1. Kerea pěndang i Yehuwa su tempong sěngkatau ělang’E saụ nẹ̌bal᷊ị sarang i Sie?

KERE seng niěndungang i kitẹ su pěngangěndungang misa tamai, Yehuwa napẹ̌sul᷊ung watangeng’E dingangu gembala mapia kụ mapadul᷊i su kěbị dombane. Kụ i Sie mědẹ̌deạ domba-Ne apang napal᷊idẹ̌. Yehuwa naul᷊ị su tau Israel apang seng něněntang si Sie, ”Pẹ̌bal᷊ịe si Siạ, kụ Iạ sarung mẹ̌bal᷊ị si kamene.” I kitẹ masingkạ i Sie bědang nẹ̌pěndang kerene ual᷊ingu i Sie bọu naul᷊ị, ”Iạ tawe měbẹ̌bal᷊ui.” (Mal. 3:6, 7) Yesus naul᷊ị Yehuwa dingangu manga malaekatẹ̌ sěbạe mal᷊uasẹ̌ su tempong sěngkatau ělang i Yehuwa seng napal᷊idẹ̌ saụ nẹ̌bal᷊ị sarang i Sie.​—Luk. 15:10, 32.

2. Apa sarung ěndungang i kitẹ su pěngangěndungang ini?

² Mahịe měngěndung kerea tatělu sasihing nipakẹ i Yesus botonge makatul᷊ung si kitẹ su tempong mẹ̌tul᷊ung si sire apang nẹ̌těngkarau bọu i Yehuwa. I kitẹ lai sarung měngěndung piram baụ sipatẹ̌ harusẹ̌ piạ si kitẹ tadeạu botonge mẹ̌tul᷊ung si sire mẹ̌bal᷊ị sarang i Yehuwa. Bọu ene, i kitẹ lai sarung měngěndung kawe nụe i kitẹ mal᷊uasẹ̌ mạeng mẹ̌tawakal᷊i mẹ̌tul᷊ung si sire.

3-4. Kawe nụe wawine nisěbạ su Lukas 15:8-10 nědeạ pakapia doitẹ̌ logam drakhma?

³ I kitẹ harusẹ̌ měhal᷊ẹ̌ masěghadẹ̌ tadeạu makaěbạ si sire apang mapulu mẹ̌bal᷊ị sarang i Yehuwa. Su sasihing niwohẹ su Injilẹ̌ Lukas, Yesus nělahẹ kerea sěngkatau wawine nědeạ sěmbaụ doite seng nailang isẹ̌sěbạ drakhma. Bageang penting su sasihing ene ute soal u kerea wawine ene nẹ̌tawakal᷊i nědeạ doitẹ̌ ene.​—Basa Lukas 15:8-10.

⁴ Yesus nělahẹ kerea pěndangu wawine ene su tempong doite seng nailang saụ nikaěbạ. Su zaman i Yesus, pẹ̌sěngsul᷊ẹ pirang katau matimadẹ̌ wawine su Israel měgẹ̌gělị mapul᷊o doitẹ̌ drakhma su anạe wawine su tempong anạe ene mẹ̌kawing. Aramanung, doitẹ̌ drakhma su sasihing i Yesus sěbạe maarěga su wawine ene ual᷊ingu ene kai hadiah  bọu i mamạe. Wawine ene něnikạ doitẹ̌ logam ene nanawo su lante. Hakị u ene, i sie něndikọ sol᷊o kụ nědeạ doitẹ̌ ene, katewe i sie tawe nakaěbạ. Dělịu sol᷊one tantu tawe tumanịu nakatul᷊ung si sie gunang mědeạ doitẹ̌ ene. Samurine, i sie něnapu wal᷊ene, kụ nakasilo doitẹ̌ ene su tal᷊oarang awul᷊ẹ̌. I sie sěbạe mal᷊uasẹ̌ doitẹ̌ ene nikaěbạ. I sie nẹ̌kui manga hapị lai lampunge, kụ nẹ̌běke habarẹ̌ mapia ene si sire.

