1. Kawe nụe kětạeng si Yehuwa i kitẹ mẹ̌tahamawu?

YEHUWA kai Měndariadi dingangu Mẹ̌gaghělị Pěbawiahẹ̌. Hakị u ene, i kitẹ mẹ̌tahamawu kětạeng si Sie. (Why. 4:11) Katewe, piạ sasal᷊ukạ tẹ̌tatěngong i kitẹ. Maning i kitẹ makěndagẹ̌ dingangu měngẹ̌ngadatẹ̌ si Yehuwa, manga hal᷊ẹ̌ wal᷊inẹ botonge makoạ sěbạe penting su pěbawiahẹ̌. Mạeng ene nariadi, i kitẹ seng tawe kuměndagẹ̌ lai mẹ̌tahamawu si Yehuwa dingangu kaguwạu naung. I kitẹ harusẹ̌ masingkạ kerea hal᷊ẹ̌ kerene botonge mariadi. Katewe humotong, mahịe i kitẹ měngěndung apa mangal᷊ene mẹ̌tahamawu kětạeng si Yehuwa.

2. Tumuhụ Keluaran 34:14, apa sarung koateng i kitẹ mạeng i kitẹ mẹ̌tahamawu kětạeng si Yehuwa?

² Su Alkitapẹ̌, mẹ̌tahamawu si Yehuwa mangal᷊ene kahěngang-hěngang kuměndagẹ̌ si Sie. Mạeng i kitẹ mẹ̌tahamawu kětạeng si Yehuwa, i kitẹ sarung měngibadah kětạeng si Sie. I kitẹ tawe měmala maning apa arau maning i sai makaghanti tampạ i Yehuwa su ral᷊ungu naung i kitẹ.​—Basa Keluaran 34:14.

3. Kawe nụe i kitẹ nẹ̌tahamawu si Yehuwa?

³ Si kitẹ piạ lawọ alasang matoghasẹ̌ gunang mẹ̌tahamawu si Yehuwa. I kitẹ nẹ̌tahamawu si Sie ual᷊ingu i kitẹ seng něngěndung mal᷊awọ soal i Sie. I kitẹ naherang nakasingkạ manga sipat’E mapia. I kitẹ masingkạ apa ikẹ̌kapulu-Ne dingangu ikẹ̌kawěngsing’E, kụ pěndang i kitẹ mẹ̌sul᷊ung dingangu pěndang’E. I kitẹ nakaěna Yehuwa mapulu i kitẹ mal᷊uasẹ̌ mẹ̌tahamawu si Sie sarang karěngụe. Hakị u ene, i kitẹ měbiahẹ̌ tuhụ atorang’E. I kitẹ lai nakapěndang lẹ̌arěgang ual᷊ingu botonge makoạ hapị’E. (Mz. 25:14) Kěbị apa niěndungang i kitẹ soal u Měndariadi, makakoạ si kitẹ limembong marani dingang’E.​—Yak. 4:8.

4. (a) Apa nipakẹ u Setang tadeạu kakěndagi kitẹ si Yehuwa mapahiạ? (b) Apa sarung ěndungang i kitẹ su pěngangěndungang ini?

 ⁴ Setang kai měngangawasa dunia ini, kụ i sie něpakẹ dunia ini gunang makakoạ si kitẹ limembong měngal᷊imona kapulung i kitẹ sul᷊ungu kapulung i Yehuwa. I sie lai makakoạ si kitẹ masigěsạ lumawang kapulu nẹ̌sal᷊a. (Ef. 2:1-3; 1 Yoh. 5:19) Timonang Setang ute měkoạ kakěndagi kitẹ mapahiạ tadeạu i kitẹ tawe kětạeng mẹ̌tahamawu si Yehuwa. Mahịe měngěndung darua cara nipakẹ u Setang. Humotong, i sie měnẹ̌nal᷊ukạ si kitẹ gunang měnahusu kakakalạ. Karuane, i sie mětẹ̌tawakal᷊i měkoạ si kitẹ měmile hiburan dal᷊akị.

