1. Kawe nụe pẹ̌sěngsul᷊ẹ manga ělang i Yehuwa ěndịu kesepian?

PẸ̌SĚNGSUL᷊Ẹ kal᷊awokange bọu i kitẹ nẹ̌pěndang kesepian. Su pirang katau pěndang kere ini mal᷊ighạ mailang. Sěnggạe wue turusẹ̌ kesepian. Maning i kitẹ su tal᷊oarang taumata lawọ, i kitẹ ěndịu mẹ̌pěndang tawẹ apa hapị. Sěnggạ lai masulitẹ̌ mědal᷊ahapị su sidang buhu. Sěnggạe wue asal᷊e bọu keluarga mararame, katewe su tempong i sie nẹ̌tanạ marau bọu keluarga, i sie nẹ̌pěndang kesepian. Sěnggạ lai dụdareạ taumata ikẹ̌kěndagẹ̌ seng nate. Pirang katau lai apang buhudeng něngěndung katěngadẹ̌ nẹ̌pěndang kesepian su tempong keluarga dingangu hapị bal᷊inẹ Sahiding Yehuwa mawěngsing arau měndariha si sire.

2. Manga kakiwal᷊o apa sarung ěndungang i kitẹ?

² Yehuwa masingkạ dingangu nakaěna kěbị soal i kitẹ. Su tempong i kitẹ kesepian, i Sie masingkạ ene kụ i Sie mapulu mẹ̌tul᷊ung si kitẹ. Kerea carane i Yehuwa mẹ̌tul᷊ung si kitẹ? Apa wotonge koateng i kitẹ gunang mẹ̌tul᷊ung watangeng hala? Kụ kerea i kitẹ botonge mẹ̌tul᷊ung anạu sěmbaụ su sidang apang kesepian? Mahịe měngěndung manga sasimbahe.

3. Kerea i Yehuwa něnodẹ i Sie mapadul᷊i si Elia?

³ Yehuwa mapulu kěbị ělang’E mal᷊uasẹ̌. I Sie marani dingangi  kitẹ pẹ̌sěngkatau, kụ i Sie masingkạ mạeng i kitẹ nasusah naung arau nakadodọ naung. (Mz. 145:18, 19) Pěmanda kerea i Yehuwa něnodẹ i Sie mapadul᷊i si Elia. Esẹ masatia ene měbẹ̌biahẹ̌ su kanandụu tempo masigěsạ su sějarang Israel. Taumata piạ wewenang su Israel kụ tawe makěndagẹ̌ si Yehuwa něndariha manga ělangu Mawu kụ kahumotongange i sire mapulu měmate si Elia. (1 Raj. 19:1, 2) Kụ i Elia ěndịu limembong nakadodọ naung ual᷊ingu i sie nẹ̌pikirẹ̌ kate i sie nabing Yehuwa su tempo ene. (1 Raj. 19:10) Mawu apidu někoạ sěmbaụ hal᷊ẹ̌ gunang mẹ̌tul᷊ung si Elia. Yehuwa něpakẹ sěmbaụ malaekatẹ̌ gunang měnoghasẹ̌ si Elia. Malaekatẹ̌ ene naul᷊ị si Elia bědang piạ lawọ tau Israel masatia mětẹ̌tahamawu si Yehuwa.​—1 Raj. 19:5, 18.

4. Kerea Markus 10:29, 30 něnodẹ i Yehuwa mapadul᷊i su manga ělang’E apang tawe nakaěbạ tul᷊umang bọu taumata wal᷊inẹ?

⁴ Yehuwa masingkạ su tempong i kitẹ němile mẹ̌tahamawu si Sie, i kitẹ harusẹ̌ měkoạ lawọ pengorbanan. Contone, kere tul᷊umang bọu keluarga lai hapị bal᷊inẹ Sahiding Yehuwa. Aramanung ual᷊ingu gụgěnggang, Rasul Petrus nẹ̌kiwal᷊o si Yesus, ”I kami seng něněntang kěbị haghi kụ timol᷊e si kau. Hakị u ene apa sarung tarimakeng i kami?” (Mat. 19:27) Yesus dingangu mapia naung naul᷊ị su manga murite i sire sarung makaěbạ lawọ keluarga rohani. (Basa Markus 10:29, 30.) Kụ i Yehuwa, i Amang i kitẹ su sorga nẹ̌diandi i Sie sarung mẹ̌tul᷊ung si sire apang mapulu mẹ̌tahamawu si Sie. (Mz. 9:10) Pěmanda piram baụ hal᷊ẹ̌ botonge koateng i kitẹ su tempong kesepian tadeạu makatarimạ tul᷊umang i Yehuwa.

