1. Apa wotonge koateng i Yehuwa gunang mapakasěhụ kapulu-Ne?

YEHUWA botonge makoạ kěbị haghi gunang mapakasěhụ kapulu-Ne. Contone, Yehuwa botonge makoạ Guru, i Amang měgẹ̌gělị pělahiborẹ̌, dingangu Mělahabarẹ̌ habarẹ̌ mapia. (Yes. 48:17; 2 Kor. 7:6; Gal. 3:8) Katewe, Yehuwa lai masau měpakẹ taumata gunang mapakasěhụ kapulu-Ne. (Mat. 24:14; 28:19, 20; 2 Kor. 1:3, 4) Yehuwa lai botonge měgělị si kitẹ pelesa dingangu katatoghasẹ̌ gunang měkoạ apa ikẹ̌kapulu-Ne. Ini nẹ̌tatahino dingangu mangal᷊ene areng i Yehuwa, kụ pirang katau pakar lai setuju dingangu hal᷊ẹ̌ ene.

2. (a) Aramanung, kawe nụe pẹ̌sěngsul᷊ẹ i kitẹ ragu apa i kitẹ botonge paketang i Yehuwa? (b) Apa sarung ěndungang i kitẹ su pěngangěndungang ini?

² I kitẹ kěbị mapulu paketang i Yehuwa gunang měkoạ kapulu-Ne, katewe pirang katau ragu apa i sire botonge paketang i Yehuwa. Kawe nụe kerene? I sire nẹ̌pěndang seng tawe makakoạ mal᷊awọ ual᷊ingu umurẹ̌, keadaan, arau kemampuan i sire. Arau, piạ lai nẹ̌pikirẹ̌ apa nikoạ i sire seng botonge, kụ seng tawe harusẹ̌ měkoạ limembong mal᷊awọ. Su pěngangěndungang ini, i kitẹ sarung měngěndung kerea Yehuwa botonge mẹ̌tul᷊ung si kitẹ měkoạ kapulu-Ne. Bọu ene, i kitẹ sarung měngěndung piram baụ běke su Alkitapẹ̌ soal u kerea Yehuwa něgělị kapulu dingangu katatoghasẹ̌ su manga ělang’E, esẹ dingangu wawine, gunang měkoạ kapulu-Ne. Samurine, i kitẹ sarung měngěndung kerea i kitẹ botonge měgělị watangeng i kitẹ gunang paketang i Yehuwa.

3. Kere nilahẹ su Filipi 2:13, kerea Yehuwa měgělị si kitẹ kapulu gunang měkoạ apa ikẹ̌kapulu-Ne?

³ Basa Filipi 2:13. Yehuwa botonge měgělị si kitẹ kapulu  gunang měkoạ apa ikẹ̌kapulu-Ne. Kerea carane? Aramanung i kitẹ nakaringihẹ̌ piạ anạu sěmbaụ harusẹ̌ itul᷊ung, arau piạ barang harusẹ̌ koateng su sidang. Arau manga penatua nẹ̌basa suratẹ̌ bọu kantor cabang soal u kebutuhan gunang měnginjilẹ̌ su daerah bal᷊inẹ wilayah sidang i kitẹ. Su tempong nakasingkạ hal᷊ẹ̌ ene, aramanung i kitẹ nẹ̌tiněna, ’Kerea iạ botonge mẹ̌tul᷊ung?’ Arau, ěndịu i kitẹ makaěbạ tugasẹ̌ masigěsạ, kụ nẹ̌pikirẹ̌ apa i kitẹ sarung makakoạ mapia tugasẹ̌ ene. Arau su tempong nẹ̌basa piram baụ ayatẹ̌ su Alkitapẹ̌, i kitẹ ěndịu nẹ̌pikirẹ̌, ’Kerea iạ botonge tumol᷊e sasasa su manga ayatẹ̌ ini gunang mẹ̌tul᷊ung taumata wal᷊inẹ?’ Yehuwa tawe měnihasa si kitẹ měkoạ kěbị haghi. Katewe, su tempong Yehuwa nakasilo i kitẹ nẹ̌tiněna apa wotonge koateng i kitẹ, i Sie botonge měgělị si kitẹ kapulu gunang měkoạ ene. *

