1. Kawe nụe pirang katau seng tawe masěmangatẹ̌ měngěndung?

ORASẸ̌ ini, lawọ taumata harusẹ̌ měhal᷊ẹ̌ masěghadẹ̌ tadeạu makaěbạ doitẹ̌ gunang pěbawiahẹ̌. Lawọ anạu sěmbaụ harusẹ̌ měhal᷊ẹ̌ sahěllo tiwatu gunang měnukụ kebutuhan keluarga. Sěnggạ harusẹ̌ měpakẹ tempo pirang kaorasẹ̌ kětạeng gunang makoạ sarang tampạ pělahal᷊ẹ̌kang dingangu mẹ̌bal᷊ị sarang bal᷊e. Lawọ lai harusẹ̌ měkoạ hal᷊ẹ̌ fisik mawěhạ. Hakị u ene, su tempong napul᷊ẹ i sire sěbạe nal᷊owe! I sire seng nikasuengu katatoghasẹ̌ gunang měngěndung.

2. Kange i kau botonge měngěndung?

² Katewe faktane ute i kitẹ harusẹ̌ mědeạ tempo gunang kahěngang-hěngang měngěndung Hengetangu Mawu dingangu publikasi. Mạeng tawe měkoạ ene, i kitẹ tawe mědal᷊ahapị mapia dingangi Yehuwa lai tawe měbiahẹ̌ kěkalẹ̌! (1 Tim. 4:15) Pirang katau nẹ̌bangung limembong mal᷊ukadẹ̌ kụ něngěndung su tempong bal᷊e bědang tawe maghahẹ dingangu i sire botonge mẹ̌tiněna mapaelẹ̌ ual᷊ingu seng bọu nẹ̌tikị. Sěnggạe wue něnadia tempo gunang měngěndung lai mẹ̌tiněna Alkitapẹ̌ dingangu publikasi su tempong hěbi, su tempong i sire botonge měngěndung kụ tawẹ u měnahaghe.

3-4. Penyesuaian apa seng nikoạ su bahan seng nisadia gunang i kitẹ, kụ kawe nụe?

³ I kau tantu setuju mědeạ tempo gunang měngěndung ene penting. Katewe, apa harusẹ̌ ěndungang? I kau aramanung mẹ̌bera, ’Piạ lawọ harusẹ̌ basaěng, tawe gampang mẹ̌basa kěbị ene.’ Pirang katau nakawasa kěbị publikasi dingangu nakawiala kěbị video, katewe kal᷊awokange masigěsạ měkoạ ene. Badan Pimpinan nakaěna hal᷊ẹ̌ ene. Hakị u ene i sire němutusẹ̌ gunang měngurang bahan nitarimạ i kitẹ, bahan nicetakẹ̌ arau lai su internet.

⁴ Contone, Buku Tahunan Saksi-Saksi Yehuwa seng tawe nikoạ ual᷊ingu lawọ pengalaman mapaelẹ̌ seng nitaho su jw.org^® arau JW Broadcasting^®. Bọu ene lai, Menara Pengawal  edisi umum dingangu Sadarlah! nikoạ kětạeng tělung sul᷊ẹ sěntaung. Penyesuaian ini nikoạ bal᷊inẹ tadeạu i kitẹ piạ lawọ tempo gunang kegiatan wal᷊inẹ, kụ tawẹ apa sěmpụe dingangu ibadang i kitẹ. Katewe, ene nikoạ tadeạu i kitẹ botonge fokus su hal᷊ẹ̌ ”limembong penting”. (Flp. 1:10) Mahịe i kitẹ měngěndung kerea i kau botonge měmile hal᷊ẹ̌ limembong penting dingangu kerea tadeạu makaěbạ lawọ gunane bọu pěngangěndungang Alkitapẹ̌ hala.

5-6. Publikasi apa harusẹ̌ ěndungang i kitẹ pakapia?

⁵ Apa harusẹ̌ ěndungang i kitẹ kahumotongange? Ěllo-ěllo i kitẹ harusẹ̌ měngěndung soal u Hengetangu Mawu. Orasẹ̌ ini, kal᷊awọe ayatẹ̌ gunang pẹ̌bawasang Alkitapẹ̌ sabang misa su sidang seng nipakahal᷊i. Hakị u ene, si kitẹ piạ lawọ tempo gunang mẹ̌tiněna apa niwasa dingangu měkoạ riset. Su tempong mẹ̌basa Alkitapẹ̌, timonang i kitẹ bal᷊inẹ kětạeng mẹ̌basa pakasue kěbị ayatẹ̌ gunang misa ene. Katewe tadeạu apa niwasa makakanoạ naung i kitẹ, kụ i kitẹ sauneng kakạranine dingangi Yehuwa.​—Mz. 19:14.

