SU ALKITAPẸ̌, piạ lawọ bawerang manga ělangu Mawu ”piạ pěndang kere i kitẹ”. (Yak. 5:17) Contone, i kitẹ botonge makaěna pěndang i Paulus su tempong i sie naul᷊ị bawera su Roma 7:21-24, ”Su tempong iạ mapulu měkoạ barang nihino, kapulu gunang měkoạ barang dal᷊akị timimbul᷊ẹ̌ su watangengku. . . . O kasiang iạ ini!” Mạeng harusẹ̌ lumawang karal᷊omeng i kitẹ, i kitẹ sarung mahiborẹ̌ su tempong makasingkạ i Paulus lai mětẹ̌tawakal᷊i kere i kitẹ.

Katewe, i Paulus lai něnodẹ pěndang wal᷊inẹ su Galatia 2:20. I sie naul᷊ị i sie mangimang Yesus ”makěndagẹ̌ [si sie] dingangu něgělị watangenge gunang [i sie]”. Apa i kau lai nẹ̌pěndang kerene? Aramanung i kau tawe turusẹ̌ nẹ̌pěndang kerene.

Mạeng nakadodọ naung ual᷊ingu pẹ̌sasal᷊a su tempong tamai, i kitẹ pẹ̌sěngsul᷊ẹ masigěsạ mangimang Yehuwa makěndagẹ̌ dingangu seng něgělị ampung si kitẹ. Bọu ene lai, i kitẹ aramanung masigěsạ mẹ̌pěndang tatěbusẹ̌ i Yesus ene kai gaghělị si kitẹ sěngkatau-sěngkatau. Apa i Yesus kahěngang-hěngang mapulu i kitẹ mẹ̌tiněna tatěbusẹ̌ ene kai gaghělị si kitẹ pẹ̌sěngkatau? Mạeng kahěngang kerene, apa wotonge koateng i kitẹ tadeạu mẹ̌tiněna kerene? Mahịe měngěndung darua kakiwal᷊o ini.

Yesus mapulu i kitẹ mẹ̌tiněna tatěbuse kai gaghělị si kitẹ pẹ̌sěngkatau. Bọu apa i kitẹ masingkạ? Pẹ̌tiněna apa niwohẹ su Lukas 23:39-43. Sěngkatau esẹ nipaku su rihi maraning i Yesus. I sie něngaku bọu někoạ barang dal᷊akị. Apa nikoạe ene tantu sěbạe dal᷊akị sarang i sie nakaěbạ hukumang papate. Tau esẹ ene sěbạe gụgěnggang, kụ i sie nẹ̌dorong si Yesus, ”Tahěndunge wue iạ su tempong i kau sumuẹ̌ su Kararatuangu.”

Apa nikoạ i Yesus? Pẹ̌tiněna tědụ nikapěndangenge su tempong i sie nẹ̌bihu sarang tau esẹ ene. Maning sěbaẹ natědụ, i sie tatapẹ̌ himěming kụ něhiborẹ̌ tau esẹ ene. I sie naul᷊ị, ”Kahěngang-hěngang iạ maul᷊ị si kau sahěllo ini, i kau sarung dingangku su Firdaus.” Sěběnarẹ̌e, Yesus botonge kětạeng maul᷊ị su tau esẹ ene, ”Ahusu taumata diměnta . . . [gunang] měgělị biahe makoạ tatěbusẹ̌ gunang lawọ taumata.” (Mat. 20:28) Katewe, Yesus tawe někoạ ene. I sie dingangu kapiang naung něnodẹ tatěbuse nighělị gunang tau esẹ ene. I sie mahimumu nẹ̌bisara kụ něpakẹ bawera ”i kau” dingangu ”iạ”. Yesus lai naul᷊ị su tau esẹ ene, i sie sarung měbiahẹ̌ su firdaus su dunia.

Nal᷊ahẹ, i Yesus mapulu tau esẹ ene mẹ̌tiněna tatěbusẹ̌ kai gaghělị gunang i sie. Mạeng Yesus mapulu penjahat ene mẹ̌pěndang kerene, sěmbal᷊ia penjahat ene bědang tawe nẹ̌tahamawu su Mawu, Yesus tantu mapulu tau Kristen seng bọu nibaptisẹ̌, kụ nẹ̌tahamawu su Mawu, lai mẹ̌pěndang kerene. Hakị u ene, apa wotonge makatul᷊ung si kitẹ mẹ̌pěndang kerene maning i kitẹ bọu někoạ dosa su tempong tamai?

