Su ayatẹ̌ ene niul᷊ị, ”Mạeng i kau nakasilo sěngkatau pejabat tinggi něnigěsạ taumata masusah dingangu napakawengkọ kal᷊aadilẹ̌ arau barang nihino su wilayane, abe huměkosẹ̌, ual᷊ingu i sie pẹ̌pandangu pribadi limembong marangẹ bọu i sie. Bědang piạ limembong marangẹ sul᷊ungu manga pějabatẹ̌.”​—Pkh. 5:8.

Bọu tiněnang taumata, bawera su ayatẹ̌ ene kakělaěng kětạeng nělahẹ soal u pěměrentang taumata. Katewe, mạeng mẹ̌tiněna pakapia, bawera ene sěběnarẹ̌e lai nělahẹ katěngadẹ̌ soal i Yehuwa, kụ ene makahiborẹ̌ si kitẹ.

Pengkhotbah 5:8 nẹ̌bisara soal u pějabatẹ̌ seng něnigěsạ taumata masusah dingangu někoạ barang tawẹ adile. Sěběnarẹ̌e, i sie harusẹ̌ mẹ̌tahěndung piạ pějabatẹ̌ limembong marangẹ arau makawasa bọu i sie. Kụ, aramanung piạ lai limembong marangẹ bọu pějabatẹ̌ ene. Katewe, su pěmamarentang taumata, kal᷊awokange pějabatẹ̌ kai tawẹ adile kụ taumata nasigěsạ ual᷊ingu apa nikoạ i sire.

Katewe, maning kakělaěng tawẹ apa pělaharapẹ̌, i kitẹ botonge mahiborẹ̌ ual᷊ingu masingkạ Yehuwa měmẹ̌manda kěbị pěměrenta, sarang lai pejabat karangetange su pěmamarentang taumata. I kitẹ botonge makitul᷊ung su Mawu dingangu měnarakang bawawaěng i kitẹ si Sie. (Mz. 55:22; Flp. 4:6, 7) I kitẹ masingkạ ”matang i Yehuwa měmẹ̌manda patikụ dunia, ual᷊ingu i Sie mapulu měnodẹ katatoghas’E gunang taumata apang masatia si Sie dingangu kaguwạu naung”.​—2 Taw. 16:9.

Nal᷊ahẹ, Pengkhotbah 5:8 něnodẹ su pěmamarentang taumata, mang piạ pějabatẹ̌ limembong marangẹ bọu pějabatẹ̌ wal᷊inẹ. Katewe limembong penting, ayatẹ̌ ini něnodẹ i Yehuwa, Mawu Makawasa, kai Měngangawasa Karangetange. I Sie měmẹ̌manda kěbị apa nikoạu taumata. Orasẹ̌ ini, i Sie měpẹ̌parenta limiung Ahus’E, Yesus Kristus, Datung Kararatuang. Kụ, kere i Amange, sěntiniạ maadilẹ̌, Yesus lai kerene.