1. Yesus něgělị contoh apa su manga tumatol᷊ene, kụ apa nikoạ i sire? (Pěmanda gambarẹ̌ sampul.)

SU KANANDỤU pelayanan i Yesus su dunia, i sie tatapẹ̌ piạ tiněna positif. Kụ i sie lai mapulu manga tumatol᷊ene tatapẹ̌ positif su pelayanan kẹ̌koateng i sire. (Yoh. 4:35, 36) Su tempong i Yesus bědang ene dingangu manga murite, i sire masěmangatẹ̌ něnginjilẹ̌. (Luk. 10:1, 5-11, 17) Katewe su tempong i Yesus nisamẹ kụ nate, kadodọ tempo manga murite nikailangengu sěmangatẹ̌ gunang měnginjilẹ̌. (Yoh. 16:32) Su apang i sie saụ nipěbiahẹ̌ bọu papate, i Yesus němahangsang si sire gunang fokus su pelayanan. Kụ su apang i Yesus saụ naawị sarang sorga, i sire něnginjilẹ̌ dingangu masěmangatẹ̌ sarang manga sědụ i sire němorotesẹ̌, ”I kamene němenẹ Yerusalem dingangu těntirong i kamene.”​—Kis. 5:28.

2. Kerea i Yehuwa něngal᷊amatẹ̌ hal᷊ẹ̌ měnginjilẹ̌?

² Yesus něngahạ hal᷊ẹ̌u tau Kristen su abad humotong gunang měnginjilẹ̌, kụ Yehuwa nẹ̌tul᷊ung si sire. Hakị u ene, lawọ taumata něnarimạ habarẹ̌ lẹ̌habareng i sire. Contone, su Pentakosta taung 33 M, piạ ěndịu 3.000 su kataune nibaptisẹ̌. (Kis. 2:41) Kụ manga muritẹ̌ sauneng kakạl᷊awọe. (Kis. 6:7) Katewe, Yesus seng naul᷊ị sarung piạ limembong lawọ taumata měnarimạ habarẹ̌ mapia su ěllo pěngěngsuenge.​—Yoh. 14:12; Kis. 1:8.

3-4. Kawe nụe hal᷊ẹ̌ měnginjilẹ̌ tawẹ gampang su piram baụ tampạ, kụ apa sarung ěndungang i kitẹ su pěngangěndungang ini?

³ I kitẹ kěbị mẹ̌tawakal᷊i tatapẹ̌ positif su pelayanan. Su piram baụ tampạ gampang měkoạ ene. Kawe nụe? Ual᷊ingu piạ lawọ mapulu měngěndung Alkitapẹ̌ sarang pirang katau  harusẹ̌ měngampal᷊ẹ̌ piạ Sahiding Yehuwa měněntiro Alkitapẹ̌ si sire. Katewe su tampạ wal᷊inẹ, penyiar tawe gampang měnginjilẹ̌. Kal᷊awokange taumata tawe dịe su wal᷊e, kụ mạeng ene, i sire tawe tumanịu mapulu dumaringihẹ̌ habaru Alkitapẹ̌.

⁴ Mạeng i kau mětẹ̌tanạ su tampạ tawe gampang měnginjilẹ̌, manga těgu su pěngangěndungang ini sarung makatul᷊ung si kau. I kitẹ sarung měngěndung apa nikoạu anạu sěmbaụ tadeạu botonge mẹ̌sombang dingangu taumata su pelayanan. Kụ i kitẹ lai sarung měngěndung kawe nụe i kitẹ botonge tatapẹ̌ positif tawẹ soale taumata dumaringihẹ̌ habari kitẹ arau tala.

