1. Kerea i kitẹ masingkạ hal᷊ẹ̌ měkoạ muritẹ̌ kai hal᷊ẹ̌ makasal᷊amatẹ̌?

HAL᷊Ẹ̌ měkoạ muritẹ̌ kai hal᷊ẹ̌ makasal᷊amatẹ̌! Bọu apa i kitẹ masingkạ? Su tempong Yesus něgělị parenta niwohẹ su Matius 28:19, 20, i sie naul᷊ị, ”Dakọe kụ koạko taumata . . . mariadi muritẹ̌ku. Baptisẹ̌ i sire.” Kawe nụe baptisan ene penting? Ual᷊ingu ene makasal᷊amatẹ̌. Tau sarung ibaptisẹ̌ harusẹ̌ mangimang i sie botonge masal᷊amatẹ̌ ual᷊ingu i Yesus seng nate nakoạ tatěbusẹ̌ kụ saụ nipakawiahẹ̌. Hakị u ene, Rasul Petrus naul᷊ị su anạu sěmbaụe ”baptisan . . . nakasal᷊amatẹ̌ si kamene . . . lumiu pěbawiahi Yesus Kristus bọu papate”. (1 Ptr. 3:21) Nal᷊ahẹ, su tempong sěngkatau muritẹ̌ buhu nibaptisẹ̌, i sie nakaěbạ pělaharapẹ̌ gunang ipakasal᷊amatẹ̌.

2. Tumuhụ 2 Timotius 4:1, 2, i kitẹ harusẹ̌ makoạ měnaněntiro kerea?

² Gunang měkoạ muritẹ̌, i kitẹ harusẹ̌ ’matahuěna su tempong měněntiro’. (Basa 2 Timotius 4:1, 2.) Kawe nụe? Ual᷊ingu i Yesus nẹ̌parenta, ”Dakọe kụ koạko taumata . . . mariadi muritẹ̌ku. Těntiroi i sire.” Bọu ene lai, Rasul Paulus naul᷊ị tatapẹ̌e pěkoạ hal᷊ẹ̌ ene, ’ual᷊ingu mạeng měkoạ ene, i kau sarung makasal᷊amatẹ̌ watangengu dingangu i sire apang dimaringihẹ̌ si kau’. Ual᷊ingu alasang ene, i Paulus naul᷊ị, ”Turusẹ̌e parikěsa . . . těntironu.” (1 Tim. 4:16) Nal᷊ahẹ, ual᷊ingu měněntiro piạ sěmpụe dingangu hal᷊ẹ̌ měkoạ muritẹ̌, i kitẹ mapulu cara i kitẹ měněntiro makoạ limembong mapaelẹ̌.

3. Su pěngangěndungang ini, apa sarung ěndungang i kitẹ?

³ I kitẹ seng něněntiro Alkitapẹ̌ su jutane taumata. Katewe, kere nilahẹ su pěngangěndungang kal᷊imona, i kitẹ mapulu masingkạ kerea mẹ̌tul᷊ung si sire tadeạu ibaptisẹ̌ makoạ muriti Yesus Kristus. Su pěngangěndungang ini, i kitẹ sarung měngěndung lima hal᷊ẹ̌ harusẹ̌ koateng i kitẹ gunang mẹ̌tul᷊ung měngangěndung tadeạu měkoạ kemajuan kụ ibaptisẹ̌.

4. Kawe nụe měnaněntiro harusẹ̌ mẹ̌kakědangu watangeng su tempong měněntiro Alkitapẹ̌? (Pěmanda lai catatan kaki.)

⁴ I kitẹ puluang su těntiro bọu Hengetangu Mawu. Hakị u ene, i kitẹ aramanung mapulu mẹ̌bisara mal᷊awọ soal u těntiro ikẹ̌kapuluang i kitẹ. Katewe, tawẹ soale i kitẹ měngahạ Pěngangěndungang Měhabarẹ̌, Pěngangěndungang Alkitapẹ̌ su Sidang, arau pěngangěndungang su wal᷊e, i kitẹ tawe harusẹ̌ mẹ̌bisara tumanịu mal᷊awọ. Gunang měmala Alkitapẹ̌ měněntiro, měnaněntiro harusẹ̌ mẹ̌kakědangu watangeng kụ tawe mělahẹ kěbị kasingkạe soal u sěmbaụ topik Alkitapẹ̌. * (Yoh. 16:12) Kěnang pẹ̌tiněna kal᷊awọe kasingkạu su tempong i kau nibaptisẹ̌ dingangu orasẹ̌ ini. Su tempong nibaptisẹ̌ tantu i kau kětạeng nakaěna těntiro dasarẹ̌ Alkitapẹ̌. (Ibr. 6:1) Hědo taunge i kau buhudeng piạ kasingkạ mal᷊awọ kere orasẹ̌ ini. Hakị u ene, abe sěngsul᷊ẹ měněntiro kěbị haghi su muritẹ̌ buhu.

