1. Apa sěmbaụ sipati Yesus sěbạe lẹ̌arěgang i kitẹ? Lahẹko.

YESUS botonge makaěna kasasigěsạ nikahombangengu taumata tawe nasukụ. Ene kai sěmbaụ sipati Yesus sěbạe lẹ̌arěgang i kitẹ. Su tempong su dunia Yesus ’mal᷊uasẹ̌ dingangu taumata apang mal᷊uasẹ̌, lai simangị dingangu taumata apang simangị’. (Rm. 12:15) Contone, su tempong 70 muritẹ̌ nẹ̌bal᷊ị dingangu pěndang mal᷊uasẹ̌ ual᷊ingu seng něnginjilẹ̌ sěbạe mapaelẹ̌, Yesus lai ”nakapěndang karal᷊uasẹ̌ gěguwạ”. (Luk. 10:17-21) Su tempong i Yesus nakasilo taumata sěbạe masusah naung ual᷊ingu i Lazarus nate, i Yesus ”sěbạe nasusah naung kụ i sie nasigěsạ”.​—Yoh. 11:33.

2. Apa nakakoạ si Yesus botonge měnodẹ sipatẹ̌ sěngkanaung su taumata?

² Apa nakakoạ si Yesus tumal᷊ěntụ dingangu masabarẹ̌ su taumata tawe nasukụ? Alasang kahumotongange, Yesus makěndagẹ̌ su taumata. Kere seng nilahẹ su pěngangěndungang kal᷊imona, ”i sie limembong puluang su taumata”. (Amsal 8:31) Ual᷊ingu kakěndagẹ̌, i Yesus nẹ̌tawakal᷊i makasingkạ carane taumata mẹ̌tiněna. Rasul Yohanes nělahẹ, ”I sie masingkạ lohongu naung taumata.” (Yoh. 2:25) Taumata nakapěndang i Yesus sěbạe matal᷊ěntụ dingangu makěndagẹ̌ si sire. Ual᷊ingu ene, i sire mapulu dumaringihẹ̌ habarẹ̌ mapia nihabarẹ̌ i Yesus. Mạeng i kitẹ mẹ̌tawakal᷊i měnodẹ sipatẹ̌ sěngkanaung, i kitẹ lai makoạ limembong mapaelẹ̌ su pelayanan.​—2 Tim. 4:5.

3-4. (a) Mạeng i kitẹ piạ sipatẹ̌ sěngkanaung, kerea i kitẹ měmanda pelayanan i kitẹ? (b) Apa sarung ěndungang i kitẹ?

³ Rasul Paulus masingkạ i sie piạ tugasẹ̌ gunang měnginjilẹ̌, kerene lai i kitẹ. (1 Kor. 9:16) Katewe, mạeng si kitẹ piạ sipatẹ̌ sěngkanaung, i kitẹ tawe mẹ̌pěndang měnginjilẹ̌ ene kai kětạeng tugasẹ̌. I kitẹ něnginjilẹ̌ ual᷊ingu mapadul᷊i su taumata  dingangu mapulu mẹ̌tul᷊ung si sire. I kitẹ masingkạ ”limembong mal᷊uasẹ̌ měgělị sul᷊ungu měnarimạ”. (Kis. 20:35) Mạeng si kitẹ piạ tiněna kerene soal u pelayanan, i kitẹ sarung limembong mal᷊uasẹ̌ su pelayanan.

⁴ Su pěngangěndungang ini, i kitẹ sarung měngěndung kerea carane měnodẹ sipatẹ̌ sěngkanaung su pelayanan. Humotong, i kitẹ sarung měngěndung kerea pěndangi Yesus su taumata wal᷊inẹ. Bọu ene, i kitẹ sarung měngěndung ěpạ cara mẹ̌těno si Yesus.​—1 Ptr. 2:21.

5-6. (a) Si sai Yesus něnodẹ sipatẹ̌ sěngkanaung? (b) Kawe nụe i Yesus timal᷊ěntụ su taumata apang nihabarenge, kere nitěbal᷊ẹ̌ su Yesaya 61:1, 2?

