1. Aramanung, kange i kitẹ nakapěndang tawe gampang měkoạ kapulung Yehuwa?

TUMUHỤ si kau, kange i kau nakapěndang tawe gampang měkoạ kapulung Yehuwa? Apa su tempong i kau nakahombang masalah mawěhạ arau su tempong pěbawiahu matěnang? Su tempong tụtatěngo masalah, i kitẹ aramanung sěntiniạ měngẹ̌ngumbala si Yehuwa. Katewe, apa koateng i kitẹ su tempong pěbawiahi kitẹ matěnang? Apa i kitẹ pẹ̌sěngsul᷊ẹ miwul᷊e měkoạ kapulung Yehuwa ene kai hal᷊ẹ̌ sěbạe penting? Yehuwa něgělị laingatẹ̌ su tau Israel soal u hal᷊ẹ̌ ene.​—Ul. 6:10-12.

2. Kerea Datu Asa nakoạ pẹ̌tatěnoěng mapaelẹ̌?

² Datu Asa kai nakoạ pẹ̌tatěnoěng mapaelẹ̌ soal u kahěngang-hěngang měngumbala si Yehuwa. I sie někoạ kapulung Yehuwa bal᷊inẹ kětạeng su tempo masigěsạ, katewe lai su tempo matěnang. Dongkeng humotong, ”Asa nẹ̌tahamawu si Yehuwa dingangu kaguwạu naunge”. (1 Raj. 15:14, catatan kaki.) Sěmbaụ cara i sie nẹ̌tahamawu si Yehuwa dingangu kaguwạu naunge ene kai napakailang ibadah palsu su Yehuda. Alkitapẹ̌ naul᷊ị i sie ”něminasa manga mezbang mawu wal᷊inẹ dingangu manga tampạ pěnaněmbang, něminasa manga pilar masusi, dingangu něnuwang dihi masusi”. (2 Taw. 14:3, 5) I sie lai něměcatẹ̌ si omane, i Maaka, bọu kedudukan penting su kararatuange. Kawe nụe? Ual᷊ingu i omane měmẹ̌mahangsang rakyatẹ̌ gunang měněmbah berhala.​—1 Raj. 15:11-13.

3. Apa sarung ěndungang i kitẹ su pěngangěndung ini?

³ Asa tawe kětạeng napakailang ibadah palsu. I sie lai nẹ̌tul᷊ung tau Yehuda gunang saụ měngibadah si Yehuwa. Ual᷊ingu ene, Yehuwa něgělị tempo matěnang si  Asa dingangu su tau Israel. Su kanandụu mapul᷊o taung pěmamarentang i Asa, ”negeri ene bebasẹ̌ bọu gangguan”. (2 Taw. 14:1, 4, 6) Su pěngangěndungang ini, i kitẹ sarung měngěndung kerea i Asa dingangu tau Kristen su abad humotong něpakẹ pakapia tempo matěnang. Samurine, i kitẹ sarung sumimbahẹ̌ kakiwal᷊o ini: Mạeng i kau mětẹ̌tanạ su negeri tawe nẹ̌sěding hal᷊ẹ̌ u Sahiding Yehuwa, kerea i kau botonge měpakẹ pakapia tempo matěnang ene?

4. Tumuhụ 2 Tawarikh 14:2, 6, 7, kerea i Asa něpakẹ pakapia tempo matěnang?

⁴ Basa 2 Tawarikh 14:2, 6, 7. Asa naul᷊ị su tau Yehuda Yehuwa seng ”něgělị [si sire] dame bọu kěbị sědụ su rěduhi [sire]”. Asa tawe nẹ̌pěndang tempong dame ene kai tempo gunang mẹ̌santai. Katewe, i sie něnětạ němangung soa, těndạ, menara, dingangu gerbang. I sie naul᷊ị su tau Yehuda, ”Negeri ini bědang tataghuaneng i kitẹ.” Apa mangal᷊ene bawerang i Asa? Ene mangal᷊ene rakyatẹ̌ bebasẹ̌ ual᷊ingu tawẹ apa sědụ měnahaghe si sire kụ i sire bebasẹ̌ měmangung. I sie němahangsang rakyate tadeạu měpakẹ pakapia tempo ene.