5. (a) Kere nilahẹ su 1 Tesalonika 2:13, i kitẹ mapulu měngangěndung makaěna soal u apa? (b) Kerea i kitẹ botonge měmahangsang měngangěndung gunang mẹ̌bisara soal u apa seng niěndungange?

⁵ I kitẹ mapulu měngangěndung makaěna apa niěndungange ene asal᷊e kai bọu Hengetangu Mawu. (Basa 1 Tesalonika 2:13.) Kerea i kitẹ botonge měkoạ ene? I kitẹ botonge měmahangsang měngangěndung gunang mẹ̌bisara soal u apa seng niěndungange. Sul᷊ungu sěntiniạ mělahẹ ayatẹ̌ Alkitapẹ̌ si sie, kěnang pẹ̌dorong i sie mělahẹ piram baụ ayatẹ̌ si kau. Tul᷊ungko měngangěndung makasilo kerea Hengetangu Mawu piạ gunane si sie. Pěgělị kakiwal᷊o makatul᷊ung si sie maul᷊ị kerea pěndange soal u ayatẹ̌ seng niwasane. (Luk. 10:25-28) Contone, pẹ̌kiwal᷊o si sie, ”Kerea ayatẹ̌ ini nakatul᷊ung si kau nakasilo sipati Yehuwa?” ”Kerea ayatẹ̌ ini piạ gunane si kau?” ”Kerea pěndangu soal u apa seng niěndungangu ini?” (Amsal 20:5) I kitẹ harusẹ̌ mẹ̌tahěndung paling penting ene bal᷊inẹ soal u kerea kal᷊awọe kasingkạ u měngangěndung, katewe kerea i sie kiměndagẹ̌ dingangu někoạ apa seng nikasingkạe.

6. Kawe nụe mapaelẹ̌ mạeng měmaringang penyiar piạ lawọ pengalaman gunang tumol᷊e měngěndung Alkitapẹ̌ dingangi kitẹ?

⁶ Su tempong i kau měněntiro Alkitapẹ̌, apa i kau měmẹ̌maringang penyiar wal᷊inẹ piạ lawọ pengalaman? Mạeng i kau měkẹ̌koạ ene, kěnang pẹ̌kiwal᷊o su penyiar ene kerea caranu měněntiro dingangu apa i kau měpẹ̌pakẹ pakapia Alkitapẹ̌. Bọu ene, i kau lai harusẹ̌ masanạ naung mạeng mapulu makoạ guru matahuěna. (Bandingkan Kisah 18:24-26.) Bọu ene, pẹ̌kiwal᷊ọe lai su penyiar ene, apa tumuhụ si sie měngangěndung seng nakaěna apa niěndungange. I kau lai botonge makitul᷊ung su penyiar ene gunang  měněntiro Alkitapẹ̌ su měngangěndung mạeng i kau tawe makarěnta sěngkamisa arau nal᷊iu bọu ene. Ene sarung makatul᷊ung měngangěndung turusẹ̌ měngěndung dingangu mẹ̌tahěndung pěngangěndungang Alkitapẹ̌ kai penting si sie. Kụ, abe mẹ̌pěndang měngangěndung ene kai ”muritu hala” kụ tawe wotonge taumata wal᷊inẹ měněntiro. I kau tantu mapulu měkoạ kapaelange gunang měngangěndung tadeạu i sie botonge turusẹ̌ měngěndung katěngadẹ̌.