⁵ Pẹ̌tiněna kerea i Yesus něnodẹ sipatẹ̌ sěngkanaung. Su sěngkatempo, Yesus dingangu manga murite sěng sěbạe nal᷊owe ual᷊ingu něnginjilẹ̌. Ual᷊ingu sibukẹ̌ něnginjilẹ̌, i sire ”seng tawẹ apa tempo gunang kumaěng”. Hakị u ene, i Yesus němaringang manga murite makoạ sarang tampạ marěmasẹ̌ gunang měngirul᷊e kadodọ. Katewe, komol᷊angu taumata lawọ diměnta sarang tampạ ene. Su tempong Yesus nakasilo si sire, kerea reaksine? I sie ”timal᷊ěntụ * si sire, ual᷊ingu i sire kere domba tawẹ apa měngangahạe. Hakị u ene i sie něnětạ něněntiro lawọ hal᷊ẹ̌ si sire”.​—Mrk. 6:30-34.

⁶ Kěnang pěmanda, apa nakakoạ si Yesus piạ sipatẹ̌ sěngkanaung arau matal᷊ěntụ su taumata ene. Yesus nakasilo i sire ”kere domba tawẹ apa měngangahạe”. Aramanung i Yesus masingkạ i sire ene kai taumata masusah kụ harusẹ̌ měhal᷊ẹ̌ mawěhạ gunang kěluargang i sire. Arau aramanung piạ lai nasusah naung ual᷊ingu taumata ikẹ̌kěndage nate. Hakị u ene, Yesus masingkạ pěndang i sire. Kere seng niěndungang su pěngangěndungang kal᷊imona, i Yesus hala seng nakapěndang kasasigěsạ kerene. Yesus mapandung su pěndangu taumata  wal᷊inẹ, kụ i sie mapulu měhiborẹ̌ si sire dingangu habarẹ̌ mapia.​—Basa Yesaya 61:1, 2.

7. Kerea i kitẹ botonge mẹ̌těno si Yesus?

⁷ Apa nikaěndungang i kitẹ bọu apa nikoạ i Yesus? Kere i Yesus, i kitẹ nilikutangu taumata ”kere domba tawẹ apa měngangahạe”. I sire nakahombang lawọ kasasigěsạ. I kitẹ botonge mẹ̌tul᷊ung si sire dingangu habarẹ̌ Kararatuang. (Why. 14:6) Kere i Tuang i kitẹ, i kitẹ měhabarẹ̌ habarẹ̌ mapia ual᷊ingu i kitẹ ”matal᷊ěntụ su taumata kadodọ dingangu taumata masusah”. (Mz. 72:13) I kitẹ nakapěndang kasiang su taumata, kụ i kitẹ mapulu měkoạ sěmbaụ hal᷊ẹ̌ gunang mẹ̌tul᷊ung si sire.

8. Apa sěmbaụ cara i kitẹ měnodẹ sipatẹ̌ sěngkanaung su pelayanan? Lahẹko sasihinge.

⁸ Apa makatul᷊ung si kitẹ měnodẹ sipatẹ̌ sěngkanaung su taumata nihabareng i kitẹ? I kitẹ harusẹ̌ mẹ̌tiněna apa tẹ̌tiněnang dingangu nikapěndangengu taumata nihabareng i kitẹ. Bọu ene, i kitẹ lai harusẹ̌ měkoạ si sire kere i kitẹ mapulu koatengu taumata wal᷊inẹ. * (Mat. 7:12) Mahịe i kitẹ měngěndung ěpạ cara měkoạ ene. Humotong, pẹ̌tiněna apa kebutuhan sěngkatau-sěngkatau. Su tempong měnginjilẹ̌, i kitẹ kere dokterẹ̌. Dokterẹ̌ mapaelẹ̌ mẹ̌tiněna kebutuhan pasien sěmbaụ-sěmbaụ. I sie mẹ̌kiwal᷊o dingangu dumaringihẹ̌ pakapia su tempong pasien mělahẹ apa nikapěndangenge. I sie tawe masahawụ měgělị undang, katewe i sie sarung měpakẹ tempo gunang měmarikěsa kondisi pasien tadeạu makaghělị undang nihino. Kerene lai, i kitẹ tawe měpakẹ cara mẹ̌sul᷊ung su tempong měnětạ mẹ̌bawěke dingangu kěbị taumata su tempong měnginjilẹ̌. I kitẹ mẹ̌tiněna kebutuhan dingangu keadaan i sire.