⁶ Apa lai harusẹ̌ ěndungang i kitẹ pakapia? I kitẹ tantu mapulu měkoạ persiapan gunang Pěngangěndungang Měhabarẹ̌ dingangu Pěngangěndungang Alkitapẹ̌ su Sidang, lai měkoạ persiapan gunang kěbị bahan pěngangibadang tengah pekan. I kitẹ lai harusẹ̌ mẹ̌basa kěbị terbitan Menara Pengawal edisi umum dingangu Sadarlah!

7. Apa i kitẹ harusẹ̌ makadodọ naung mạeng tawe makapẹ̌basa arau tawe makapẹ̌biala manga bahan su situs web i kitẹ dingangu su JW Broadcasting?

⁷ I kau aramanung setuju kěbị bahan kanini harusẹ̌ ěndungang. Katewe, i kau aramanung mẹ̌kiwal᷊o, ’Kerea dingangu kěbị bahan su jw.org dingangu su JW Broadcasting? Sěbạe lawọ artikel dingangu video sene!’ Kěnang pẹ̌tiněna sasihing ini: Su sěmbaụ rumah makan, piạ haghing kaěng nisadia. Taumata apang diměnta sene tawe makatemang kěbị kaěng. Hakị u ene, i sire kětạeng měmile piram baụ kaěng. Kerene lai, mạeng i kau tawe makapẹ̌basa dingangu tawe makapẹ̌biala kěbị kaěng rohani seng nisadia, abe makadodọ naung. Pẹ̌basa arau pẹ̌biala manga bahan ene sěngapang botonge. Mahịe měmanda apa mangal᷊ene měngěndung kụ kerea tadeạu makaěbạ lawọ gunane su tempong měngěndung.

8. Apa botonge koateng i kitẹ su tempong měngěndung Měhabarẹ̌, kụ apa gunane měkoạ ene?

⁸ Su tempong něngěndung, i kau harusẹ̌ fokus su apa niwasanu tadeạu makaěbạ tatěntiro penting. Katewe, ini bal᷊inẹ kětạeng mẹ̌basa masahawụ dingangu měngěhị sasimbahe. Contone, su tempong měkoạ persiapan Pěngangěndungang Měhabarẹ̌, humotong basạe bageang ”Tinjauan”. Bọu ene, pẹ̌tiněna tatěmbọu pěngangěndungang dingangu kěbị subjudul lai kakiwal᷊o tinjauan. Bọu ene, basa pěngangěndungang ene pakapia dingangu pakal᷊ongge. Pěmanda kalimat nẹ̌sěbạ apa nilahẹ su paragraf ene. Biasane, ene kai kalimat humotong su paragraf. Bọu kalimat ene, i kau makasingkạ apa nilahẹ su paragraf ene. Su tempong mẹ̌basa pěngangěndungang ene, pẹ̌tiněna kerea manga paragraf mendukung subjudul dingangu tema kahumotongange pěngangěndungang ene. Bohẹ manga bawera tawe nikaěnangu dingangu manga topik sarung parikěsangu.

9. (a) Su Pěngangěndungang Měhabarẹ̌, kawe nụe dingangu kerea i kitẹ mẹ̌tarukira pakapia kěbị ayate? (b) Kere nisěbạ su Yosua 1:8, su apang bọu nẹ̌basa ayatẹ̌, apa lai harusẹ̌ koateng i kitẹ?

⁹ Su Pěngangěndungang Měhabarẹ̌ su sidang, i kitẹ limembong makasingkạ soal u Alkitapẹ̌. Hakị u ene, pẹ̌tarukira pakapia  kěbị ayatẹ̌ su sěmbaụ pěngangěndungang, něngělembo manga ayatẹ̌ sarung basaěng. Pẹ̌tiněna kerea kata kunci su sěmbaụ ayatẹ̌ piạ sěmpụe dingangu gagasan utama su paragraf. Bọu ene, pẹ̌tiněna manga ayatẹ̌ seng niwasanu dingangu kerea i kau botonge měkoạ ene su pěbawiahu.​—Basa Yosua 1:8.

10. Kere nilahẹ su Ibrani 5:14, kawe nụe matatimadẹ̌ harusẹ̌ měpakẹ tempo su Ibadah Keluarga gunang měněntiro anạ i sire carane měngěndung dingangu měkoạ riset?