Ual᷊ingu Yesus něgělị tugasẹ̌ měnginjilẹ̌, Paulus mangimang Yesus nate gunang i sie. Paulus  nělahẹ, ”Iạ makitarimakasẹ si Kristus Yesus Tuang i kitẹ, seng něgělị si siạ kawasa, ual᷊ingu i sie nẹ̌pěndang iạ masatia hakị u ene i sie něgělị tugasẹ̌ pelayanan ini si siạ, maning iạ kangerẹ mělẹ̌hinakang Mawu, měnděndariha, dingangu maobotẹ̌.” (1 Tim. 1:12-14) Tugasẹ̌ nitarimạ i Paulus bọu i Yesus nakakoạ si sie mangimang Yesus matal᷊ěntụ si sie, lai makěndagẹ̌ dingangu mangimang si sie. Yesus lai něgělị si kitẹ tugasẹ̌ gunang měmahiạ habarẹ̌ mapia. (Mat. 28:19, 20) Apa tugasẹ̌ ini makakoạ si kitẹ mangimang Yesus nate gunang i kitẹ pẹ̌sěngkatau?

Albert buhu ini saụ nẹ̌bal᷊ị sarang Yehuwa su apang bọu nisěbang bọu sidang karěngụe 34 su taunge. I sie nẹ̌běke, ”Iạ sěntiniạ mětẹ̌tahěndung manga dosaku. Katewe su tempong měnginjilẹ̌, iạ nẹ̌pěndang iạ nighělịkangu tugasẹ̌ pelayanan karạ i Yesus, mẹ̌sul᷊ung kere i Paulus. Iạ nakoạ limembong mal᷊uasẹ̌ dingangu piạ tiněna positif soal u watangengku dingangu pěbawiahẹ̌ku orasẹ̌ ini lai su tempo mahi.”​—Mz. 51:3.

Allan sěbạe matingkaị dingangu měkẹ̌koạ lawọ karal᷊akisẹ̌ těntal᷊ang bědang tawe něngěndung katěngadẹ̌. I sie něngakui, ”Iạ bědang hanesẹ̌ mětẹ̌tiněna barang dal᷊akị seng nikoạku su taumata wal᷊inẹ. Pẹ̌sěngsul᷊ẹ, ene nakakoạ si siạ nasusah naung. Katewe, iạ makitarimakasẹ si Yehuwa ual᷊ingu i Sie něgělị izin su taumata marosa kere iạ gunang měhabarẹ̌ habarẹ̌ mapia. Su tempong makasilo taumata wal᷊inẹ měnarimạ habarẹ̌ mapia, iạ nasadarẹ̌ Yehuwa kai mapia dingangu makěndagẹ̌. Iạ nẹ̌pěndang i Sie něpakẹ si siạ gunang mẹ̌tul᷊ung taumata apang piạ latar belakang mẹ̌sul᷊ungu iạ.”

Su tempong měkoạ pelayanan, i kitẹ někoạ barang mapia dingangu nẹ̌tiněna hal᷊ẹ̌ mapia. Pelayanan ene makakoạ si kitẹ mangimang Yesus matal᷊ěntụ, makěndagẹ̌, dingangu mangimang si kitẹ.

Sarang duniang Setang ini binasaěng, naung i kitẹ aramanung bědang turusẹ̌ mělẹ̌hukung si kitẹ ual᷊ingu dosa su tempong tamai. Apa makatul᷊ung si kitẹ lumawang pěndang ene?

”Iạ mal᷊uasẹ̌ ual᷊ingu ’Mawu limembong gěguwạ sul᷊ungu naungku’,” ěngkuěng i Jean, sěngkatau wawine hanesẹ̌ makapěndang nẹ̌sal᷊a ual᷊ingu měbẹ̌biahẹ̌ munafikẹ̌ su tempong mangudạ. (1 Yoh. 3:19, 20) I kitẹ lai sarung mahiborẹ̌ makasingkạ Yehuwa dingangi Yesus nakaěna i kitẹ kai taumata marosa. Pẹ̌tahěndung, i rẹ̌dua něnadia tatěbusẹ̌, bal᷊inẹ gunang taumata masukụ, katewe gunang taumata marosa apang mapulu mẹ̌tobatẹ̌.​—1 Tim. 1:15.

I kitẹ mangimang tatěbusẹ̌ nighělị gunang i kitẹ pẹ̌sěngkatau mạeng i kitẹ mẹ̌tiněna cara Yesus měkoạ taumata tawe nasukụ dingangu mạeng i kitẹ měkoạ kapaelange gunang pelayanan seng nighělị si kitẹ. Kụ, mạeng měkoạ ene, kere i Paulus, i kitẹ botonge mẹ̌bera, ”[Yesus] makěndagẹ̌ si siạ dingangu něgělị watangenge gunang iạ.”