1. Manga sasal᷊ukạ apa kẹ̌kahombangengu manga ělang i Yehuwa?

APA i kau nakahombang sasal᷊ukạ mawěhạ? Aramanung su sidang piạ u nakatědụ naungu. (Yak. 3:2) Aramanung lai hapị su pělahal᷊ẹ̌kang arau su sikol᷊ah mělẹ̌heghesẹ̌ si kau ual᷊ingu nakoạ ělang i Yehuwa. (1 Ptr. 4:3, 4) Arau kěluarganu nẹ̌sěding si kau duměnta su pěngangibadang arau mẹ̌bisara soal u apa pẹ̌pangimangengu su taumata wal᷊inẹ. (Mat. 10:35, 36) Mạeng sasal᷊ukạ ene pěndangeng sěbạe mawěhạ, i kau aramanung mẹ̌pěndang kapaelange měngědo makoạ ělang i Yehuwa. Katewe, i kau botonge mangimang maning sasal᷊ukạ apa kẹ̌kahombangengu, Yehuwa sarung měgělị pelesa gunang tumatěngo ene lai katatoghasẹ̌ gunang mẹ̌tatahang.

2. Tumuhụ Roma 15:4, kerea pẹ̌bawasang Alkitapẹ̌ makatul᷊ung si kitẹ?

² Su Hengetang’E, Yehuwa něngahạ tadeạu pakiwohẹ manga contoh su Alkitapẹ̌ gunang měnodẹ kerea manga ělang’E tawe nasukụ botonge mẹ̌tatahang tumatěngo sasal᷊ukạ. Kawe nụe? Tadeạu i kitẹ botonge měngěndung bọu i sire. Ini alasange kawe nụe Yehuwa něngoro si Rasul Paulus gunang pěmohẹ Roma 15:4. (Basa.) Mẹ̌basa manga běke ene botonge makakoạ si kitẹ matěnang dingangu piạ pělaharapẹ̌. Katewe, tadeạu makaěbạ gunane, i kitẹ bal᷊inẹ kětạeng mẹ̌basa Alkitapẹ̌. I kitẹ měmala Alkitapẹ̌ měngahạ tiněna lai makakanoạ naung i kitẹ. Contone, apa wotonge koateng i kitẹ gunang mědeạ sasasa soal u sěmbaụ masalah nikahombangeng  i kitẹ? I kitẹ sarung měngěndung ěpạ hal᷊ẹ̌ ini: (1) Pẹ̌doa, (2) Bayangkan, (3) Pẹ̌tiněna, dingangu (4) Pěkoạ apa seng niěndungang. I kitẹ sarung měngěndung kerea měkoạ manga hal᷊ẹ̌ ene. * Bọu ene, i kitẹ sarung měpakẹ ěpạ hal᷊ẹ̌ ene su tempong měngěndung soal u apa nariadi si Datu Daud dingangi Rasul Paulus.

3. Těntal᷊ang bědang tawe nẹ̌basa Alkitapẹ̌ apa harusẹ̌ koatengu, kụ kawe nụe?

³ (1) Pẹ̌doa. Těntal᷊ang bědang tawe nẹ̌basa Alkitapẹ̌, pẹ̌dorong si Yehuwa tadeạu mẹ̌tul᷊ung si kau makasilo kerea i kau botonge makaěbạ gunane bọu apa niwasanu. Contone, pẹ̌dorong si Yehuwa tadeạu mẹ̌tul᷊ung si kau makaěbạ manga prinsip su Alkitapẹ̌ kụ makatul᷊ung si kau měkoạ putusang soal u apa harusẹ̌ koateng.​—Flp. 4:6, 7; Yak. 1:5.

4. Apa makatul᷊ung si kau tadeạu běkeng su Alkitapẹ̌ limembong mal᷊ahẹ?

⁴ (2) Bayangkan. Yehuwa seng něgělị si kitẹ kesanggupan luar biasa gunang membayangkan. Gunang mẹ̌tul᷊ung si kau tadeạu běkeng su Alkitapẹ̌ mal᷊ahẹ, bayangkan apa nariadi kụ pělọe i kau nakoạ taumata su běke ene. Pẹ̌tawakal᷊i měmanda manga hal᷊ẹ̌ nikasilongu taumata su běke ene dingangu apa ěndịu nikapěndangenge.

