1. Apa seng nikoạ i Yehuwa gunang i kitẹ pẹ̌sěngkatau?

YEHUWA seng němol᷊eng si kitẹ pẹ̌sěngkatau sarang i Sie. (Yoh. 6:44) Pẹ̌tiněna apa ene mangal᷊ene. Su tempong i Yehuwa němanda miliarẹ̌e taumata su dunia ini, i Sie němanda i kau matul᷊idẹ̌ kụ sarung kuměndagẹ̌ si Sie. Ini maarěga si Yehuwa. (1 Taw. 28:9) Yehuwa masingkạ, nakaěna, dingangu makěndagẹ̌ si kau. Ene sěbạe makatoghasẹ̌!

2. Kerea i Yesus nẹ̌tul᷊ung si kitẹ makaěna i Yehuwa sěbạe mapadul᷊i si kitẹ pẹ̌sěngkatau?

² Yehuwa sěbạe mapadul᷊i si kau dingangu i Sie lai mapadul᷊i su kěbị anạu sěmbaụ. Gunang mẹ̌tul᷊ung si kitẹ makaěna soal u ene, i Yesus napẹ̌sul᷊ung i Yehuwa dingangu sěngkatau měngangahạ. Mạeng bọu 100 domba piạ sěmbaụ napal᷊idẹ̌, apa sarung koatengu měngangahạ? I sie sarung ”měněntang 99 dombane su wul᷊udẹ̌ kụ dumal᷊eng mědeạ domba napal᷊idẹ̌ ene”. Su tempong měngangahạ nakaěbạ domba ene, i sie tawe měměbahẹ̌. I sie sarung mal᷊uasẹ̌. Apa tatěntirone? Kěbị domba penting si Yehuwa. Yesus nẹ̌bera, ”I Amangku su sorga madiri sarang sěngkatau bọu manga taumata dararodọ ini mailang.”​—Mat. 18:12-14.

3. Apa sarung ěndungang i kitẹ su pěngangěndungang ini?

³ I kitẹ tantu madiri makatědụ naungu anạu sěmbaụ. Kerea tadeạu i kitẹ tawe makasangkong taumata wal᷊inẹ? Kụ, apa koateng i kitẹ mạeng piạ u nakatědụ naung i kitẹ? I kitẹ sarung sumimbahẹ̌ manga kakiwal᷊o ene su pěngangěndungang ini. Katewe, mahịe i kitẹ měngěndung soal u ”manga taumata kadodọ” su Matius pasalẹ̌ 18.

4. I sai ”manga taumata kadodọ” ene?

⁴ ”Manga taumata kadodọ” ene kai tumatol᷊eng i Yesus bọu haghing umurẹ̌. I sire kěbị mẹ̌sul᷊ung ”kere dariọ kadodọ” ual᷊ingu mapulu těntirong i Yesus. (Mat. 18:3) Maning i sire bọu haghing latar belakang, budaya, dingangu piạ sipatẹ̌ nẹ̌tatěntang, i sire kěbị mangimang si Kristus. Kụ i Kristus lai sěbạe makěndagẹ̌ si sire.​—Mat. 18:6; Yoh. 1:12.

5. Kerea pěndang i Yehuwa su tempong piạ u nakasangkong arau nakatědụ naungu sěngkatau ělang’E?

⁵ Kěbị ”taumata kadodọ” ini maarěga si Yehuwa. Gunang makaěna ene, pẹ̌tiněna pěndang i kitẹ soal u mangarariọ. I sire maarěga si kitẹ. I kitẹ mapulu měndiagạ si sire ual᷊ingu i sire bědang mahal᷊i pengalaman, tawe tumanịu matoghasẹ̌, arau matahuěna kere taumata matělang. I kitẹ tawe mapulu makasilo piạ u mẹ̌tingkaị taumata wal᷊inẹ, katewe su tempong piạ u mẹ̌tingkaị mangarariọ i kitẹ sarung limembong mẹ̌pědu. Yehuwa lai kerene, i Sie mapulu měndiagạ si kitẹ. Yehuwa mẹ̌pědu su tempong piạ u nakasangkong arau nakatědụ naungu sěngkatau ělang’E.​—Yes. 63:9; Mrk. 9:42.