5. Apa gunane mạeng i kitẹ mẹ̌tiněna soal u kerea i Yehuwa nẹ̌tul᷊ung si kitẹ?

⁵ Pẹ̌tiněna kerea Yehuwa mẹ̌tul᷊ung si kau. (Mz. 55:22) Ene sarung makatul᷊ung si kau makasilo i kau tawe sẹ̌sanu. Sěngkatau saudari lajang arenge Karina *, kụ kětạeng sẹ̌sane su ral᷊ungu katěngadẹ̌, nẹ̌bera, ”Su tempong iạ nẹ̌tiněna soal u kerea i Yehuwa nẹ̌tul᷊ung si siạ nẹ̌tatahang su tempong masigěsạ, ene nakatul᷊ung si siạ nẹ̌pěndang iạ tawe sẹ̌saku. Kụ ene nakakoạ iạ mangimang Yehuwa sarung sěntiniạ mẹ̌tul᷊ung si siạ.”

6. Kerea 1 Petrus 5:9, 10 botonge makawahangsang si sire apang kesepian?

 ⁶ Pẹ̌tiněna kerea i Yehuwa nẹ̌tul᷊ung anạu sěmbaụ apang kesepian. (Basa 1 Petrus 5:9, 10.) Hiroshi, sěngkatau saudara seng pira taung kětạeng i sie sẹ̌sane Sahiding Yehuwa su kěluargane, nẹ̌bera, ”Su ral᷊ungu sidang, i kitẹ gampang makasilo i kitẹ pẹ̌sěngkatau piạ masalah. I kitẹ masingkạ i kitẹ kěbị nẹ̌tawakal᷊i někoạ kapaelange gunang mẹ̌tahamawu si Yehuwa, kụ ene botonge makawahangsang si sire apang kětạeng sẹ̌sane su ral᷊ungu katěngadẹ̌.”

7. Kerea daroa makatul᷊ung si kau?

⁷ Tatapẹ̌ piạ rutin rohani mapia. I kau harusẹ̌ mẹ̌běke si Yehuwa kerea pěndangu. (1 Ptr. 5:7) Massiel, sěngkatau saudari mangudạ nẹ̌pěndang kěluargane tawe nẹ̌pandung si sie su tempong i sie nakoạ Sahiding Yehuwa. I sie nẹ̌bera, ”Sěmbaụ hal᷊ẹ̌ nakatul᷊ung si siạ su tempong kesepian ene kai mẹ̌doa si Yehuwa dingangu kaguwạu naung. I Sie kahěngang-hěngang Amangku, kụ iạ masau mẹ̌doa si Sie mẹ̌běke kerea pěndangku.”

8. Kerea mẹ̌basa Alkitapẹ̌ dingangu mẹ̌tiněna apa niwasa makatul᷊ung si kau?

⁸ Basa Alkitapẹ̌ ěllo-ěllo, kụ pẹ̌tiněna manga běke něnodẹ Yehuwa makěndagẹ̌ si kau. Bianca, sěngkatau saudari tụtatěngo bawera makakadodọ naung bọu kěluargane, nẹ̌běke, ”Mẹ̌basa dingangu mẹ̌tiněna manga běke su Alkitapẹ̌, lai pěbawiahu manga ělang i Yehuwa apang tụtatěngo situasi mẹ̌sul᷊ung sěbạe nakatul᷊ung si siạ.” Pirang katau anạu sěmbaụ nẹ̌tahěndung manga ayatẹ̌ sěbạe nakatoghasẹ̌ kere Mazmur 27:10 dingangu Yesaya 41:10. Anạu sěmbaụ wal᷊inẹ tawe tumanịu kesepian ual᷊ingu dimaringihẹ̌ rekaman audio su tempong měkoạ persiapan gunang pěngangibadang arau su tempong mẹ̌basa Alkitapẹ̌.

