Tau Lewi apang tawe nakoạ imang nakaěbạ tugasẹ̌ wal᷊inẹ. Contone, piạ u nakoạ měndariagạ bait. I sire lẹ̌ahạkengu těmbonangu měndariagạ bait. Filo, sěngkatau měmamohẹ Yahudi, nělahẹ apa tugasi sire: ”Pirang katau wọu i sire měnděndiagạ su těngong tukadẹ̌ sasuẹ̌kang. Piạ lai měnděndiagạ su těngong tampạ masusi [su ral᷊ungu bait]. I sire měnděndiagạ sene tadeạu taumata apang tawe layak tuhụ hukung tawe sumuẹ̌ su tampạ masusi, tawẹ soale ual᷊ingu sangaja arau tala. Bọu ene lai, piạ u měgẹ̌gaghanti dụdal᷊eng mělẹ̌likụ bait.”

Sanhedrin botonge mẹ̌dorong tul᷊ung su manga měndariagạ bait ene. Kětạeng i sire kelompok Yahudi nighělịkangu izin karạ u pěměrentang Roma gunang mẹ̌bawa senjata.

Sěngkatau pakar arenge Joachim Jeremias nẹ̌bera, ”Su tempong i Yesus nisamẹ, Yesus naul᷊ị i sie ěllo-ěllo měnẹ̌něntiro su Bait, katewe tawe nisamẹ. (Mat. 26:55) Bawerang i Yesus ene něnodẹ taumata apang něnamẹ si Yesus ene kai manga měndariagạ Bait.” Bọu ene lai, tumuhụ si Jeremias, taumata apang nioro gunang měnamẹ si Yesus ene kai měndariagạ bait. (Yoh. 7:32, 45, 46) Samurine, Sanhedrin něngoro těmbonangu měndariagạ dingangu pirang katau měndariagạ bait gunang měnamẹ manga muriti Yesus. Kụ, su tempong Rasul Paulus niwol᷊eng siměbang bọu bait, kakělaěng němol᷊eng si sie ene kai manga měndariagạ bait.​—Kis. 4:1-3; 5:17-27; 21:27-30.