6. Tumuhụ 1 Korintus 1:26-29, kerea dunia ini měmanda manga muriti Yesus?

⁶ Apa lai nakakoạ manga muriti Yesus mẹ̌sul᷊ung kere ”taumata kadodọ”? Gunang sumimbahẹ̌ ene, i sai pẹ̌pandaěng penting su dunia ini? Taumata makalạ, terkenal, dingangu makawasa. Nẹ̌tatěntang dingangu manga muriti Yesus, i sire pandaěng tawe penting kere ”taumata kadodọ”. (Basa 1 Korintus 1:26-29.) Katewe, i Yehuwa tawe němanda si sire kerene.

7. Yehuwa mapulu i kitẹ kerea měmanda anạu sěmbaụ?

⁷ Yehuwa makěndagẹ̌ su kěbị ělang’E, tawẹ soale i sire seng marěngụ arau bědang buhu su ral᷊ungu katěngadẹ̌. Kěbị anạu sěmbaụ penting si Yehuwa, hakị u ene i sire lai harusẹ̌ penting si kitẹ. I kitẹ mapulu ’kuměndagẹ̌ kěbị anạu sěmbaụ’, bal᷊inẹ kětạeng pirang katau. (1 Ptr. 2:17) I kitẹ harusẹ̌ sadia měkoạ kěbị haghi gunang měndiagạ dingangu mapadul᷊i si sire. Mạeng i kitẹ masingkạ i kitẹ seng nakatědụ naungu sěngkatau, i kitẹ abe měmala ene kụ měpikirẹ̌ taumata ene harusẹ̌ měgělị ampung dingangu seng tawe mẹ̌tahěndung masalah ene. Apa alasang pirang katau natědụ naung? Ual᷊ingu latar belakang i sire, kụ nẹ̌pěndang watangenge tawẹ arěgane sul᷊ungu taumata wal᷊inẹ. Sěnggạ lai bědang buhu su katěngadẹ̌, kụ i sire bědang tawe něngěndung kerea carane tumatěngo karal᷊omeng taumata. Maning apa situasine, i kitẹ mapulu mẹ̌tawakal᷊i tatapẹ̌ mararame. Kụ taumata masau tersinggung ual᷊ingu taumata wal᷊inẹ perlu měmarikěsa apa ini sipate kụ harusẹ̌ bal᷊uiang. Bọu ene, i sie sarung mal᷊uasẹ̌ kụ piạ pẹ̌dal᷊ahapị mapia dingangu anạu sěmbaụ.

8. Manga muriti Yesus napěngaruh tiněna apa?

⁸ Kawe nụe i Yesus nẹ̌bisara soal u ”manga taumata kadodọ”? Manga murite nẹ̌kiwal᷊o si sie, ”I sai sěběnarẹ̌e kaguwạkenge su Kararatuang su sorga?” (Mat. 18:1) Lawọ tau Yahudi mapulu taumata wal᷊inẹ měpikirẹ̌ i sire penting. Sěngkatau pakar nẹ̌bera, ”Měnarimạ kawawantugẹ̌ dingangu makoạ terkenal ene sěbạe penting su pěbawiahi sire.”

9. Apa harusẹ̌ koatengu manga muriti Yesus?

⁹ Yesus masingkạ lawọ tau Yahudi mapulu makoạ limembong mapaelẹ̌ bọu taumata wal᷊inẹ, kụ manga murite harusẹ̌ mẹ̌tawakal᷊i měmal᷊ui tiněnang i sire. I sie nẹ̌bera si sire, ”Taumata kaguwạkenge su tal᷊oarang i kamene harusẹ̌ makoạ kangudạkenge, kụ taumata měngẹ̌ngahạ makoạ kere sěngkatau ělang.” (Luk. 22:26) I kitẹ makoạ kere ”kangudạkenge” su tempong ”mẹ̌pěndang taumata wal᷊inẹ  limembong penting” sul᷊ungu i kitẹ. (Flp. 2:3) Kakạpaele i kitẹ měnodẹ sipatẹ̌ ene, i kitẹ ěndịu tawe makasangkong taumata wal᷊inẹ.