9. Kerea duměnta su pěngangibadang makatul᷊ung si kau?

⁹ Pẹ̌tawakal᷊i turusẹ̌ duměnta su pěngangibadang. I kau sarung makaěbạ gunane bọu acara makatoghasẹ̌, kụ i kau lai sarung limembong makasingkạ anạu sěmbaụ. (Ibr. 10:24, 25) Massiel, seng nisěbạ kanini, nẹ̌bera, ”Maning iạ sěbạe meang, iạ nẹ̌tawakal᷊i duměnta su pěngangibadang kụ měgělị komentarẹ̌. Ini nakatul᷊ung si siạ nakapěndang marani dingangu anạu sěmbaụ su sidang.”

10. Kawe nụe penting mědal᷊ahapị dingangu anạu sěmbaụ masatia?

¹⁰ Pẹ̌dal᷊ahapịe dingangu anạu sěmbaụ masatia. Pẹ̌dal᷊ahapịe dingangu anạu sěmbaụ su sidang apang botonge makoạ tatěnoěng si kau. I sire botonge limembong maghurang arau limembong mangudạ bọu i kau, arau piạ latar belakang nẹ̌tatěntang. Alkitapẹ̌ naul᷊ị pelesa kaěbakeng su tal᷊oarang ”taumata seng maghurang”. (Ayb. 12:12) Maghaghurang lai botonge  měngěndung mal᷊awọ bọu mangangudạ apang masatia. Daud limembong mangudạ bọu i Yonatan, katewe ene tawe nakasahaghe pẹ̌dal᷊ahapị i rẹ̌dua. (1 Sam. 18:1) Daud dingangi Yonatan nẹ̌tul᷊ung sěmbaụ su wal᷊inẹ gunang mẹ̌tahamawu si Yehuwa maning tụtatěngo haghing situasi masigěsạ. (1 Sam. 23:16-18) Irina, sěngkatau saudari kụ kětạeng sẹ̌sane Sahiding Yehuwa su kěluargane, nẹ̌bera, ”Anạu sěmbaụ kahěngang-hěngang nakoạ matimadẹ̌ arau tahatuari rohani si siạ.” Yehuwa botonge měpakẹ si sire makoạ keluarga gunang měnukụ kebutuhan i kitẹ.

11. Apa harusẹ̌ koatengu tadeạu piạ pẹ̌dal᷊ahapị matoghasẹ̌?

¹¹ Mědal᷊ahapị dingangu hapị buhu ěndịu tawe gampang, něngělembo lai mạeng i kau meang. Ratna, sěngkatau saudari meang kụ něngěndung katěngadẹ̌ maning piạ sasal᷊ukạ, nẹ̌běke, ”Iạ harusẹ̌ měnarimạ fakta iạ membutuhkan tul᷊umang anạu sěmbaụ su sidang.” Ěndịu masulitẹ̌ si kitẹ mẹ̌běke pěndang i kitẹ su sěngkatau, katewe mạeng i kitẹ měkoạ ene i kitẹ sarung mědal᷊ahapị mapia dingange. Hapịu mapulu měnoghasẹ̌ dingangu mẹ̌tul᷊ung si kau, katewe i kau perlu mẹ̌běke apa harusẹ̌ koateng i sire.

12. Kerea měnginjilẹ̌ makatul᷊ung si kau makaěbạ hapị mapia?

¹² Sěmbaụ cara kapaelange mědal᷊ahapị ene kai měnginjilẹ̌ sěngkasio dingangu anạu sěmbaụ. Karina, seng nisěbạ kanini, nẹ̌bera, ”Iạ nakaěbạ lawọ hapị mapia ual᷊ingu nědal᷊ahapị dingangu manga saudari su tempong něnginjilẹ̌ lai su tempong někoạ manga hal᷊ẹ̌ rohani wal᷊inẹ. Taunge Yehuwa nẹ̌tul᷊ung si siạ bọu manga hapị kerene.” Su tempong i kitẹ mědal᷊ahapị dingangu anạu sěmbaụ masatia ene mang makarěntang hal᷊ẹ̌ mapia. Yehuwa něpakẹ manga hapị kerene gunang měnoghasẹ̌ si kau su tempong i kau nakadodọ naung. Contone, su tempong i kau kesepian.​—Amsal 17:17.

