1. Yehuwa němala si kitẹ měkoạ apa?

YEHUWA němala i kitẹ měmile dal᷊engu wiahi kitẹ. I Sie něněntiro si kitẹ carane měkoạ putusang mapaelẹ̌, kụ i Sie mẹ̌tul᷊ung si kitẹ tadeạu berhasil su tempong měkoạ putusang makal᷊uasẹ̌ naung’E. (Mz. 119:173) Kakạsaune i kitẹ tumol᷊e pelesa su Hengetangu Mawu, kakạpaele i kitẹ měkoạ putusang mapaelẹ̌.​—Ibr. 5:14.

2. Kasasigěsạ apa aramanung tẹ̌tatěngong i kitẹ su apang bọu někoạ putusang?

² Katewe, maning někoạ putusang nihino, aramanung i kitẹ masigěsạ měkoạ pakasue apa seng nitětạ i kitẹ. Pẹ̌tiněna piram baụ contone: Sěngkatau saudara mangudạ němutusẹ̌ gunang mẹ̌basa kěbị lohong Alkitapẹ̌. I sie někoạ ene pirang kamisa, katewe bọu ene něngědo ual᷊ingu piram baụ alasang. Sěngkatau saudari němutusẹ̌ gunang makoạ perintis biasa, katewe i sie mědẹ̌děngụ měnětạ merintis. Badan penatua su sěmbaụ sidang někoạ putusang gunang limembong masau měkoạ kunjungan penggembalaan, katewe pira wul᷊ang bọu ene i sire bědang tawe někoạ ene. Manga situasi ini nẹ̌tatěntang, katewe piạ hal᷊ẹ̌ mẹ̌sul᷊ung. I sire někoạ putusang katewe tawe někoạ apa seng niputusẹ̌. Tau Kristen su Korintus su abad humotong lai nakahombang masalah kerene. Pěmanda apa wotonge kaěndungang i kitẹ bọu i sire.

3. Putusang apa nikoạ u tau Korintus, katewe apa nariadi?

³ Ěndịu taung 55 M, tau Korintus někoạ putusang penting. I sire nakaringihẹ̌ anạu sěmbaụ su Yerusalem dingangu Yudea nasigěsạ lai nasusah, kụ manga sidang wal᷊inẹ něngomol᷊ẹ̌ doitẹ̌ gunang mẹ̌tul᷊ung si sire. Ual᷊ingu mapia dingangu maělugẹ̌, tau Korintus lai mapulu měgělị sumbangan. I sire nẹ̌kiwal᷊o si Paulus kerea i sire botonge mẹ̌tul᷊ung. I Paulus něgělị těgu si sire kụ němile si Titus gunang mẹ̌tul᷊ung měngomol᷊ẹ̌ sumbangan. (1 Kor. 16:1; 2 Kor. 8:6) Katewe, pira wul᷊ang bọu  ene, Paulus nakaringihẹ̌ i sire tawe něngomol᷊ẹ̌ sumbangan kere seng niul᷊ị i sire. Mạeng i sire tawe lighạ měngomol᷊ẹ̌, sumbangan i sire ěndịu tawe masadia su tempone gunang bawaneng sarang Yerusalem sěngkasio dingangu sumbangan bọu manga sidang wal᷊inẹ.​—2 Kor. 9:4, 5.

4. Kere nilahẹ su 2 Korintus 8:7, 10, 11, Paulus němahangsang tau Korintus gunang měkoạ apa?

⁴ Tau Korintus seng někoạ putusang mapaelẹ̌, kụ Paulus nẹ̌dalo si sire ual᷊ingu piạ pangangimang matoghasẹ̌ dingangu maělugẹ̌. Katewe, i sie lai němahangsang si sire gunang měkoạ pakasue apa seng nitětạ i sire. (Basa 2 Korintus 8:7, 10, 11.) Bọu pengalaman i sire, i kitẹ nakaěndung tau Kristen apang masatia lai masigěsạ měkoạ apa seng niputusẹ̌.

5. Kakiwal᷊o apa sarung simbaheng i kitẹ?

⁵ Kere tau Korintus, i kitẹ aramanung masigěsạ měkoạ apa seng niputusẹ̌. Kawe nụe? Ual᷊ingu tawe nasukụ, i kitẹ ěndịu mědẹ̌děngụ. Arau ěndịu piạ barang tawe tẹ̌tiněnang nariadi kụ nakakoạ si kitẹ masigěsạ měkoạ apa seng niputusẹ̌. (Pkh. 9:11; Rm. 7:18) Kerea i kitẹ botonge měkoạ putusang mapaelẹ̌? Mạeng perlu, kerea i kitẹ botonge měmarikěsa putusang seng nikoạ i kitẹ? Kụ kerea tadeạu i kitẹ botonge měkoạ pakasue apa seng nitětạ i kitẹ?