5. Kawe nụe i kitẹ harusẹ̌ maingatẹ̌ abe sarang kuměndagẹ̌ su roitẹ̌?

⁵ I kitẹ kěbị mapulu piạ kaěng, pakeang, dingangu tampạ pẹ̌tatanakeng mapaelẹ̌. Katewe, i kitẹ harusẹ̌ maingatẹ̌ abe sarang kuměndagẹ̌ su roitẹ̌. Orasẹ̌ ini, lawọ taumata ”makěndagẹ̌ su roitẹ̌” dingangu su manga hal᷊ẹ̌ botonge kawěliangu roitẹ̌. (2 Tim. 3:2) Yesus masingkạ manga murite aramanung sarung kawintaugang gunang kuměndagẹ̌ su roitẹ̌. Yesus naul᷊ị, ”Tawẹ apa taumata botonge makoạ ělang gunang darua tuang, ual᷊ingu i sie sarung mawěngsing su sěngkatau kụ kuměndagẹ̌ su sěngkatau, arau masatia su sěngkatau kụ mẹ̌pandang ěnteng su sěngkatau. I kamene tawe mariadi makoạ ělangu Mawu apidu makoạ ělangu Kakakalạ.” (Mat. 6:24) Taumata apang měngibadah si Yehuwa apidu měpakẹ lawọ tempo dingangu katatoghasẹ̌ gunang makaěbạ kakakalạ, mẹ̌sul᷊ungu nakoạ ělang gunang darua tuang. I sie nẹ̌tahamawu bal᷊inẹ kětạeng si Yehuwa.

6. Apa kaěndungang i kitẹ bọu bawerang i Yesus su anggota sidang Laodikia?

⁶ Maraning pěngěngsuengu abad  humotong M, anggota sidang su soa Laodikia něngobotẹ̌, ”Iạ makalạ kụ arětạku mal᷊awọ. Iạ tawe kakawusangu manga apa.” Katewe su těngong Yehuwa dingangi Yesus, i sire kai ”masigěsạ dingangu makạtatal᷊ěntụ. I [sire] masusah, buta, dingangu těntol᷊e”. Yesus něgělị sasasa si sire, bal᷊inẹ ual᷊ingu i sire makalạ, katewe ual᷊ingu kakěndagi sire su kakakalạ seng nakarusa pẹ̌dal᷊ahapị i sire dingangi Yehuwa. (Why. 3:14-17) Mạeng i kitẹ nasadarẹ̌ i kitẹ seng něnětạ kiměndagẹ̌ su roitẹ̌, i kitẹ harusẹ̌ pakasahawụ měmal᷊ui tiněna. (1 Tim. 6:7, 8) Mạeng tala, naung i kitẹ sarung mapahiạ kụ Yehuwa seng madiri měnarimạ ibadang i kitẹ. I Sie ”mědẹ̌dorong taumata mẹ̌tahamawu kětạeng si Sie”. (Ul. 4:24) Mạeng kerene, kerea sarang doitẹ̌ botonge makoạ hal᷊ẹ̌ sěbạe penting su pěbawiahi kitẹ?

7-9. Apa kaěndungangu bọu pengalaman sěngkatau penatua arenge David?

⁷ Pẹ̌tiněna pengalaman i David, sěngkatau penatua masěmangatẹ̌ su Amerika Serikat. I sie nẹ̌běke kangerẹ i sie mělahal᷊ẹ̌ marading. Ual᷊ingu ene, i sie nighělịkangu jabatan limembong marangẹ su kantore. Kụ i sie nisěbạ mělahal᷊ẹ̌ kapaelange su něgěrine. David nẹ̌bera, ”Su tempo ene, iạ nẹ̌pikirẹ̌ penghargaan ene kai al᷊amatẹ̌ bọu i Yehuwa.” Katewe, apa ene kahěngang bọu i Yehuwa?

⁸ David něnětạ nakasilo hal᷊ẹ̌e nakawahaya pẹ̌dal᷊ahapịe dingangi Yehuwa. I sie naul᷊ị, ”Su tempong měngibadah dingangu měnginjilẹ̌, iạ turusẹ̌ mětẹ̌tiněna soal u masalah su tampạ pělahal᷊ẹ̌kang. Gajiku mal᷊awọ katewe kakạrěngụe iạ stres kụ piạ masalah su pẹ̌kakawingku.”

