Iạ nalahirẹ̌ su taung 1954 su St. Paul, Minnesota, AS. Agamang kěluargang i kami kai Katolik Roma. I kami tawe makalạ katewe lai tawe masusah. Iạ anạ karuane bọu lima tahatuari. Iạ nẹ̌sikol᷊ah su SD Katolik, ku iạ nakoạ putra altar. Katewe, kasingkạku soal u těntirong Alkitapẹ̌ kětạeng mahal᷊i. Kụ, maning iạ mangimang Mawu něndiadi kěbị haghi, iạ tawe mangimang su těntirong gaheda.

Taung humotong iạ nẹ̌kuliah su William Mitchell College of Law, piạ Sahiding Yehuwa diměnta su wal᷊eku. Su tempo ene, ia kạpěngungsạe pakeang, hakị u ene i sire nẹ̌diandi hědo saụ duměnta. Su tempong i sire saụ diměnta, iạ nẹ̌kiwal᷊o darua hal᷊ẹ̌ ini: ”Kawe nụe taumata dal᷊akị limembong mal᷊uasẹ̌ biahe sul᷊ungu taumata mapia?” dingangu ”Apa makakoạ si kitẹ kahěngang-hěngang mal᷊uasẹ̌?” I sire něgělị si siạ bukẹ̌ Kebenaran yang Membimbing kepada Hidup yang Kekal dingangu Kitab Suci Terjemahan Dunia Baru papikunge melong. Iạ lai setuju gunang měngěndung Alkitapẹ̌. Pěngangěndungang Alkitapẹ̌ ene sěbạe nakawuka mataku. Iạ sěbạe mal᷊uasẹ̌ su apang  nakasingkạ Kararatuangu Mawu ene kai pěmamarenta sarung mẹ̌kawasa su patikụ dunia. Iạ sẹ̌saku nakasilo kerea pěměrentang taumata tawe kapěngumbalang kụ nakakoạ dunia ini napenẹu masalah, hal᷊ẹ̌ tawẹ adile, dingangu kasasigěsạ.

Su tětạu taung 1982, iạ nẹ̌diandi měgělị watangengku si Yehuwa gunang měkoạ kapulu-Ne. Kụ su taung ene lai, iạ nibaptisẹ̌ su Kebaktian ”Kebenaran Kerajaan” nikoạ su gedung gěguwạ su St. Paul. Su misa tuhụe, iạ saụ nẹ̌bal᷊ị sarang gedung ene gunang tumol᷊e ujian makoạ pengacara. Su tětạu wul᷊ang Oktober, iạ nakaěbạ habarẹ̌ iạ nalulusẹ̌ bọu ujian ene, kụ botonge měnětạ měhal᷊ẹ̌ makoạ pengacara.

Su Kebaktian ”Kebenaran Kerajaan”, iạ nẹ̌sombang dingangi saudara Mike Richardson. I sie mělẹ̌hal᷊ẹ̌ su Betel Brooklyn, kụ i sie nẹ̌běke piạ bageang hukum seng nikoạ su kantor pusat. Iạ nakatahěndung bawerang pejabat Etiopia, kạbawohẹ su Kisah 8:36. Iạ nẹ̌pikirẹ̌, ’Apa makasahaghe si siạ gunang měhal᷊ẹ̌ su Bageang Hukum?’ Hakị u ene, iạ něloho formulir gunang měhal᷊ẹ̌ su Betel.

Su tempong iạ němutusẹ̌ gunang makoạ Sahiding Yehuwa, matimadẹ̌ku nẹ̌pědu. I Papạku nẹ̌kiwal᷊o si siạ apa hal᷊ẹ̌ su Betel sarung makakoạ si siạ berhasil su bageang hukum. Iạ naul᷊ị hal᷊ẹ̌ su Betel ene kai hal᷊ẹ̌ sukarela. Iạ lai naul᷊ị si sie, iạ sarung makatarimạ mahal᷊i penggantian ongkos sabang wul᷊ang, kere taumata wal᷊inẹ su Betel.

Su apang hal᷊ẹ̌ku su pengadilan nasue, iạ něnětạ melayani su Betel Brooklyn, New York, su taung 1984. Kụ ia nakaěbạ tugasẹ̌ su Bageang Hukum. Pengalamanku su tempong něhal᷊ẹ̌ su pengadilan nakatul᷊ung si siạ sadia gunang hal᷊ẹ̌ku tuhụe.

