1-2. (a) Apa seng tawẹ kararěngụe bohangengu manga wangsa? (b) Manga kakiwal᷊o apa sarung simbaheng i kitẹ?

KĚNANG pẹ̌tiněna hal᷊ẹ̌ ini. Bohang ”dame dingangu aman” buhudeng niwohangu manga wangsa, kere seng nitěbal᷊ẹ̌. I sire ěndịu naul᷊ị dunia ini seng sěbạe aman. Manga wangsa mapulu i kitẹ mẹ̌tiněna i sire seng nakailang kěbị masalah su dunia ini. Katewe, i sire tawe makaědo apa sarung mariadi tuhụe! Kawe nụe? Tumuhụ těbal᷊u Alkitapẹ̌, ”sěngkělěndịu kawawinasa ene duměnta su ral᷊ungu sěngkakondạ . . . kụ i sire tawe makatal᷊ang”.​—1 Tes. 5:3.

² Piạ kakiwal᷊o penting harusẹ̌ simbaheng i kitẹ: Apa sarung mariadi su kanandụu ”kasasusah masaria”? Su tempo ene, Yehuwa mapulu i kitẹ měkoạ apa? Kụ kerea i kitẹ mẹ̌sasadia měnětạ orasẹ̌ ini tadeạu tatapẹ̌ masatia su kanandụu kasasusah masaria?​—Mat. 24:21.

3. Tumuhụ Wahyu 17:5, 15-18, kerea Mawu měminasa ”Babelẹ̌ Gěguwạ”?

³ Basa Wahyu 17:5, 15-18. ”Babelẹ̌ Gěguwạ” sarung mawinasa! Kerea ene mariadi? ’Mawu sarung mẹ̌taho su naung i sire kapulu gunang měkoạ kapulu-Ne.’ Apa kapulung Mawu? Mawu mapulu měminasa kěbị agama palsu su patikụ dunia, sarang lai agama měngẹ̌ngaku Kristen. Mawu sarung mẹ̌taho kapulu-Ne ini su naungu ”mapul᷊o sunge” bọu ”binatang buas mahamụ”. Mapul᷊o sunge ene kai kěbị pěměrenta apang mendukung ”binatang buas” arau Perserikatan Bangsa-Bangsa. (Why. 17:3, 11-13; 18:8) Su tempong měngangawasa politikẹ̌ měminasa agama palsu, ene nakoạ  tatiala kasasusah masaria seng něnětạ. Ene makoạ peristiwa makạhěkosẹ̌ dingangu makạtatakụ gunang kěbị taumata su dunia.

4. (a) Aramanung apa sarung ul᷊ịkangu manga wangsa gunang mělahẹ kawe nụe i sire měminasa Babelẹ̌ Gěguwạ? (b) Ěndịu apa sarung koateng i sire apang bọu nakoạ bageang bọu agama palsu?

⁴ I kitẹ běga apa sarung ul᷊ịkangu manga wangsa gunang mělahẹ alasang i sire měminasa Babelẹ̌ Gěguwạ. I sire aramanung maul᷊ị manga agama su dunia měnẹ̌nahaghe manga wangsa mapakarěntang pẹ̌darame kụ i sire lai lụlaụ urusangu politikẹ̌. Arau i sire ěndịu maul᷊ị manga agama ene seng něnampung tumanịu lawọ arětạ dingangu kakakalạ. (Why. 18:3, 7) Su tempong manga wangsa měminasa Babelẹ̌ Gěguwạ, ěndịu i sire tawe měminasa anggotane katewe měminasa kěbị agamane. Su tempong manga agama ene seng nawinasa, anggotane sarung masadarẹ̌ manga těmbonangu agamang i sire tawe někoạ apa seng niriandi si sire. Hakị u ene, ěndịu i sire tawe měngakụ i sire bọu nakoạ bageangu agama ene.

5. Apa nirianding Yehuwa soal u kasasusah masaria, kụ kawe nụe?

⁵ Alkitapẹ̌ tawe něnodẹ kerea karěngụe Babelẹ̌ Gěguwạ binasang. Katewe, i kitẹ masingkạ ene tawe tumanịu marěngụ. (Why. 18:10, 21) Yehuwa seng nẹ̌diandi sarung ’mapakanibụ tempong’ kasasusah masaria tadeạu ”taumata apang nipile-Ne” dingangu agama nihino tawe mawinasa. (Mrk. 13:19, 20) Su tětạu kasasusah masaria sarang sekẹ Armagedon mariadi, Yehuwa mapulu i kitẹ měkoạ apa?