⁹ David nasadarẹ̌ i sie harusẹ̌ měmutusẹ̌  apa makoạ kahumotongange su pěbawiahe. I sie naul᷊ị, ”Iạ němutusẹ̌ gunang měmal᷊ui situasiku.” David saụ němohẹ jadwale tadeạu tempone tawe mapakẹ mal᷊awọ su hal᷊ẹ̌ kụ i sie něnodẹ rěncanane ene su bosẹ̌e. Apa hasile? David nipěcatẹ̌! Apa nikoạe? I sie naul᷊ị, ”Dịěllone, iạ něloho formulir perintis ekstra.” Gunang biahẹ̌ ěllo-ěllo, i David dingangu kawinge něhal᷊ẹ̌ nakoạ měmamurěsi su manga bangunan gaghaghuwạ. Bọu ene, i David něnětạ nakoạ perintis biasa kụ samurine kawinge lai nakoạ perintis. Maning hal᷊ẹ̌ nipileng i rẹ̌dua kakělaěng tawe lẹ̌arěgangu lawọ taumata, jenis hal᷊ẹ̌ tawe nakoạ paling penting si rẹ̌dua. Maning gajing i sire sěbạe mahal᷊i sul᷊ungu gaji su hal᷊ẹ̌ kal᷊imona, ene botonge makatutu pengeluaran i sire sabang wul᷊ang. I sire mapulu Yehuwa makoạ kahumotongange su pěbawiahi sire, kụ i sire nakapěndang Yehuwa měnẹ̌nukụ kebutuhan taumata apang měngẹ̌ngal᷊imona hal᷊ẹ̌ u Kararatuang.​—Mat. 6:31-33.

10. Kerea carane měndiagạ naung i kitẹ?

¹⁰ Tawẹ soale piạ lawọ doitẹ̌ arau mahal᷊i, i kitẹ harusẹ̌ měndiagạ naung i kitẹ. Kerea carane? Abe sarang kuměndagẹ̌ kakakalạ. Kụ, abe wala hal᷊ẹ̌ makoạ kahumotongange sul᷊ungu pelayanan si Yehuwa. Kerea makasingkạ ene seng nariadi si kau? Piram baụ kakiwal᷊o ini botonge tiněnangu: ’Apa iạ hanesẹ̌ mětẹ̌tiněna hal᷊ẹ̌ su tempong měngibadah arau měnginjilẹ̌? Apa iạ turusẹ̌ gụgěnggang sarung piạ doitẹ̌ su tempo mahi? Apa doitẹ̌ dingangu hal᷊ẹ̌ materi nakarěntang masalah su pẹ̌kakawingku? Apa iạ mapulu měkoạ hal᷊ẹ̌ makakoạ si siạ piạ lawọ tempo gunang pelayanan si Yehuwa maning hal᷊ẹ̌ ene tawe lẹ̌arěgangu taumata?’ (1 Tim. 6:9-12) Su tempong mẹ̌tiněna manga kakiwal᷊o ini, i kitẹ harusẹ̌ mẹ̌tahěndung Yehuwa makěndagẹ̌ si kitẹ kụ někoạ diandi ini si sire apang nẹ̌tahamawu si Sie: ”Iạ tawe měněntang si kau, dingangu Iạ tawe měmala si kau.” Hakị u ene, Rasul Paulus němohẹ, ”Kumbahang kuměndagẹ̌ doitẹ̌.”​—Ibr. 13:5, 6.

11. Apa pěngaruh hiburan su taumata?

¹¹ Yehuwa mapulu i kitẹ měbiahẹ̌ mal᷊uasẹ̌, kụ hiburan botonge makal᷊uasẹ̌ si kitẹ. Sěběnarẹ̌e, Hengetangu Mawu naul᷊ị, ”Kapaelange su taumata ene kai kumaěng dingangu měnginung, dingangu měpakẹ hasilu hal᷊ẹ̌e.” (Pkh 2:24) Katewe, lawọ hiburan su dunia piạ pěngarune dal᷊akị si kitẹ. Hiburan kerene makakoạ taumata  setuju su manga hal᷊ẹ̌ ikẹ̌kawěngsingu Mawu arau kuměndagẹ̌ su hal᷊ẹ̌ ene.

