I KITẸ kěbị mangimang Yehuwa měngẹ̌ngahạ dingangu měgẹ̌gělị kebutuhan rohani manga ělang’E su kanandụu ”ěllo pěngěngsuenge”. (2 Tim. 3:1) Katewe, i kitẹ kěbị harusẹ̌ tumuhụ si Yehuwa. I kitẹ botonge mapẹ̌sul᷊ung situasing i kitẹ dingangu tau Israel su kěhu l᷊inggi. I sire harusẹ̌ tumol᷊e laahạ bọu tingihu těrompetẹ̌.

Yehuwa něngoro si Musa gunang pěkoạ darua těrompetẹ̌ bọu perak ’gunang měngomol᷊ẹ̌ jamaatẹ̌ dingangu gunang měngoro si sire měngal᷊ing’. (Bil. 10:2) Manga imang sarung měniụ těrompetẹ̌ ene dingangu haghing cara gunang měnodẹ apa harusẹ̌ koatengu tau Israel. (Bil. 10:3-8) Orasẹ̌ ini, manga ělangu Mawu lai nakaěbạ laahạ dingangu haghing cara. Pěmanda tatělu cara i kitẹ nakaěbạ laahạ, kụ apa sul᷊unge hal᷊ẹ̌ ene dingangu tingihu těrompetẹ̌ su tempong tamai. (1) Manga ělangu Mawu orasẹ̌ ini gẹ̌gausang gunang mẹ̌komol᷊ẹ̌. (2) Manga pengawas nakatarimạ pelatihan. (3) Pengaturan teokratis gunang kěbị sidang seng niwal᷊ui.

Mạeng Yehuwa mapulu ”kěbị jamaatẹ̌” mẹ̌tampung su tukadu sasuẹ̌kang, su sěmběkang daki bọu tabernakel, manga imang sarung měniụ darua těrompetẹ̌. (Bil. 10:3) Kěbị suku seng nipahiạ nakoạ ěpạ kelompok, kụ nẹ̌kemah nělikụ tabernakel, sarung makaringihẹ̌ tingihẹ̌ ene. I sire apang marani dingangu tabernakel aramanung mal᷊ighạ duměnta. Arawe i sire apang marau, aramanung diọ marěngụ kụ lai harusẹ̌ mẹ̌tawakal᷊i. Tawẹ soale i sire marau arau marani, Yehuwa mapulu kěbị jamaatẹ̌ matampung dingangu makaěbạ gunane.

Orasẹ̌ ini, i kitẹ tawe mẹ̌tampung su tabernakel, katewe i kitẹ gẹ̌gausang gunang tumol᷊e kebaktian regional arau manga acara wal᷊inẹ. Sene, i kitẹ sarung makatarimạ informasi penting dingangu laahạ. Manga ělang i Yehuwa su haghing negeri su patikụ dunia timol᷊e acara mẹ̌sul᷊ung. Hakị u ene, i saing něnarimạ undangan gunang mẹ̌komol᷊ẹ̌ tantu sěbạe mal᷊uasẹ̌. Piạ u harusẹ̌ dumal᷊eng marau tadeạu botonge makarěnta. Maning kerene, kěbị apang diměnta nakaěbạ gunane mẹ̌sul᷊ung kaguwạe dingangu tawakal᷊ing i sire gunang duměnta.

Kerea dingangi sire apang mětẹ̌tanạ su tampạ marau bọu tampạu kebaktian? Ual᷊ingu piạ teknologi modern, i sire lai nakatol᷊e acara mẹ̌sul᷊ung dingangu nakapěndang mẹ̌sul᷊ungu diměnta langsung su acara ene. Contone, su tempong wakil kantor pusat nẹ̌tiwo, kantor cabang su Benin něněmpụ acara ene sarang Arlit, Nigeria, sěmbaụ soa pertambangan su Gurun Sahara. Sene, piạ duam pul᷊o esa su kataune nẹ̌tampung. Maning nahae marau, i sire nẹ̌pěndang  nasěmbaụ dingangu 44.131 anạu sěmbaụ apang nẹ̌komol᷊ẹ̌ su acara ene. Sěngkatau saudara němohẹ, ”Kasẹ bue lawọ-lawọ ual᷊ingu seng něněmpụ acara ene. Ene něnodẹ i kamene sěbạe makěndagẹ̌ si kami.”

Su tempong imang kětạeng něniụ sěmbaụ těrompetẹ̌, ”kětạeng manga těmbonang apang měngẹ̌ngahạ hiwune” sarung mẹ̌tampung su kemah pẹ̌sasombangeng. (Bil. 10:4) Sene, i sire makatarimạ informasi dingangu pelatihan bọu i Musa. Ene makatul᷊ung si sire měkoạ tanggung jawab i sire su manga sukung i sire. Mạeng i kau sěngkatau těmbonang, apa i kau sarung mẹ̌tawakal᷊i duměnta tadeạu makaěbạ gunane?