¹⁰ Matatimadẹ̌ tantu mapulu manga anạe mal᷊uasẹ̌ tumol᷊e Ibadah Keluarga. Hakị u ene, i sire harusẹ̌ měkoạ rencana apa sarung ěndungang su Ibadah Keluarga. Lawọ keluarga měkoạ kegiatan khusus arau proyek makal᷊uasẹ̌ kere mẹ̌těno měkoạ bahterang i Noakẹ̌. Katewe, kegiatan kerene tawe harusẹ̌ koateng sabang misa. Bal᷊inẹ kětạeng měkoạ kegiatan makal᷊uasẹ̌ arau mẹ̌biala acara su JW Broadcasting, matimadẹ̌ lai harusẹ̌ měněntiro anạ i sire carane měngěndung. Contone, manga rariọ harusẹ̌ masingkạ carane měkoạ persiapan bahan pěngangibadang arau carane měkoạ riset soal u masalah su sikol᷊ah. (Basa Ibrani 5:14.) Mạeng i sire měpakẹ tempo gunang měngěndung Alkitapẹ̌ su wal᷊e, i sire sarung gampang makaěna dingangu tumol᷊e bahan nilahẹ su pěngangibadang dingangu kebaktian, maning tawẹ apa videone. Tantu, kal᷊awọe tempo paketang gunang měngěndung dingangu manga rariọ ene harusẹ̌ mẹ̌tatahino dingangu umurẹ̌ lai sipati sire.

11. Kawe nụe penting měněntiro měngangěndung Alkitapẹ̌ soal u cara měngěndung pakapia?

¹¹ Měngangěndung Alkitapẹ̌ lai harusẹ̌ těntirong carane měngěndung. Su tempong i sire buhudeng něngěndung, i kitẹ mal᷊uasẹ̌ mạeng i sire něngěhị sasimbahe su tempong někoạ persiapan pěngangěndungang Alkitapẹ̌ arau pěngangibadang. Katewe, i kitẹ lai harusẹ̌ měněntiro si sire carane měkoạ riset dingangu měngěndung hala. Mạeng měkoạ ene, su tempong i sire piạ masalah, i sire tawe langsung mẹ̌dorong tul᷊ung su taumata wal᷊inẹ su sidang. I sire sarung makasingkạ carane mědeạ hala informasi makatul᷊ung si sire su publikasing i kitẹ.

12. Timona apa harusẹ̌ piạ si kitẹ su tempong měngěndung?

¹² Mạeng i kau tawe tumanịu puluang měngěndung, aramanung i kau nẹ̌pěndang madiri měkoạ ene. Katewe, i kau sarung mapulu měkoạ ene. Pěnětạe pěngěndung kadodọ-kadodọ, bọu ene tamba temponu gunang měngěndung. Pẹ̌tahěndung  timonanu něngěndung. Tantu, timonang i kitẹ ute tadeạu limembong mědal᷊ahapị mapia dingangi Yehuwa. Katewe, aramanung i kitẹ piạ timona mapulu langsung koateng, kere sumimbahẹ̌ kakiwal᷊o arau mědeạ informasi soal u masalah tẹ̌tatěngong i kitẹ.

13. (a) Lahẹko piram baụ cara botonge koatengu mangangudạ gunang tumatawang pangangimange su sikol᷊ah. (b) Kerea mangangudạ botonge tumol᷊e sasasa su Kolose 4:6?

¹³ Contone, apa i kau anạ mangudạ kụ bědang měsẹ̌sikol᷊ah? Manga hapịu su kělasẹ̌ aramanung měkẹ̌koạ hari jadi. Ěndịu i kau mapulu mělahẹ bọu Alkitapẹ̌ kawe nụe i kau tawe měkẹ̌koạ ene, katewe i kau nẹ̌pěndang tawe makakoạ mělahẹ ene. Ene něnodẹ i kau harusẹ̌ měngěndung! I kau botonge piạ darua alasang: (1) tadeạu i kau limembong mangimang hari jadi ene tawe makal᷊uasẹ̌ Mawu dingangu (2) tadeạu i kau mapaelẹ̌ mělahẹ katěngadẹ̌. (Mat. 14:6-11; 1 Ptr. 3:15) Humotong, i kau botonge mẹ̌tiněna ini: ’Kawe nụe manga hapịku někoạ hari jadi?’ Bọu ene, pěkoạ riset pakapia bọu publikasing i kitẹ. Tumatawang pangangimangu ěndịu tawe masigěsạ kere tẹ̌tiněnangu. Kal᷊awokange taumata měkẹ̌koạ hari jadi ual᷊ingu lawọ taumata měkẹ̌koạ ene. Mạeng i kau makaěbạ sěmbaụ arau darua bukti botonge pahiakengu si sire, aramanung i kau makatul᷊ung hapịu apang mapulu makasingkạ katěngadẹ̌.​—Basa Kolose 4:6.