5. Apa ene mẹ̌tiněna, kụ kerea i kitẹ botonge mẹ̌tiněna?

⁵ (3) Pẹ̌tiněna. Mẹ̌tiněna mangal᷊ene mẹ̌pikirẹ̌ pakapia soal u apa niwasanu dingangu kerea informasi ene piạ gunane si kau. Ene makatul᷊ung si kau makaěna manga pokok lai makaěna mapia apa niwasanu. Mẹ̌basa Alkitapẹ̌ kụ tawe mẹ̌tiněna ene kere měmanda manga bageang bọu teka-teki gambar su meda kụ tawe nipẹ̌sasěmpụ. Mẹ̌tiněna ene kere měněmpụ manga bageang gunang makasilo sěmbau gambarẹ̌. Gunang mẹ̌tul᷊ung si kau mẹ̌tiněna, i kau botonge mẹ̌kiwal᷊o dingangu sumimbahẹ̌ manga kakiwal᷊o ini: ’Apa nikoạu taumata su běke ini gunang tumatěngo masalane? Kerea Yehuwa nẹ̌tul᷊ung si sie? Kerea iạ měpakẹ apa seng niěndungangku gunang mẹ̌tul᷊ung si siạ mẹ̌tatahang tumatěngo sasal᷊ukạ?’

6. Kawe nụe i kitẹ harusẹ̌ měkoạ apa seng niěndungang?

⁶ (4) Pěkoạ apa seng niěndungang. Yesus naul᷊ị mạeng i kitẹ tawe měkoạ apa seng niěndungang, i kitẹ kere sěngkatau esẹ někoạ bal᷊ene su wowong ěne. I sie seng něhal᷊ẹ̌ masěghadẹ̌, katewe ene nakoạ tawẹ gunane. Kawe nụe? Ual᷊ingu su tempong piạ lěba dingangu anging maihạ nariadi, wal᷊ene sarung mahaka. (Mat. 7:24-27) Kerene lai, maning i kitẹ mẹ̌doa, membayangkan, dingangu mẹ̌tiněna katewe tawe měkoạ apa seng niěndungang, tawakal᷊ing i kitẹ makoạ tawẹ gunane. Su tempong nakahombang sasal᷊ukạ arau kasasigěsạ, pangangimang i kitẹ tawe tumanịu matoghasẹ̌. Katewe, su tempong i kitẹ něngěndung kụ někoạ apa seng niěndungang, i kitẹ limembong mapaelẹ̌ měkoạ putusang, makoạ limembong matěnang, dingangu makatoghasẹ̌ pangangimang i kitẹ. (Yes. 48:17, 18) Mahịe měmanda apa wotonge kaěndungang i kitẹ bọu apa nariadi si Datu Daud měpakẹ ěpạ hal᷊ẹ̌ seng niěndungang i kitẹ kanini.

7. Běkeng Alkitapẹ̌ apa sarung ěndungang i kitẹ?

⁷ Apa piạ hapị arau keluarga nakatědụ naungu? Mạeng iya, sěmbaụ hal᷊ẹ̌ makatul᷊ung si kau ene kai měngěndung apa nariadi si Datu Daud, su tempong anạe i Absalom nakatědụ naunge kụ nẹ̌tawakal᷊i makoạ datu.​—2 Sam. 15:5-14, 31; 18:6-14.

8. Apa botonge koatengu tadeạu makaěbạ tul᷊umang bọu i Yehuwa?

⁸ (1) Pẹ̌doa. Apidu mẹ̌tiněna běke ene, paul᷊ị si Yehuwa kerea tědụu naungu ual᷊ingu apa nikahombangengu. (Mz. 6:6-9) Paul᷊ị si Yehuwa kěbị apa nikapěndangengu. Bọu ene, pẹ̌dorong  si Yehuwa tadeạu mẹ̌tul᷊ung si kau makasilo manga prinsip botonge měmihing si kau su tempong tumatěngo haghing sasal᷊ukạ.

9. Apa nariadi si Daud dingangi Absalom?

⁹ (2) Bayangkan. Pẹ̌tiněna apa nariadi su peristiwa ene dingangu bayangkan kerea pěndang i Datu Daud. Absalom, anạ i Daud taunge někoạ taumata wal᷊inẹ puluang si sie. (2 Sam. 15:7) Su tempong Absalom nẹ̌pikirẹ̌ tempone seng nẹ̌tatahino, i sie něngoro mata-mata pakoạ sarang patikụ Israel gunang měnadia taumata tadeạu měnarimạ si sie makoạ datu. I sie lai němaringang si Ahitofel, hapị dingangu měnanasang i Daud, gunang tumol᷊e měndukung si sie makoạ datu. Absalom něhengkẹ watangenge makoạ datu. I sie nẹ̌tawakal᷊i měnamẹ dingangu měmate si Daud kụ su tempo ene aramanung masakị mawěhạ. (Mz. 41:1-9) Daud masingkạ apa koateng i Absalom kụ i sie timal᷊ang bọu Yerusalem. Samurine, prajurit i Absalom nẹ̌sekẹ dingangu prajurit i Daud. Prajuritu sědụ nikawatạ, kụ Absalom anạ i Daud nipate.