Organisasi něměli Stanley Theater su Jersey City, New Jersey, su wul᷊ang November 1983. Saudara-saudara nẹ̌dorong izin gunang měkoạ pakapia sistem listrik dingangu saluran akẹ su gedung ene. Su tempong i sire nẹ̌sombang dingangu manga pejabat su tampạ ene, saudara-saudara ene naul᷊ị Stanley Theater sarung paketang gunang makoạ tampạ kebaktian Sahiding Yehuwa. Katewe, su Jersey City piạ atorang gedung paketang gunang měngibadah kětạeng botonge koateng su daerah perumahan. Stanley Theater kai su daerah bisnis, hakị u ene, manga pejabat su tampạ ene madiri měgělị izin. Kụ saudara-saudara někoạ banding ual᷊ingu putusang ene, katewe banding ene tawe nitarimạ.

 Organisasi nẹ̌bawa masalah ene sarang pengadilan. Ene nikoạ su misa humotong iạ něhal᷊ẹ̌ su Betel. Ual᷊ingu iạ bọu něhal᷊ẹ̌ dua taung su St. Paul, Minnesota, iạ hanesẹ̌ měngurusẹ̌ kasus kerene. Sěngkatau saudara pengacara naul᷊ị Stanley Theater seng hanesẹ̌ pẹ̌paketang gunang acara umum, kere měmutarẹ̌ film arau konser musikẹ̌. Hakị u ene, kawe nụe ene tawe wotonge paketang gunang acarang agama? Su tempong němarikěsa kasus ene, pengadilan němutusẹ̌ Jersey City tawe něngadatẹ̌ hakẹ̌ gunang měngibadah. Bọu ene, pengadilan něngoro tadeạu soa ene měgělị izin. Bọu peristiwa ene, ia něnětạ nakasilo kerea Yehuwa něngal᷊amatẹ̌ tawakal᷊ing organisasi gunang měpakẹ sarana hukum gunang hal᷊ẹ̌ u Kararatuang. Iạ sěbạe mal᷊uasẹ̌ ual᷊ingu botonge něhal᷊ẹ̌ su bageang ene.

Proyek renovasi gěguwạ nitětạ. Kụ tawe nakaěbạ sěntaung, acara wisuda Sekolah Gilead kělasẹ̌ 79 nikoạ su Balai Kebaktian Jersey City su tanggalẹ̌ 8 September 1985. Ia nẹ̌pěndang iạ nakaěbạ kesempatan luar biasa ual᷊ingu botonge někoạ hal᷊ẹ̌ u Kararatuang su bageang hukum. Hal᷊ẹ̌ ini nakakoạ si siạ limembong mal᷊uasẹ̌ sul᷊ungu su tempong iạ nakoạ pengacara těntal᷊ang bědang tawe něhal᷊ẹ̌ su Betel. Bọu ene, Yehuwa bědang něpakẹ si siạ gunang měngurusẹ̌ haghing kasus hukum wal᷊inẹ.

Nal᷊iu wọu taung 1980, manga dokterẹ̌ dingangu rumah sakitẹ̌ madiri měnarimạ dorongu pasien Sahiding Yehuwa apang makiundang tawe měpakẹ daha. Hal᷊ẹ̌ ene něngělembong masigěsạ su wawine apang matiang, ual᷊ingu lawọ hakim nẹ̌pěndang i sire tawẹ apa hakẹ̌ gunang tawe měnarimạ transfusi daha. Manga hakim ene nẹ̌bera mạeng tawe měnarimạ transfusi, wawine ene sarung mate kụ anạe sarung tawẹ apa i mamạe.

Su tanggalẹ̌ 29 Desember 1988, Saudari Denise Nicoleau nakaěbạ pendarahan su apang bọu nělahirkan. Ukurangu dahane nal᷊intụ tawe nakarating 5, kụ dokterẹ̌ mapulu i sie měnarimạ transfusi. Saudari Nicoleau madiri. Diěllone mal᷊ukadẹ̌, rumah sakitẹ̌ ene nẹ̌dorong izin bọu pengadilan gunang měgělị transfusi daha si Saudari Nicoleau. Maning bědang tawe nẹ̌bisara dingangi Saudari Nicoleau lai kawinge, hakim něgělị izin gunang transfusi.