6. Selain tawe makoạ bageang bọu agama palsu, apa lai harusẹ̌ koateng i kitẹ?

⁶ Kere seng niěndungang i kitẹ su pěngangěndungang kal᷊imona, Yehuwa mapulu umat’E mẹ̌těngkarau bọu Babelẹ̌ Gěguwạ. Katewe, tawe makoạ bageang bọu agama palsu ene bědang kurang. I kitẹ harusẹ̌ turusẹ̌ mẹ̌tahamawu si Yehuwa. Pẹ̌tiněna darua cara měkoạ ene.

7. (a) Kerea i kitẹ turusẹ̌ tumol᷊e standar moral i Yehuwa? (b) Tumuhụ Ibrani 10:24, 25, kawe nụe měngibadah ene penting, něngělembo orasẹ̌ ini?

⁷ Humotong, i kitẹ harusẹ̌ tumol᷊e  standar moral i Yehuwa. I kitẹ tawe wotonge měnarimạ standar moral dunia ini. Contone, i kitẹ tawe setuju su kakanoạ amoral, kere pẹ̌kakawing sesama jenis arau kakanoạ homoseksual wal᷊inẹ. (Mat. 19:4, 5; Rm. 1:26, 27) Karuane, i kitẹ harusẹ̌ turusẹ̌ měngibadah dingangu anạu sěmbaụ, tawẹ soale su Banalang Kararatuang, su wal᷊e, arau lai su tampạ tawe kasingkatengu taumata wal᷊inẹ. Maning apa mariadi, i kitẹ tawe měngědo měngibadah. Sěběnarẹ̌e, i kitẹ harusẹ̌ měngibadah ”limembong marading ual᷊ingu [i kitẹ] nakasilo ěllo ene seng kakạranine”.​—Basa Ibrani 10:24, 25.

8. Kerea habarẹ̌ habareng i kitẹ aramanung sarung mẹ̌bal᷊ui su tempo mahi?

⁸ Su kanandụu kasasusah masaria, habarẹ̌ habareng i kitẹ aramanung sarung mẹ̌bal᷊ui. Orasẹ̌ ini, i kitẹ bědang mělẹ̌habarẹ̌ habarẹ̌ mapia bọu Kararatuang dingangu mětẹ̌tawakal᷊i měkoạ muritẹ̌. Katewe su tempo ene, i kitẹ ěndịu sarung měhabarẹ̌ habarẹ̌ sěbạe těgasẹ̌ mẹ̌sul᷊ungu tahiting eisẹ̌ gaghaghuwạ. (Why. 16:21) I kitẹ aramanung měhabarẹ̌ seng mal᷊ighạ duniang Setang kahěngang-hěngang binasaěng. Su tempone, i kitẹ sarung makasingkạ apa habareng i kitẹ dingangu carane měhabarẹ̌ ene. Apa i kitẹ sarung měpakẹ cara měhabarẹ̌ kere kẹ̌koateng i kitẹ nal᷊iu wọu mahasụ su taunge ini? Arau apa i kitẹ sarung měpakẹ cara wal᷊inẹ? I kitẹ harusẹ̌ měngampal᷊ẹ̌. Tawẹ soale cara apa sarung paketang, kakělaěng i kitẹ sarung makaěbạ kehormatan gunang měhabarẹ̌ hukumang bọu Yehuwa!​—Yeh. 2:3-5.

9. Kakělaěng, kerea reaksing manga wangsa su habarẹ̌ habareng i kitẹ, katewe i kitẹ mangimang apa?

⁹ Kakělaěng, habarẹ̌ habareng i kitẹ sarung makakoạ manga wangsa mẹ̌sěding si kitẹ měhabarẹ̌ sarang karěngụe. Hakị u ene, i kitẹ harusẹ̌ sěntiniạ měngumbala si Yehuwa, kere seng kẹ̌koateng i kitẹ orasẹ̌ ini. I kitẹ botonge mangimang Mawu sarung měgělị si kitẹ katatoghasẹ̌ gunang měkoạ kapulu-Ne.​—Mi. 3:8.