4. Kerea Yehuwa botonge měgělị si kitẹ katatoghasẹ̌ gunang měkoạ kapulu-Ne?

⁴ Yehuwa lai botonge měgělị si kitẹ katatoghasẹ̌ gunang měkoạ kapulu-Ne. (Yes. 40:29) Kerea carane? I Sie botonge měgělị rohkẹ̌ masusi gunang meningkatkan kemampuan dingangu bakat i kitẹ. (Kel. 35:30-35) Bọu organisasi-Ne, Yehuwa něněntiro si kitẹ kerea carane měkoạ piram baụ tugasẹ̌. Mạeng i kau běga cara měkoạ sěmbaụ tugasẹ̌, pẹ̌dorong tul᷊ung su taumata wal᷊inẹ. Bọu ene lai, i kau botonge mẹ̌dorong ’katatoghasẹ̌ sěbạe gěguwạ’ si Amang i kitẹ su sorga. (2 Kor. 4:7; Luk. 11:13) Su Alkitapẹ̌, piạ lawọ contoh kerea Yehuwa něgělị su manga esẹ dingangu manga wawine kapulu dingangu katatoghasẹ̌ gunang měkoạ kapulu-Ne. Su tempong měngěndung manga contoh ini, pẹ̌tiněna kerea Yehuwa botonge měpakẹ si kau kere i Sie něpakẹ manga wawine dingangu manga esẹ ene.

5. Apa kaěndungang i kitẹ bọu tempone dingangu carane Yehuwa něpakẹ si Musa gunang mapakawebasẹ̌ manga ělang’E?

⁵ Yehuwa někoạ si Musa botonge mapakawebasẹ̌ bangsa Israel. Katewe, kange Yehuwa něnětạ něpakẹ si sie? Apa su tempong i Musa nẹ̌pěndang i sie seng sadia ual᷊ingu seng nitěntiro ”kěbị kasingkạu tau Misirẹ̌”? (Kis. 7:22-25) Tala. Yehuwa něnětạ něpakẹ si Musa su tempong i Sie seng bọu něněntiro si Musa nakoạ taumata masanạ naung dingangu masikome naung. (Kis. 7:30, 34-36) Yehuwa něgělị si Musa kawawahani gunang mẹ̌bisara su měngangawasa karangetange su Misirẹ̌. (Kel. 9:13-19) Apa wotonge kaěndungang i kitẹ bọu tempone dingangu carane Yehuwa něpakẹ si Musa? Yehuwa kětạeng měpakẹ taumata apang mapulu tumol᷊e manga sipat’E dingangu měngẹ̌ngumbala katatoghasẹ̌ bọu i Sie.​—Flp. 4:13.

6. Apa wotonge kaěndungang i kitẹ bọu cara i Yehuwa něpakẹ si Barzilai gunang mẹ̌tul᷊ung si Datu Daud?

⁶ Hasụe su taunge bọu ene, Yehuwa něpakẹ si Barzilai gunang měnadia kebutuhan i Datu Daud. Daud dingangu manga tumatol᷊ene ”nahutung, nal᷊owe, dingangu narou” ual᷊ingu timal᷊ang bọu i Absalom, anạ i Daud. Su tempo ene, i Barzilai seng maghurang. I sie dingangu pirang katau esẹ wal᷊inẹ tawe matakụ mate gunang měnadia kebutuhan i Daud dingangu tumatol᷊ene. Maning seng maghurang, i Barzilai tawe nẹ̌pěndang i sie seng tawẹ apa gunane si Yehuwa. Katewe, dingangu kal᷊aěluge i sie něgělị apang piạ si sie gunang mẹ̌tul᷊ung manga ělangu Mawu. (2 Sam. 17:27-29) Apa těntirone si kitẹ? Tawẹ soale umuri kitẹ, Yehuwa botonge měpakẹ si kitẹ gunang mẹ̌tul᷊ung anạu sěmbaụ apang nasigěsạ, su tampạ i kitẹ arau su negeri wal᷊inẹ. (Amsal 3:27, 28; 19:17) Maning tawe langsung makatul᷊ung si sire,  aramanung i kitẹ botonge měgělị sumbangan gunang pekerjaan sedunia. Mạeng měkoạ ene, anạu sěmbaụ i kitẹ su patikụ dunia sarung makaěbạ bantuan su tempong i sire membutuhkan.​—2 Kor. 8:14, 15; 9:11.