12. Tumuhụ 1 Korintus 10:21, 22, kawe nụe i kitẹ harusẹ̌ měmile hiburan pakapia?

¹² I kitẹ mapulu mẹ̌tahamawu kětạeng si Yehuwa, hakị u ene i kitẹ tawe kumaěng su ”medang Yehuwa” apidu lai kumaěng su ”medang manga rohkẹ̌ dal᷊akị”. (Basa 1 Korintus 10:21, 22.) Kumaěng sěngkasio dingangu taumata wal᷊inẹ biasane kai tatialang pẹ̌dal᷊ahapị. Mạeng i kitẹ měmile hiburan soal u měnděndariha taumata, spiritisme, kakanoạ amoral, arau kakanoạ dingangu kapulu ral᷊akị wal᷊inẹ, i kitẹ mẹ̌sul᷊ungu kimaěng kaěng nisadiangu manga sědụu Mawu lai kimaěng dingangi sire. Tětal᷊e, i kitẹ sarung makawahaya watangeng i kitẹ dingangu makarusa pẹ̌dal᷊ahapị i kitẹ dingangi Yehuwa.

13-14. (a) Apa sul᷊unge hiburan dingangu kaěng? (b) Tumuhụ Yakobus 1:14, 15, kawe nụe i kitẹ harusẹ̌ maingatẹ̌ soal u hiburan sarung pileng i kitẹ?

¹³ Apa sul᷊unge hiburan dingangu kaěng? Su tempong kumaěng, i kitẹ botonge měmile apa sarung tahong su mohong. Katewe, su tempong kaěng ene naělụ, ene nakoạ bageang bọu wadang i kitẹ. Kaěng mal᷊awọ gizine botonge makasehatẹ̌ si kitẹ. Katewe, kaěng tawẹ apa gizine sarung makasakị si kitẹ. Tětal᷊e aramanung tawe langsung kasilong, katewe kakạrěngụe ene sarung kasilong.

¹⁴ Kerene lai, su tempong měmile hiburan, i kitẹ botonge měmile apa sarung tahong su tiněnang i kitẹ. Katewe bọu ene, hiburan nipileng i kitẹ sarung piạ pěngarune su tiněna dingangu pěndang i kitẹ. Hiburan mapaelẹ̌ piạ pěngarune mapaelẹ̌ si kitẹ; hiburan dal᷊akị sarung makawahaya si kitẹ. (Basa Yakobus 1:14, 15.) Pengaruh hiburan dal᷊akị aramanung tawe langsung kasilong, katewe kakạrěngụe ene sarung kasilong. Hakị u ene Alkitapẹ̌ něgělị laingatẹ̌, ”Abe kaakal᷊eng. Mawu tawe ikapẹ̌taghunalang. Apa nisawuhụ taumata, ene lai sarung pěngsạkenge. Taumata apang něnawuhẹ̌ tuhụ kapulung badange marosa, sarung měměngsạ kawawinasa bọu wadange ene.” (Gal. 6:7, 8) Hakị u ene, sěbạe penting mẹ̌těngkarau bọu hiburan nělahẹ manga hal᷊ẹ̌ ikẹ̌kawěngsing i Yehuwa!​—Mz. 97:10.

15. Hadiah apa seng nighělị i Yehuwa si kitẹ?

¹⁵ Lawọ ělang i Yehuwa puluang mẹ̌biala JW Broadcasting^®, stasiun televisi Internet i kitẹ. Sěngkatau saudari arenge Marilyn nẹ̌bera, ”JW Broadcasting nakatul᷊ung si siạ nakoạ taumata limembong mal᷊uasẹ̌. Iạ botonge mẹ̌biala kěbị lohone ual᷊ingu kěbị ene piạ gunane si siạ. Su tempong kesepian arau nakadodọ naung, iạ mẹ̌biala nasẹ̌ arau acara Ibadah Pagi makatoghasẹ̌ si siạ. Ene nakakoạ si siạ marani dingangi Yehuwa lai organisasi-Ne. JW Broadcasting kahěngang-hěngang nakawal᷊ui pěbawiahẹ̌ku.” Apa i kau seng něpakẹ hadiah bọu Yehuwa ini? Su JW Broadcasting piạ program buhu sabang wul᷊ang. Piạ lai program audio dingangu video lai manga kakantarị makatoghasẹ̌ botonge bialang dingangu daringihangu su haghing tempo.

16-17. Kawe nụe i kitẹ harusẹ̌ maingatẹ̌ soal u kal᷊awọe tempo nipakẹ gunang hiburan, kụ kerea měkoạ ene?