10. Kere nitěbal᷊ẹ̌ su Lukas 21:25-28, kerea reaksing taumata su kanandụu kasasusah masaria?

¹⁰ Basa Lukas 21:25-28. Su kanandụu kasasusah masaria, taumata sarung huměkosẹ̌ su tempong makasilo kěbị apang kakělaěng stabil su dunia ini seng nawinasa. I sire sarung makapěndang ”sigěsạ” dingangu matakụ pateng, ual᷊ingu ene kai tempo karěndungange su kanandụu sějarang taumata. (Zef. 1:14, 15) Su tempo ene, pěbawiahẹ̌ sarung limembong masigěsạ, kụ manga ělang i Yehuwa lai makapěndang ene. Ual᷊ingu i kitẹ bal᷊inẹ bageang bọu dunia ini, i kitẹ aramanung sarung makapěndang haghing sigěsạ. Ěndịu piram baụ kebutuhan dasari kitẹ tawẹ apa su tempo ene.

11. (a) Kawe nụe Sahiding Yehuwa sarung makoạ pusat perhatian? (b) Kawe nụe i kitẹ tawe harusẹ̌ matakụ su tempong kasasusah masaria?

¹¹ Samurine, taumata apang agamane seng niwinasa sarung sěbạe mẹ̌pědu ual᷊ingu agama Sahiding Yehuwa bědang tawe niwinasa. I sire sarung mapakal᷊ahẹ pědung i sire, ěndịu bọu media sosial. Manga wangsa dingangu měngangawasang i sire, Setang, sarung mawěngsing si kitẹ ual᷊ingu kětạeng agamang i kitẹ tawe niwinasa. I sire bědang tawe nakawinasa kěbị agama su dunia. Hakị u ene, i kitẹ sarung makoạ pusat perhatian. Su tempo ene, manga wangsa sarung makoạ Gog bọu Magog. * I sire sarung masěmbaụ kụ měnekẹ manga  ělang i Yehuwa dingangu kěbị katatoghasi sire. (Yeh. 38:2, 14-16) I kitẹ aramanung matakụ mạeng mẹ̌tiněna soal u apa sarung mariadi su kanandụu kasasusah masaria, něngělembo ual᷊ingu i kitẹ běga apa sarung mariadi. Katewe, i kitẹ botonge mangimang i kitẹ tawe harusẹ̌ matakụ. Yehuwa sarung měgělị manga laahạ makasal᷊amatẹ̌ si kitẹ. (Mz. 34:19) I kitẹ sarung ’dumarisị matei dingangu dumal᷊ingara’, ual᷊ingu masingkạ ’kawawebasi [kitẹ] seng marani’. *

12. Kerea ”ělang masatia dingangu matahuěna” nẹ̌tul᷊ung si kitẹ tadeạu sadia tumatěngo apa sarung mariadi su tempo mahi?

¹² ”Ělang masatia dingangu matahuěna” seng nẹ̌tul᷊ung si kitẹ tadeạu botonge tatapẹ̌ masatia su kanandụu kasasusah masaria. (Mat. 24:45) I sire něpakẹ lawọ cara, sěmbaụ contone ute kebaktian regional taung 2016-2018. Kěbị nasẹ̌ su kebaktian ene němahangsang si kitẹ tadeạu piạ sipatẹ̌ makatul᷊ung si kitẹ tatapẹ̌ masatia su tempong ěllong Yehuwa seng kakạranine. Mahịe i kitẹ měngěndung manga sipatẹ̌ ene.