6. Aramanung kange i kitẹ perlu měmal᷊ui putusang i kitẹ?

⁶ Piạ piram baụ putusang penting tawe wal᷊uiang i kitẹ. Contone, i kitẹ seng němutusẹ̌ gunang mẹ̌tahamawu si Yehuwa. I kitẹ lai němutusẹ̌ gunang turusẹ̌ masatia su kawing i kitẹ. (Mat. 16:24; 19:6) Katewe, putusang wal᷊inẹ aramanung harusẹ̌ bal᷊uiang. Kawe nụe? Ual᷊ingu situasi nẹ̌bal᷊ui. Apa makatul᷊ung si kitẹ měkoạ putusang kapaelange?

7. I kitẹ harusẹ̌ mẹ̌doa mẹ̌dorong apa, kụ kawe nụe?

⁷ Pẹ̌doa mẹ̌dorong pelesa. Yehuwa něngahạ si Yakobus gunang měmohẹ, ”Mạeng i kamene perlu limembong lawọ pelesa, turusẹ̌e pẹ̌dorong ene su Mawu, kụ i kamene sarung makaěbạ ene, ual᷊ingu Mawu měgělị mědẹ̌dal᷊embo su kěbị taumata.” (Yak. 1:5) Su piram baụ hal᷊ẹ̌, i kitẹ memang ”perlu limembong lawọ pelesa”. Hakị u ene, pěngumbala si Yehuwa su tempong měkoạ putusang dingangu su tempong měmarikěsa putusang seng nikoạ i kitẹ. Yehuwa sarung mẹ̌tul᷊ung si kau měkoạ putusang nihino.

8. Těntal᷊ang bědang tawe někoạ putusang, apa harusẹ̌ koateng i kitẹ tadeạu makaěbạ informasi?

⁸ Pědeạ informasi pakal᷊awọ. Parikěsa Hengetangu Mawu, pẹ̌basa publikasi bọu organisasi Yehuwa, dingangu pẹ̌bisara su taumata botonge kapěngimangengu. (Amsal 20:18) Měkoạ manga hal᷊ẹ̌ ene penting těntal᷊ang bědang tawe někoạ putusang soal u měmal᷊ui hal᷊ẹ̌, měngal᷊ing sarang tampạ bal᷊inẹ, arau měmile pendidikan makatul᷊ung si kau mědeạ doitẹ̌ dingangu tatapẹ̌ měkoạ kapulung Yehuwa.

9. Apa gunane mạeng i kitẹ jujurẹ̌ su watangeng i kitẹ?

⁹ Parikěsa alasang i kau někoạ putusang. Alasang i kitẹ měkoạ sěmbaụ hal᷊ẹ̌ ene penting si Yehuwa. (Amsal 16:2) I Sie mapulu i kitẹ jujurẹ̌ su haghing hal᷊ẹ̌. Hakị u ene, su tempong měkoạ putusang, i kitẹ lai mapulu jujurẹ̌ su watangeng i kitẹ dingangu su taumata wal᷊inẹ soal u alasang i kitẹ. Mạeng tawe jujurẹ̌, i kitẹ sarung masigěsạ měkoạ apa seng niputusẹ̌. Contone, sěngkatau saudara mangudạ aramanung němutusẹ̌ gunang makoạ perintis biasa. Katewe, tawe nararěna bọu ene, i sie masigěsạ memenuhi jam dinas kụ i sie seng tawe tumanịu mal᷊uasẹ̌ su pelayanan. Aramanung i sie nẹ̌pikirẹ̌ alasang kahumotongange i  sie merintis ene kai gunang makal᷊uasẹ̌ si Yehuwa. Katewe, ěndịu alasang sěběnarẹ̌e i sie merintis ene kai gunang makal᷊uasẹ̌ matimade arau taumata wal᷊inẹ.

