1-2. Situasi apa tẹ̌tatěngongu manga ělang i Yehuwa, kụ apa tětal᷊e si sire?

PẸ̌TINĚNA tatělu situasi ini: Sěngkatau saudara mangudạ nakaěbạ sakị mawěhạ kụ nakal᷊ome si sie. Sěngkatau saudara umure nal᷊iu wọu 50 su taunge nikailangengu hal᷊ẹ̌, kụ maning seng nẹ̌tawakal᷊i nědeạ hal᷊ẹ̌, i sie bědang tawe nakaěbạ hal᷊ẹ̌ buhu. Sěngkatau saudari maghurang seng tawe nakakoạ mal᷊awọ gunang pelayanan si Yehuwa, kere kẹ̌koatenge kangerẹ.

² Mạeng nakahombang situasi kerene, aramanung i kau nẹ̌pěndang seng tawẹ apa gunane. Situasi kerene sarung makailang karal᷊uasẹ̌, makakoạ si kau makadodọ naung, kụ lai piạ pěngarune su pẹ̌dal᷊ahapịu dingangu taumata wal᷊inẹ.

3. Kerea Setang dingangu taumata apang tụtol᷊e tiněnane měmanda pěbawiahu taumata?

³ Dunia ini něnodẹ tiněnang Setang soal u pěbawiahẹ̌. Setang měkẹ̌koạ taumata mẹ̌sul᷊ungu tawẹ arěgane. Setang tawẹ tatal᷊ěntụe naul᷊ị si Hawa i sie botonge měbiahẹ̌ bebasẹ̌ mạeng tawe tumuhụ su Mawu, sěmbal᷊ia Setang masingkạ tětal᷊e ute papate. Orasẹ̌ ini, Setang lai měngẹ̌ngul᷊ing sistem perdagangan, politik, dingangu agama. Hakị u ene, tawe maherang mạeng pengusaha, těmbonangu politikẹ̌, dingangu těmbonangu agama tawe měngẹ̌ngarěga pěbawiahu taumata dingangu tawe mapadul᷊i su pěndangu taumata.

4. Apa sarung ěndungang i kitẹ su pěngangěndungang ini?

⁴ Katewe, Yehuwa sěbạe nẹ̌tatěntang bọu Setang. Yehuwa mapulu i kitẹ masingkạ i kitẹ kai maarěga. I Sie lai mapulu mẹ̌tul᷊ung su tempong i kitẹ nakahombang situasi masigěsạ nakakoạ si kitẹ nẹ̌pěndang tawe maarěga. (Mz. 136:23; Rm. 12:3) Su pěngangěndungang ini i kitẹ sarung měngěndung kerea Yehuwa mẹ̌tul᷊ung si kitẹ su situasi ini: (1) Su tempong i kitẹ masakị, (2) su tempong masigěsạ mědeạ doitẹ̌, dingangu (3) su tempong i kitẹ nẹ̌pěndang i kitẹ seng tawe apa  gunane si Yehuwa ual᷊ingu i kitẹ seng maghurang. Katewe humotong, mahịe měngěndung kawe nụe i kitẹ botonge mangimang i kitẹ maarěga su těngong Yehuwa.

5. Apa buktine taumata maarěga su těngong Yehuwa?

⁵ Maning i kitẹ nikoạ bọu ěntana, katewe sěběnarẹ̌e i kitẹ limembong maarěga bọu ěntana. (Kej. 2:7) Pẹ̌tiněna piram baụ alasang kawe nụe i kitẹ botonge mangimang i kitẹ maarěga su těngong Yehuwa. Yehuwa něndiadi taumata dingangu kemampuan gunang mẹ̌těno manga sipat’E. (Kej. 1:27) Su tempong někoạ ene, i Sie někoạ si kitẹ limembong kapaelange bọu kěbị apa niriadi-Ne su dunia ini. I Sie lai někoạ si kitẹ botonge mẹ̌kawasa binatang dingangu dunia.​—Mz. 8:4-8.