5. Aramanung, kawe nụe tawe gampang makaěbạ si sire apang tawe aktif?

⁵ Kere nal᷊ahẹ su sasihing i Yesus, gunang makaěbạ sěmbaụ hal᷊ẹ̌ seng nailang, i kitẹ harusẹ̌ mẹ̌tawakal᷊i. Kerene lai, gunang makaěbạ si sire apang tawe aktif, i kitẹ ěndịu harusẹ̌ měhal᷊ẹ̌ masěghadẹ̌. Aramanung i sire seng taunge tawe aktif. Ěndịu i sire lai seng něngal᷊ing sarang tampạ bal᷊inẹ, kụ anạu sěmbaụ sene běga si sire. Katewe, su tempo ini, i sire apang tawe aktif tantu sěbạe mapulu mẹ̌bal᷊ị sarang i Yehuwa. I sire mapulu mẹ̌tahamawu si Yehuwa sěngkasio dingangu anạu sěmbaụ i sire, katewe i sire harusẹ̌ itul᷊ung.

6. Kerea kěbị penyiar su sidang botonge mědeạ si sire apang tawe aktif?

⁶ I sai botonge mědeạ si sire apang tawe aktif? I kitẹ kěbị, měnětạ bọu penatua, perintis, keluarga, dingangu penyiar su sidang. Apa piạ hapịu arau kěluarganu nakoạ tawe aktif? Apa i kau bọu nẹ̌sombang dingangi sire apang tawe aktif su tempong něnginjilẹ̌ bọu wal᷊e sarang bal᷊e arau su tampạ piạ lawọ taumata? Paul᷊ị si sie mạeng i sie mapulu tiwong, i kau sarung mal᷊uasẹ̌ měgělị alamatu wal᷊ene dingangu nomorẹ̌ HP-ne su penatua.

7. Apa wotonge kaěndungangu bọu komentarẹ̌ u sěngkatau penatua arenge Thomas?

⁷ Manga penatua piạ tanggung jawab kahumotongange gunang mědeạ si sire apang tawe aktif kụ mapulu mẹ̌bal᷊ị sarang i Yehuwa. Kerea i sire botonge měkoạ ene? Pěmanda komentarẹ̌ sěngkatau penatua su Spanyol, arenge Thomas. * I sie seng nẹ̌tul᷊ung nal᷊iu wọu 40 Sahiding Yehuwa gunang mẹ̌bal᷊ị sarang sidang. Thomas naul᷊ị, ”Humotong, iạ měkẹ̌kiwal᷊o su anạu sěmbaụ apa i sire masingkạ su apa i sire apang tawe aktif mětẹ̌tanạ. Arau iạ měkẹ̌kiwal᷊o apa i sire nakatahěndung i sai seng marěngụ tawe diměnta su pěngangibadang. Lawọ penyiar masěmangatẹ̌ nẹ̌tul᷊ung ual᷊ingu nẹ̌pěndang i sire lai timol᷊e nědeạ. Samurine, su tempong iạ nẹ̌tiwo anạu sěmbaụ apang tawe aktif, iạ lai nẹ̌kiwal᷊o soal u anạ i sire dingangu anạu sěngkataung i sire wal᷊inẹ. Kangerẹ, pirang katau tawe aktif měbẹ̌bawa manga anạ i sire sarang pěngangibadang, kụ manga anạ i sire ene bọu nakoạ penyiar. I sire lai botonge itul᷊ung gunang mẹ̌bal᷊ị sarang i Yehuwa.”

8. Su sasihing niwohẹ su Lukas 15:17-24 soal u anạ nailang, kerea i papạe někoạ anạe seng nẹ̌tobatẹ̌?

⁸ Manga sipatẹ̌ apa harusẹ̌ piạ si kitẹ mạeng i kitẹ mapulu mẹ̌tul᷊ung si sire apang tawe aktif saụ mẹ̌bal᷊ị sarang i Yehuwa? Pěmanda piram baụ tatěntiro botonge kaěndungang i kitẹ bọu sasihing i Yesus soal u anạ nailang. (Basa Lukas 15:17-24.) Yesus nělahẹ kerea anạ ene samurine nasadarẹ̌ kụ němutusẹ̌ saụ mẹ̌bal᷊ị sarang bal᷊e. I papạe timal᷊ang něněnsomahẹ̌ kụ nělahěkụ si sie, kụ ene nakakoạ anạe masingkạ i papạe makěndagẹ̌ si sie. Anạ ene nẹ̌pěndang tawe layak isěbạ anạ. Kụ su tempong anạ ene nẹ̌běke pěndange, i papạe timal᷊ěntụ si sie. Bọu ene, papạe někoạ sěmbaụ hal᷊ẹ̌ gunang měnodẹ anạe ene nitarimạ su wal᷊e, bal᷊inẹ makoạ ělang  katewe makoạ anạ. Gunang měnodẹ anạ ene nitarimạ, i papạe někoạ pesta kụ něnadia pakeang mal᷊ěnggihẹ̌ gunang anạ seng nẹ̌tobatẹ̌ ene.