7. Apa makatul᷊ung měngangěndung gunang kuměndagẹ̌ apa seng niěndungange?

⁷ Měngangěndung harusẹ̌ makasilo i kau makěndagẹ̌ dingangu mangimang su těntirong Alkitapẹ̌. (1 Tes. 1:5) Ene sarung makakoạ si sie kuměndagẹ̌ dingangu mangimang su apa niěndungange. Kụ mạeng nẹ̌tatahino, pẹ̌běke si sie kerea prinsipẹ̌ Alkitapẹ̌ seng nakatul᷊ung si kau. Ene sarung makatul᷊ung si sie makasingkạ prinsipẹ̌ Alkitapẹ̌ lai botonge makatul᷊ung si sie.

8. Apa lai wotonge koatengu gunang mẹ̌tul᷊ung měngangěndung Alkitapẹ̌, kụ kawe nụe i kau měkoạ ene?

⁸ Su tempong měněntiro Alkitapẹ̌, i kau botonge mẹ̌běke su měngangěndung soal u pengalaman taumata apang nakahombang kasasigěsạ mẹ̌sul᷊ung dingange kụ kerea i sire seng timatěngo hal᷊ẹ̌ ene. I kau botonge měmaringang anạu sěmbaụ bọu sidang apang piạ pengalaman kere měngangěndung ene. Arau, i kau botonge mědeạ pengalaman su jw.org su seri ”Alkitab Mengubah Kehidupan”. * Manga artikel dingangu video kerene sarung makatul᷊ung měngangěndung makasilo kerea Alkitapẹ̌ botonge makawal᷊ui pěbawiahe.

9. Kerea i kau botonge měmahangsang měngangěndung gunang měmahiạ apa seng niěndungange su keluarga dingangu hapịe?

⁹ Mạeng měngangěndung seng bọu nẹ̌kawing, apa kawinge lai timol᷊e něngěndung? Mạeng tala, paringang lai kawinge gunang měngěndung. Bọu ene, bahangsang měngangěndung gunang měmahiạ apa seng niěndungange su keluarga dingangu hapịe. (Yoh. 1:40-45) Kerea cara měkoạ ene? I kau botonge mẹ̌kiwal᷊o si sie, ”Kerea i kau mělahẹ katěngadẹ̌ ini su kěluarganu?” arau ”Ayatẹ̌ sude sarung paketangu su tempong mẹ̌bisara dingangu hapịu?” Mạeng měkoạ ene, i kau nělatih měngangěndung gunang makoạ měnaněntiro. Kụ mạeng i sie seng memenuhi syarat, i sie botonge tumol᷊e měnginjilẹ̌, kụ makoạ sěngkatau penyiar bědang tawe nibaptisẹ̌. I kau lai botonge  mẹ̌kiwal᷊o su měngangěndung apa i sie masingkạ taumata wal᷊inẹ apang mapulu měngěndung Alkitapẹ̌. Mạeng piạ, lighạ pěhubungi tau ene kụ pěmaringang měngěndung Alkitapẹ̌. Todẹko su tau ene video Kerea Měngěndung Binohẹ Susi? *

10. Kere nilahẹ su 1 Tesalonika 2:7, 8, kerea i kitẹ botonge mẹ̌těno si Paulus?

¹⁰ I kitẹ harusẹ̌ mapadul᷊i su měngangěndung. Pẹ̌tiněna i sire ene sarung makoạ anạu sěmbaụ i kitẹ. (Basa 1 Tesalonika 2:7, 8.) Tantu tawe gampang i sire měngědo mědal᷊ahapị dingangu taumata bal᷊inẹ ělang i Yehuwa lai gunang měkoạ pẹ̌bawal᷊ui tadeạu botonge mẹ̌tahamawu si Yehuwa. I kitẹ harusẹ̌ mẹ̌tul᷊ung si sire makaěbạ hapị mapia su sidang. I kitẹ lai botonge makoạ hapịe, carane ute měnadia tempo bal᷊inẹ kětạeng su tempong měngěndung Alkitapẹ̌, katewe lai su tempo wal᷊inẹ. I kitẹ botonge měnelpon, měndoho pesan, arau mẹ̌tiwo si sie gunang měnodẹ i kitẹ mapadul᷊i si sie.