10. Sasasang i Paulus sude harusẹ̌ tol᷊eěng i kitẹ?

¹⁰ Kěbị anạu sěmbaụ i kitẹ sěběnarẹ̌e piạ sěmbaụ hal᷊ẹ̌ limembong mapaelẹ̌ bọu i kitẹ. Ene gampang kasilong su tempong i kitẹ fokus su manga sipati sire mapaelẹ̌. I kitẹ harusẹ̌ měndesọ su ral᷊ungu naung sasasang i Rasul Paulus ini: ”Apa pẹ̌tatěntange i kamene dingangu taumata wal᷊inẹ? Sěběnarẹ̌e, bal᷊inẹbe kěbị apa seng piạ si kamene ene kai gaghělị? Mạeng ene gaghělị, kawe nụe i kamene bangga mẹ̌sul᷊ung ene bal᷊inẹ kere gaghělị?” (1 Kor. 4:7) Hakị u ene, i kitẹ tantu madiri taumata mapakawantugẹ̌ arau měmanda i kitẹ limembong marangẹ sul᷊ungu taumata wal᷊inẹ. Mạeng sěngkatau saudara nẹ̌bawa nasẹ̌ mapaelẹ̌ arau sěngkatau saudari mapaelẹ̌ měnětạ pěngangěndungang Alkitapẹ̌, i sire harusẹ̌ měgělị kawawantugẹ̌ si Yehuwa.

11. Apa nitěntirong i Yesus bọu sasihing soal u sěngkatau datu dingangu ělang dal᷊akị?

¹¹ Su apang i Yesus bọu něgělị laingatẹ̌ su manga tumatol᷊ene tadeạu tawe makoạ kasasangkonang su taumata wal᷊inẹ, i sie něgělị sasihing soal u sěngkatau datu dingangu ělang dal᷊akị. Datu ene něngěmụ utange mal᷊awọ tawe kawaehangu ělang ene. Bọu ene, ělang ene madiri měngěmụ utangu ělang wal᷊inẹ limembong mahal᷊i bọu utange. Samurine, datu ene něnuẹ̌ ělang ene sarang penjara. Apa těntirone? Yesus nẹ̌bera, ”I Amangku su sorga lai sarung měkoạ si kamene kerene mạeng i kamene pẹ̌sěngkatau tawe měngampung anạu sěmbaụ i kamene bọu naung.”​—Mat. 18:21-35.

12. Mạeng i kitẹ tawe měgělị ampung, apa pěngarune su taumata wal᷊inẹ?

¹² Apa nikoạu ělang ene bal᷊inẹ kětạeng nakarugi si sie, katewe lai taumata wal᷊inẹ. Humotong, i sie nakarugi ělang wal᷊inẹ ual᷊ingu ”něnuẹ̌ [ělang wal᷊inẹ] su penjara sarang i sie makawaehẹ̌ utange”. Karuane, i sie nakoạ kasasangkonang su ělang wal᷊inẹ apang němanda apa nikoạe. Su tempong ”manga ělang wal᷊inẹ nakasilo apa nariadi, i sire sěbạe nasusah naung”. Kerene lai, apa nikoạ i kitẹ piạ pěngarune su taumata wal᷊inẹ. Mạeng sěngkatau někoạ pẹ̌sasal᷊a kụ i kitẹ madiri měgělị ampung, apa sarung mariadi? Humotong, i kitẹ nakatědụ naunge ual᷊ingu madiri měgělị ampung si sie. Kụ i kitẹ ěndịu tawe nẹ̌pandung dingangu tawe něnodẹ kakěndagẹ̌ si sie. Karuane, i kitẹ makakoạ taumata wal᷊inẹ su sidang balisa su tempong i sire němanda i kitẹ madiri mẹ̌dame dingange.

