Iạ nalahirẹ̌ su soa Amioûn, Lebanon, su tanggalẹ̌ 19 Mei 1940. Pira taung tuhụe keluargaku něngal᷊ing sarang soa Tripoli. Su tampạ ene, iạ naguwạ dingangu keluarga maral᷊uasẹ̌ kụ masingkạ lai makěndagẹ̌ si Yehuwa. Bọu i kami lima tahatuari, tatělu wawine dingangu darua esẹ, iạ katuariange. Su matimadẹ̌ku, mědeạ doitẹ̌ ene bal᷊inẹ kahumotongange. Su keluargaku kahumotongange ene kai měngěndung Alkitapẹ̌, duměnta su pěngangibadang, dingangu mẹ̌tul᷊ung taumata wal᷊inẹ makasingkạ si Yehuwa.

Su sidang i kami piạ pirang katau tau Kristen nilanisẹ̌. Kere Michel Aboud, sěngkatau měngangahạ pěngangibadang kangerẹ nisěbạ Pelajaran Buku Sidang. I sie něngěndung katěngadẹ̌ su New York, kụ i sie kahumotongange něnginjilẹ̌ su Lebanon su taung 1921. Iạ nakatahěndung kerea kapiane i sie nẹ̌tul᷊ung duang katau lulusan Sekolah Gilead bědang mangudạ, i Anne dingangi Gwen Beavor. I sire nakoạ hapị i kami mapia. Pul᷊one su taunge tuhụe, iạ mal᷊uasẹ̌ nẹ̌sombang dingangi Anne su Amerika Serikat. Bọu ene pira taung tuhụe, iạ nẹ̌sombang dingangi Gwen seng nẹ̌kawing dingangi Wilfred Gooch, kụ melayani su Betel London su Inggris.

Su tempong iạ mangudạ, bědang mahal᷊i Sahiding Yehuwa su Lebanon. Katewe, i kami masěmangatẹ̌ měněntiro taumata soal u Alkitapẹ̌. I kami tatapẹ̌ někoạ ene maning pirang katau těmbonangu agama mawěngsing si kami. Iạ sěbạe nakatahěndung piram baụ hal᷊ẹ̌ nariadi si kami.

Piạ su sahěllo, iạ dingangu tuhangku wawine i Sana něnginjilẹ̌ su sěmbaụ apartemen. Sěngkatau pastor diměnta su tampạ i kami měbẹ̌bisara dingangu taumata sene. Tantu piạ taumata nẹ̌kui si sie. Pastor ene něnětạ něhinakang tuhangku. I sie makasarẹ̌ kụ něnuhudẹ̌ si Sana sarang tangga kụ i Sana nanawo lai nal᷊esẹ. Piạ taumata něnelpon polisi, kụ polisi diměnta lai dingangu mapia něngatorẹ̌ tadeạu i Sana makaěbạ tul᷊umang. I sire nẹ̌bawa pastor ene sarang kantor polisi, kụ sene i sire nakasingkạ i sie nẹ̌bawa pistolẹ̌. Komandan polisi nẹ̌kiwal᷊o si sie, ”I sai i kau sěběnarẹ̌e? Sěngkatau těmbonangu agama arau bosẹ̌u preman?”

Sěmbaụ hal᷊ẹ̌ takụ tẹ̌tahěndungang ene su tempong sidang i kami něnewa oto gunang měnginjilẹ̌ su tampạ marau. I kami mal᷊uasẹ̌ něnginjilẹ̌ sarang sěngkatau pastor nakaringihẹ̌ apa nikoạ i kami kụ něngomol᷊ẹ̌ taumata l᷊awọ gunang měndariha si kami. I sire napakamea si kami, sarang němerengu watu si kami, kụ i papạku nal᷊esẹ. Iạ nakatahěndung su tempong iạ nakasilo gatine napenẹu raha. I sie dingangi mamạku nẹ̌bal᷊ị sarang oto, kụ ual᷊ingu natakụ i kami timol᷊e si sire. Katewe, iạ tawe niwul᷊e su tempong i mamạku němurěsi lesẹ i papạku, i sie nẹ̌bera, ”Yehuwa tul᷊ung ampungeko i sire. I sire běga apa nikoạ i sire.”