11. Kawe nụe i kitẹ mapulu mẹ̌bawa měngangěndung sarang sidang?

¹¹ Sěmbaụ pepatah nẹ̌bera, ”Harusẹ̌ piạ taumata sěngkampong gunang měhiking sěngkatau anạ.” Kerene lai botonge ikawera, ”Harusẹ̌ piạ sěmbaụ sidang gunang měkoạ sěngkatau taumata mariadi muritẹ̌.” Hakị u ene, penting si kitẹ mẹ̌bawa měngangěndung gunang mědal᷊ahapị dingangu anạu sěmbaụ, ual᷊ingu anạu sěmbaụ botonge makatul᷊ung si sie limembong marani dingangi Yehuwa. Samurine, měngangěndung sarung mal᷊uasẹ̌ mědal᷊ahapị dingangu anạu sěmbaụ, kụ anạu sěmbaụ botonge makatul᷊ung si sie su tempong i sie nakahombang kasasigěsạ. I kitẹ mapulu mẹ̌tul᷊ung měngangěndung tadeạu makapěndang i sie kai bageang bọu sidang. Kụ, i kitẹ lai mapulu i sie marani dingangu anạu sěmbaụ. Ene sarung makatul᷊ung si sie měngědo mědal᷊ahapị dingangu taumata apang tawe makatul᷊ung si sie kuměndagẹ̌ si Yehuwa. (Amsal 13:20) Kụ, su tempong hapịe bal᷊inẹ ělang i Yehuwa seng tawe mědal᷊ahapị dingange, i sie masingkạ i sie sarung makaěbạ hapị mapia su organisasing Yehuwa.​—Mrk. 10:29, 30; 1 Ptr. 4:4.

12. Kawe nụe i kitẹ harusẹ̌ mẹ̌bisara su měngangěndung soal u mẹ̌diandi měgělị watangeng si Yehuwa kụ ibaptisẹ̌?

¹² Pakasau mẹ̌bisara su měngangěndung soal u kawe nụe penting mẹ̌diandi měgělị watangenge si Yehuwa kụ ibaptisẹ̌. Alasang i kitẹ měněntiro Alkitapẹ̌ su taumata ene  kai gunang mẹ̌tul᷊ung si sie mẹ̌tahamawu si Yehuwa kụ ibaptisẹ̌. Mạeng měngangěndung seng bul᷊ange marading měngěndung Alkitapẹ̌, kụ něngělembo mạeng i sie seng diměnta su pěngangibadang, i sie harusẹ̌ makaěna timonang i kitẹ mẹ̌tul᷊ung si sie měngěndung Alkitapẹ̌ ene kai tadeạu i sie botonge makoạ Sahiding Yehuwa.

13. Manga hal᷊ẹ̌ apa harusẹ̌ koatengu měngangěndung tadeạu botonge ibaptisẹ̌?

¹³ Piạ piram baụ hal᷊ẹ̌ harusẹ̌ koatengu měngangěndung apang mapulu ibaptisẹ̌. Humotong, i sie harusẹ̌ makasingkạ si Yehuwa dingangu kuměndagẹ̌ lai mangimang si Sie. (Yoh. 3:16; 17:3) Bọu ene, měngangěndung ene harusẹ̌ mědal᷊ahapị dingangi Yehuwa lai dingangu anạu sěmbaụ. (Ibr. 10:24, 25; Yak. 4:8) Kụ měngangěndung ene lai harusẹ̌ měngědo měkoạ barang dal᷊akị dingangu mẹ̌tobatẹ̌ bọu haghing dosane. (Kis. 3:19) Měngangěndung ene lai harusẹ̌ mẹ̌běke apa pẹ̌pangimangenge su taumata wal᷊inẹ. (2 Kor. 4:13) Samurine, i sie botonge mẹ̌diandi si Yehuwa gunang měgělị pěbawiahe kụ měnodẹ ene bọu baptisan. (1 Ptr. 3:21; 4:2) Ene kai ěllo sěbạe makal᷊uasẹ̌ gunang kěbị anạu sěmbaụ! Su tempong měngangěndung něnětạ někoạ manga hal᷊ẹ̌ ene, pakasau mẹ̌dalo si sie dingangu bahangsang i sie tadeạu turusẹ̌ měkoạ manga hal᷊ẹ̌ ene.