14-16. (a) Mạeng i kau tawe tumanịu masingkạ lohong sěmbaụ bukẹ̌ su Alkitapẹ̌, apa wotonge koatengu? (b) Lahẹko kerea manga ayatẹ̌ su referensi silang botonge mẹ̌tul᷊ung si kau makasingkạ mapaelẹ̌ bukẹ̌ Amos. (Pěmanda lai kotak ” Pěngěndung soal u Taumata su Alkitapẹ̌!”)

¹⁴ Umpamane, su pěngangibadang tempo mahi i kitẹ sarung měngěndung sěmbaụ bukẹ̌ bọu bukẹ̌ manga nabi kadodọ. Aramanung i kau tawe tumanịu masingkạ lohong bukẹ̌ ene. Hakị u ene, i kau aramanung harusẹ̌ mẹ̌tawakal᷊i tadeạu limembong mapulu měngěndung apa niwohẹu nabi ene. Apa wotonge koatengu? *

¹⁵ Humotong, kěnang pẹ̌tiněna, ’Apa nikasingkạku soal u měmamohẹ bukẹ̌ ini? I sai i sie, su apa i sie nẹ̌tanạ, apa hal᷊ẹ̌e?’ Mạeng masingkạ latar bělakange, i kau limembong makaěna alasang i sie něpakẹ sěmbaụ bawera arau sasihing. Hakị u ene, su tempong mẹ̌basa Alkitapẹ̌, pědeạe bawera makatul᷊ung si kau makaěna latar belakang měmamohẹe.

¹⁶ Bọu ene, i kau botonge měmarikěsa kange bukẹ̌ ene niwohẹ. I kau botonge měmanda ”Daftar Buku-Buku Alkitab” su bageang belakang bọu Kitab Suci Terjemahan Dunia Baru. Bọu ene, i kau botonge měmanda tabel manga nabi dingangu datu su Lampiran A6. Ual᷊ingu bukẹ̌ lẹ̌ěndungangu lohone kai těbal᷊ẹ̌, kěnang pěngěndung kerea pěbawiahu taumata su tempong bukẹ̌ ene niwohẹ. Contone: Nabi ene něgělị laingatẹ̌ tadeạu taumata mẹ̌těngkarau bọu sipatẹ̌ dingangu kakanoạ nẹ̌sal᷊a apa? I sai něbiahẹ̌ su tempo mẹ̌sul᷊ung dingangu měmamohẹ bukẹ̌ ene? Tadeạu i kau kahěngang-hěngang makaěna hal᷊ẹ̌ ene, i kau aramanung harusẹ̌ mẹ̌basa manga bukẹ̌ bal᷊inẹ su Alkitapẹ̌. Contone, gunang kahěngang-hěngang makaěna apa nariadi su zaman Nabi Amos, i kau botonge mẹ̌basa manga ayatẹ̌ su referensi silang Amos 1:1, kere bukẹ̌ 2 Raja-Raja dingangu 2 Tawarikh. Bọu ene lai, i kau botonge měngěndung apa niwohẹu Nabi Hosea, ual᷊ingu aramanung i sie něbiahẹ̌ su tempo mẹ̌sul᷊ung dingangi Amos. Kěbị bukẹ̌ ene makatul᷊ung si kitẹ limembong makaěna kerea pěbawiahẹ̌ su  zaman i Amos.​—2 Raj. 14:25-28; 2 Taw. 26:1-15; Hos. 1:1-11; Am. 1:1.

17-18. Bọu contoh su paragraf ini arau contoh nikaěbạu hala, lahẹko kerea perincian kadodọ seng niwasang i kitẹ botonge makakoạ pěngangěndungang Alkitapẹ̌ limembong makal᷊uasẹ̌.