5. Apa manga sasal᷊ukạ nikahombangengu manga Sahiding Yehuwa?

⁵ Lawọ Sahiding Yehuwa nẹ̌pěndang tawe gampang mẹ̌sombangu taumata su wal᷊eng i sire. Pirang katau penyiar mětẹ̌tanạ su tampạ piạ lawọ apartemen dẹ̌diagateng masěghadẹ̌. Aramanung piạ měndariagạ tawe měmala i kitẹ sumuẹ̌ mạeng tawẹ apa undangan bọu taumata mětẹ̌tanạ su tampạ ene. Penyiar wal᷊inẹ botonge měnginjilẹ̌ bọu wal᷊e sarang bal᷊e kụ tawẹ apa barang makasahaghe, katewe mahal᷊i taumata nipěsombangeng i sire. Penyiar wal᷊inẹ lai něnginjilẹ̌ su tampạ marau kụ mahal᷊i taumata mětẹ̌tanạ sene. Manga penyiar ěndịu dimal᷊eng marau gunang měnginjilẹ̌ su sěngkatau kụ taumatane tawe dịe su wal᷊e. Mạeng i kitẹ nakahombang manga sasal᷊ukạ kerene, i kitẹ tawe měngědo. Apa koateng i kitẹ gunang tumatěngo manga sasal᷊ukạ kerene dingangu mẹ̌bisara su limembong lawọ taumata?

6. Kerea měnginjilẹ̌ mẹ̌sul᷊ung kere mẹ̌baẹ?

⁶ Yesus napẹ̌sul᷊ungu hal᷊ẹ̌ měnginjilẹ̌ dingangu hal᷊ẹ̌ mẹ̌baẹ. (Mrk. 1:17) Pirang katau mẹ̌bawaẹ ěndịu něnondo sarang pira ěllo, kụ tawe nakaěbạ kinạ. Katewe i sire tawe něngědo, i sire němal᷊ui cara i sire. I sire němal᷊ui tempo, tampạ, arau cara i sire mẹ̌baẹ. Su pelayanan, i kitẹ lai botonge měkoạ pẹ̌bawal᷊ui mẹ̌sul᷊ung. Pěmanda piram baụ těgu ini.

7. Apa hasile mạeng i kitẹ měnginjilẹ̌ su tempo nẹ̌tatěntang?

⁷ Kěnang pědeạ taumata su tempo nẹ̌tatěntang. I kitẹ sarung mẹ̌sombang dingangu limembong lawọ taumata mạeng měnginjilẹ̌ su tempong i sire ěndịu ene su wal᷊e. Maning apa nariadi, i sire mang mapul᷊ẹ sarang bal᷊e. Lawọ anạu sěmbaụ něnginjilẹ̌ su tempong bawěllo arau hěbi ual᷊ingu i sire mẹ̌sombang dingangu limembong lawọ taumata. Bọu ene lai taghuangu wal᷊e tawe sibukẹ̌ kụ limembong sadia mẹ̌bisara su tempo kerene. Arau i kau ěndịu botonge mẹ̌těno apa nikoạu sěngkatau penatua arenge David. I sie naul᷊ị su apang něnginjilẹ̌ pirang kaorasẹ̌ su sěmbaụ tampạ, i sie dingangu hapịe saụ nẹ̌tiwo manga bal᷊e tawẹ taune. I sie nẹ̌bera, ”Su tempong saụ nẹ̌bal᷊ị iạ himěkosẹ̌ ual᷊ingu limembong lawọ taumata ene su wal᷊e.” *

8. Kerea Pengkhotbah 11:6 makatul᷊ung si kitẹ su pelayanan?

⁸ I kitẹ perlu mědeạ taumata su tempong i sire ene su wal᷊e. Ayat tema su pěngangěndungang ini něněntiro si kitẹ gunang tatapẹ̌ masěmangatẹ̌. (Basa Pengkhotbah 11:6.) I David seng nisěbạ kanini, tawe něngědo. Su apang seng pirang sul᷊ẹ mětẹ̌tiwo, i sie samurine nẹ̌sombang dingangu taumata su sěmbaụ wal᷊e. Taumata ene mapulu mẹ̌bisara soal u Alkitapẹ̌ kụ i sie nẹ̌bera, ”Iạ seng nẹ̌tanạ sini ěndịu ual᷊u taung, kụ tawẹ pernah Sahiding Yehuwa diměnta su wal᷊eku.”  David nẹ̌bera, ”Iạ nasadarẹ̌ su tempong nẹ̌sombang dingangu taumata su wal᷊e, i sire biasane mapulu dumaringihẹ̌ habarẹ̌ lẹ̌habareng i kitẹ.”