10. Apa makatul᷊ung si kitẹ měkoạ pẹ̌bawal᷊ui?

¹⁰ Pẹ̌tiněna situasing sěngkatau měngangěndung Alkitapẹ̌. I sie němutusẹ̌ gunang měngědo měnosọ. Sěngkamisa arau duang kamisa i sie něngědo něnosọ maning ene masigěsạ. Katewe bọu ene i sie saụ něnosọ. Maning kerene, samurine i sie nakakoạ něngědo. Kakěndage si Yehuwa dingangu kapulune gunang makal᷊uasẹ̌ si Yehuwa nakatul᷊ung si sie něngědo něnosọ.​—Kol. 1:10; 3:23.

11. Kawe nụe harusẹ̌ piạ rencana mal᷊ahẹ?

¹¹ Pakal᷊ahẹ rencana koatengu. Mạeng rěncananu mal᷊ahẹ, i kau limembong gampang měkoạ ene. Contone, aramanung i kau němutusẹ̌ gunang mẹ̌basa Alkitapẹ̌ ěllo-ěllo. Katewe, mạeng i kau tawe někoạ jadwalẹ̌ mal᷊ahẹ, aramanung i kau tawe měkoạ apa seng niputusẹ̌ ene. * Arau, manga penatua su sidang němutusẹ̌ gunang limembong masau měkoạ kunjungan penggembalaan, katewe nal᷊iu bọu ene, i sire tawe někoạ apa seng niputusẹ̌. Tadeạu berhasil, i sire harusẹ̌ mẹ̌tiněna manga kakiwal᷊o ini: ”Apa i kami někoạ daftarẹ̌ saudara dingangu saudari sude sarung tiwong? Apa i kami seng něnantu tempone gunang mẹ̌tiwo si sire?”

12. Aramanung, apa harusẹ̌ koateng i kitẹ, kụ kawe nụe?

¹² Masuẹ̌ su akal᷊ẹ̌. I kitẹ tawẹ apa tempo, katatoghasẹ̌, dingangu sumber daya gunang měkoạ kěbị apa ikẹ̌kapulung i kitẹ. Hakị u ene, i kitẹ harusẹ̌ masuẹ̌ su akal᷊ẹ̌. Mạeng perlu, aramanung i kau harusẹ̌ měmal᷊ui sěmbaụ putusang ual᷊ingu nasadarẹ̌ i kau tawe makakoạ ene sarang masue. (Pkh. 3:6) Maning kerene, aramanung i kau seng bọu němarikěsa putusang nikoạu, němal᷊ui ene, kụ nẹ̌pěndang i kau seng makakoạ ene. Apa makatul᷊ung si kau měkoạ pakasue apa seng nitětạu? Pẹ̌tiněna lima hal᷊ẹ̌ ini.

13. Kerea tadeạu i kau makaěbạ katatoghasẹ̌ gunang měkoạ apa seng niputusẹ̌?

¹³ Pẹ̌doa mẹ̌dorong katatoghasẹ̌. Mawu botonge měgělị si kau ”katatoghasẹ̌ gunang měkoạ” apa seng niputusẹ̌. (Flp. 2:13) Hakị u ene, pẹ̌dorong rohkẹ̌ masusi si Yehuwa tadeạu si kau piạ katatoghasẹ̌. Turusẹ̌ pẹ̌doa maning kakělaěng dorongu bědang tawe nisimbaheng. Kere niul᷊ị i Yesus, ”Turusẹ̌e pẹ̌dorong, kụ [rohkẹ̌ masusi] sarung gělịkang si kamene.”​—Luk. 11:9, 13.

14. Kerea prinsipẹ̌ su Amsal 21:5 makatul᷊ung si kau měkoạ apa seng niputusẹ̌?

¹⁴ Pěkoạ rencana. (Basa Amsal 21:5.) Gunang měkoạ pakasue apa seng nitětạu, i kau perlu měkoạ rencana. Bọu ene, i kau harusẹ̌ tumol᷊e rencana ene. Kerene lai, mạeng měkoạ putusang, pěkoạ daftarẹ̌ mal᷊ahẹ soal u haghing hal᷊ẹ̌ sarung koatengu tadeạu putusang ene makoạ. Mạeng piạ hal᷊ẹ̌ masigěsạ koatengu sarang pakasue, pahiạ ene makoạ piram baụ hal᷊ẹ̌ sederhana. Sabang i kau nakakoạ sěmbaụ hal᷊ẹ̌ sederhana, i kau sarung makasilo kerea kal᷊awọe seng nikoạu. Paulus němahangsang tau Korintus gunang měhae doitu sumbangan ”su ěllo humotong sabang misa” sul᷊ungu měngampal᷊ẹ̌ kụ měngomol᷊ẹ̌ ene su tempong i sie masongo. (1 Kor. 16:2) Měmahiạ hal᷊ẹ̌ gěguwạ makoạ hal᷊ẹ̌ dararodọ lai makatul᷊ung si kau tawe mẹ̌pěndang tawe makamampo.

