Bukti něnodẹ Yesus nakoạ Imang Mawantugẹ̌ su tempong i sie nibaptisẹ̌ su taung 29 M. Apa buktine? Su tempong nibaptisẹ̌, Yesus něnodẹ i sie mapulu měgělị watangenge gunang makoạ tatěbusẹ̌ su wowong mezbah kiasan, ene kai ”kapulung Mawu”. (Gal. 1:4; Ibr. 10:5-10) Nal᷊ahẹ, mezbah kiasan něnětạ ene su tempong i Yesus nibaptisẹ̌. Kụ, ual᷊ingu mezbah kai bageang penting bọu bait, ene něnodẹ bait rohani lai seng něnětạ ene su tempo ene. Bait rohani ene kai pengaturan nakakoạ taumata botonge měněmbah Mawu dingangu cara nihino ual᷊ingu piạ tatěbusi Yesus.​—Mat. 3:16, 17; Ibr. 5:4-6.

Su bait rohani harusẹ̌ piạ imang mawantugẹ̌. Ual᷊ingu ene, Yehuwa nělanisẹ̌ si Yesus ”dingangu rohkẹ̌ masusi kụ něgělị si sie kawasa” nakoạ Imang Mawantugẹ̌. (Kis. 10:37, 38; Mrk. 1:9-11) Katewe, kawe nụe i kitẹ botonge mangimang Yesus nihengkẹ nakoạ Imang Mawantugẹ̌ těntal᷊ang i sie bědang tawe nate kụ saụ nipěbiahẹ̌? I kitẹ botonge mangimang mạeng i kitẹ měmanda contoh Imang Mawantugẹ̌ Harun dingangu manga imang mawantugẹ̌ wal᷊inẹ apang něngganti si sie.

Su Hukung Musa niul᷊ị kětạeng imang mawantugẹ̌ botonge sumuẹ̌ su Ruang Sěbạe Masusi su tabernakel arau su bait. Su tal᷊oarang Ruang Masusi dingangu Ruang Sěbạe Masusi, piạ hordeng. Imang mawantugẹ̌ lumiu bọu hordeng ene kětạeng su Ěllong Pẹ̌darame. (Ibr. 9:1-3, 6, 7) Harun dingangu manga imang mawantugẹ̌ apang něngganti si sie nihengkẹ nakoạ imang mawantugẹ̌ těntal᷊ang bědang tawe simuẹ̌ limiu bọu hordeng ene gunang makoạ sarang Ruang Sěbạe Masusi. Hakị u ene, i Yesus lai nihengkẹ nakoạ Imang Mawantugẹ̌ těntal᷊ang i sie bědang tawe nate, kụ lumiu ”hordeng ene, ene kai badange” gunang makoạ sarang sorga. (Ibr. 10:20) Ual᷊ingu ene i Paulus nẹ̌bera i Yesus ”diměnta nakoạ imang mawantugẹ̌” kụ ”limiu bọu kemah limembong penting dingangu limembong masukụ, bal᷊inẹ nikoạu lima”, kụ simuẹ̌ su ”sorga”.​—Ibr. 9:11, 24.

Apa piạ pẹ̌tatěntange soal u kange pẹ̌dariandi wuhu nakoạ sah dingangu kange ene berlaku? Tala. Kawe nụe? Su tempong i Yesus naawị sarang sorga kụ něnarakang pěbawiahe nasukụ, i sie někoạ pẹ̌dariandi wuhu nakoạ sah. Proses ene lai nakakoạ pẹ̌dariandi ene něnětạ berlaku. Manga hal᷊ẹ̌ apa nikoạ tadeạu pẹ̌dariandi ene makoạ sah?

Humotong, Yesus nẹ̌těngong Yehuwa. Bọu ene, Yesus něnarakang nilai tatěbuse si Yehuwa. Kụ samurine, Yehuwa něnarimạ nilai dahang i Yesus. Su apang tatělu hal᷊ẹ̌ ene bọu nikoạ, pẹ̌dariandi wuhu něnětạ berlaku.

Alkitapẹ̌ tawe naul᷊ị kange tempo sěběnarẹ̌e Yehuwa něnarimạ nilai tatěbusi Yesus. Hakị u ene, i kitẹ běga kange sěběnarẹ̌e pẹ̌dariandi wuhu nakoạ sah dingangu něnětạ berlaku. Katewe, i kitẹ masingkạ Yesus naawị sarang sorga mapul᷊o ěllo těntal᷊ang Pentakosta bědang tawe nikoạ. (Kis. 1:3) Bukti orasẹ̌ ini pẹ̌dariandi wuhu seng berlaku ene nikasilong mal᷊ahẹ su ěllong Pentakosta. (Kis. 2:1-4, 32, 33) Nal᷊ahẹ, i Yesus tantu seng něnarakang nilai tatěbuse si Yehuwa těntal᷊ang ěllong Pentakosta bědang tawe nikoạ, kụ Yehuwa seng něnarimạ ene.​—Ibr. 9:12.

Nal᷊ahẹ, pẹ̌dariandi wuhu nakoạ sah dingangu něnětạ berlaku, su apang Yehuwa bọu něnarimạ nilai dahang i Yesus kụ nẹ̌bawa si sire apang nilanisẹ̌ sarang pẹ̌dariandi buhu. Yesus, Imang Mawantugẹ̌, nakoạ Perantara bọu pẹ̌dariandi ene.​—Ibr. 7:25; 8:1-3, 6; 9:13-15.