Su tempo wal᷊inẹ, i kami nẹ̌tiwo keluarga su soang i kami. Su wal᷊eng i opaku, i kami nẹ̌sombang dingangu sěngkatau uskup. Uskup ene masingkạ matimadẹ̌ku kai Sahiding Yehuwa. Maning umurẹ̌ku bědang ěnungu taung, i sie nẹ̌tawakal᷊i napakamea si siạ kụ nẹ̌bera, ”Kawe nụe i kau bědang tawe nibaptisẹ̌?” Iạ simimbahẹ̌ iạ bědang kadodọ kụ tadeạu ibaptisẹ̌ iạ harusẹ̌ makasingkạ limembong mal᷊awọ soal u Alkitapẹ̌ lai piạ pangangimang matoghasẹ̌. I sie tawe mal᷊uasẹ̌ su sasimbahẹ̌ku. Hakị u ene i sie naul᷊ị si opaku, iạ kai kurang ajar.

Katewe, kětạeng mahal᷊i pengalaman dal᷊akị kerene. Kal᷊awokange tau Lebanon mahimumu dingangu puluang měnarimạ sake. Hakị u ene, i kami botonge mẹ̌bisara soal u Alkitapẹ̌ dingangu taumata l᷊awọ lai něngahạ lawọ pěngangěndungang Alkitapẹ̌.

Su tempong iạ bědang měsẹ̌sikol᷊ah, sěngkatau saudara mangudạ bọu Venezuela nẹ̌tiwo Lebanon. I sie něngibadah su sidang i kami kụ nẹ̌sasintị dingangu tuhangku i Wafa. Samurine, i sire nẹ̌kawing kụ nẹ̌tanạ su Venezuela. Su manga surate, i Wafa nẹ̌tawakal᷊i nẹ̌dorong i papạku dingangi kami kěbị tadeạu měngal᷊ing sarang Venezuela. I sie někoạ ene ual᷊ingu i sie sěbạe  dụdareạ si kami. Kụ samurine, i sie nakakoạ i kami kěbị něngal᷊ing.

I kami nakoạ sarang Venezuela su taung 1953 kụ nahumpạ su Caracas, maraning tampạu presiden. Ual᷊ingu iạ bědang kadodọ, iạ mal᷊uasẹ̌ nakasilo presiden sụsahe dingangu otone masadadạ. Katewe tawe gampang su matimadẹ̌ku měkoạ penyesuaian dingangu tampạ, bawera, budaya, kaěng, lai cuaca nẹ̌tatěntang. Sěběnarẹ̌e i sire bědang něnětạ někoạ penyesuaian su pěbawiahi sire su tempong piạ masalah nariadi.

Papạku něnětạ nasakị. Ini tawe masuẹ̌ su akal᷊ẹ̌ si kami, ual᷊ingu taumatane matoghasẹ̌ dingangu masehatẹ̌. Su kasingkạ i kami, i sie tawe pernah nasakị. Bọu ene dokter naul᷊ị i sie nasakị kanker pankreas, kụ niopěrasi. Katewe, sěngkamisa tuhụe i sie nate.

Tawe gampang mẹ̌běke susah naung i kami. Umurẹ̌ku bědang 13 su taunge. Tawe napikirẹ̌ si kami i papạku nate. Kụ i kami nẹ̌pěndang i kami seng tawe makapěndang mal᷊uasẹ̌. Diọ marěngụ i mamạku masulitẹ̌ měnarimạ i papạku seng nate. Katewe, i kami nasadarẹ̌ i kami tawe wotonge turusẹ̌ masusah naung, kụ dingangu tul᷊umang i Yehuwa i kami botonge tumatěngo ene. Su tempong umurẹ̌ku 16 su taunge, iạ nalulusẹ̌ bọu SMA su Caracas, kụ iạ sěbạe mapulu mẹ̌tul᷊ung keluargaku.

Bọu ene tuhangku i Sana nẹ̌kawing dingangi Rubén Araujo, sěngkatau buhudeng nalulusẹ̌ bọu Sekolah Gilead kụ nẹ̌bal᷊ị sarang Venezuela. I sire němile gunang měngal᷊ing sarang New York. Su tempong keluargaku němutusẹ̌ iạ pẹ̌sikol᷊ah marangẹ, iạ pěkoạ ene su New York, kụ su tampạ ene iạ seng piạ tampạ pẹ̌tatanakeng. Su tempong iạ nẹ̌tanạ dingangu tuhang lai ipagẹ̌ku, i sire nẹ̌tul᷊ung si siạ limembong marani dingangi Yehuwa. Kụ lai su sidang i kami, sidang Brooklyn werang Spanyol, piạ lawọ saudara matělang su rohani. Iạ mal᷊uasẹ̌ nakasingkạ si Milton Henschel dingangi Frederick Franz, i sire mělẹ̌hal᷊ẹ̌ su Betel Brooklyn.

