SĚNGKATAU petugas prakiraan cuaca měmẹ̌manda gambarẹ̌ su satelit. I sie nakasilo badai gěguwạ seng kakạranine sarang tampạ piạ lawọ penduduk. Ual᷊ingu i sie mapulu taumata masal᷊amatẹ̌, i sie mětẹ̌tawakal᷊i měgělị laingatẹ̌ su taumata těntal᷊ang bědang piạ tempo.

Kerene lai, orasẹ̌ ini Yehuwa měgẹ̌gělị laingatẹ̌ su taumata soal u sěmbaụ ”badai” limembong makawahaya sul᷊ungu haghing badai nikaringihang i kitẹ su prakiraan cuaca. Kerea Yehuwa někoạ ene? Kụ, kawe nụe i kitẹ mangimang Yehuwa něgělị tempo su taumata gunang tumuhụ laingatẹ̌ ene? Gunang makasingkạ sasimbahe, humotong mahịe i kitẹ měmanda laingatẹ̌ nighělị i Yehuwa su tempong tamai.

Su zaman Alkitapẹ̌, Yehuwa měgẹ̌gělị laingatẹ̌ kal᷊imona těntal᷊ang haghing ”badai”, arau penghakiman, bědang tawe diměnta su taumata apang tawe tụtuhụ si Sie. (Amsal 10:25; Yer. 30:23) Sabang měgělị penghakiman, Yehuwa měgělị tempo su taumata gunang mẹ̌bal᷊ui dingangu tumuhụ si Sie. (2 Raj. 17:12-15; Neh. 9:29, 30) Tadeạu i sire mapulu mẹ̌bal᷊ui, Yehuwa masau měpakẹ manga ělang’E su dunia gunang měmohang penghakiman bọu i Sie dingangu mẹ̌tul᷊ung si sire makaěna i sire harusẹ̌ lighạ mẹ̌bal᷊ui.​—Am. 3:7.

Nuh kai sěngkatau esẹ nipakẹ i Yehuwa gunang měmohang penghakiman bọu i Sie. Taumata su zaman i Nuh sěbạe amoral dingangu dal᷊akị. Taunge i Nuh bahani měgẹ̌gělị laingatẹ̌ si sire soal u Lěba Maihạ sarung mariadi su patikụ dunia. (Kej. 6:9-13, 17) I sie lai naul᷊ị apa harusẹ̌ koateng i sire tadeạu masal᷊amatẹ̌. Ual᷊ingu i Nuh turusẹ̌ mělẹ̌habarẹ̌ laingatẹ̌ ene, Alkitapẹ̌ nẹ̌sěbạ i sie kai ”mělahabarẹ̌ katěngadẹ̌”.​—2 Ptr. 2:5.

Maning i Nuh seng nẹ̌tawakal᷊i, taumata tawe dimaringihẹ̌ laingatẹ̌ bọu Mawu. Ene něnodẹ i sire tawe mangimang. Tětal᷊e, ”Lěba Maihạ narěnta kụ něminasa si sire kěbị”. (Mat. 24:39; Ibr. 11:7) Su tempo ene nariadi, i sire tawe wotonge maul᷊ị Mawu nẹ̌sal᷊a arau měnoke i Sie tawe něgělị laingatẹ̌ kal᷊imona si sire.

Pẹ̌sěngsul᷊ẹ, Yehuwa něgělị laingatẹ̌ su taumata maraning ”badai” penghakiman duměnta. Maning kerene, i Sie tatapẹ̌ něgělị tempo su taumata gunang tumuhụ laingat’E. Contone, su tempong Yehuwa napakarěntang Mapul᷊o Tulah su Misirẹ̌, Yehuwa sěntiniạ měgẹ̌gělị laingatẹ̌. Sěmbaụ contone, Yehuwa něndolohẹ̌ si Musa dingangi Harun gunang měgělị laingatẹ̌ si Firaun dingangu su manga pějabate soal u tulah kapitune, ene kai tahiti eisẹ̌ sěbạe makarusa. Ual᷊ingu tahiti eisẹ̌ ene sarung mariadi dịěllone, apa Mawu něgělị tempo si sire gunang mědeạ tampạ pẹ̌kakělungang? Alkitapẹ̌ naul᷊ị, ”Manga pejabat i Firaun apang matakụ si Yehuwa masahawụ-sahawụ něnuẹ̌ kěbị ělang dingangu manga binatang i sire su tampạ aman. Katewe, i sire apang tawe rimaringihẹ̌ bawerang i Yehuwa němala manga ělang dingangu binatang i sire su likude.” (Kel. 9:18-21) Nal᷊ahẹ, Yehuwa něgělị tempo hakị u ene taumata apang masahawụ timuhụ si Sie tawe narugi mal᷊awọ ual᷊ingu tulah ene.