¹⁷ Su tempong mẹ̌basa Alkitapẹ̌, si kitẹ harusẹ̌ piạ kapulu gunang makasingkạ limembong mal᷊awọ. Contone, pělọe i kau měbẹ̌basa pasalẹ̌ 12 bọu těbal᷊ẹ̌ i Zakharia kụ nělahẹ papateng Mesias. (Za. 12:10) Su tempong nahumpạ su ayatẹ̌ 12, i kau nakawasa ”kěluargang hiteng Natan” sarung sěbạe masusah naung dingangu sumangị ual᷊ingu papateng Mesias. Sul᷊ungu kětạeng mẹ̌basa perincian ene, i kau botonge mẹ̌tiněna, ’Apa sěmpụe hiteng i Natan dingangu Mesias? Apa piạ cara wal᷊inẹ makaěbạ lawọ informasi?’ Kere sěngkatau detektif, i kau nědeạ kěbị faktane. Bọu referensi silang, i kau nakaěbạ 2 Samuel 5:13, 14. Su ayatẹ̌ ene, i kau nakasingkạ Natan kai sěngkatau anạ i Datu Daud. Referensi silang karuane, Lukas 3:23, 31, něhabarẹ̌ i Yesus kai hiteng Natan bọu i Maria. (Pěmanda Menara Pengawal, No. 3 2016, hlm. 9, par. 1-3, ”Tahukah Anda?”) Su apang nakasingkạ ene, i kau naherang! I kau seng masingkạ těbal᷊ẹ̌ nělahẹ i Yesus sarung malahirẹ̌ bọu hiteng i Daud. (Mat. 22:42) Katewe anạ i Daud esẹ kai nal᷊iu wọu 20 su kataune. Maning kerene, Nabi Zakharia secara khusus nẹ̌sěbạ hiteng i Natan sarung sumangị ual᷊ingu papateng Yesus. Ini sěbạe makạlaherang!

¹⁸ Pěmanda lai contoh wal᷊inẹ. Su pasalẹ̌ humotong Injil Lukas, i kitẹ nakawasa malaekatẹ̌ Gabriel nẹ̌tiwo si Maria dingangu naul᷊ị hal᷊ẹ̌ makạlaherang soal u anạ sarung malahirẹ̌ bọu i Maria. I Gabriel naul᷊ị, ”I sie sarung makoạ taumata penting kụ sarung isěbạ Ahusu Mawu Karangetange.  Mawu Yehuwa sarung měgělị takhta Daud, i upunge, kụ i sie sarung makoạ Datu gunang kěbi hiteng Yakub sarang karěngụe.” (Luk. 1:32, 33) I kitẹ aramanung limembong fokus su bageang humotong bọu tatanatang i Gabriel, ene kai Yesus sarung isěbạ ”Ahusu Mawu Karangetange”. Katewe Gabriel lai něněbal᷊ẹ̌ i Yesus sarung ”makoạ Datu”. Hakị u ene, i kitẹ aramanung měpẹ̌pikirẹ̌ apa tẹ̌tiněnang i Maria su tempong nakaringihẹ̌ tatanatang Gabriel. Apa i sie nẹ̌pikirẹ̌ i Yesus sarung měngganti si Herodes, arau sěngkatau hitene, gunang měngawasa Israel? Mạeng kahěngang i Yesus makoạ datu, ene mangal᷊ene i Maria sarung makoạ ibu suri, kụ kěluargane sarung mẹ̌tanạ su istanang datu. Katewe tawẹ apa catatan něnodẹ i Maria nẹ̌sěbạ manga hal᷊ẹ̌ ene su tempong nẹ̌bisara si Gabriel. I kitẹ lai tawe nakawasa i Maria nẹ̌dorong posisi istimewa su Kararatuangu Mawu, kere nirorongu darua muriti Yesus. (Mat. 20:20-23) Manga perincian ini nakakoạ si kitẹ limembong mangimang i Maria sěbạe masanạ naung!

19-20. Kere nilahẹ su Yakobus 1:22-25 dingangu 4:8, apa timonang i kitẹ su tempong měngěndung?

¹⁹ Pẹ̌tahěndung timonang i kitẹ měngěndung Alkitapẹ̌ dingangu publikasi Kristen ute tadeạu limembong mědal᷊ahapị mapia dingangi Yehuwa. I kitẹ lai mapulu makasingkạ mal᷊ahẹ taumata kerea i kitẹ sěběnarẹ̌e dingangu apa harusẹ̌ bal᷊uiang i kitẹ tadeạu makal᷊uasẹ̌ Mawu. (Basa Yakobus 1:22-25; 4:8.) Sabang měnětạ měngěndung, i kitẹ harusẹ̌ mẹ̌dorong rohkẹ̌ masusi si Yehuwa. I kitẹ mẹ̌dorong Yehuwa mẹ̌tul᷊ung si kitẹ makaěbạ gunane bọu bahan ene dingangu měmanda watangeng i kitẹ kere cara i Sie měmanda.

²⁰ Sěngkatau pemazmur naul᷊ị ělangu Mawu masatia ene ”puluang su hukung i Yehuwa, lai mẹ̌basa hukung’E dingangu tingihẹ̌ masikome ěllo hěbi. . . . Kěbị apa nikoạe mang piạ hasile.” (Mz. 1:2, 3) Karimạko i kitẹ kěbị lai kerene!