10. Aramanung apa botonge koateng i Datu Daud?

¹⁰ Bọu ene, bayangkan apa harusẹ̌ kapěndangeng i Daud su apang manga hal᷊ẹ̌ ene nariadi si sie. I sie makěndagẹ̌ si Absalom dingangu mangimang si Ahitofel. Katewe, i rẹ̌dua tawe satia si sie. I sire sěbạe nakatědụ naunge kụ mapulu měmate si sie. I Daud aramanung seng tawe mangimang su hapịe wal᷊inẹ, ual᷊ingu curiga i sire lai seng timol᷊e si Absalom. I sie ěndịu kětạeng mẹ̌pikirẹ̌ watangenge kụ i sie sẹ̌sane měněntang soa ene. I sie aramanung sěbạe nakadodọ naung. Katewe, i Daud tawe někoạ kěbị ene. I sie timatěngo kěbị sasal᷊ukạ mawěhạ ene. Kawe nụe i sie botonge měkoạ ene?

11. Apa nikoạ i Daud su situasi masigěsạ ene?

¹¹ (3) Pẹ̌tiněna. Manga prinsip apa botonge kaěndungangu bọu běke ini? Simbahe kakiwal᷊o ini: ”Apa nikoạ i Daud gunang mẹ̌tul᷊ung watangenge?” Daud tawe nẹ̌bingọ dingangu tawe masahawụ někoạ putusang. I sie lai tawe matakụ měkoạ putusang soal u apa harusẹ̌ koatenge. Katewe, i sie nẹ̌doa nẹ̌dorong tul᷊ung si Yehuwa. I sie lai nẹ̌dorong manga hapịe gunang mẹ̌tul᷊ung si sie. Kụ i sie masahawụ někoạ putusang seng nikoạe. Maning sěbạe nasusah naung, Daud tawe něngědo mangimang su taumata wal᷊inẹ kụ i sie tawe lusiang. I sie turusẹ̌ mangimang si Yehuwa dingangu su manga hapịe.

12. Apa nikoạ i Yehuwa gunang mẹ̌tul᷊ung si Daud?

¹² Kerea Yehuwa nẹ̌tul᷊ung si Daud? Mạeng měkoạ riset, i kau sarung makaěndung kerea Yehuwa něgělị si Daud katatoghasẹ̌ gunang mẹ̌tatahang tumatěngo sasal᷊ukạ nikahombangenge. (Mz. 3:1-8; superskripsi) Yehuwa něngal᷊amatẹ̌ putusang nikoạ i Daud. Kụ Yehuwa nẹ̌tul᷊ung manga hapị i Daud apang masatia su tempong i sire nẹ̌sekẹ gunang měndiagạ datung i sire.

13. Kerea i kau mẹ̌těno si Daud su tempong taumata wal᷊inẹ sěbạe nakatědụ naungu? (Matius 18:15-17)

¹³ (4) Pěkoạ apa seng niěndungang. Pẹ̌kiwal᷊o su watangeng, ’Kerea iạ botonge mẹ̌těno si Daud?’ Pakasahawụ mapakasue masalah. I kau botonge tumol᷊e sasasang i Yesus kạbawohẹ su Matius pasalẹ̌ 18 secara langsung arau bọu prinsip tuhụ situasinu. (Basa Matius 18:15-17.) Katewe, i kau tawe masahawụ měkoạ putusang su tempong i kau pědu. Gunang tumatěngo masalah i kau harusẹ̌ mẹ̌doa tadeạu Yehuwa měgělị si kau pelesa dingangu naung matěnang. Abe sarang měngědo mangimang su hapịu. Katewe, tarimạ tul᷊umang bọu i sire. (Amsal 17:17) Kụ sěbạe penting tumol᷊e sasasa nighělị i Yehuwa su Hengetang’E.​—Amsal 3:5, 6.