9. Apa nikoạu pirang katau penyiar gunang mẹ̌sombang dingangu taumata tawe gampang kaěbakeng su wal᷊e?

⁹ Kěnang pěnal᷊ukạ tampạ nẹ̌tatěntang. Gunang mẹ̌sombang dingangu taumata tawe kaěbakeng su wal᷊e, pirang katau penyiar němal᷊ui tampạ i sire měnginjilẹ̌. Contone, měnginjilẹ̌ su ral᷊eng dingangu měnginjilẹ̌ měpakẹ rak beroda. Ene cara mapaelẹ̌ gunang mẹ̌sombang dingangu taumata mětẹ̌tanạ su apartemen gěguwạ, kụ tawe kaěbakeng su tempong měnginjilẹ̌ bọu wal᷊e sarang bal᷊e. Ini makakoạ Sahiding Yehuwa botonge mẹ̌bisara dingangu taumata apang mětẹ̌tanạ su tampạ kerene. Kụ lawọ penyiar lai nẹ̌sombang dingangu taumata mapulu mẹ̌bisara arau měnarimạ publikasi su taman, pasarẹ̌, dingangu su daerah bisnis. Floiran, sěngkatau pengawas wilayah su Bolivia, nẹ̌bera, ”I kami nakoạ sarang pasarẹ̌ dingangu daerah bisnis, su taloarang pukul᷊ẹ̌ 1 sarang pukul᷊ẹ̌ 3 su tempong taumata sene tawe tumanịu sibukẹ̌. I kami biasane botonge mẹ̌bawěke sarang lai měnětạ pěngangěndungang Alkitapẹ̌.”

10. Apa cara botonge paketangu gunang měnginjilẹ̌ su kěbị taumata?

¹⁰ Kěnang pěnal᷊ukạ cara nẹ̌tatěntang. Pělọe i kau seng pirang sul᷊ẹ nẹ̌tiwo sěngkatau. I kau seng diměnta su tempo nẹ̌tatěntang, katewe tawe nẹ̌sombang dingange. Apa piạ cara wal᷊inẹ tadeạu makapahiạ habarẹ̌ mapia su taumata kerene? Katarína, nẹ̌bera, ”Iạ němohẹ suratẹ̌ gunang i sire apang tawe kaěbakeng su wal᷊e, ia maul᷊ị apa  mapulu takụ ul᷊ịkang si sire.” Apa těntirone? Pakẹ haghing cara gunang měnginjilẹ̌ su kěbị taumata su tampạu.

11. Kawe nụe pirang katau madiri dumaringihẹ̌ habarẹ̌ mapia?

¹¹ Pirang katau madiri dumaringihẹ̌ habarẹ̌ mapia. I sire nẹ̌pikirẹ̌ i sire tawe harusẹ̌ masingkạ soal u Mawu arau Alkitapẹ̌. I sire tawe mangimang su Mawu ual᷊ingu nakasilo lawọ kasasigěsạ su dunia ini. I sire madiri su Alkitapẹ̌ ual᷊ingu nakasilo manga těmbonangu agama naul᷊ị i sire matuhụ su Alkitapẹ̌ katewe kakanoạ i sire dal᷊akị. Taumata wal᷊inẹ tumanịu sibukẹ̌ su hal᷊ẹ̌, keluarga, arau masalang i sire, kụ i sire tawe nẹ̌pikirẹ̌ Alkitapẹ̌ botonge makatul᷊ung si sire. Kerea i kitẹ botonge tatapẹ̌ mal᷊uasẹ̌ su tempong něnginjilẹ̌ su taumata nẹ̌tiněna habari kitẹ tawe penting?