14. Kerea i kitẹ botonge měmarikěsa kemajuan měngangěndung?

¹⁴ I kitẹ harusẹ̌ masabarẹ̌ su tempong mẹ̌tul᷊ung měngangěndung sarang i sie mẹ̌diandi měgělị watangenge si Yehuwa kụ ibaptisẹ̌. Katewe, i kitẹ lai harusẹ̌ makasingkạ apa i sie mapulu mẹ̌tahamawu si Yehuwa. Apa měngangěndung něnodẹ i sie mětẹ̌tawakal᷊i gunang tumuhụ parentang i Yesus? Arau, apa i sie kětạeng mapulu makaěbạ kasingkạ soal u Alkitapẹ̌?

15. Manga hal᷊ẹ̌ apa nakoạ tatiala sěngkatau měngangěndung botonge ibaptisẹ̌?

¹⁵ Turusẹ̌ parikěsa kemajuan měngangěndung. Contone, apa i sie nẹ̌běke pěndange si Yehuwa? Apa i sie mědẹ̌doa si Yehuwa? (Mz. 116:1, 2) Apa i sie puluang mẹ̌basa Alkitapẹ̌? (Mz. 119:97) Apa i sie marading duměnta su pěngangibadang? (Mz. 22:22) Apa i sie někoạ pẹ̌bawal᷊ui su pěbawiahe? (Mz. 119:112) Apa i sie něnětạ nẹ̌běke apa nikaěndungange su keluarga dingangu hapịe? (Mz. 9:1) Kụ limembong penting, apa i sie mapulu makoạ Sahiding Yehuwa? (Mz. 40:8) Mạeng měngangěndung tawe někoạ kemajuan su manga hal᷊ẹ̌ ene, pakatahuěna mẹ̌kiwal᷊o  si sie kawe nụe, bọu ene pẹ̌bisara pakapia si sie katewe terus terang soal u hal᷊ẹ̌ ene. *

16. Apa nakoạ tatiala i kitẹ tawe harusẹ̌ měnurusẹ̌ pěngangěndungang dingangu sěngkatau měngangěndung?

¹⁶ Bọu tempo sarang tempo parikěsa apa i kau harusẹ̌ měnurusẹ̌ pěngangěndungang dingangu sěngkatau měngangěndung. Kěnang pẹ̌tiněna, ’Apa měngangěndung tawe někoạ persiapan gunang pěngangěndungang? Apa i sie madiri duměnta su pěngangibadang? Apa i sie bědang měkẹ̌koạ barang dal᷊akị? Apa i sie bědang nakoạ anggota agama palsu?’ Mạeng sasimbahu manga kakiwal᷊o ene iya, měnurusẹ̌ pěngangěndungang dingange ene mẹ̌sul᷊ungu měněntiro kumalang su tau madiri maholo. Mạeng měngangěndung tawe kahěngang-hěngang měngẹ̌ngarěga apa niěndungange kụ madiri měkoạ pẹ̌bawal᷊ui, kapaelange kuhạe měnurusẹ̌ pěngangěndungang dingange.

17. Tadeạu botonge makapěněntiro mapaelẹ̌ kere nitodẹ su 1 Timotius 4:16, apa harusẹ̌ koateng i kitẹ?

¹⁷ Hal᷊ẹ̌ měkoạ muritẹ̌ penting gunang koateng i kitẹ, kụ i kitẹ mapulu mẹ̌tul᷊ung měngangěndung měkoạ kemajuan sarang ibaptisẹ̌. Hakị u ene, i kitẹ sarung měmala Alkitapẹ̌ měněntiro kụ i kitẹ sarung měnodẹ su měngangěndung i kitẹ makěndagẹ̌ dingangu mangimang su apa nitěntirong i kitẹ. I kitẹ lai měmahangsang měngangěndung gunang mědal᷊ahapị dingangu anạu sěmbaụ su sidang. I kitẹ lai mělahẹ si sie soal u mẹ̌diandi měgělị watangenge si Yehuwa dingangu ibaptisẹ̌. I kitẹ lai sarung měmarikěsa sarang sude kemajuan měngangěndung. (Pěmanda kotak ” Koatengu Měnaněntiro”.) I kitẹ mal᷊uasẹ̌ ual᷊ingu botonge timol᷊e někoạ hal᷊ẹ̌ makasal᷊amatẹ̌ ini! Karimạko i kitẹ mẹ̌tawakal᷊i mẹ̌tul᷊ung měngangěndung tadeạu botonge měkoạ kemajuan kụ ibaptisẹ̌.