Orasẹ̌ ini, manga penatua sidang bal᷊inẹbe ”těmbonang”, kụ i sire lai bal᷊inẹbe tuangu manga dombang Mawu. (1 Ptr. 5:1-3) Katewe, i sire nẹ̌tawakal᷊i někoạ kapaelange gunang měngahạ manga domba su sidang. Hakị u ene, i sire masahawụ měnarimạ undangan gunang pelatihan, kere tumol᷊e Sekolah Pelayanan Kerajaan. Su sikol᷊ah ene, manga penatua něngěndung kerea tadeạu limembong mapaelẹ̌ měngurusẹ̌ sidang. Hasile, manga penatua ene dingangu anạu sěmbaụ su sidang sarung limembong marani dingangi Yehuwa. Maning tawe timol᷊e sikol᷊ah ene, i kau tatapẹ̌ botonge makaěbạ gunane bọu manga penatua apang timol᷊e sikol᷊ah ene.

Mạeng manga imang něniụ těrompetẹ̌ kụ tingihe měbẹ̌bal᷊ui, ene něnodẹ Yehuwa mapulu tau Israel měngal᷊ing sarang tampạ wal᷊inẹ. (Bil. 10:5, 6) Su tempong tau Israel měngal᷊ing, i sire naatorẹ̌, katewe i sire harusẹ̌ měkoạ lawọ hal᷊ẹ̌. Pirang katau aramanung nẹ̌pěndang mawěhạ měngal᷊ing bọu tampạ sěmbaụ sarang tampạ bal᷊inẹ. Kawe nụe?

Aramanung pirang katau nẹ̌pěndang parenta gunang měngal᷊ing ene tumanịu masau dingangu tawe nikatikạ. ”Pẹ̌sěngsul᷊ẹ, binawa ene kětạeng ene bọu hěbi sarang mal᷊ukadẹ̌.” Su tempo wal᷊inẹ lai, binawa tatapẹ̌ ene su wowong tabernakel karengụe ”dua ěllo, sěmbul᷊ang, arau nal᷊iu”. (Bil. 9:21, 22) Kụ pirang sul᷊ẹ i sire něngal᷊ing? Bilangan pasalẹ̌ 33 něnodẹ tau Israel harusẹ̌ měngal᷊ing ěndịu 40 su sul᷊ẹe.

Pẹ̌sěngsul᷊ẹ, tau Israel aramanung nẹ̌kemah su tampạ mal᷊uẹ̌. Ual᷊ingu i sire ene su ”kěhu l᷊inggi mal᷊oahẹ̌ dingangu makạtatakụ”, tantu i sire mal᷊uasẹ̌ nakaěbạ tampạ mal᷊uẹ̌ kerene. (Ul. 1:19) Hakị u ene, pirang katau aramanung gụgěnggang mạeng i sire saụ měngal᷊ing, i sire seng tawe makaěbạ tampạ mapaelẹ̌ kerene.

Su tempong manga suku měnětạ dumal᷊eng, pirang katau aramanung harusẹ̌ masabarẹ̌ měngampal᷊ẹ̌ giliran i sire. Kěbị suku nakaringihẹ̌ tingihu těrompetẹ̌, katewe tawe kěbị dumal᷊eng su tempo mẹ̌sul᷊ung. Tingihu terompet kahumotongange nakoạ tatiala tatělu suku su sěmběkang daki sarung dumal᷊eng. Ene kai suku Yehuda, Isakhar, dingangu Zebulon. (Bil. 2:3-7; 10:5, 6) Su apang i sire seng dimal᷊eng, imang sarung měniụ karuang sul᷊ẹe gunang makoạ tatiala tatělu suku su timuhẹ̌ sarung dumal᷊eng. Imang sarung měkoạ ene sarang kěbị suku dimal᷊eng.

Aramanung i kau diọ masigěsạ měnarimạ pẹ̌bawal᷊ui su organisasi. Kawe nụe? Aramanung i kau nẹ̌pěndang tumanịu lawọ pẹ̌bawal᷊ui nariadi. Arau, i kau aramanung puluang dingangu pengaturan seng těbe ene, kụ madiri ene mẹ̌bal᷊ui. I kau aramanung harusẹ̌ mẹ̌tawakal᷊i masabarẹ̌ tadeạu botonge menyesuaikan diri dingangu pẹ̌bawal᷊ui ene. Maning kerene, mạeng i kitẹ mẹ̌tawakal᷊i tumol᷊e pẹ̌bawal᷊ui, i kitẹ sarung makasilo Mawu měngal᷊amatẹ̌ si kitẹ.

Su zaman i Musa, Yehuwa něngahạ jutane esẹ, wawine, dingangu manga rariọ limiu kěhu l᷊inggi. Mạeng i Sie tawe něngurusẹ̌ dingangu něngahạ si sire, i sire tantu tawe masal᷊amatẹ̌. Orasẹ̌ ini, Yehuwa něngahạ si kitẹ tadeạu botonge makal᷊iu ěllo pěngěngsuenge makawahaya ini. I Sie nẹ̌tul᷊ung si kitẹ tadeạu limembong marani dingang’E lai piạ pangangimang matoghasẹ̌. Hakị u ene, karimạko i kitẹ kěbị mẹ̌tawakal᷊i gunang tumuhụ kere tau Israel masatia timuhụ kakuing těrompetẹ̌!