9. Sipatẹ̌ apa harusẹ̌ piạ si kitẹ tadeạu botonge mẹ̌tul᷊ung si sire apang tawe aktif gunang mẹ̌bal᷊ị sarang i Yehuwa? (Pěmanda kotak ” Cara Mẹ̌tul᷊ung si Sire Apang Mapulu Saụ Mẹ̌bal᷊ị”.)

⁹ Yehuwa mẹ̌sul᷊ungu papạ su sasihing ene. I Sie makěndagẹ̌ su ělang’E apang tawe aktif kụ i Sie mapulu i sire saụ mẹ̌bal᷊ị sarang i Sie. Mạeng mẹ̌těno si Yehuwa, i kitẹ botonge mẹ̌tul᷊ung si sire gunang saụ mẹ̌bal᷊ị. I kitẹ harusẹ̌ měnodẹ kasasabarẹ̌, sipatẹ̌ sěngkanaung, dingangu kakěndagẹ̌. Kawe nụe i kitẹ harusẹ̌ měnodẹ manga sipatẹ̌ ini, kụ kerea měkoạ ene?

10. Kerea kasasabarẹ̌ penting su tempong i kitẹ mẹ̌tul᷊ung tau tawe aktif?

¹⁰ I kitẹ harusẹ̌ masabarẹ̌ ual᷊ingu lawọ tempo mapakẹ gunang mẹ̌tul᷊ung si sire saụ mẹ̌bal᷊ị sarang i Yehuwa. Lawọ taumata bọu nakoạ tawe aktif něngakui i sire hědo piạ kapulu saụ mẹ̌bal᷊ị su tempong manga penatua dingangu anạu sěmbaụ wal᷊inẹ pirang sul᷊ẹ nẹ̌tiwo si sire. Sěngkatau saudari bọu Asia Tenggara arenge Nancy, němohẹ, ”Sěngkatau hapị mapia su sidang sěbạe nakatul᷊ung si siạ. I sie makěndagẹ̌ si siạ kụ někoạ si siạ kere tuarine. I sie nẹ̌běke soal u hal᷊ẹ̌ makal᷊uasẹ̌ seng nikoạ i kami kangerẹ. I sie lai masabarẹ̌ dimaringihẹ̌ su tempong iạ nẹ̌běke apa nikapěndangengku, kụ tawe němotọ bisaraku gunang měgělị sasasa. I sie nakoạ hapị tutune, kụ sadia mẹ̌tul᷊ung su haghing tempo.”

11. Kawe nụe si kitẹ harusẹ̌ piạ sipatẹ̌ sěngkanaung gunang mẹ̌tul᷊ung si sire apang natědụ naung?

¹¹ Sipatẹ̌ sěngkanaung mẹ̌sul᷊ungu undang mapaelẹ̌. Ene botonge makapia tědụu naung. Pirang katau tawe aktif seng  taunge natědụ naung ual᷊ingu kakanoạu sěngkatau su sidang. Ual᷊ingu ene, i sire madiri mẹ̌bal᷊ị sarang i Yehuwa. Sěnggạ ěndịu nẹ̌pikirẹ̌ i sire nakahombang hal᷊ẹ̌ tawẹ adile. I sire aramanung mapulu piạ u dumaringihẹ̌ si sire dingangu makaěna pěndang i sire. (Yak. 1:19) I María, bọu nakoạ tawe aktif, nẹ̌bera, ”Iạ mapulu piạ u dumaringihẹ̌ si siạ, měhiborẹ̌ si siạ, dingangu měgělị sasasa lai mẹ̌tul᷊ung si siạ.”