14. Su situasi kerea 2 Timotius 1:12-16; 4:6-11, 17-22 makawahangsang si kau?

¹⁴ Apa i kau nakahombang sasal᷊ukạ bọu manga kěluarganu? Arau i kau aramanung mětẹ̌tanạ su tampạ kụ piram baụ arau kěbị hal᷊ẹ̌u ělang i Yehuwa nisěding? Mạeng kerene i kau aramanung sarung mawahangsang mạeng  mẹ̌basa 2 Timotius 1:12-16 dingangu 4:6-11, 17-22. * Paulus němohẹ manga ayatẹ̌ ini su tempong i sie su penjara.

15. Apa wotonge dorongangu si Yehuwa?

¹⁵ (1) Pẹ̌doa. Těntal᷊ang bědang tawe nẹ̌basa manga ayatẹ̌ ene, paul᷊ị si Yehuwa masalanu kụ kerea pěndangu. Pẹ̌běke kěbị apa nikapěndangengu. Bọu ene pẹ̌dorong tadeạu Yehuwa mẹ̌tul᷊ung si kau makasilo manga prinsip su běke ini, soal u apa nariadi si Paulus, kụ makatul᷊ung si kau makasingkạ apa harusẹ̌ koatengu.

16. Kerea i kau mělahẹ situasing i Paulus?

¹⁶ (2) Bayangkan. Bayangkan i kau nakoạ i Paulus. I sie nihante su penjara su Roma. I sie seng bọu nipěnjara, katewe su tempo ini i sie nẹ̌pěndang i sie sarung pateěng. Pirang katau hapịe seng něněntang si sie, kụ badange seng nal᷊owe.​—2 Tim. 1:15.

17. I Paulus ěndịu piạ alasang gunang měkoạ apa?

¹⁷ Paulus piạ alasang gunang fokus su tempong tamai. I sie ěndịu mẹ̌pikirẹ̌ mạeng tawe makoạ tau Kristen masěmangatẹ̌, i sie tawe masuẹ su penjara. I sie aramanung botonge makoạ lusiang su esẹ bọu wilayah Asia apang něněntang si sie, kụ ěndịu seng tawe mangimang su manga hapịe wal᷊inẹ. Katewe, i Paulus tawe někoạ kěbị ini. Kawe nụe i sie botonge tatapẹ̌ mangimang dingangu piạ pělaharapẹ̌?

18. Kerea i Paulus timatěngo sasal᷊ukạ nikahombangenge?

¹⁸ (3) Pẹ̌tiněna. Simbahe kakiwal᷊o ini: ”Kerea i Paulus nẹ̌tul᷊ung watangenge?” Maning i Paulus masingkạ i sie seng mal᷊ighạ mate, i sie tawe miwul᷊e sěmbaụ hal᷊ẹ̌ sěbạe penting ene kai mapakawantugẹ̌ si Yehuwa. Kụ i sie turusẹ̌ měpẹ̌pikirẹ̌ kerea měnoghasẹ̌ taumata wal᷊inẹ. I sie něngumbala si Yehuwa kụ masau mẹ̌doa. (2 Tim. 1:3) Sul᷊ungu fokus su manga hapị seng něněntang si sie, Paulus sěbạe měngẹ̌ngarěga kakěndagẹ̌ nitodẹu manga hapịe apang masatia nẹ̌tul᷊ung si sie. Bọu ene lai, i Paulus turusẹ̌ měngẹ̌ngěndung Hengetangu Mawu. (2 Tim. 3:16, 17; 4:13) Kụ něngělembong penting, i sie mangimang Yehuwa dingangi Yesus makěndagẹ̌ si sie. I sire tawe měněntang si sie, kụ i sire sarung měngal᷊amatẹ̌ ual᷊ingu i sie masatia su pelayanan.

19. Kerea i Yehuwa nẹ̌tul᷊ung si Paulus?

¹⁹ Yehuwa seng něgělị laingatẹ̌ si Paulus i sie sarung darihang ual᷊ingu nakoạ sěngkatau Kristen. (Kis. 21:11-13) Kerea i Yehuwa nẹ̌tul᷊ung si Paulus? Yehuwa simimbahẹ̌ manga daroane kụ pirang sul᷊ẹ něgělị katatoghasẹ̌ si sie. (2 Tim. 4:17) I Paulus mangimang i sie sarung makaěbạ hadiah ual᷊ingu hal᷊ẹ̌ masěghadẹ̌ seng nikoạe. Yehuwa lai něpakẹ manga hapị i Paulus apang masatia gunang mẹ̌tul᷊ung si sie.