13. Kěbị su ral᷊ungu sidang piạ tanggung jawab apa?

¹³ Kěbị su sidang piạ tanggung jawab měkoạ sidang mararame dingangu měnodẹ kakěndagẹ̌ su kěbị tadeạu tawẹ apa sěngkatau mẹ̌pěndang kesepian. (Yoh. 13:35) Apa nikoạ dingangu niwerang i kitẹ sěbạe makawahangsang taumata wal᷊inẹ. Sěngkatau saudari nẹ̌běke, ”Su tempong iạ něngěndung katěngadẹ̌, sidang nakoạ keluargaku. Iạ tawe makoạ Sahiding Yehuwa mạeng tawẹ apa tul᷊umang anạu sěmbaụ.” Apa wotonge koatengu gunang mẹ̌tul᷊ung si sire apang kětạeng sẹ̌sane su ral᷊ungu katěngadẹ̌ tadeạu mẹ̌pěndang i sire bageang bọu sidang?

14. Apa wotonge koatengu gunang mědal᷊ahapị dingangu taumata wuhu?

¹⁴ Kěnang pẹ̌dal᷊ahapị dingangu taumata wuhu. Carane měkoạ ene ute mahimumu měněnsomahẹ̌ si sire apang buhu su sidang. (Rm. 15:7) Katewe, i kitẹ mapulu měkoạ limembong mal᷊awọ bal᷊inẹ kětạeng měněnsomahẹ̌ dingangu mahimumu. I kitẹ mapulu mědal᷊ahapị mapia. Hakị u ene, pakapia kụ todẹ i kau sěbạe mapadul᷊i si sire apang buhu. Pẹ̌tawakal᷊i makaěna apa nikahombangeng i sire, katewe abe měgělị kakiwal᷊o makakoạ si sire mamea. Pakaingatẹ̌ abe memaksa si sire gunang sumimbahẹ̌ kakiwal᷊onu ual᷊ingu pirang katau ěndịu masigěsạ mẹ̌běke pěndang i sire. Katewe, pěgělị kakiwal᷊o matahuěna kụ daringihẹ̌ pakapia sasimbahe. Contone, i kau botonge mẹ̌kiwal᷊o kerea sarang i sire nakaěbạ katěngadẹ̌.

15. Kerea tau Kristen matělang su rohani botonge mẹ̌tul᷊ung taumata wal᷊inẹ su sidang?

¹⁵ Kěbị su sidang sarung matoghasẹ̌ mạeng tau Kristen matělang su rohani, lembone manga penatua, mapadul᷊i si sire. Melissa, sěngkatau něngěndung katěngadẹ̌ dingangi mamạe, nẹ̌běke, ”Iạ sěbạe mẹ̌tarimakasẹ su manga  saudara seng nakoạ kere papạ. I sire něnadia tempo dingangku kụ seng taunge mapadul᷊i si siạ. Su tempong iạ mapulu mẹ̌běke piạ taumata mapulu dumaringihẹ̌ si siạ.” Mauricio, sěngkatau saudara nasusah naung ual᷊ingu měnaněntirone něněntang katěngadẹ̌, nẹ̌bera, ”Manga penatua něnodẹ i sire sěbạe mapadul᷊i kụ ene sěbạe nakatul᷊ung si siạ. I sire masau mẹ̌bisara dingangku, i sire něnginjilẹ̌ dingangku, němahiạ permata rohani, dingangu něnalang dingangku.” Orasẹ̌ ini, i Melissa dingangi Mauricio seng nakoạ pelayan sepenuh waktu.

16-17. Apa lai wotonge koateng i kitẹ gunang mẹ̌tul᷊ung taumata wal᷊inẹ?

¹⁶ Pěgělị tul᷊umang. (Gal. 6:10) Leo, sěngkatau utusan injil nakaěbạ tugasẹ̌ marau bọu kěluargane, nẹ̌bera, ”Kasauange, i kau membutuhkan bantuan nẹ̌tatahino su tempone. Iạ nakatahěndung piạ su sěngkatempo iạ nasilakạ su oto. Kụ su tempong nahumpạ su wal᷊e, iạ sěbạe stres. Katewe, su tempo ene piạ sěngkawingang němaringang si siạ kumaěng. Iạ tawe nakatahěndung apa nikaěng i kami, katewe iạ nakatahěndung i sire dimaringihẹ̌ pakapia su tempong iạ nẹ̌běke. Kụ samurine, iạ nakapěndang limembong matěnang.”