6. Apa lai nakakoạ si kitẹ mangimang Yehuwa měngẹ̌ngarěga taumata tawe nasukụ?

⁶ Maning i Adam nẹ̌dosa, Yehuwa tatapẹ̌ měngẹ̌ngarěga taumata. I Sie sěbạe měngẹ̌ngarěga si kitẹ, sarang i Sie něgělị Yesus, Ahuse ikẹ̌kěndagẹ̌, gunang měněbusẹ̌ dosang i kitẹ. (1 Yoh. 4:9, 10) Ual᷊ingu piạ tatěbusi Yesus, Yehuwa piạ dasarẹ̌ gunang saụ mapakawiahẹ̌ taumata apang seng nate ual᷊ingu dosang i Adam, tawẹ soale ”taumata měkẹ̌koạ barang nihino arau tawe nihino”. (Kis. 24:15) Hengetangu Mawu něnodẹ i kitẹ maarěga su těngong Mawu tawẹ soale i kitẹ masakị, tawẹ apa roitẹ̌, arau seng maghurang.​—Kis. 10:34, 35.

7. Alasang apa lai nakakoạ manga ělang i Yehuwa mangimang Yehuwa měngẹ̌ngarěga si sire?

⁷ Piạ lai alasang wal᷊inẹ makakoạ si kitẹ mangimang Yehuwa měngẹ̌ngarěga si kitẹ. I Sie seng němol᷊eng si kitẹ sarang i Sie, kụ i Sie lai měmẹ̌manda reaksing i kitẹ su tempong nakaringihẹ̌ habarẹ̌ mapia. (Yoh. 6:44) Su tempong i kitẹ něnětạ nẹ̌těngkarani si Yehuwa, Yehuwa lai nẹ̌těngkarani si kitẹ. (Yak. 4:8) Bọu ene lai, Yehuwa mapulu mẹ̌tawakal᷊i dingangu měpakẹ tempo gunang měněntiro si kitẹ. Ini něnodẹ i kitẹ maarěga su těngo-Ne. I Sie masingkạ i kitẹ kai taumata kerea dingangu i Sie masingkạ i kitẹ botonge makoạ taumata limembong mapia. Yehuwa lai něgělị disiplin si kitẹ ual᷊ingu i Sie makěndagẹ̌ si kitẹ. (Amsal 3:11, 12) Ene kěbị nakakoạ si kitẹ kahěngang-hěngang mangimang Yehuwa měngẹ̌ngarěga si kitẹ!

8. Kerea Mazmur 18:27-29 botonge makatul᷊ung si kitẹ piạ tiněna positif su tempong tumatěngo masalang i kitẹ?

⁸ Maning pirang katau nẹ̌pěndang i Datu Daud kai taumata tawẹ apa gunane, Daud masingkạ Yehuwa makěndagẹ̌ dingangu mětẹ̌tul᷊ung si sie. Ene nakatul᷊ung si Daud piạ tiněna positif su tempong timatěngo masalane. (2 Sam. 16:5-7) Su tempong sěbạe nasusah naung arau nakahombang masalah, Yehuwa botonge mẹ̌tul᷊ung si kitẹ měmal᷊ui tiněnang i kitẹ. Yehuwa lai botonge mẹ̌tul᷊ung si kitẹ tumatěngo masalah ene. (Basa Mazmur 18:27-29.) Ual᷊ingu Yehuwa mětẹ̌tul᷊ung, tawẹ apa makaědo si kitẹ mẹ̌tahamawu si Sie dingangu karal᷊uasẹ̌. (Rm. 8:31) Orasẹ̌ ini, mahịe měngěndung tatělu situasi aramanung tẹ̌tatěngong i kitẹ. Su tatělu situasi ini, i kitẹ harusẹ̌ mẹ̌tahěndung Yehuwa makěndagẹ̌ dingangu měngẹ̌ngarěga si kitẹ.