7. Kerea Yehuwa něpakẹ si Simeon, kụ kawe nụe ene makatoghasẹ̌ si kitẹ?

⁷ Simeon kai sěngkatau esẹ maghurang masatia kụ mětẹ̌tanạ su Yerusalem. Yehuwa nẹ̌diandi i Simeon tawe mate mạeng bědang tawe nakasilo si Mesias. Diandi ene sěbạe nakatoghasẹ̌ si Simeon, ual᷊ingu i sie seng pul᷊one su taunge mělẹ̌hědo si Mesias. Kụ, Yehuwa něngal᷊amatẹ̌ pangangimang dingangu kasasatiane. Piạ su sahěllo, ”i sie niahạu rohkẹ̌ masusi” kụ nakoạ sarang bait. Sene, i sie nakasilo si Yesus kadodọ, kụ Yehuwa něpakẹ si Simeon gunang měhabarẹ̌ těbal᷊ẹ̌ anạ ene sarung makoạ Kristus. (Luk. 2:25-35) Maning i Simeon ěndịu nate su tempong i Yesus bědang tawe něnětạ někoạ pelayanan, i sie sěbạe měngẹ̌ngarěga hak istimewa nikaěbạe. Kụ su tempo mahi, i sie sarung makaěbạ limembong lawọ al᷊amatẹ̌! Su dunia wuhu, esẹ masatia ene sarung makasilo kerea pěmamarentang Yesus makarěntang al᷊amatẹ̌ gunang kěbị bangsa su dunia. (Kej. 22:18) I kitẹ lai sěbạe měngarěga haghing hak istimewa nighělị i Yehuwa si kitẹ.

8. Kerea i Yehuwa botonge měpakẹ si kitẹ kere i Sie něpakẹ si Barnabas?

⁸ Su abad humotong M, sěngkatau esẹ maělugẹ̌ arenge i Yusuf mapulu paketang i Yehuwa. (Kis. 4:36, 37) Ěndịu ual᷊ingu i Yusuf mapaelẹ̌ měhiborẹ̌ taumata wal᷊inẹ, manga rasul nẹ̌sěbạ i sie Barnabas, mangal᷊ene ”Anạu Pělahiborẹ̌”. Contone, su tempong i Saul nakoạ tau Kristen, lawọ anạu sěmbaụ matakụ mẹ̌těngkarani si sie ual᷊ingu kangerẹ i sie měnděndariha tau Kristen. Katewe, i Barnabas něhiborẹ̌ dingangu nẹ̌tul᷊ung si Saul. Tantu i Saul sěbạe měngẹ̌ngarěga kapiang naung i Barnabas. (Kis. 9:21, 26-28) Samurine, manga penatua su Yerusalem nẹ̌pěndang anạu sěmbaụ su tampạ marau, kere su Antiokhia su Siria, harusẹ̌ toghaseng. I sai nirolohi sire? I Barnabas! Pileng i sire ene seng nihino. Alkitapẹ̌ nělahẹ i Barnabas ”něnoghasẹ̌ si sire kěbị tadeạu tatapẹ̌ masatia si Tuang dingangu kaguwạu naung”. (Kis. 11:22-24) Kerene lai orasẹ̌ ini, Yehuwa botonge mẹ̌tul᷊ung si kitẹ makoạ ”anạu pělahiborẹ̌” gunang anạu sěmbaụ i kitẹ. Contone, aramanung i Sie měpakẹ si kitẹ gunang měhiborẹ̌ si sire apang nitěntangu taumata ikẹ̌kěndagi sire ual᷊ingu papate. Arau, i Sie aramanung makakoạ si kitẹ mapulu mẹ̌tiwo arau menelpon si sire apang masakị arau nasusah naung gunang měhiborẹ̌ si sire. Apa i kau mapulu Yehuwa měpakẹ si kau kere i Sie něpakẹ si Barnabas?​—1 Tes. 5:14.