¹⁷ I kitẹ kěbị mal᷊uasẹ̌ su tempong mẹ̌komol᷊ẹ̌ dingangu Sahiding Yehuwa wal᷊inẹ, kụ mẹ̌bisara soal u apa seng nikaringihang i kitẹ, kere su manga pertemuan. Katewe, i Karina, seng nisěbạ kanini, nẹ̌bera, ”Iạ sěbạe kesepian su manga pertemuan.” Kawe nụe? I sie nẹ̌bera, ”Maning iạ ene su tal᷊oarang hasụe arau hiwune anạu sěmbaụ, kasauange i sire kụkaiang dingangu kěluargang i sire. Su tempong iạ nakasilo si sire, iạ sěbạe kesepian.” Sěnggạ lai masigěsạ duměnta su manga pertemuan ual᷊ingu nikapatengu kawing i sire. Apa i kau masingkạ sěngkatau nakahombang situasi kere ini? Paringang i sire gunang tumol᷊e acara rohani sěngkasio dingangu kěluarganu.

18. Kerea i kitẹ měpakẹ 2 Korintus 6:11-13 su tempong měnodẹ sipatẹ̌ puluang měnarimạ sake?

¹⁸ Pakẹ tempo sěngkasio. Sadia tempo dingangu anạu sěmbaụ, lembone i sire apang kesepian. I kitẹ mapulu ’měmuka pakal᷊oahẹ̌ naung [i kitẹ]’, lembone su taumata kerene. (Basa 2 Korintus 6:11-13.) Melissa, seng nisěbạ kanini, nẹ̌bera, ”I kami sěntiniạ mal᷊uasẹ̌ su tempong anạu sěmbaụ měmaringang si kami měnalang su wal᷊eng i sire dingangu kěluargang i sire arau mẹ̌pasiarẹ̌ sěngkasio.” Apa piạ taumata  su sidangu botonge kapěnodẹkang sipatẹ̌ puluang měnarimạ sake?

19. Su tempo kerea anạu sěmbaụ limembong mal᷊uasẹ̌ mạeng i kitẹ mědal᷊ahapị dingangi sire?

¹⁹ Aramanung piạ tempo limembong makal᷊uasẹ̌ su anạu sěmbaụ mạeng i kitẹ mědal᷊ahapị dingangi sire. Sěnggạ ěndịu masigěsạ mẹ̌komol᷊ẹ̌ dingangu keluarga bal᷊inẹ Sahiding Yehuwa su tempong piạ perayaan agama tawe nẹ̌tatahino. Piạ lai ěndịu sěbạe nasusah naung su tanggalẹ̌ nikapatengu taumata ikẹ̌kěndagi sire. Su tempong i kitẹ měnadia tempo dingangu anạu sěmbaụ apang nakahombang masalah kerene, i kitẹ něnodẹ i kitẹ ”kahěngang-hěngang mapadul᷊i” si sire.​—Flp. 2:20.

20. Kerea bawera i Yesus su Matius 12:48-50 makatul᷊ung si kitẹ su tempong kesepian?

²⁰ Piạ lawọ alasang kawe nụe sěngkatau Kristen ěndịu kesepian. Katewe, abe miwul᷊e Yehuwa sěbạe mapandung su taumata piạ pěndang kerene. Kasauange Yehuwa měnadia kebutuhan i kitẹ lumiu anạu sěmbaụ. (Basa Matius 12:48-50.) Bọu ene, i kitẹ měnodẹ si Yehuwa i kitẹ mẹ̌tarimakasẹ ual᷊ingu anạu sěmbaụ su tempong i kitẹ mẹ̌tawakal᷊i měkoạ kapaelange mẹ̌tul᷊ung keluarga rohaning i kitẹ. Tawẹ soale kerea pěndang i kitẹ, i kitẹ tawe kesepian ual᷊ingu Yehuwa sěntiniạ dụděndingang si kitẹ.