Mawu lai něgělị laingatẹ̌ si Firaun dingangu su manga pějabate těntal᷊ang tulah kapul᷊one bědang tawe nariadi. Katewe, i sire tawe rimaringihẹ̌ laingatẹ̌ ene. (Kel. 4:22, 23) Tětal᷊e, anạ i sire esẹ kaiakanenge nate. Ene sěbạe nakasusah naung! (Kel. 11:4-10; 12:29) Apa i sire sěběnarẹ̌e piạ tempo gunang tumuhụ laingatẹ̌ ene?  Iya! Musa masahawụ něgělị laingatẹ̌ su tau Israel soal u tulah kapul᷊one dingangu něhabarẹ̌ apa harusẹ̌ koateng tadeạu kěluargang i sire masal᷊amatẹ̌. (Kel. 12:21-28) Ual᷊ingu timuhụ si Yehuwa, tělu juta arau nal᷊iu taumata nasal᷊amatẹ̌ kụ něněntang Misirẹ̌. I sire ene kai tau Israel, ”taumata bọu haghing bangsa”, dingangu tau Misirẹ̌.​—Kel. 12:38; catatan kaki.

Manga contoh ini něnodẹ Yehuwa sěntiniạ měgẹ̌gělị tempo su taumata gunang tumuhụ laingat’E. (Ul. 32:4) Kawe nụe? Rasul Petrus nělahẹ Yehuwa ”madiri sarang sěngkatau mawinasa”. Katewe, i Sie ”mapulu kěbị mẹ̌tobatẹ̌”. (2 Ptr. 3:9) Nal᷊ahẹ, Yehuwa mapadul᷊i su taumata. I Sie mapulu i sire mẹ̌tobatẹ̌ dingangu mẹ̌bal᷊ui těntal᷊ang ěllong penghakiman bědang tawe diměnta.​—Yes. 48:17, 18; Rm. 2:4.

Orasẹ̌ ini lai, kěbị taumata harusẹ̌ tumuhụ laingatẹ̌ penting lẹ̌habareng su patikụ dunia. Su tempong Yesus ene su dunia, i sie něgělị laingatẹ̌ dunia orasẹ̌ ini sarung binasang su kanandụu ”kasasusah masaria”. (Mat. 24:21) Yesus něhabarẹ̌ sarang hal᷊ẹ̌ kakadodọkange soal u apa sarung kasilong dingangu kahombangengu manga tumatol᷊ene su tempong pěngěngsuengu dunia seng kakạranine. Orasẹ̌ ini, i kitẹ nakasilo apa nitěbal᷊i Yesus seng nariadi su patikụ dunia.​—Mat. 24:3-12; Luk. 21:10-13.

Kere těbal᷊i Yesus ene, orasẹ̌ ini Yehuwa měmẹ̌mahangsang taumata gunang mẹ̌tahamawu dingangu tumuhụ si Sie. Yehuwa mapulu taumata apang matuhụ si Sie makaěbạ pěbawiahẹ̌ limembong mapia orasẹ̌ ini dingangu lawọ al᷊amatẹ̌ su dunia wuhu. (2 Ptr. 3:13) Tadeạu taumata mangimang su dianding Yehuwa dingangu ipakasal᷊amatẹ̌, Yehuwa něhabarẹ̌ ’habarẹ̌ mapia soal u Kararatuangu [Mawu]’. Kere seng nitěbal᷊i Yesus, habarẹ̌ mapia ini seng ’lẹ̌habareng su patikụ dunia gunang makoạ kesaksian su kěbị bangsa’. (Mat. 24:14) Mawu seng něngatorẹ̌ tadeạu umat’E měgělị ”kesaksian”, arau měhabarẹ̌ habarẹ̌ ini, kụ ini kẹ̌koateng su ěndịu 240 negeri. Yehuwa mapulu lawọ taumata tumuhụ laingatẹ̌ ene kụ masal᷊amatẹ̌ bọu ”badai” penghakiman maadilẹ̌ seng mal᷊ighạ duměnta.​—Zef. 1:14, 15; 2:2, 3.

Nal᷊ahẹ, tumuhụ manga bukti, Yehuwa sěntiniạ měgẹ̌gělị tempo su taumata gunang tumuhụ laingat’E. Katewe orasẹ̌ ini, piạ sěmbaụ kakiwal᷊o penting: Apa taumata sarung tumuhụ laingatẹ̌ bọu Mawu těntal᷊ang bědang piạ tempo? Karimạko i kitẹ, apang mělẹ̌habarẹ̌ habarẹ̌ bọu Mawu, turusẹ̌ mẹ̌tul᷊ung lawọ taumata tadeạu masal᷊amatẹ̌ bọu pěngěngsuengu dunia ini.