¹⁶ I kitẹ harusẹ̌ maingatẹ̌ bal᷊inẹ kětạeng soal u apa hiburan sarung pileng i kitẹ, katewe lai kal᷊awọe tempo sarung paketang i kitẹ. Mạeng tawe maingatẹ̌, i kitẹ sarung makapakẹ limembong lawọ tempo gunang hiburan sul᷊ungu gunang pelayanan si Yehuwa. Lawọ taumata masigěsạ měngatorẹ̌ kal᷊awọe tempo paketang gunang hiburan. Abigail, sěngkatau saudari umure 18 su taunge naul᷊ị, ”Su apang seng bọu něhal᷊ẹ̌ su kanandụu ěllo, biasane iạ mẹ̌santai  apidu mẹ̌biala televisi. Katewe mạeng tawe maingatẹ̌, iạ sarung mẹ̌biala sarang pirang kaorasẹ̌.” Sěngkatau saudara mangudạ arenge Samuel nẹ̌bera, ”Pẹ̌sěngsul᷊ẹ, iạ nẹ̌biala lawọ video manibụ su Internet. Humotong, iạ nẹ̌biala kětạeng sěmbaụ, katewe iạ tawe sadarẹ̌ seng nẹ̌biala karěngụe tatělu arau ěpạu kaorasẹ̌.”

¹⁷ Kerea i kitẹ botonge měngatorẹ̌ kal᷊awọe tempo paketang i kitẹ gunang hiburan, kụ kerea i kitẹ botonge měkoạ ene? Humotong, i kitẹ harusẹ̌ masingkạ pira kal᷊awọe tempo seng nipakẹ i kitẹ gunang ene. Pěkoạe catatan gunang sěngkamisa. Bohẹe pira kal᷊awọe tempo nipakẹ gunang mẹ̌biala televisi, měmanda manga hal᷊ẹ̌ su Internet, dingangu měnalang game su HP arau tablet. Mạeng i kau nẹ̌pěndang lawọ temponu nasue gunang manga hal᷊ẹ̌ ene, kěnang pěkoạ jadwalẹ̌. Atorẹ̌ tempo gunang měkoạ hal᷊ẹ̌ limembong penting kal᷊imona, buhudeng atorẹ̌ tempo gunang hiburan. Bọu ene, pẹ̌dorong Yehuwa mẹ̌tul᷊ung si kau tadeạu botonge tumol᷊e jadwalẹ̌ ene. Mạeng měkoạ kerene, i kau sarung piạ lawọ tempo dingangu katatoghasẹ̌ gunang měngěndung Alkitapẹ̌ hala, měkoạ ibadah keluarga, měngibadah dingangu anạu sěmbaụ, lai měkoạ pelayanan si Yehuwa. I kau sarung limembong matěnang měpakẹ tempo gunang hiburan ual᷊ingu Yehuwa seng nakoạ kahumotongange su pěbawiahu.

18-19. Kerea měnodẹ i kitẹ mẹ̌tahamawu kětạeng si Yehuwa?

¹⁸ Su apang bọu němohẹ soal u duniang Setang sarung mawinasa kụ dunia wuhu sarung duměnta, Rasul Petrus nẹ̌bera, ”Anạu sěmbaụ ikẹ̌kěndagẹ̌, ual᷊ingu i kamene seng mělẹ̌hědo manga hal᷊ẹ̌ ini, pẹ̌tawakal᷊ịe sěngapang botonge tadeạu samurine Mawu měmanda i kamene burěsi, tawẹ kurange, dingangu piạ dame dingang’E.” (2 Ptr. 3:14) Mạeng i kitẹ tumuhụ sasasa ene, dingangu mẹ̌tawakal᷊i měbiahẹ̌ lai měngibadah tuhụ kapulung Yehuwa, i kitẹ měnodẹ i kitẹ mẹ̌tahamawu kětạeng si Yehuwa.

¹⁹ Setang dingangu duniane sarung turusẹ̌ měnal᷊ukạ si kitẹ tadeạu měngal᷊imona hal᷊ẹ̌ wal᷊inẹ sul᷊ungu Yehuwa. (Luk. 4:13) Katewe, tawẹ soale sasal᷊ukạ apa tatěngong i kitẹ, i kitẹ tawe měmala maning apa arau maning i sai makaghanti tampạ i Yehuwa su ral᷊ungu naung i kitẹ. I kitẹ mẹ̌tawakal᷊i měgělị si Yehuwa apa seng nakoạ hakẹ̌’E, ene kai mẹ̌tahamawu kětạeng si Sie!