13. Kerea carane měnoghasẹ̌ kasasatiang i kitẹ si Yehuwa, kụ kawe nụe harusẹ̌ měkoạ ene měnětạ orasẹ̌ ini?

¹³ Kasasatia: Tema kebaktian regional taung 2016 kai ”Tatapẹ̌ e Pakasatia si Yehuwa!” Kebaktian ini něněntiro mạeng pẹ̌dal᷊ahapị i kitẹ dingangi Yehuwa matoghasẹ̌, i kitẹ sarung masatia si Sie. I kitẹ lai nitěntiro i kitẹ botonge marani dingangi Yehuwa mạeng mẹ̌doa dingangu kaguwạu naung lai marading měngěndung Hengetang’E. Měkoạ manga hal᷊ẹ̌ ene sarung makatoghasẹ̌ si kitẹ tumatěngo haghing sasal᷊ukạ. Ual᷊ingu kasasusah masaria kakạranine, sarung piạ lawọ kasasigěsạ makasal᷊ukạ kasasatiang i kitẹ su Mawu dingangu Kararatuang’E. I kitẹ lai aramanung sauneng heghesang. (2 Ptr. 3:3, 4) Sěmbaụ alasang kahumotongange ute ual᷊ingu i kitẹ tawe nakoạ bageang bọu duniang Setang. I kitẹ harusẹ̌ měnoghasẹ̌ kasasatia měnětạ orasẹ̌ ini tadeạu i kitẹ tatapẹ̌ masatia su kanandụu kasasusah masaria.

14. (a) Pẹ̌bawal᷊ui apa sarung mariadi su saudara-saudara apang měngẹ̌ngahạ manga ělang i Yehuwa su dunia? (b) Kawe nụe i kitẹ harusẹ̌ masatia su tempo ene?

¹⁴ Su kanandụu kasasusah masaria, sarung piạ pẹ̌bawal᷊ui su saudara-saudara apang měngẹ̌ngahạ manga ělang i Yehuwa su dunia. Su tempone, kěbị apang nilanisẹ̌ kụ bědang ene su dunia sarung komol᷊ang sarang sorga gunang mẹ̌sekẹ su Armagedon. (Mat. 24:31; Why. 2:26, 27) Ini mangal᷊ene Badan Pimpinan seng tawe dingangi kitẹ su dunia. Katewe, komol᷊ang gěguwạ sarung tatapẹ̌ lẹ̌ahạkeng. Saudara-saudara bọu domba wal᷊inẹ apang memenuhi syarat sarung měngahạ manga ělang i Yehuwa. I kitẹ měnodẹ kasasatia si Yehuwa su tempong i kitẹ tumuhụ su saudara-saudara ini dingangu tumol᷊e laahạ nitarimạ i sire bọu Mawu. I kitẹ harusẹ̌ tumol᷊e laahạ i sire mạeng mapulu masal᷊amatẹ̌!

15. Apa harusẹ̌ koateng i kitẹ tadeạu turusẹ̌ mẹ̌tatahang, kụ kawe nụe měkoạ ene měnětạ orasẹ̌ ini?

¹⁵ Pakatatahang: Tema kebaktian regional taung 2017 kai ”Jangan Menyerah!” Kebaktian ini nakatoghasẹ̌ kapulung i kitẹ gunang mẹ̌tatahang su tempong piạ sasal᷊ukạ. I kitẹ lai něngěndung mạeng i kitẹ kahěngang-hěngang měngumbala si Yehuwa,  i kitẹ botonge mẹ̌tatahang tawẹ soale kerea situasing i kitẹ. (Rm. 12:12) Karimạko i kitẹ tawe miwul᷊e dianding Yesus ini: ”I saing mẹ̌tatahang sarang pěngěngsuenge sarung ipakasal᷊amatẹ̌.” (Mat. 24:13) Diandi ini něnodẹ i kitẹ harusẹ̌ tatapẹ̌ masatia maning tụtatěngo lawọ kasasigěsạ. Mạeng mẹ̌tatahang su tempong piạ sigěsạ orasẹ̌ ini, pangangimang i kitẹ sauneng matoghasẹ̌ těntal᷊ang kasasusah masaria bědang tawe něnětạ.

16. Apa makakoạ si kitẹ bahani, kụ kerea tadeạu i kitẹ limembong mawahani?

¹⁶ Kawawahani: Tema kebaktian regional taung 2018 kai ”Jadilah Berani”! Kebaktian ini něněntiro i kitẹ mawahani bal᷊inẹ ual᷊ingu katatoghasi kitẹ. I kitẹ botonge mẹ̌tatahang ual᷊ingu měngumbala si Yehuwa, kerene lai i kitẹ botonge mawahani mạeng měngumbala si Yehuwa. Kerea tadeạu i kitẹ limembong měngumbala si Yehuwa? Carane ute mẹ̌basa Hengetang’E ěllo-ěllo dingangu mẹ̌tiněna kerea Yehuwa něnal᷊amatẹ̌ manga ělang’E su tempong tamai. (Mz. 68:20; 2 Ptr. 2:9) Su tempong manga wangsa měnekẹ si kitẹ su kasasusah masaria, i kitẹ harusẹ̌ limembong bahani dingangu mangimang si Yehuwa. (Mz. 112:7, 8; Ibr. 13:6) Mạeng měngumbala si Yehuwa orasẹ̌ ini, i kitẹ sarung bahani su tempong Gog dumokạ si kitẹ. *