9. Kerea sakị piạ pěngarune su cara i kitẹ měmanda watangeng i kitẹ?

⁹ Mạeng i kitẹ nasakị, ene piạ pěngarune su pěndang i kitẹ, kụ makakoạ si kitẹ nẹ̌pěndang i kitẹ seng tawẹ apa gunane su taumata wal᷊inẹ. I kitẹ aramanung mamea su tempong taumata nakasingkạ i kitẹ masakị arau su tempong i kitẹ harusẹ̌  makitul᷊ung su taumata wal᷊inẹ. Arau, maning taumata běga i kitẹ masakị, i kitẹ aramanung mamea ual᷊ingu seng tawe makakoạ manga hal᷊ẹ̌ biasa kẹ̌koateng i kitẹ. Su tempo masigěsạ kerene, kerea Yehuwa měnoghasẹ̌ si kitẹ?

10. Tumuhụ Amsal 12:25, apa makatul᷊ung si kitẹ su tempong i kitẹ masakị?

¹⁰ Su tempong masakị, ”bawera mapia” sarung makasěmangatẹ̌ si kitẹ. (Basa Amsal 12:25.) Su Alkitapẹ̌, Yehuwa seng něndesọ lawọ bawera mapapia kụ makakoạ si kitẹ mẹ̌tahěndung i kitẹ maarěga su těngo-Ne, maning i kitẹ masakị. (Mz. 31:19; 41:3) Mạeng i kitẹ mẹ̌basa manga bawera ene, arau saụ mẹ̌basa manga bawera ene pirang sul᷊ẹ, Yehuwa sarung mẹ̌tul᷊ung si kitẹ měnděmẹ pěndang negatif ual᷊ingu sakị i kitẹ.

11. Kerea sěngkatau saudara nakapěndang tul᷊umang i Yehuwa?

¹¹ Pẹ̌tiněna pengalaman i Julio. * Su tempong mangudạ, i sie nakaěbạ sakị nakakoạ badange masahawụ nělome. Sakịe ene nakakoạ si sie nẹ̌pěndang tawẹ apa gunane. Julio naul᷊ị, ”Iạ tawe sadia tumatěngo tětal᷊u sakịku. Iạ lai sěbạe namea ual᷊ingu taumata masau měmanda si siạ. Su tempong sakịku kakạwěhạe, iạ nẹ̌tiněna kerea pěbawiahẹ̌ku sarung mẹ̌bal᷊ui. Iạ sěbạe nasusah naung, kụ iạ nẹ̌dorong tul᷊ung si Yehuwa.” Kerea Yehuwa nẹ̌tul᷊ung si Julio? ”Ual᷊ingu masigěsạ mẹ̌tiněna, iạ nighělịkangu těgu gunang mẹ̌basa kětạeng piram baụ ayatẹ̌ su ral᷊ungu sěngsul᷊ẹ mẹ̌basa. Iạ nighělịkangu těgu gunang mẹ̌basa bukẹ̌ Mazmur něnodẹ kerea Yehuwa mapadul᷊i su umat’E. Su ral᷊ungu sahěllo, iạ nẹ̌basa pirang sul᷊ẹ manga ayatẹ̌ ene, kụ ene sěbạe nakahiborẹ̌ dingangu nakatoghasẹ̌ si siạ. Kakạrěngụe, taumata něnětạ nakasilo iạ limembong masau huměming. I sire lai nẹ̌bera  i sire natoghasẹ̌ ual᷊ingu nakasilo iạ mal᷊uasẹ̌. Iạ nasadarẹ̌ Yehuwa simimbahẹ̌ daroaku. I Sie nẹ̌tul᷊ung si siạ němal᷊ui cara iạ mẹ̌tiněna soal u watangengku. Iạ něnětạ fokus su bawerang Alkitapẹ̌ nělahẹ Yehuwa tatapẹ̌ měngẹ̌ngarěga si siạ maning iạ masakị.”

12. Su tempong nasakị, apa wotonge koatengu tadeạu makatarimạ tul᷊umang i Yehuwa?

¹² Mạeng i kau nasakị, pangimangke Yehuwa masingkạ apa nariadi si kau. Pẹ̌dorongke tadeạu i Sie mẹ̌tul᷊ung si kau piạ tiněna nihino soal u situasinu. Bọu ene, pědeạe bawera makahiborẹ̌ seng nisadiang i Yehuwa gunang i kau su Alkitapẹ̌. I kau botonge fokus su manga ayatẹ̌ něnodẹ Yehuwa sěbạe měngẹ̌ngarěga manga ělang’E. Mạeng měkoạ ene, i kau sarung makasilo Yehuwa mapia su taumata apang masatia mẹ̌tahamawu si Sie.​—Mz. 84:11.