12. Kerea bawera su Filipi 2:4 makatul᷊ung si kitẹ su pelayanan?

¹² Todẹ i kau mapadul᷊i. Lawọ taumata humotong madiri měnarimạ katewe bọu ene mapulu dumaringihẹ̌ habarẹ̌ mapia ual᷊ingu nakasilo i kitẹ mapadul᷊i si sire. (Basa Filipi 2:4.) Contone, i David seng nisěbạ kanini, nẹ̌bera, ”Mạeng sěngkatau maul᷊ị i sie madiri dumaringihẹ̌, i kami měndesọ Alkitapẹ̌ arau publikasi kụ mẹ̌bera, ’Iạ mapulu masingkạ kawe nụe i kau nẹ̌pěndang kerene.’” Taumata botonge makapěndang mạeng sěngkatau mapadul᷊i si sire. I sire ěndịu niwul᷊e apa niwerang i kitẹ, katewe i sire biasane nakatahěndung apa nikapěndangeng i sire su tempo ene. Maning taghuangu wal᷊e tawe měmala i kitẹ mẹ̌bisara soal u habarẹ̌ mapia, i kitẹ botonge měnodẹ i kitẹ padul᷊i si sire bọu kakanoạ dingangu ekspresi gating i kitẹ.

13. Apa koateng i kitẹ tadeạu taumata limembong mapulu dumaringihẹ̌ habari kitẹ?

¹³ I kitẹ měnodẹ i kitẹ mapadul᷊i su tempong měmal᷊ui topik lẹ̌habareng i kitẹ tuhụ kebutuhan dingangu apa mapulu daringihangu taghuangu wal᷊e. Contone, apa i kitẹ nakasilo taghuangu wal᷊e piạ anạe? Taghuangu wal᷊e ěndịu limembong mapulu dumaringihẹ̌ sasasang Alkitapẹ̌ soal u kerea měhiking anạ arau kerea tadeạu pěbawiahu keluarga makoạ limembong mal᷊uasẹ̌. Apa i kitẹ nakasilo piram baụ solotẹ̌ su tukadu wal᷊eng i sire? I kitẹ botonge mẹ̌bisara soal u karal᷊akisẹ̌ dingangu apa nakakoạ lawọ taumata su dunia ini natakụ. Taghuangu wal᷊e ěndịu mal᷊uasẹ̌ dumaringihẹ̌ su tempong mahi seng tawẹ apa karal᷊akisẹ̌. Tawẹ soale kerea situasine, pẹ̌tul᷊ung si sire apang mapulu dumaringihẹ̌ gunang makasingkạ sasasang Alkitapẹ̌ ene piạ gunane si sire. Katarína, seng nisěbạ kanini, nẹ̌bera,  ”Iạ nẹ̌tiněna kerea Alkitapẹ̌ sěbạe nakatul᷊ung si siạ.” Hakị u ene, i Katarína mangimang su apa niul᷊ịe, kụ taumata apang dimaringihẹ̌ nakasilo ene.

14. Kere nilahẹ su Amsal 27:17, kerea hapị su tempong měnginjilẹ̌ makatul᷊ung sěmbaụ su wal᷊inẹ?

¹⁴ Tarimạ tul᷊umangu taumata wal᷊inẹ. Su abad humotong, Paulus něnodẹ si Timotius carane měnginjilẹ̌ dingangu měněntiro, kụ i sie němahangsang si Timotius gunang mẹ̌tul᷊ung taumata wal᷊inẹ dingangu cara mẹ̌sul᷊ung. (1 Kor. 4:17) Kere i Timotius, i kitẹ botonge měngěndung bọu i sire apang piạ lawọ pengalaman su sidang. (Basa Amsal 27:17.) Pěmanda contoh sěngkatau saudara arenge Shawn. I sie bọu merintis su sěmbaụ tampạ marau kụ kal᷊awokange taumata sene seng piạ agamane. Kerea i sie botonge tatapẹ̌ mal᷊uasẹ̌? I sie nẹ̌bera, ”Mạeng botonge, iạ měhal᷊ẹ̌ sěngkasio dingangu anạu sěmbaụ wal᷊inẹ. Su ral᷊eng bọu wal᷊e sarang bal᷊e, i kami něpakẹ tempo gunang mẹ̌tul᷊ung sěmbaụ su wal᷊inẹ tadeạu limembong mapaelẹ̌ měněntiro. Contone, i kami nẹ̌bisara soal u apa niul᷊ịu taghuangu wal᷊e, kụ kerea i kami sumimbahẹ̌. Bọu ene, i kami mẹ̌bawěke apa wotonge koateng i kami mạeng taghuangu wal᷊e maul᷊ị hal᷊ẹ̌ mẹ̌sul᷊ung.”