9. Apa tawe wotonge koateng i kitẹ? Lahẹko.

⁹ Su tempong nẹ̌sombang dingangu taumata su pelayanan, abe pẹ̌tiněna i kau seng masingkạ keadaan, pangangimang, dingangu alasang kawe nụe i sie mangimang kerene. (Amsal 18:13) Kapaelange, pẹ̌kiwal᷊o tadeạu makasingkạ kerea keadaan dingangu pangangimange. (Amsal 20:5) Mạeng nẹ̌tatahino su tampạu, pẹ̌kiwal᷊o soal u hal᷊ẹ̌, keluarga, latar belakang, dingangu pěndange. Mạeng i kitẹ mẹ̌kiwal᷊o, i kitẹ kere něgělị kesempatan si sire maul᷊ị kawe nụe i sire membutuhkan habarẹ̌ mapia. Mạeng i kitẹ seng masingkạ kebutuhan i sire, i kitẹ botonge měnodẹ sipatẹ̌ sěngkanaung kụ mẹ̌tul᷊ung si sire, kere nikoạ i Yesus.​—Bandingkan 1 Korintus 9:19-23.

10-11. Tumuhụ 2 Korintus 4:7, 8, apa cara karuane makakoạ si kitẹ piạ sipatẹ̌ sěngkanaung? Gělịko contoh.

¹⁰ Karuane, pẹ̌tawakal᷊i mẹ̌tiněna kerea  pěbawiahi sire. Sěběnarẹ̌e, ual᷊ingu kěbị taumata tawe nasukụ, i kitẹ nakapěndang kasasigěsạ mẹ̌sul᷊ung. Hakị u ene, i kitẹ makaěna keadaan i sire. (1 Kor. 10:13) I kitẹ masingkạ pěbawiahẹ̌ su ěllo pěngěnsuenge sěbạe masigěsạ. I kitẹ botonge mẹ̌tatahang ual᷊ingu piạ tul᷊umang Yehuwa. (Basa 2 Korintus 4:7, 8.) Katewe, kěnang pẹ̌tiněna taumata apang harusẹ̌ mẹ̌tawakal᷊i tumatěngo kasasigěsạ kụ tawe nakaěbạ tul᷊umang bọu Yehuwa. Kere i Yesus, i kitẹ tumal᷊ěntụ si sire, kụ mapulu měhabarẹ̌ ”habarẹ̌ limembong mapia”.​—Yes. 52:7.

¹¹ Pẹ̌tiněna pengalaman sěngkatau saudara arenge Sergey. Su tempong bědang tawe něngěndung katěngadẹ̌, i sie kai meang kụ taumatane marěmasẹ̌. I sie nẹ̌pěndang sěbạe masigěsạ mẹ̌bisara dingangu taumata wal᷊inẹ, samurine i sie něnětạ něngěndung Alkitapẹ̌. I sie naul᷊ị, ”Bọu Alkitapẹ̌ iạ něngěndung tau Sahani nakaěbạ tugasẹ̌ měnginjilẹ̌. Kangerẹ, iạ nẹ̌pěndang iạ tawe makakoạ ene.” Katewe, i sie nẹ̌tiněna soal u taumata apang bědang tawe nakaringihẹ̌ katěngadẹ̌. I sie makaěna situasing i sire masigěsạ ual᷊ingu bědang běga si Yehuwa. I sie naul᷊ị, ”Katěngadẹ̌ seng takụ niěndungang nakakoạ si siạ mal᷊uasẹ̌ dingangu mal᷊unsemahẹ̌. Taumata wal᷊inẹ lai harusẹ̌ dumaringihẹ̌ katěngadẹ̌ ini.” Ual᷊ingu piạ sipatẹ̌ sěngkanaung, i Sergey nawahani něnginjilẹ̌. Sergey naul᷊ị, ”Iạ himěkosẹ̌, ual᷊ingu měhabarẹ̌ katěngadẹ̌ nakakoạ si siạ limembong percaya diri. Kụ pangangimangku su katěngadẹ̌ limembong natoghasẹ̌.” *

12-13. Kawe nụe i kitẹ harusẹ̌ masabarẹ̌ si sire apang něngěndung katěngadẹ̌? Lahẹko sasihinge.

