungu pira taung ini i sire apang něngal᷊ạ bageang sauneng kakạl᷊awọe. Apa i kau harusẹ̌ guměnggang soal u hal᷊ẹ̌ ene? Tala. Mahịe i kitẹ měngěndung kawe nụe i kite tawe harusẹ̌ guměnggang.

12. Kawe nụe i kitẹ tawe harusẹ̌ guměnggang soal u kal᷊awọe i sire apang něngal᷊a bageang su acara Pẹ̌tatahěndungang?

¹² ”Yehuwa masingkạ taumata apang nakoạ tataghuaneng’E”. (2 Tim. 2:19) Bal᷊inẹ kere i Yehuwa, anạu sěmbaụ apang něndekeng kal᷊awọe i sire apang něngal᷊ạ bageang su acara Pẹ̌tatahěndungang běga  i sai-sai kahěngang-hěngang nilanisu Mawu. Hakị u ene, i sire apang nirekeng nasuẹ̌ lai taumata apang nẹ̌pěndang i sire nilanisu Mawu katewe sěběnarẹ̌e tala. Contone, pirang katau apang bọu něngal᷊ạ bageang samurine něngědo něngal᷊ạ bageang. Pirang katau lai aramanung piạ gangguan mental arau emosi kụ nakakoạ si sire nẹ̌pěndang i sire lai sarung mẹ̌parenta dingangi Yesus su sorga. Nal᷊ahẹ, i kitẹ běga pira kal᷊awọe i sire apang nilanisẹ̌ kụ bědang ene su dunia orasẹ̌ ini.

13. Apa Alkitapẹ̌ naul᷊ị pira kal᷊awọe tau Kristen apang nilanisẹ̌ mal᷊ěmbe su dunia su tempong kasasusah masaria něnětạ nariadi?

¹³ Sarung piạ taumata apang nilanisẹ̌ su piram baụ tampạ su dunia su tempong i Yesus duměnta gunang mẹ̌bawa si sire sarang sorga. (Mat. 24:31) Tumuhụ Alkitapẹ̌ sarung piạ komol᷊ang kadodọ apang nilanisẹ̌ su dunia su kanandụu ěllo pěngěngsuenge. (Why. 12:17) Katewe, Alkitapẹ̌ tawe naul᷊ị pira kal᷊awọe taumata apang nilanisẹ̌ mal᷊ěmbe su dunia su tempong kasasusah masaria něnětạ nariadi.

14. Tumuhụ Roma 9:11, 16, apa harusẹ̌ kasingkateng i kitẹ soal u cara Yehuwa měmile taumata apang nilanisẹ̌?

¹⁴ Yehuwa měmutusẹ̌ kange měmile si sire apang nilanisẹ̌. (Rm. 8:28-30) Yehuwa něnětạ němilẹ̌ taumata apang nilanisẹ̌ su apang i Yesus seng saụ nipěbiahẹ̌ bọu papate. Kakělaěng, kěbị tau Kristen tutune su abad humotong kai tau Kristen nilanisẹ̌. Pira hasụ taung tuhụe, kal᷊awokange taumata apang měngẹ̌ngaku Kristen tawe kahěngang-hěngang timol᷊e kakanoạ i Kristus. Maning kerene, su tempo ene, Yehuwa tatapẹ̌ nělanisẹ̌ pirang katau tau Kristen tutune. Kere niul᷊ị i Yesus, i sire ene mẹ̌sul᷊ung  gandum timuwo su tal᷊oarang ěhe. (Mat. 13:24-30) Su kanandụu ěllo pěngěngsuenge, Yehuwa turusẹ̌ měmẹ̌mile taumata gunang makoạ bageang bọu 144.000. * Hakị u ene, mạeng Mawu němutusẹ̌ mělanisẹ̌ pirang katau su ěllo pěngěngsuenge ini, i kitẹ tantu tawe měmorotesẹ̌ putusang’E. (Basa Roma 9:11, 16.) * I kitẹ abe makoạ kere manga mělahal᷊ẹ̌ su papinintu i Yesus. I sire němorotesẹ̌ cara tuang i sire měkoạ taumata apang buhudeng něhal᷊ẹ̌ su pěngěngsuengu ěllo ene.​—Mat. 20:8-15.

15. Apa kěbị tau Kristen apang nilanisẹ̌ kai ”ělang masatia dingangu matahuěna” nisěbạ su Matius 24:45-47? Lahẹko.

¹⁵ Tawe kěbị taumata apang piạ pělaharapẹ̌ měbiahẹ̌ su sorga sarung makoạ ”ělang masatia dingangu matahuěna”. (Basa Matius 24:45-47.) Kere su abad humotong, orasẹ̌ ini i Yehuwa dingangi Yesus něpakẹ pirang katau esẹ gunang měgělị kaěng, arau měněntiro lawọ taumata. Kětạeng pirang katau Kristen apang nilanisẹ̌ su abad humotong nipakẹ gunang měmohẹ Manga Bukẹ̌ Yunani Kristen. Orasẹ̌ ini, kětạeng pirang katau tau Kristen apang nilanisẹ̌ nighělikangu tanggung jawab gunang měgělị ”kaěng nẹ̌tatahino su tempone” su ělangu Mawu.

16. Apa nikaěndungang i kitẹ su pěngangěndungang ini?

¹⁶ Apa nikaěndungang i kitẹ su pěngangěndungang ini? Yehuwa němutusẹ̌ gunang měgělị pěbawiahẹ̌ kěkal᷊ẹ̌ su dunia gunang kal᷊awokange ělang’E dingangu pěbawiahẹ̌ su sorga gunang pirang katau apang mẹ̌parenta dingangi Yesus. Yehuwa měngal᷊amatẹ̌ kěbị ělang’E tawẹ soale i sire ”sěngkatau Yahudi” arau ”mapul᷊o esẹ”. Kụ, i Sie lai nẹ̌dorong si sire tumuhụ hukung mẹ̌sul᷊ung dingangu tatapẹ̌ masatia. I kitẹ kěbị harusẹ̌ tatapẹ̌ masanạ naung. I kitẹ kěbị harusẹ̌ mẹ̌tahamawu si Sie sěngkasio dingangu masěmbaụ. Kụ lai, i kitẹ kěbị harusẹ̌ mẹ̌tawakal᷊i měndiagạ pẹ̌darame su ral᷊ungu sidang. Kakạranine pěngěngsuengu dunia ini, mahịe i kitẹ mẹ̌tahamawu si Yehuwa dingangu tumol᷊e si Kristus masěmbaụ kere ”gapaěng sěmbaụ”.​—Yoh. 10:16.