Su Sambaiang, 30 Desember, pegawai rumah sakitẹ̌ něntransfusi daha si Saudari Nicoleau, maning kawinge dingangu pirang katau kěluargane nẹ̌sěding. Su hěbi ene, pirang katau kěluargang i Saudari Nicoleau dingangu pirang katau penatua nisamẹu polisi, ual᷊ingu i sire seng nělikụ pẹ̌tatikilang i Saudari Nicoleau tadeạu saudari ene tawe itransfusi. Kụ su Kaehẹ̌ mal᷊ukadẹ̌, tanggalẹ̌ 31 Desember, lawọ media berita su New York  City dingangu su Long Island něhabarẹ̌ soal i sire apang nisamẹ.

Su Mandakẹ̌ mal᷊ukadẹ̌, iạ nẹ̌sombang dingangi Milton Mollen, sěngkatau hakim bọu pengadilan tinggi. Iạ naul᷊ị si sie soal u apa nariadi dingangu nẹ̌bera hakim něgělị izin gunang transfusi katewe tawe němarikěsa kal᷊imona. Hakim Mollen nẹ̌dorong si siạ gunang duměnta su kantorẹ̌e bawělo ene gunang mẹ̌bisara soal u kasus ene lai manga hukung piạ sěmpụe dingangu kasus ene. Pěngawasẹ̌ku, arenge Philip Brumley, něndingang si siạ su tempong nẹ̌sombang dingangi Hakim Mollen. Hakim Mollen lai němaringang pengacara rumah sakitẹ̌ gunang mẹ̌bisara soal u ene. Bisarang i kami nakoạ pẹ̌dararendehẹ̌. Kụ, Saudara Brumley němohẹ tatanata su bukẹ̌e, i sie naul᷊ị si siạ, ”Pakatěnang”. Ene sasasa mapaelẹ̌, ual᷊ingu su tempo ene iạ seng lusiang kụ mapulu měnodẹ pengacara rumah sakitẹ̌ ene nẹ̌sal᷊a.

Su apang ěndịu nal᷊iu sěngkaorasẹ̌, Hakim Mollen naul᷊ị kasus ene sarung makoạ kasus humotong parikěsang diěllone mal᷊ukadẹ̌. Su tempong i kami seng suměbang bọu kantore, Hakim Mollen naul᷊ị pengacara rumah sakitẹ̌ ene piạ ”tugase mawěhạ dịěllo”. Ene mangal᷊ene pengacara ene sarung masigěsạ tumatawang apa nikoạ u rumah sakitẹ̌. Su tempo ene iạ nakapěndang Yehuwa někoạ si siạ mangimang i kami sarung makauntung. Yehuwa něpakẹ si kami gunang měkoạ kapulu-Ne mariadi. Ene sěbạe luar biasa.

I kami něhal᷊ẹ̌ sarang latẹ̌ gunang měnadia apa sarung paul᷊ịkang i kami. Diěllone mal᷊ukadẹ̌, kal᷊awọkange bọu i kami apang něhal᷊ẹ̌ su bageang hukum liměngang sarang pengadilan ual᷊ingu pengadilan ene marani bọu Betel Brooklyn. Su pengadilan, su apang ěpạ hakim nakaringihẹ̌ sasimbahi kami, i sire němutusẹ̌ izin gunang transfusi daha ene sěběnarẹ̌e tawe wotonge gělịkang. Pengadilan ini něněbang putusang nakauntung si Saudari Nicoleau. Pengadilan ene lai naul᷊ị mạeng sěmbaụ putusang nikoạ těntal᷊ang bědang tawe dimaringihẹ̌ pendapat pasien, ene limawang hak asasi taumata.

Tawe nararěna bọu ene, pengadilan karangetange su New York němutusẹ̌ Saudari Nicoleau piạ hakẹ̌ gunang tawe měnarimạ transfusi daha. Su apang kasus ene nasue, iạ timol᷊e nẹ̌tul᷊ung tatělu kasus wal᷊inẹ kụ piạ sěmpụe dingangu tawe měnarimạ daha. Su tatělu kasus ene, i kitẹ lai nakauntung. (Pěmanda kotak ” Kal᷊auntung su Pengadilan Tinggi”.) Iạ lai něhal᷊ẹ̌ sěngkasio dingangu pengacara wal᷊inẹ su Betel gunang měngurusẹ̌  kasus piạ sěmpụe dingangu hak asuh anạ, perceraian, lai soal u měpakẹ ěntana dingangu bangunan.