17. Kawe nụe i kitẹ tawe harusẹ̌ matakụ su tempong Armagedon mariadi? (Pěmanda gambar sampul.)

¹⁷ Kere nisěbạ su pěngangěndungang kal᷊imona, kal᷊awokange bọu i kitẹ nalahirẹ̌ su ěllo pěngěngsuenge. Katewe, i kitẹ lai piạ pělaharapẹ̌ masal᷊amatẹ̌ bọu kasasusah masaria. Sekẹ Armagedon sarung makoạ pěngěngsuengu ěllo pěngěngsuenge. Katewe, i kitẹ tawe harusẹ̌ matakụ. Kawe nụe? Ual᷊ingu Yehuwa sarung mẹ̌sekẹ gunang i kitẹ. (Amsal 1:33; Yeh. 38:18-20; Za. 14:3) Su tempong Yehuwa měgělị parenta, Yesus Kristus sarung měngahạ pasukan sorga sarang pẹ̌seketang. Tau Kristen apang nilanisẹ̌ dingangu sěbạe lawọ malaekatẹ̌ sarung duměndingang si Yesus. I sire sarung lumawang Setang, manga rohkẹ̌ dal᷊akị, dingangu  manga tentara su dunia.​—Dan. 12:1; Why. 6:2; 17:14.

18. (a) Apa jaminan bọu i Yehuwa? (b) Kerea Wahyu 7:9, 13-17 makakoạ si kitẹ mangimang su tempo mahi i kitẹ sarung masal᷊amatẹ̌?

¹⁸ Yehuwa seng něgělị jaminan, ”Maning senjata apa nikoạ gunang mělawang si kau, ene makoạ tawẹ gunane.” (Yes. 54:17) ”Komol᷊ang gěguwạ” ělang i Yehuwa masatia sarung ’masal᷊amatẹ̌ lumiu kasasusah masaria’! Bọu ene, i sire sarung turusẹ̌ mẹ̌tahamawu si Sie. (Basa Wahyu 7:9, 13-17.) Alkitapẹ̌ něgělị lawọ alasang makakoạ si kitẹ mangimang su tempo mahi i kitẹ sarung masal᷊amatẹ̌! I kitẹ masingkạ ”Yehuwa měnděndiagạ taumata apang masatia”. (Mz. 31:23) Kěbị apang makěndagẹ̌ dingangu mědẹ̌dalo si Yehuwa sarung mal᷊uasẹ̌ su tempong areng i Yehuwa masusi seng nipakawurěsi.​—Yeh. 38:23.

19. Pělaharapẹ̌ sěbạe makạlaherang apa seng mal᷊ighạ kaěbakeng i kitẹ?

¹⁹ Kěnang pẹ̌tiněna kerea lohong 2 Timotius 3:2-5 mạeng ayatẹ̌ ene mělahẹ soal u taumata su dunia wuhu, kụ seng nawebasẹ̌ bọu pěngarung Setang. (Pěmanda kotak ” Kakanoạu Taumata su Dunia Wuhu”.) Saudara George Gangas, * kangerẹ bọu nakoạ anggota Badan Pimpinan, naul᷊ị, ”Dunia sarung makoạ tampạ sěbạe mapae-paelẹ̌ su tempong kěbị taumata maněmbah si Yehuwa! Seng mal᷊ighạ i kau sarung makaěbạ kesempatan istimewa gunang měbiahẹ̌ su dunia wuhu. I kau sarung měbiahẹ̌ su kanandụu Yehuwa biahẹ̌. I kitẹ sarung měbiahẹ̌ sarang karěngụe.” Ene kai pělaharapẹ̌ sěbạe makạlaherang!