15. Kawe nụe daroa penting su tempong měnginjilẹ̌?

¹⁵ Pẹ̌doa pẹ̌dorong tul᷊ung si Yehuwa. Pẹ̌dorong tul᷊ung si Yehuwa sabang i kau měnginjilẹ̌. I kitẹ perlu rohkẹ̌ masusi gunang mẹ̌tul᷊ung si kitẹ su kěbị hal᷊ẹ̌ koateng i kitẹ. (Mz. 127:1; Luk. 11:13) Su tempong i kau mẹ̌dorong tul᷊ung si Yehuwa bọu daroa, paul᷊ị apa dorongangu. Contone, pẹ̌dorong si Yehuwa tadeạu měngahạ si kau sarang taumata mapulu dumaringihẹ̌ kụ mapulu měngěndung soal i Yehuwa. Bọu ene pẹ̌tawakal᷊i měnginjilẹ̌ su kěbị taumata nipẹ̌sombangengu.

16. Kawe nụe pěngangěndungang hala penting gunang pelayanan?

¹⁶ Sadia tempo gunang pěngangěndungang hala. Hengetangu Mawu naul᷊ị, ”Měnodẹ su watangeng, kapulung Mawu mapia, nasukụ, dingangu makal᷊uasẹ̌ si Sie.” (Rm. 12:2) Su tempong i kitẹ měngěndung, i kitẹ sarung makasingkạ limembong mapaelẹ̌ soal u Mawu. Kụ su tempong i kitẹ mẹ̌běke ene su taumata wal᷊inẹ, i sire sarung makasilo i kitẹ kahěngang-hěngang mangimang su apa niul᷊ị i kitẹ. Katarína, seng nisěbạ kanini, nẹ̌bera, ”Su tempong tamai, iạ nasadarẹ̌ iạ harusẹ̌ měnoghasẹ̌ pangangimangku soal u piram baụ těntiro dasarẹ̌ bọu Alkitapẹ̌. Hakị u ene, iạ něngěndung pakapia manga bukti něnodẹ piạ Měndariadi, Alkitapẹ̌ kahěngang-hěngang Hengetangu Mawu, dingangu Mawu piạ organisasi-Ne orasẹ̌ ini.” Katarína naul᷊ị pěngangěndungang hala nakatoghasẹ̌ pangangimange dingangu nakakoạ i sie limembong mal᷊uasẹ̌ su pelayanan.

17. Kawe nụe i Yesus tatapẹ̌ positif su pelayanan?

¹⁷ Yesus tatapẹ̌ positif dingangu turusẹ̌ něnginjilẹ̌ maning pirang katau madiri dumaringihẹ̌ habarẹ̌ lẹ̌habarenge. Kawe nụe? I sie masingkạ taumata perlu měngěndung katěngadẹ̌ kụ i sie mapulu mẹ̌tul᷊ung lawọ taumata. I sie lai masingkạ pirang katau humotong madiri dumaringihẹ̌ samurine sarung mapulu dumaringihẹ̌. Pẹ̌tiněna apa nariadi su kěluargang i Yesus. Su kanandụu tělu taung stengah i Yesus něnginjilẹ̌, tawẹ apa bọu manga tuarine nakoạ murite. (Yoh. 7:5) Katewe, su apang i sie saụ nipěbiahẹ̌ bọu papate, i sire nakoạ tau Kristen.​—Kis. 1:14.