Su pěngěngsuengu taung humotong iạ nẹ̌sikol᷊ah su New York, iạ něnětạ nẹ̌pikirẹ̌ apa seng takụ nikoạ su pěbawiahẹ̌ku. Iạ bọu nẹ̌basa dingangu nẹ̌tiněna pakapia manga artikel su Menara Pengawal soal u tau Kristen apang piạ cita-cita melayani si Yehuwa. Su sidang i kami, iạ nakasilo manga perintis dingangi sire apang mělẹ̌hal᷊ẹ̌ su Betel sěbạe mal᷊uasẹ̌, kụ iạ mapulu kere i sire. Katewe, su tempo ene iạ bědang tawe nibaptisẹ̌. Iạ masingkạ iạ harusẹ̌ měgělị pěbawiahẹ̌ku si Yehuwa. Iạ někoạ ene kụ nibaptisẹ̌ su tanggalẹ̌ 30 Maret 1957.

Su apang bọu nibaptisẹ̌, iạ něnětạ nẹ̌tiněna gunang makoạ perintis. Iạ sěbạe mapulu makoạ perintis, katewe iạ němanda ene tawe gampang. Apa iạ botonge měngatorẹ̌ tempoku gunang pelayanan dingangu sikol᷊ah? Iạ nẹ̌sasuratẹ̌ dingangu keluargaku soal u putusangku gunang měngědo mẹ̌sikol᷊ah kụ mẹ̌bal᷊ị sarang Venezuela gunang merintis.

 Su wul᷊ang Juni 1957, iạ saụ nẹ̌bal᷊ị sarang Caracas. Katewe, iạ nakasilo keadaan keluargaku masigěsạ. Harusẹ̌ piạ taumata wal᷊inẹ su keluarga mědeạ doitẹ̌. Kerea iạ botonge mẹ̌tul᷊ung? Piạ u nẹ̌kui si siạ měhal᷊ẹ̌ su bank, katewe iạ sěbạe mapulu makoạ perintis. Sěběnarẹ̌e ene alasang iạ saụ nẹ̌bal᷊ị. Iạ mapulu měkoạ darua hal᷊ẹ̌ ene. Su kanandụu pira taung, iạ něhal᷊ẹ̌ sepenuh waktu su bank kụ lai nakoạ perintis. Iạ tawe pernah sěbạe sibukẹ̌ dingangu mal᷊uasẹ̌ kere ini.

Iạ lai nakoạ sěbạe mal᷊uasẹ̌ su tempong nẹ̌sombang kụ nẹ̌kawing dingangi Sylvia, sěngkatau saudari masadadạ bọu Jerman kụ sěbạe makěndagẹ̌ si Yehuwa. I sie něngal᷊ing sarang Venezuela dingangu matimade. Bọu ene, i kami piạ darua anạ, anạ esẹ arenge Michel (Mike), dingangu wawine i Samira. Iạ lai něnětạ nẹ̌tangkiang si mamạku. I sie nẹ̌tanạ dingangi kami. Maning iạ harusẹ̌ měngědo merintis gunang měnukụ kebutuhan keluargaku, iạ tatapẹ̌ masěmangatẹ̌ měnginjilẹ̌. Iạ dingangi Sylvia nẹ̌tawakal᷊i merintis ekstra su tempong liburẹ̌.

Manga anạku bědang měsẹ̌sikol᷊ah su tempong iạ nakahombang peristiwa kere seng takụ niwěke su tětạu artikel ini. Iạ něngakui pěbawiahẹ̌ku sěbạe mal᷊unsemahẹ̌, kụ taumata wal᷊inẹ mělẹ̌hal᷊ẹ̌ su bank měngẹ̌ngarěga si siạ. Katewe, kahumotongange iạ mapulu taumata měmanda iạ kai Sahiding Yehuwa. Iạ turusẹ̌ mětẹ̌tiněna ene. Hakị u ene, iạ dingangu kawingku nẹ̌bisara soal u doiti kami. Mạeng iạ měngědo měhal᷊ẹ̌ su bank, iạ sarung makaěbạ lawọ doitẹ̌ perpisahan. Ual᷊ingu i kami tawẹ apa utang, i kami nẹ̌pikirẹ̌ mạeng i kami měbiahẹ̌ sederhana, doiti kami botonge mapakẹ marěngụ.