Su tempong humotong iạ nẹ̌sombang dingangu kawingku, i Dawn, i sie kai wawine wal᷊u kụ piạ anạe tělung katau. I sie mělẹ̌hal᷊ẹ̌ apidu merintis. Pěbawiahe masigěsạ, kụ iạ sěbạe naherang ual᷊ingu i sie nẹ̌tawakal᷊i gunang turusẹ̌ mẹ̌tahamawu si Yehuwa. Su taung 1992, i kami timol᷊e Kebaktian Distrik ”Para Pembawa Terang” su New York City, kụ iạ naul᷊ị si sie iạ mapulu limembong makasingkạ soal i sie. Sěntaung tuhụe, i kami nẹ̌kawing. Kawingku sěntiniạ měngẹ̌ngal᷊imona kapulung Yehuwa su pěbawiahe, kụ i sie puluang mẹ̌tatal᷊ewa. I sie kahěngang-hěngang hadiah bọu i Yehuwa. Su kanandụu pẹ̌kakawing i kami, i Dawn sěntiniạ nakakoạ pěbawiahẹ̌ku mal᷊uasẹ̌.​—Amsal 31:12.

Su tempong i kami nẹ̌kawing, anạ i Dawn umure, 11, 13, dingangu 16 su taunge. Iạ mapulu makoạ papạ mapia si sire, hakị u ene iạ nẹ̌basa dingangu nẹ̌tawakal᷊i někoạ apa niwasaku su publikasi soal u kerea makoạ matimadẹ̌ tiri. Memang piạ piram baụ masalah nikahombangeng i kami, katewe iạ mal᷊uasẹ̌ ual᷊ingu manga anạku něnarimạ si siạ nakoạ kere hapị dingangu papạ makěndagẹ̌. Manga hapị i sire tělu botonge měnalang su wal᷊eng i kami. Kụ, i kami mal᷊uasẹ̌ piạ mangangudạ mětẹ̌tampung su wal᷊eng i kami.

Su taung 2013, iạ dingangi Dawn něngal᷊ing sarang Wisconsin gunang mẹ̌tangkiang matimadi kami seng maghurang. Maning kerene, iạ mal᷊uasẹ̌ ual᷊ingu bědang botonge mẹ̌tul᷊ung su Betel. Iạ nirorongang gunang makoạ sukarelawan sementara dingangu turusẹ̌ mẹ̌tul᷊ung organisasi su bageang hukum.

Su September 2018, iạ nakapěndang su tinggol᷊angku masau piạ kuhaị. Iạ nakoạ sarang dokterẹ̌, katewe dokterẹ̌ lai tawe nakasingkạ kawe nụe ene nariadi. Bọu ene, dokterẹ̌ bal᷊inẹ něgělị těgu tadeạu iạ makoạ sarang ahli saraf. Su wul᷊ang Januari 2019, ahli saraf něhabarẹ̌ iạ ěndịu nakaěbạ sakị saraf tawe wiasa, isẹ̌sěbạ progressive supranuclear palsy (PSP).

Tělu ěllo tuhụe, su tempong iạ měngẹ̌ngolahraga, iạ nanawo kụ pul᷊aengku sěmběka koaneng napědi. Sěmbal᷊ia olahraga ene seng biasa kẹ̌koatengku su kanandụu pěbawiahẹ̌ku. Hakị u ene, iạ nakasingkạ sakị ene seng nakakoạ si siạ tawe makaatorẹ̌ gerakan wadangku. Tawe napikirẹ̌ si siạ sakị ene masahawụ nakoạ mawěhạ. Iạ masigěsạ mẹ̌bisara, dumal᷊eng, lai měngělụ kaěng dingangu inumang.

Maning kerene, iạ sěbạe mal᷊uasẹ̌ ual᷊ingu botonge nakoạ pengacara gunang mẹ̌tul᷊ung organisasing Yehuwa. Iạ lai mal᷊uasẹ̌ ual᷊ingu botonge němohẹ lawọ artikel nitaho su manga majalah kụ bẹ̌basangu manga dokterẹ̌, hakim, dingangu pengacara. Iạ lai nakaěbạ kesempatan gunang mẹ̌bisara su manga seminar su patikụ dunia. Su manga acara ene, iạ botonge tumatawang hakẹ̌ u manga ělang i Yehuwa su tempong měmile perawatan medis arau operasi tawe měpakẹ daha. Maning kerene, iạ tatapẹ̌ nẹ̌pěndang kere niwohẹ su Lukas 17:10: ’Iạ ělang tawẹ gunane, Iạ kětạeng někoạ apa seng nakoạ hal᷊ẹ̌ku.’