20. Tumuhụ Roma 8:38, 39, kerea i kitẹ botonge mẹ̌těno si Paulus?

²⁰ (4) Pěkoạ apa seng niěndungang. Pẹ̌kiwal᷊o su watangeng, ’Kerea iạ botonge mẹ̌těno si Paulus?’ Kere i Paulus, i kitẹ lai harusẹ̌ masingkạ i kitẹ sarung darihang ual᷊ingu pangangimang. (Mrk. 10:29, 30) Tadeạu botonge tatapẹ̌ satia su tempong piạ sasal᷊ukạ, i kitẹ harusẹ̌ měngumbala si Yehuwa bọu daroa dingangu tatapẹ̌ marading měngěndung Hengetang’E. Kụ i kitẹ harusẹ̌ mẹ̌tahěndung sěmbaụ hal᷊ẹ̌ sěbạe penting koateng i kitẹ ene kai mapakawantugẹ̌ si Yehuwa. I kitẹ botonge mangimang Yehuwa tawe měněntang si kitẹ, kụ tawẹu sarang sěngkatau makasahaghe kakěndag’E si kitẹ.​—Basa Roma 8:38, 39; Ibr. 13:5, 6.

21. Apa nakatul᷊ung si Aya dingangi Hector gunang tumatěngo sasal᷊ukạ nikahombangeng i sire?

²¹ Maning apa situasing i kitẹ, i kitẹ botonge makaěbạ katatoghasẹ̌ bọu manga běke su Alkitapẹ̌. Contone, Aya, sěngkatau perintis su Jepang nẹ̌běke, contoh i Yunus nakatul᷊ung si sie tawe matakụ mẹ̌bisara su tampạ piạ lawọ taumata. Hector, sěngkatau mangudạ su Indonesia kụ  matimade bal᷊inẹ Sahiding Yehuwa nẹ̌běke, contoh i Rut nakatul᷊ung si sie mapulu měngěndung soal i Yehuwa kụ mẹ̌tahamawu si Sie.

22. Kerea i kau botonge makaěbạ gunane bọu drama Alkitapẹ̌ arau seri ”Tirulah Iman Mereka”?

²² Su apa i kau makaěbạ manga contoh su Alkitapẹ̌ kụ makatoghasẹ̌ si kau? Bọu manga video, drama audio, dingangu seri ”Tirulah Iman Mereka” nakakoạ běkeng Alkitapẹ̌ limembong mal᷊ahẹ. * Těntal᷊ang bědang tawẹ nẹ̌biala, dimaringihẹ̌, arau nẹ̌basa manga běke ene, pẹ̌dorong tul᷊ung si Yehuwa tadeạu i kau makaěbạ tatěntiro penting kụ botonge koatengu. Bayangkan i kau nakoạ taumata su běke ene. Pẹ̌tiněna apa nikoạ u manga ělang i Yehuwa dingangu kerea Yehuwa nẹ̌tul᷊ung si sire timatěngo sasal᷊ukạ. Pěkoạ apa seng niěndungangu su pěbawiahu. Pẹ̌tarimakasẹe si Yehuwa ual᷊ingu apa seng nikoạ’E gunang mẹ̌tul᷊ung si kau. Gunang měnodẹ i kau měngẹ̌ngarěga apa seng nikoạ’E, pědeạ cara gunang měnoghasẹ̌ lai mẹ̌tul᷊ung taumata wal᷊inẹ.

23. Tumuhụ Yesaya 41:10, 13, Yehuwa nẹ̌diandi sarung měkoạ apa si kitẹ?

²³ I kitẹ měbẹ̌biahẹ̌ su dunia měngẹ̌ngawasane i Setang. Endịu ini masulitẹ̌ kụ i kitẹ běga harusẹ̌ měkoạ apa. (2 Tim. 3:1) Katewe i kitẹ tawe harusẹ̌ guměnggang arau matakụ. Yehuwa masingkạ apa tẹ̌tatěngong i kitẹ. Su tempong i kitẹ nanawo, i Sie nẹ̌diandi sarung měhěgo si kitẹ dingangu lima-Ne koaneng matoghasẹ̌. (Basa Yesaya 41:10, 13.) I kitẹ mangimang Yehuwa sarung mẹ̌tul᷊ung si kitẹ, kụ i kitẹ makaěbạ katatoghasẹ̌ bọu Alkitapẹ̌ gunang mẹ̌tatahang tumatěngo haghing sasal᷊ukạ.