¹² Katělune, todẹko kasasabarẹ̌ si sire apang něngěndung katěngadẹ̌. Pẹ̌tahěndung, aramanung i sire bědang tawe nakaringihẹ̌ piram baụ katěngadẹ̌ bọu Alkitapẹ̌. Kụ lawọ taumata aramanung sěbạe mangimang su agamang i sire. Su pěndang i sire agamang i sire nakasěmbaụ keluarga,  budaya, dingangu taumata su tampạ i sire. Kerea i kitẹ botonge mẹ̌tul᷊ung si sire?

¹³ Sasihinge kere ini: Mạeng i kitẹ mapulu měngganti dal᷊enteng seng marěngụ, apa koateng i kitẹ? Tantu, dal᷊enteng těbe bědang paketang su tempong i kitẹ měkoạ dal᷊enteng buhu. Su tempong dal᷊enteng buhu seng sadia paketang, buhudeng dal᷊enteng těbe ene dusang. Kerene lai, těntal᷊ang bědang tawe měmahansang apang něngěndung gunang měněntang pangangimang ”těbe”, kal᷊imona i kitẹ harusẹ̌ mẹ̌tul᷊ung si sire kahěngang-hěngang měngarěga pangangimang ”buhu”, ene kai těntirong Alkitapẹ̌ buhudeng nikasingkateng i sire. Bọu ene, i sire sarung sadia měněntang pangangimang těbe. Pẹ̌sěnsul᷊ẹ, aramanung i sire membutuhkan lawọ tempo gunang mẹ̌bal᷊ui.​—Rm. 12:2.

14-15. Kerea i kitẹ botonge mẹ̌tul᷊ung taumata makasingkạ pělaharapẹ̌ měbiahẹ̌ kěkalẹ̌ su firdaus su dunia? Gělịko contone.

¹⁴ Mạeng i kitẹ masabarẹ̌ su pelayanan, i kitẹ tawe měharapẹ̌ i sire masahawụ makaěna arau měnarimạ katěngadẹ̌ su tempong i sire nakaringihẹ̌ kahumotongange. Katewe, ual᷊ingu sipatẹ̌ sěngkanaung, i kitẹ masabarẹ̌ mẹ̌tul᷊ung si sire mẹ̌tiněna tuhụ Alkitapẹ̌ kadodọ-kadodọ. Contone, i kitẹ mẹ̌tul᷊ung si sire měnarimạ pělaharapẹ̌ měbiahẹ̌ kekal᷊ẹ̌ su firdaus su dunia. Lawọ taumata bědang tawe nakaringihẹ̌ ini. Aramanung i sire mangimang papate kai pěngěnsuengu kěbị haghi, arau taumata mapia sarung měbiahẹ̌ su sorga. Kerea i kitẹ mẹ̌tul᷊ung si sire?

¹⁵ Sěngkatau saudara piạ cara mapaelẹ̌. Humotong, i sie mẹ̌basa Kejadian 1:28. Bọu ene, i sie mẹ̌kiwal᷊o Mawu mapulu taumata měbiahẹ̌ su apa dingangu su situasi kere apa. Kal᷊awokange taghuangu wal᷊e sumimbahẹ̌, ”Su dunia, su situasi mapaelẹ̌.” Tuhụe i sie mẹ̌basa Yesaya 55:11 kụ mẹ̌kiwal᷊o apa kapulung Mawu seng nẹ̌bal᷊ui. Pẹ̌sěnsul᷊ẹ taghuangu wal᷊e sumimbahẹ̌ tala. Samurine, i sie mẹ̌basa Mazmur 37:10, 11 kụ mẹ̌kiwal᷊o kere apa pěbawiahu taumata su ěllo mahi. Ual᷊ingu něpakẹ cara ini, i sie seng nakatul᷊ung pirang katau nakaěna Mawu mapulu taumata mapia měbiahẹ̌ kěkalẹ̌ su Firdaus su dunia.

16-17. Tumuhụ Amsal 3:27, apa botonge koateng i kitẹ gunang měnodẹ i kitẹ mapadul᷊i su taumata? Gělịko contoh.