Tawe gampang měkoạ ene, katewe kawingku ikẹ̌kěndagẹ̌ dingangi mamạku mendukung putusang ene. Hakị u ene, iạ botonge saụ makoạ perintis, kụ iạ sěbạe mal᷊uasẹ̌. Iạ sadia měnětạ merintis. Katewe piạ hal᷊ẹ̌ tawe nikatikạ nariadi.

Piạ su sahěllo dokter naul᷊ị i Sylvia natiang. I kami sěbạe himěkosẹ̌. Ene habarẹ̌ sěbạe makal᷊uasẹ̌, katewe iạ lai nẹ̌tiněna soal u putusangku gunang makoạ perintis. Kerea iạ botonge makoạ sěngkatau perintis? I kami měngẹ̌ngampal᷊ẹ̌ piạ anggota keluarga buhu. Katewe iạ ragu, apa iạ bědang botonge makoạ perintis.

Su apang bọu nẹ̌bisara soal u cita-citang i kami, i kami němutusẹ̌ iạ tatapẹ̌ makoạ perintis.  Anạ i kami esẹ, i Gabriel, nalahirẹ̌ su wul᷊ang April 1985. Maning kerene, iạ tatapẹ̌ něngědo něhal᷊ẹ̌ su bank kụ něnětạ merintis su wul᷊ang Juni 1985. Samurine, iạ nakoạ anggota Panitia Cabang. Katewe kantor cabang bal᷊inẹ su Caracas, ene mangal᷊ene iạ harusẹ̌ měkoạ perjalanan darua arau tělung sul᷊ẹ su ral᷊ungu sěngkamisa, kụ karaune 80 su kilometere.

Kantor cabang tampạe su La Victoria, hakị u ene i kami němutusẹ̌ kěluargang i kami měngal᷊ing sarang La Victoria, tadeạu limembong marani dingangu Betel. Ene pẹ̌bawal᷊ui gěguwạ su pěbawiahi kami. Iạ sěbạe kagum su keluargaku kụ sěbạe mẹ̌tarimakasẹ si sire. Apa nikoạ i sire ene sěbạe nakatul᷊ung. Tuhangku wawine i Baha sadia měngurusẹ̌ mamạ i kami. Mike seng bọu nẹ̌kawing, katewe i Samira dingangi Gabriel bědang mětẹ̌tanạ dingangi kami. Měngal᷊ing sarang La Victoria ene lai mangal᷊ene měněntang hapị i sire su Caracas. Kụ lai, i Sylvia harusẹ̌ měkoạ penyesuaian měngal᷊ing bọu soa gěguwạ sarang soa kadodọ. Kụ i kami lai harusẹ̌ mawiasa mẹ̌tanạ su wal᷊e limembong kadodọ. Hakị u ene, piạ lawọ hal᷊ẹ̌ nariadi su tempong měngal᷊ing bọu Caracas sarang La Victoria.

Katewe, piạ lai nẹ̌bal᷊ui. Gabriel nẹ̌kawing, kụ i Samira seng nẹ̌tanạ sẹ̌sane. Su taung 2007, i kanduang Sylvia nakaěbạ undangan makoạ keluarga Betel, kụ i kami mal᷊uasẹ̌ melayani sene sarang orasẹ̌ ini. Mike, anạ i kami kaiakanenge nakoạ sěngkatau penatua kụ merintis sěngkasio dingangu kawinge, i Monica. Gabriel lai sěngkatau penatua, kụ melayani su Italia dingangu kawinge i Ambra. Samira nakoạ perintis lai nẹ̌tul᷊ung su Betel nakoạ relawan jarak jauh.

Nal᷊ahẹ, iạ někoạ lawọ putusang gěguwạ su pěbawiahẹ̌ku. Katewe, iạ tawe nẹ̌sasěsilẹ̌. Iạ sarung měkoạ putusang mẹ̌sul᷊ung. Iạ sěbạe mẹ̌tarimakasẹ su kěbị hal᷊ẹ̌ botonge takụ koateng gunang i Yehuwa. Su kanandụu pira taung, iạ nakasilo sěbạe penting piạ pẹ̌dal᷊ahapị matoghasẹ̌ dingangi Yehuwa. Tawẹ soale i kitẹ měkoạ putusang kadodọ arau gěguwạ, Yehuwa sarung měgělị pẹ̌darame kụ ”makawatạ haghing tiněna”. (Flp. 4:6, 7) Iạ dingangi Sylvia mal᷊uasẹ̌, kụ i kami nẹ̌pěndang Yehuwa něngal᷊amatẹ̌ putusang i kami ual᷊ingu i Sie sěntiniạ nakoạ kahumotongange su pěbawiahi kami.