15. Su apang bọu někoạ rencana, apa lai harusẹ̌ koateng?

 ¹⁵ Mạeng i kau měmohẹ rěncananu, i kau limembong gampang měkoạ ene. (1 Kor. 14:40) Contone, badan penatua nioro pěmile sěngkatau penatua gunang měmohẹ kěbị putusangu badan penatua, i sai měkoạ tugasẹ̌ ene, dingangu kange tugasẹ̌ ene harusẹ̌ masueng koạe. Mạeng penatua měkoạ daftarẹ̌ kerene, i sire limembong gampang měkoạ apa seng niputusẹ̌. (1 Kor. 9:26) I kau lai botonge měkoạ hal᷊ẹ̌ mẹ̌sul᷊ung soal u apa koatengu sabang ěllo. Contone, i kau botonge měkoạ daftarẹ̌ apa sarung koatengu sabang ěllo, kụ hal᷊ẹ̌ humotong koateng bohẹ su bageang kahumotongange. Mạeng měkoạ ene, i kau limembong gampang měkoạ pakasue apa seng nitětạu kụ i kau lai sarung makakoạ limembong lawọ hal᷊ẹ̌.

16. Gunang měkoạ apa seng niputusẹ̌, apa lai harusẹ̌ koateng i kitẹ? Kụ kerea Roma 12:11 napakal᷊ahẹ hal᷊ẹ̌ ini?

¹⁶ Pẹ̌tawakal᷊ịe. I kau harusẹ̌ mẹ̌tawakal᷊i tumol᷊e rěncananu dingangu měkoạ pakasue apa seng nitětạu. (Basa Roma 12:11.) Paulus něngoro si Timotius gunang ”turusẹ̌” dingangu ”tatapẹ̌” pẹ̌tawakal᷊i makoạ guru mapaelẹ̌. Sasasa ene botonge mapakẹ su cita-cita rohani wal᷊inẹ.​—1 Tim. 4:13, 16.

17. Su tempong měkoạ apa seng niputusẹ̌, kerea i kitẹ botonge tumol᷊e sasasa su Efesus 5:15, 16?

¹⁷ Atorẹ̌ temponu pakapia. (Basa Efesus 5:15, 16.) Atorẹ̌ temponu gunang měkoạ apa seng niputusẹ̌, kụ abe wal᷊ui tempo ene. Abe měngampal᷊ẹ̌ tempo nẹ̌tatahino, ual᷊ingu ěndịu tawẹ apa tempo kerene. (Pkh. 11:4) Pakaingatẹ̌, abe wala hal᷊ẹ̌ tawe tumanịu penting makasue tempo dingangu katatoghasẹ̌ botonge paketangu gunang hal᷊ẹ̌ limembong penting. (Flp. 1:10) Mạeng botonge, pěmile tempo su tempong taumata wal᷊inẹ tawe makasahaghe si kau. Paul᷊ị su taumata wal᷊inẹ i kau mapulu fokus. Pate HP kụ hědo buka e-mail arau media sosial su tempo wal᷊inẹ. *

18-19. Maning piạ barang makasahaghe, apa makatul᷊ung si kau tatapẹ̌ měkoạ pakasue apa seng niputusẹ̌?

¹⁸ Turusẹ̌ pẹ̌tahěndung hasile. Hasilu putusangu ene mẹ̌sul᷊ungu tampạ tẹ̌timonangu. Mạeng mapulu mahumpạ su tampạ tẹ̌timonang, i kau harusẹ̌ turusẹ̌ dumal᷊eng maning dal᷊eng nitutu kụ i kau harusẹ̌ lumiu ral᷊eng wal᷊inẹ. Kerene lai, mạeng turusẹ̌ mẹ̌tahěndung hasilu putusang, i kitẹ tawe lighạ měngědo su tempong piạ barang makasahaghe.​—Gal. 6:9.

¹⁹ Měkoạ putusang mapaelẹ̌ dingangu měkoạ apa seng niputusẹ̌ ene tawe gampang. Katewe, Yehuwa botonge měkoạ si kau mapelesa dingangu matoghasẹ̌ gunang měkoạ pakasue apa seng nitětạu.