¹⁶ Kaěpạe, pědeạ cara gunang měnodẹ i kau mapadul᷊i si sire. Contone, mạeng i kitẹ nẹ̌tiwo si sire su tempo tawe nẹ̌tatahino, i kitẹ mẹ̌dorong ampung dingangu maul᷊ị hědo saụ mẹ̌tiwo su tempo wal᷊inẹ. Kerea mạeng taghuangu wal᷊e harusẹ̌ itul᷊ung gunang měkoạ piram baụ hal᷊ẹ̌? Arau kerea mạeng piạ taumata tawe makasěbang bọu wal᷊e kụ harusẹ̌ itul᷊ung gunang měkoạ sěmbaụ hal᷊ẹ̌? Su situasi kerene, i kitẹ botonge mẹ̌tul᷊ung si sire.​—Basa Amsal 3:27.

 ¹⁷ Kapiang naung kakělaěng sederhana piạ lawọ gunane. Ene nikapěndangengu sěngkatau saudari. Ual᷊ingu sipatẹ̌ sěngkanaung, i sie němohẹ suratẹ̌ gunang sěmbaụ keluarga apang nasusah naung ual᷊ingu anạ i sire nate. Su suratẹ̌ ene i sie němohẹ manga ayatẹ̌ makahiborẹ̌. Kerea reaksing keluarga ene? Mamạ u anạ ene němohẹ, ”Kahěbi iạ sěbạe nasusah naung. Katewe, suratẹ̌ ene kahěngang-hěngang nakatoghasẹ̌ si kami. Iạ sěbạe makitarimakasẹ ual᷊ingu suratẹ̌ ene. I kami sěbạe nahiborẹ̌ nẹ̌basa suratẹ̌ ene. Kahěbi iạ nẹ̌basa suratẹ̌ ene 20 su sul᷊ẹe. Bawera su ral᷊ungu suratẹ̌ ene sěbạe mapia, mapadul᷊i, dingangu nakatoghasẹ̌ si kami. Bọu ral᷊ungu naungku, iạ kahěngang-kahěngang makitarimakasẹ.” Mạeng i kitẹ mẹ̌tawakal᷊i makaěna kasasigěsạ nikapěndangengu taumata dingangu mẹ̌tul᷊ung si sire, i kitẹ lai botonge makaěbạ hasilẹ̌ mapaelẹ̌.

18. Tumuhụ 1 Korintus 3:6, 7, apa harusẹ̌ tahěndungang i kitẹ soal u peranan i kitẹ su pelayanan, kụ kawe nụe?

¹⁸ Su pelayanan, i kitẹ piạ peranan gunang mẹ̌tul᷊ung taumata wal᷊inẹ měngěndung soal u Mawu. Katewe, i kitẹ harusẹ̌ seimbang. Pẹ̌tahěndung, peranan i Yehuwa paling penting. (Basa 1 Korintus 3:6, 7.) I Yehuwa němol᷊eng taumata sarang i Sie. (Yoh. 6:44) Bọu ene lai, makakoạ taumata měnarimạ arau tawe měnarimạ habarẹ̌ mapia ene kai naung i sire. (Mat. 13:4-8) Pẹ̌tahěndung, kal᷊awokange taumata madiri dumaringihẹ̌ habarẹ̌ niwawang i Yesus, sěmbal᷊ia i sie kai Guru kaguwạkenge! Hakị u ene, i kitẹ abe makadodọ naung mạeng piạ taumata madiri dumaringihẹ̌ si kitẹ.

19. Apa gunane měnodẹ sipatẹ̌ sěngkanaung su pelayanan?

¹⁹ Mạeng i kitẹ měnodẹ sipatẹ̌ sěngkanaung su pelayanan, i kitẹ sarung makaěbạ al᷊amatẹ̌. I kitẹ sarung limembong mal᷊uasẹ̌ měkoạ pelayanan. I kitẹ limembong makaěbạ karal᷊uasẹ̌ ual᷊ingu něgělị. Bọu ene lai, taumata apang ”piạ kapulu nihino gunang makaěbạ pěbawiahẹ̌ kěkalẹ̌” sarung limembong gampang měnarimạ habarẹ̌ mapia. (Kis. 13:48) Hakị u ene, ”karěngụeweng piạ loahe si kitẹ, mahịe i kitẹ měkoạ mapia su kěbị taumata”. (Gal. 6:10) I kitẹ sarung mal᷊uasẹ̌ ual᷊ingu botonge makawantugẹ̌ si Amang i kitẹ su sorga.​—Mat. 5:16.