9. Apa wotonge kaěndungang i kitẹ bọu cara Yehuwa nẹ̌tul᷊ung si Vasily gunang makoạ gembala rohani mapia?

⁹ Yehuwa nẹ̌tul᷊ung sěngkatau saudara arenge i Vasily gunang makoạ gembala rohani mapia. Su tempong nakoạ penatua, umuri Vasily 26 su taunge. I sie gụgěnggang tawe terampil mẹ̌tul᷊ung anạu sěmbaụ, něngělembo i sire apang nakahombang  kasasigěsạ. Katewe, i sie nakaěbạ pělatihan mapaelẹ̌ bọu manga penatua piạ lawọ pengalaman dingangu bọu Sekolah Pelayanan Kerajaan. Vasily nẹ̌tawakal᷊i tadeạu makoạ penatua limembong mapaelẹ̌. Contone, i sie někoạ daftarẹ̌ cita-cita dararodọ. Su tempong i sie nakakoạ ene sěmbaụ-sěmbaụ, kaghaghěnggange něnětạ kakạilange. Samurine i sie nẹ̌bera, ”Manga hal᷊ẹ̌ kangerẹ nakakoạ si siạ gụgěnggang, orasẹ̌ ini seng nakakoạ si siạ sěbạe mal᷊uasẹ̌. Su tempong i Yehuwa nẹ̌tul᷊ung si siạ nakaěbạ ayatẹ̌ nẹ̌tatahino gunang měhiborẹ̌ anạu sěmbaụ, iạ sěbạe mal᷊uasẹ̌.” Saudara-Saudara, mạeng i kamene kere i Vasily měgělị watangeng gunang paketang i Yehuwa, i Sie botonge měgělị si kamene kemampuan gunang měkoạ limembong mal᷊awọ tanggung jawab su sidang.

10. Apa nikoạ i Abigail, kụ apa wotonge kaěndungang i kitẹ bọu kakanoạe?

¹⁰ Su sěngkatempo, i Daud dingangu manga tumatol᷊ene sẹ̌sahusuang i Datu Saul, kụ harusẹ̌ piạ u mẹ̌tul᷊ung si sire. Manga tumatol᷊eng i Daud nẹ̌dorong kaěng su sěngkatau esẹ Israel makalạ arenge Nabal. I sire tawe ragu nẹ̌dorong ual᷊ingu i sire seng něndiagạ manga binatang i Nabal su padang. Katewe ual᷊ingu egois, Nabal madiri měgělị apa-apa si sire. Daud sěbạe pědu kụ mapulu měmate si Nabal dingangu kěbị esẹ su wal᷊ene. (1 Sam. 25:3-13, 22) Nabal piạ kawinge arenge Abigail. I sie sěbạe masadadạ kụ lai matahuěna. Abigail bahani nẹ̌sombang dingangi Daud. I sie nẹ̌tumpěkuhẹ̌ su těngong i Daud kụ nẹ̌dorong tadeạu i Daud tawe makarěntang utang daha ual᷊ingu měmal᷊isẹ̌ si Nabal. I sie matahuěna nẹ̌dorong si Daud měnarakang masalah ene si Yehuwa. Bawerang i Abigail masanạ naung dingangu kakanoạe matahuěna nakakanoạ naung i Daud. Daud nasadarẹ̌ i Abigail nirolohi Yehuwa. (1 Sam. 25:23-28, 32-34) Abigail mětẹ̌tawakal᷊i piạ sipatẹ̌ mapia nakakoạ si sie botonge paketang i Yehuwa. Kere i Abigail, saudari-saudari apang nẹ̌tawakal᷊i piạ sipatẹ̌ matahuěna dingangu mapelesa, botonge paketang i Yehuwa gunang měnoghasẹ̌ kěluargang i sire dingangu taumata wal᷊inẹ su sidang.​—Amsal 24:3; Tit. 2:3-5.