13. Apa kaěndungangu bọu pengalaman sěngkatau perintis?

¹³ Mạeng i kitẹ měgělị ampung su anạu sěmbaụ, i kitẹ dingangu taumata wal᷊inẹ sarung makaěbạ gunane. Pěmanda pengalaman sěngkatau perintis arenge Kristal. * I sie natědụ naung ual᷊ingu sěngkatau saudari su sidang. Kristal nẹ̌běke, ”Pẹ̌sěngsul᷊ẹ bawerane kasarẹ̌ si siạ mẹ̌sul᷊ung kere nitěkạu pisọ. Sarang měnginjilẹ̌ dingange iạ madiri. Iạ něnětạ nikailangengu sěmangatẹ̌ dingangu karal᷊uasẹ̌.” Kristal nẹ̌pěndang masuẹ̌ su akal᷊ẹ̌ i sie mẹ̌pědu. Katewe, i sie tawe turusẹ̌ nẹ̌pědu arau timal᷊ěntụ su watangenge. Kawe nụe? Ual᷊ingu i sie masanạ naung kụ timol᷊e sasasa bọu Alkitapẹ̌ su Menara Pengawal 15 Oktober 1999, su pěngangěndungang tatěmbọe ”Ampunilah dengan Segenap Hati Saudara”. I sie něgělị ampung su saudari ene. Kristal nẹ̌bera, ”Orasẹ̌ ini, iạ nasadarẹ̌ i kitẹ kěbị mětẹ̌tawakal᷊i měpakẹ pěbawiahẹ̌ buhu kụ i Yehuwa sadia měgělị ampung si kitẹ ěllo-ěllo. Iạ nakapěndang kere němělọ bawawaěng mawěhạ bọu wěmbangku. Iạ saụ nakapěndang mal᷊uasẹ̌.”

14. Tumuhụ Matius 18:21, 22, masalah apa nikahombangeng i Rasul Petrus kụ apa kaěndungangu bọu sasimbahi Yesus?

 ¹⁴ I kitẹ masingkạ i kitẹ harusẹ̌ měgělị ampung, kụ ene hal᷊ẹ̌ nihino gunang koateng. Katewe i kitẹ ěndịu masigěsạ měkoạ ene. Pẹ̌sěngsul᷊ẹ i Rasul Petrus ěndịu nẹ̌pěndang kerene. (Basa Matius 18:21, 22.) Apa botonge makatul᷊ung? Humotong, pẹ̌tiněna kerea kal᷊awọe i Yehuwa seng něgělị ampung si kau. (Mat. 18:32, 33) I kitẹ tawe layak ampungang, katewe i Sie mapulu měgělị ampung si kitẹ. (Mz. 103:8-10) Su tempo mẹ̌sul᷊ung, ”i kitẹ lai harusẹ̌ mẹ̌kakěndagẹ̌ sěmbaụ su wal᷊inẹ”. Hakị u ene, měgělị ampung ene bal᷊inẹ pile. I kitẹ harusẹ̌ měgělị ampung su anạu sěmbaụ. (1 Yoh. 4:11) Karuane, pẹ̌tiněna apa mariadi mạeng i kau měgělị ampung. I kitẹ makatul᷊ung taumata seng někoạ pẹ̌sasal᷊a si kitẹ, makakoạ sidang masěmbaụ, makariagạ pẹ̌dal᷊ahapị i kitẹ dingangi Yehuwa, dingangu kere měmělọ sěmbaụ bawawaěng bọu běmbang i kitẹ. (2 Kor. 2:7; Kol. 3:14) Samurine, pẹ̌doa si Yehuwa ual᷊ingu i Sie mapulu i kitẹ měgělị ampung. Abe wala Setang makarusa pẹ̌dal᷊ahapịu mapia dingangu anạu sěmbaụ. (Ef. 4:26, 27) I kitẹ membutuhkan tul᷊umang i Yehuwa tadeạu piạ pẹ̌darame su sidang.