12. Kerea kakěndagi Yehuwa mẹ̌sul᷊ungu tal᷊i?

¹² Alkitapẹ̌ nělahẹ kakěndagi Yehuwa su manga ělang’E ene mẹ̌sul᷊ungu tal᷊i. Apa mangal᷊ene kakěndagu Mawu mẹ̌sul᷊ungu tal᷊i? Pẹ̌tiněna sasihing ini: Pělọe i kau nal᷊ěmisẹ̌ su laudẹ̌ maihạ kụ piạ u něneledẹ̌ rompi pelampung. I kau tantu makitarimakasẹ ual᷊ingu ene nakakoạ si kau dimal᷊ěto. Katewe, kětạeng měpakẹ rompi ene bědang kurang. Laudẹ̌ kai matěho, kụ i kau sarung mate mạeng tawe maawị su sakaeng. Harusẹ̌ piạ u měneledẹ̌ tal᷊i si kau, kụ měmol᷊eng si kau sarang sakaeng. Yehuwa nẹ̌bisara soal u tau Israel apang seng nẹ̌těngkarau bọu i Sie, ”Iạ němol᷊eng si sire sarang Iạ dingangu kapiang naung lai kakěndagẹ̌ [arau, ”tal᷊ing kakěndagẹ̌”, ctk.].” (Hos. 11:4) Orasẹ̌ ini, pěndangu Mawu lai kerene si sire apang něngědo nẹ̌tahamawu si Sie dingangu si sire apang nal᷊ěmisu haghing masalah lai kaghaghěnggang. I Sie mapulu i sire makasingkạ i Sie makěndagẹ̌ si sire, kụ i Sie mapulu měmol᷊eng si sire sarang i Sie. Yehuwa botonge měpakẹ si kau gunang mapakal᷊ahẹ kakěndag’E si sire.

13. Běkeko pengalaman něnodẹ kakěndagi kitẹ makatul᷊ung tau tawe aktif gunang mẹ̌bal᷊ị sarang i Yehuwa.

¹³ Sěbạe penting turusẹ̌ maul᷊ị su tau tawe aktif Yehuwa kai makěndagẹ̌ si sire kụ i kitẹ lai makěndagẹ̌ si sire. I Pablo, seng  nisěbạ su pěngangěndungang kal᷊imona, nakoạ tawe aktif karěngụe nal᷊iu wọu 30 su taunge. I sie nẹ̌bera, ”Sěngsul᷊ẹ tempo, su tempong mal᷊ukadẹ̌, iạ siměbang bọu wal᷊e, kụ iạ nẹ̌sombang dingangu sěngkatau saudari maghurang kụ mapia naung. I sie nẹ̌bisara mapia si siạ. Iạ něnětạ simangị kere anạ kadodọ. Iạ naul᷊ị si sie Yehuwa seng něndolohẹ̌ si sie gunang mẹ̌bisara si siạ. Su tempo ene, iạ němutusẹ̌ gunang saụ mẹ̌bal᷊ị sarang i Yehuwa.”

14. Tumuhụ sasihing niwohẹ su Lukas 15:4, 5, apa nikoạu gembala su tempong nakaěbạ dombane?

¹⁴ Su apang seng nakaěbạ si sire apang tawe aktif, i kitẹ harusẹ̌ turusẹ̌ mẹ̌tul᷊ung dingangu měnoghasẹ̌ si sire. Kere anạ nailang su sasihing i Yesus, i sire aramanung nasigěsạ secara emosi. Kụ i sire lai aramanung nal᷊ome secara rohani ual᷊ingu apa nikahombangeng i sire su duniang Setang ini. I kitẹ harusẹ̌ mẹ̌tul᷊ung si sire gunang měnoghasẹ̌ pẹ̌dal᷊ahapị i sire dingangi Yehuwa. Su sasihing i Yesus soal u domba nailang, Yesus naul᷊ị gembala nẹ̌taho domba ene su wěmbange kụ nẹ̌bawa si sie sarang komol᷊angu dombane. Gembala ene seng něpakẹ lawọ tempo dingangu katatoghasẹ̌ gunang mědeạ domba ene. Katewe i sie masingkạ i sie harusẹ̌ měmikul᷊ẹ̌ domba ene ual᷊ingu domba ene seng lome gunang dumal᷊eng.​—Basa Lukas 15:4, 5.