13. Aramanung, kerea pěndangu těmbonangu keluarga su tempong nikailangengu hal᷊ẹ̌?

¹³ Kěbị těmbonangu keluarga tantu mapulu měnukụ kebutuhan kěluargane. Katewe, sěngkatau saudara aramanung nikailangengu hal᷊ẹ̌e maning i sie tawe někoạ pẹ̌sasal᷊a. Ěndịu i sie seng nẹ̌tawakal᷊i nědeạ hal᷊ẹ̌, katewe tawe nakaěbạ. Su situasi kerene, aramanung i sie nẹ̌pěndang i sie seng tawẹ apa gunane. Kerea dianding Yehuwa botonge makatoghasẹ̌ si sie?

14. Kawe nụe Yehuwa sěntiniạ měkẹ̌koạ apa seng niriandi-Ne?

¹⁴ Yehuwa sěntiniạ měkẹ̌koạ apa seng niriandi-Ne. (Yos. 21:45; 23:14) I Sie někoạ ene ual᷊ingu piram baụ alasang. Sěmbaụ alasange ute ual᷊ingu ene piạ pěngarune su areng’E. Yehuwa seng nẹ̌diandi sarung měnukụ kebutuhan manga ělang’E masatia, kụ i Sie piạ tanggung jawab gunang měkoạ apa seng niriandi-Ne ene. (Mz. 31:1-3) Yehuwa lai masingkạ i kitẹ, anggota  kěluarga-Ne, sarung masusah naung mạeng i Sie tawe měnadia kebutuhan i kitẹ. Yehuwa seng nẹ̌diandi sarung měnadia kebutuhan jasmani dingangu rohaning i kitẹ. Tawẹ apa makaědo si Yehuwa měkoạ apa seng niriandi-Ne ene!​—Mat. 6:30-33; 24:45.

15. (a) Kasasigěsạ apa nikahombangengu tau Kristen su abad humotong? (b) Manga bawera su Mazmur 37:18, 19 nakakoạ si kitẹ mangimang apa?

¹⁵ Mạeng mẹ̌tahěndung kawe nụe Yehuwa sěntiniạ měkẹ̌koạ apa seng niriandi-Ne, i kitẹ sarung mangimang Yehuwa mang mẹ̌tul᷊ung su tempong i kitẹ masigěsạ mědeạ doitẹ̌. Pẹ̌tiněna pengalaman tau Kristen su abad humotong. Su tempong tau Kristen nirarihang su Yerusalem, ”i sire kěbị, kecuali manga rasulẹ̌, nasal᷊iawuhẹ̌”. (Kis. 8:1) Pẹ̌tiněna apa suwụe si sire. Aramanung, i sire nikailangengu wal᷊e dingangu hal᷊ẹ̌ arau bisnis i sire hakị u ene i sire nakahombang masalah ekonomi. Maning kerene, Yehuwa tawe něněntang si sire. I sire lai tatapẹ̌ mal᷊uasẹ̌. (Kis. 8:4; Ibr. 13:5, 6; Yak. 1:2, 3) Yehuwa turusẹ̌ nẹ̌tul᷊ung tau Kristen masatia ene, kụ i Sie lai sarung turusẹ̌ mẹ̌tul᷊ung si kitẹ.​—Basa Mazmur 37:18, 19.

16. Aramanung, apa nakakoạ si kitẹ nẹ̌tiněna ibadang i kitẹ seng tawe maarěga su těngong Yehuwa?

¹⁶ Su tempong seng maghurang, i kitẹ aramanung něnětạ nẹ̌tiněna i kitẹ seng tawe nakaghělị mal᷊awọ gunang Yehuwa. Datu Daud aramanung nẹ̌pěndang kerene su tempong i sie seng maghurang. (Mz. 71:9) Kerea Yehuwa botonge mẹ̌tul᷊ung si kitẹ?