15. Kere nilahẹ su Kolose 3:13, apa koateng i kitẹ mạeng piạ anạu sěmbaụ nakatědụ naung i kitẹ?

¹⁵ Kerea mạeng piạ anạu sěmbaụ nakatědụ naung i kitẹ? Apa harusẹ̌ koateng? Diagạ pẹ̌darame sěngapang botonge. Pẹ̌běke si Yehuwa kerea pěndangu. Pẹ̌dorong si Yehuwa tadeạu mẹ̌tul᷊ung tau seng nakatědụ naungu. Kụ lai pẹ̌dorong tul᷊ung tadeạu i kau makasilo manga sipatẹ̌ mapaelẹ̌ nakakoạ i Yehuwa kiměndagẹ̌ si sie. (Luk. 6:28) Mạeng i kau turusẹ̌ mětẹ̌tahěndung pẹ̌sasal᷊a nikoạu anạu sěmbaụ ene, pẹ̌tiněna cara kapaelange gunang mẹ̌bisara dingange. Mapaelẹ̌ mạeng mẹ̌tiněna anạu sěmbaụ ene tawe sangaja nakatědụ  naung i kitẹ. (Mat. 5:23, 24; 1 Kor. 13:7) Su tempong i kau mẹ̌bisara dingange, pẹ̌tiněna i sie piạ timona mapia. Kerea mạeng i sie madiri mẹ̌dame? ”Tatapẹ̌ masabarẹ̌” tumatěngo si sie. Abe pěngědo měkoạ ene. (Basa Kolose 3:13.) Kụ limembong penting abe turusẹ̌ mẹ̌pědu, ual᷊ingu ene sarung makarusa pẹ̌dal᷊ahapịu dingangi Yehuwa. Abe wala maning apa makasangkong si kau. Mạeng měkoạ ene, i kau něnodẹ i kau limembong makěndagẹ̌ si Yehuwa sul᷊ungu kěbị hal᷊ẹ̌ wal᷊inẹ.​—Mz. 119:165.

16. I kitẹ pẹ̌sěngkatau piạ tanggung jawab apa?

¹⁶ I kitẹ mẹ̌tarimakasẹ ual᷊ingu nẹ̌tahamawu si Yehuwa sěngkasio dingangu anạu sěmbaụ nakoạ ”sěmbaụ gapaěng”, kụ ”sěmbaụ měngangahạe”. (Yoh. 10:16) Su bukẹ̌ Diorganisasi untuk Melakukan Kehendak Yehuwa, halaman 165, niul᷊ị, ”Ual᷊ingu nakaěbạ gunane bọu kasasěmbaụ ini, i kau piạ tanggung jawab gunang měndiagạ ene.” Hakị u ene, i kitẹ perlu ”melatih watangeng gunang měmanda taumata wal᷊inẹ kere cara i Yehuwa měmanda”. I kitẹ kěbị kai ”taumata kadodọ” maarěga si Yehuwa. Apa i kitẹ němanda anạu sěmbaụ kerene? Yehuwa měmẹ̌manda dingangu měngarěga kěbị apa nikoạu gunang mẹ̌tul᷊ung dingangu mapadul᷊i si sire.​—Mat. 10:42.

17. I kitẹ mapulu mẹ̌tawakal᷊i měkoạ apa?

¹⁷ I kitẹ makěndagẹ̌ su anạu sěmbaụ. Hakị u ene, i kitẹ ’mẹ̌tawakal᷊i tawe mẹ̌taho batu makasangkong arau makasahaghe su těngong anạu sěmbaụ’. (Rm. 14:13) I kitẹ měkoạ anạu sěmbaụ limembong marangẹ bọu i kitẹ, kụ i kitẹ mapulu měgělị ampung si sire bọu dal᷊ungu naung. Karimạko i kitẹ tawe měmala watangeng i kitẹ masangkong ual᷊ingu taumata wal᷊inẹ. Mahịe i kitẹ měmile gunang ’měkoạ kěbị hal᷊ẹ̌ makarěntang pẹ̌darame dingangu makatoghasẹ̌ sěmbaụ su wal᷊inẹ’.​—Rm. 14:19.