11. Apa nikoạ u manga anạ i Syalum wawine, kụ i sai nẹ̌těno si sire orasẹ̌ ini?

¹¹ Hasụe su taunge bọu ene, manga anạ i Syalum wawine nipakẹ i Yehuwa gunang saụ měkoạ těndạ u Yerusalem. (Neh. 2:20; 3:12) Maning papạ i sire sěngkatau měngangawasa, i sire mapulu měkoạ hal᷊ẹ̌ masigěsạ dingangu makawahaya ini. (Neh. 4:15-18) I sire sěbạe nẹ̌tatěntang dingangu manga esẹ penting bọu Tekoa ual᷊ingu manga esẹ ene ”madiri mẹ̌těngkasanạu naung i sire” gunang měkoạ hal᷊ẹ̌ ene. (Neh. 3:5) Manga anạ i Syalum ini tantu mal᷊uasẹ̌ su tempong těndạ ene nasueng koạe kětạeng su ral᷊ungu 52 su ěllone. (Neh. 6:15) Su zaman i kitẹ, piạ lawọ saudari mapulu měgělị watangeng i sire gunang měkoạ tugasẹ̌ masusi si Yehuwa. Contone, piạ u timol᷊e někoạ dingangu něngurusẹ̌ manga bangunan pẹ̌paketang gunang pelayanan si Yehuwa. Manga hal᷊ẹ̌ ini botonge nakoạ ual᷊ingu tul᷊umang bọu saudari-saudari apang terampil, masěmangatẹ̌, dingangu masatia.

12. Kerea Yehuwa botonge měpakẹ si kitẹ kere i Sie něpakẹ si Tabita?

¹² Yehuwa němahangsang si Tabita gunang ’měkoạ lawọ hal᷊ẹ̌ mapia dingangu měgělị sumbangan su taumata masusah’, kahumotongange gunang manga wawine wal᷊u. (Kis. 9:36) Ual᷊ingu i sie sěbạe maělugẹ̌ dingangu mapia naung, lawọ taumata sěbạe nasusah naung su tempong i sie nate. Katewe, i sire sěbạe mal᷊uasẹ̌ su tempong i Rasul Petrus saụ napakawiahẹ̌ si sie. (Kis. 9:39-41) Apa wotonge kaěndungang i kitẹ bọu i Tabita? Tawẹ soale mangudạ arau maghurang, esẹ arau wawine, i kitẹ kěbị botonge měkoạ barang piạ gunane gunang mẹ̌tul᷊ung anạu sěmbaụ.​—Ibr. 13:16.

13. Kerea sěngkatau saudari meang arenge i Ruth nipakẹ i Yehuwa, ku apa niwerang i Ruth?

¹³ Sěngkatau saudari meang arenge i Ruth, mapulu makoạ utusan injil. Su tempong bědang kadodọ, i sie masěmangatẹ̌ kụ masahawụ měmahiạ risalah bọu wal᷊e sarang bal᷊e. I sie nẹ̌bera, ”Iạ sěbạe puluang měnginjilẹ̌”. Katewe, i sie nakapěndang masigěsạ mẹ̌bisara su těngong tukadẹ̌ gunang měhabarẹ̌ soal u Kararatuangu Mawu. Samurine, maning meang, i Ruth nakoạ perintis biasa su tempong umure bědang 18 su taunge. Su taung 1946, i sie timol᷊e Sekolah Alkitab Gilead Menara Pengawal kụ nakaěbạ tugasẹ̌ su Hawaii dingangu Jepang. Yehuwa něpakẹ si sie gunang měmahiạ habarẹ̌ mapia  su lawọ taumata su manga negeri ene. Su apang seng maraning 80 su taunge někoạ pelayanan, i Ruth nẹ̌bera, ”Yehuwa sěntiniạ měnẹ̌noghasẹ̌ si siạ. I Sie nẹ̌tul᷊ung si siạ tadeạu tawe mamea. Iạ sěbạe mangimang Yehuwa botonge měpakẹ taumata apang mangimang si Sie.”