17. Apa wotonge kaěndungang i kitẹ bọu pengalaman sěngkatau saudari arenge Joanna?

¹⁷ Pẹ̌tiněna pengalaman sěngkatau saudari arenge Joanna. I sie nakaěbạ undangan  gunang tumol᷊e pelatihan su Banalang Kararatuang soal u carane měngurusẹ̌ manga bangunan pẹ̌paketang gunang pelayanan si Yehuwa. I sie nẹ̌bera, ”Iạ seng maghurang, wal᷊u, kụ tawẹ apa keterampilan botonge paketang i Yehuwa. Iạ tawẹ apa gunane.” Su hěbi dịěllone piạ pelatihan, i sie nẹ̌běke lohongu naunge si Yehuwa. Dịěllone, su Banalang Kararatuang, i sie bědang gụgěnggang apa seng nihino i sie ene sene. Su pelatihan ene, sěngkatau saudara naul᷊ị keterampilan i kitẹ kahumotongange ene kai sipatẹ̌ mapulu těntirong i Yehuwa. Joanna nẹ̌tahěndung, ”Iạ nẹ̌pikirẹ̌, ’Si siạ piạ keterampilan ene!’ Iạ něnětạ simangị su tempong nasadarẹ̌ Yehuwa simimbahẹ̌ daroaku. I Sie nẹ̌tul᷊ung si siạ nakaěna si siạ bědang piạ barang maarěga botonge gělikangku, kụ i Sie mapulu melatih si siạ!” Joanna nẹ̌tahěndung, ”Su tempong iạ simongo su pelatihan ene, iạ gugup dingangu tawe percaya diri. Katewe, su tempong napul᷊ẹ bọu ene, iạ natoghasẹ̌, limembong percaya diri, dingangu nẹ̌pěndang iạ piạ gunane!”

18. Kerea Alkitapẹ̌ něnodẹ Yehuwa tatapẹ̌ měngẹ̌ngarěga pelayanan i kitẹ maning i kitẹ sauneng kakạgurange?

¹⁸ Maning i kitẹ sauneng kakạgurange, Yehuwa bědang měpakẹ si kitẹ gunang měkoạ hal᷊ẹ̌’E. (Mz. 92:12-15) I kitẹ aramanung nẹ̌pěndang apa nikoạ arau nighělị i kitẹ ene kadodọ. Katewe, Yesus něněntiro apa nighělị i kitẹ ene maarěga su těngong Yehuwa. (Luk. 21:2-4) Hakị u ene, pẹ̌tiněnạe apa wotonge ikakoạu. Contone, i kau botonge mẹ̌bisara soal i Yehuwa su taumata wal᷊inẹ, mẹ̌doa gunang anạu sěmbaụ, dingangu měnoghasẹ̌ si sire tadeạu tatapẹ̌ masatia. Yehuwa měmanda i kau kai hapị sěngkapěhal᷊ẹ̌ dingang’E, bal᷊inẹ ual᷊ingu apa wotonge ikakoạu, katewe ual᷊ingu i kau mapulu tumuhụ si Sie.​—1 Kor. 3:5-9.

19. Bawera su Roma 8:38, 39 nakakoạ si kitẹ mangimang apa?

¹⁹ Yehuwa kai Mawu sěbạe měngẹ̌ngarěga taumata apang mětẹ̌tahamawu si Sie. I kitẹ tantu sěbạe mal᷊uasẹ̌ ual᷊ingu piạ Mawu kere i Sie! Yehuwa něndiadi si kitẹ gunang měkoạ kapulu-Ne, kụ i kitẹ sarung mal᷊uasẹ̌ mạeng i kitẹ měngibadah si Sie. (Why. 4:11) Dunia ini aramanung měmanda i kitẹ tawe maarěga, katewe Yehuwa tawe kerene. (Ibr. 11:16, 38) Su tempong nakadodọ naung ual᷊ingu masakị, masigěsạ mědeạ doitẹ̌, arau seng maghurang, turusẹ̌e pẹ̌tahěndung tawẹ apa makarau si kitẹ bọu kakěndagi Amang i kitẹ su sorga.​—Basa Roma 8:38, 39.