18. Kawe nụe i kitẹ turusẹ̌ měnginjilẹ̌?

¹⁸ I kitẹ běga i sai sarung měnarimạ katěngadu  Alkitapẹ̌ nitěntirong i kitẹ. Pirang katau ěndịu harusẹ̌ měpakẹ limembong lawọ tempo gunang měngěndung katěngadẹ̌ sul᷊ungu taumata wal᷊inẹ. Maning i sire madiri dumaringihẹ̌ katewe makasilo kakanoạ mapia dingangu positif bọu i kitẹ, i sire ěndịu sarung měnětạ ”mapakawantugẹ̌ Mawu”.​—1 Ptr. 2:12.

19. Bọu 1 Korintus 3:6, 7, apa nikaěndungang i kitẹ soal u pelayanan?

¹⁹ Maning i kitẹ mẹ̌suang dingangu měněbohẹ̌, i kitẹ harusẹ̌ mẹ̌tahěndung Mawu mapakatuwo ene. (Basa 1 Korintus 3:6, 7.) Getahun, sěngkatau saudara melayani su Etiopia, nẹ̌bera, ”Nal᷊iu bọu 20 su taunge, kětạeng iạ Sahiding Yehuwa su tampạku. Katewe orasẹ̌ ini seng piạ 14 penyiar. Mapul᷊o tělu seng bọu nibaptisẹ̌, nasuẹ̌ lai kawingku dingangu tatělu anạku. Biasane piạ 32 diměnta su pěngangibadang i kami.” Getahun mal᷊uasẹ̌ ual᷊ingu i sie turusẹ̌ něnginjilẹ̌ kụ dingangu masabarẹ̌ měhědo Yehuwa mẹ̌tul᷊ung taumata gunang makoạ ělang’E.​—Yoh. 6:44.

20. Su hal᷊ẹ̌ kerea i kitẹ mẹ̌sul᷊ung dingangu tim měnanal᷊amatẹ̌?

²⁰ Si Yehuwa pěbawiahu kěbị taumata ene maarěga. I Sie něgělị si kitẹ kesempatan maarěga měhal᷊ẹ̌ sěngkasio dingangu Ahus’E gunang měngomol᷊ẹ̌ taumata bọu patikụ bangsa těntal᷊ang pěngěngsuengu dunia ini bědang tawe diměnta. (Hag. 2:7) Hal᷊ẹ̌ měnginjilẹ̌ ene botonge isul᷊ung dingangu hal᷊ẹ̌ měnanal᷊amatẹ̌. Kụ i kitẹ kere anggota su sěmbaụ tim měnanal᷊amatẹ̌ taumata naambung su ral᷊ungu tambang. Maning kětạeng mahal᷊i taumata nikaěbạu tim měnanal᷊amatẹ̌, kěbị hal᷊ẹ̌ nikoạ i sire ene maarěga. Kerene lai hal᷊ẹ̌ kěkoateng i kitẹ su pelayanan. I kitẹ běga pira kal᷊awọe taumata sarung ipakasal᷊amatẹ̌ bọu duniang Setang. Katewe, Yehuwa botonge měpakẹ maning i sai bọu i kitẹ gunang mẹ̌tul᷊ung si sire. Andreas, mětẹ̌tanạ su Bolivia, nẹ̌bera, ”Iạ nakasilo sěngkatau něngěndung Alkitapẹ̌ kụ nibaptisẹ̌ ual᷊ingu piạ lawọ něhal᷊ẹ̌ sěngkasio nẹ̌tul᷊ung si sie.” Karimạko i kitẹ tatapẹ̌ positif su pelayanan kẹ̌koateng i kitẹ. Mạeng měkoạ ene Yehuwa sarung měngal᷊amatẹ̌ si kitẹ, kụ hal᷊ẹ̌ měnginjilẹ̌ kẹ̌koateng i kitẹ sarung makarěntang karal᷊uasẹ̌.