14. Tumuhụ Kolose 1:29, apa harusẹ̌ koateng i kitẹ mạeng i kitẹ mapulu paketang i Yehuwa?

¹⁴ Su kanandụu sejarah, Yehuwa seng něpakẹ manga ělang’E gunang měkoạ haghing tugasẹ̌. Kerea Yehuwa botonge měpakẹ si kau? Ene bergantung su kerea kaguwạe kapulunu gunang mẹ̌tawakal᷊i měkoạ hal᷊ẹ̌ i Yehuwa. (Basa Kolose 1:29.) Mạeng i kau mapulu paketang i Yehuwa, i Sie botonge mẹ̌tul᷊ung si kau makoạ penginjil masěmangatẹ̌, guru mapaelẹ̌, hapị gunang měgělị pělahiborẹ̌, mělahal᷊ẹ̌ mapande, hapị mapia, arau makoạ kěbị haghi gunang mapakasěhụ kapulu-Ne.

15. Kere seng nilahẹ su 1 Timotius 4:12, 15, apa harusẹ̌ dorongangu saudara-saudara mangudạ si Yehuwa?

¹⁵ Kerea dingangi kamene saudara-saudara mangudạ apang seng kakạtělange? Orasẹ̌ ini, sidang Kristen membutuhkan manga esẹ masěmangatẹ̌ gunang makoạ hamba pelayanan. Su lawọ sidang, piạ limembong lawọ penatua sul᷊ungu hamba pelayanan. Apa i kamene saudara mangudạ mapulu měgělị watangeng i kamene gunang měkoạ limembong lawọ hal᷊ẹ̌ su sidang? Pẹ̌sěngsul᷊ẹ, piạ saudara měbẹ̌bera, ”Iạ seng mal᷊uasẹ̌ maning kětạeng nakoạ penyiar.” Mạeng ene nikapěndangengu, pẹ̌dorong si Yehuwa tadeạu mẹ̌tul᷊ung si kau piạ kapulu gunang makoạ hamba pelayanan dingangu měgělị si kau katatoghasẹ̌ gunang měkoạ kapaelange su pelayanan si Yehuwa. (Pkh. 12:1) I kami membutuhkan tul᷊umang i kamene!​—Basa 1 Timotius 4:12, 15.

16. Apa harusẹ̌ dorongang i kitẹ si Yehuwa, kụ kawe nụe?

¹⁶ Yehuwa botonge měkoạ si kau makoạ kěbị haghi gunang mapakasěhụ kapulu-Ne. Hakị u ene, pẹ̌dorong si Sie kapulu gunang měkoạ hal᷊ẹ̌’E, kụ bọu ene pẹ̌dorong si Sie katatatoghasẹ̌ gunang měkoạ hal᷊ẹ̌ ene. Tawẹ soale mangudạ arau maghurang, pakẹe tempo, katatoghasẹ̌, dingangu kěbị apang piạ si kau, kere keterampilan dingangu arětạ, gunang makawantugẹ̌ si Yehuwa orasẹ̌ ini. (Pkh. 9:10) Abe wala kaghaghěnggang arau pěndang tawe percaya diri makakoạ si kau kailangengu kesempatan maarěga gunang měgělị kapaelange si Yehuwa. Sěbạe gěguwạ hak istimewang i kitẹ ual᷊ingu botonge makawantugẹ̌ si Amang i kitẹ makěndagẹ̌, Yehuwa!