15. Kerea i kitẹ botonge mẹ̌tul᷊ung si sire apang lome apang mapulu saụ mẹ̌bal᷊ị sarang i Yehuwa? (Pěmanda kotak ” Alat Bantu Maarěga”.)

¹⁵ I kitẹ aramanung harusẹ̌ měpakẹ lawọ tempo dingangu katatoghasẹ̌ gunang mẹ̌tul᷊ung si sire apang tawe aktif lumawang masalah nakal᷊ome si sire. Katewe, dingangu rohkẹ̌ i Yehuwa, Hengetang’E, dingangu manga publikasi nisadia bọu sidang, i kitẹ botonge mẹ̌tul᷊ung si sire saụ makoạ matoghasẹ̌. (Rm. 15:1)  Kerea i kitẹ měkoạ ene? Sěngkatau penatua piạ lawọ pengalaman, nẹ̌bera, ”Lawọ anạu sěmbaụ apang tawe aktif harusẹ̌ saụ měngěndung Alkitapẹ̌ mạeng i sire mapulu saụ mẹ̌tahamawu si Yehuwa.” * Hakị u ene, mạeng i kau nirorongang gunang měngahạ pěngangěndungang Alkitapẹ̌ dingangi sire apang tawe aktif, tarimạe ene. Penatua ene lai naul᷊ị, ”Penyiar apang měngahạ pěngangěndungang ene harusẹ̌ makoạ hapị mapia, kụ botonge makakoạ tau tawe aktif ene mangimang si sie dingangu mapulu mẹ̌běke apa nikapěndangenge.”

16. Apa buktine manga malaekatẹ̌ lai nẹ̌tul᷊ung si kitẹ?

¹⁶ Lawọ pengalaman něnodẹ manga malaekatẹ̌ lai něhal᷊ẹ̌ sěngkasio dingangi kitẹ gunang makaěbạ si sire apang tawe aktif kụ mapulu mẹ̌bal᷊ị sarang i Yehuwa. (Why. 14:6) Contone, sěngkatau saudara bọu Ekuador, arenge Silvio, nẹ̌doa si Yehuwa gunang mẹ̌tul᷊ung si sie mẹ̌bal᷊ị sarang sidang. Su tempong i sie kạpẹ̌doane, belẹ̌ su tukadu wal᷊ene himěte. Sěngkakělane, piạ darua penatua su těngong tukadẹ̌. Manga penatua ene mal᷊uasẹ̌ mẹ̌tul᷊ung si sie.

17. Apa al᷊amatẹ̌ nikaěbạ i kitẹ mạeng mẹ̌tul᷊ung si sire apang lome?

¹⁷ I kitẹ sarung mal᷊uasẹ̌ su tempong mẹ̌tul᷊ung si sire apang lome gunang mẹ̌bal᷊ị sarang i Yehuwa. Sěngkatau perintis seng nẹ̌tawakal᷊i nẹ̌tul᷊ung tau tawe aktif, nẹ̌bera, ”Pẹ̌sěngsul᷊ẹ, iạ nitědọkangu ěllong mata ual᷊ingu sěbạe mal᷊uasẹ̌. Iạ sěbạe mal᷊uasẹ̌ ual᷊ingu botonge něhal᷊ẹ̌ sěngkasio dingangi Yehuwa gunang mẹ̌tul᷊ung sěngkatau ělang’E suměbang bọu duniang Setang kụ nẹ̌bal᷊ị sarang sidang.”​—Kis. 20:35.

18. Mạeng i kau tawe aktif, i kau botonge mangimang apa?

¹⁸ Mạeng i kau nakoạ tawe aktif, pangimangke Yehuwa bědang makěndagẹ̌ si kau. I Sie mapulu i kau mẹ̌bal᷊ị sarang i Sie. I kau harusẹ̌ mẹ̌tawakal᷊i tadeạu botonge mẹ̌bal᷊ị sarang i Sie. Katewe, kere papạ su sasihing i Yesus, Yehuwa měngẹ̌ngampal᷊ẹ̌ i kau mẹ̌bal᷊ị, kụ i Sie sarung mal᷊uasẹ̌ měněnsomahẹ̌ si kau.