5. Kawe nụe i Asa něnoghasẹ̌ manga prajurite?

⁵ Asa lai něpakẹ tempo matěnang ene gunang mapakatoghasẹ̌ manga prajurite. (2 Taw. 14:8) Apa ini mangal᷊ene i sie tawe mangimang si Yehuwa? Tala. Sěběnarẹ̌e, Asa masingkạ i sie piạ tugasẹ̌ gunang mẹ̌tul᷊ung rakyate tadeạu sadia tumatěngo kasasigěsạ sarung mariadi. Asa masingkạ negeri ene tawe sarung turusẹ̌ makapěndang dame, kụ ene kahěngang.

6. Kerea tau Kristen su abad humotong něpakẹ pakapia tempo matěnang?

⁶ Maning tau Kristen su abad humotong masau dẹ̌darihang, i sire lai nakapěndang tempo matěnang. Kerea i sire  něpakẹ pakapia tempo ene? I sire tawe něngědo němahiạ habarẹ̌ mapia. Běke su bukẹ̌ Kisah naul᷊ị i sire ”něbiahẹ̌ dingangu pěndang matakụ si Yehuwa”. I sire turusẹ̌ něhabarẹ̌ habarẹ̌ mapia, kụ hasile, i sire ”turusẹ̌ natambah mal᷊awọ”. Nal᷊ahẹ, Yehuwa něngal᷊amatẹ̌ sěmangati sire gunang měnginjilẹ̌ su tempo matěnang.​—Kis. 9:26-31, catatan kaki.

7-8. Apa nikoạ i Paulus dingangu tau Kristen wal᷊inẹ su tempong piạ kesempatan? Lahẹko.

⁷ Tau Kristen su abad humotong něpakẹ kěbị kesempatan gunang měmahiạ habarẹ̌ mapia. Sěmbaụ contone, su tempong Rasul Paulus nakasingkạ piạ kesempatan gěguwạ si sie gunang měnginjilẹ̌ su Efesus, i sie něpakẹ kesempatan ene gunang měnginjilẹ̌ dingangu měkoạ muritẹ̌ su soa ene.​—1 Kor. 16:8, 9.

⁸ Paulus dingangu tau Kristen wal᷊inẹ lai piạ kesempatan gunang měnginjilẹ̌ su lawọ taumata su tempong piạ masalah sunat nariadi su taung 49 M. (Kis. 15:23-29) Su apang piạ putusang nihabarẹ̌ su sidang-sidang, manga muritẹ̌ nẹ̌tawakal᷊i gunang měhabarẹ̌ ”habarẹ̌ mapia soal u hengetang i Yehuwa”. (Kis. 15:30-35) Apa hasile? Alkitapẹ̌ naul᷊ị, ”Pangangimangu sidang-sidang jamaatẹ̌ nakoạ limembong matoghasẹ̌, kụ jumlang i sire kakạtambane bọu ěllo sarang ěllo.”​—Kis. 16:4, 5.

9. Kerea situasi su lawọ negeri orasẹ̌ ini, kụ apa wotonge tiněnang i kitẹ?

⁹ Orasẹ̌ ini, su lawọ negeri i kitẹ bebasẹ̌ měnginjilẹ̌. Apa i kau mětẹ̌tanạ su negeri kerene? Mạeng iya, kěnang pẹ̌tiněna, ’Kerea iạ něpakẹ kawawebasẹ̌ ini?’ Su ěllo pěngěngsuenge ini, organisasing Yehuwa seng někoạ hal᷊ẹ̌ měnginjilẹ̌ dingangu měněntiro kaguwakenge su patikụ dunia. (Mrk. 13:10) Piạ lawọ kesempatan niwuka gunang manga ělang i Yehuwa.

10. Darua Timotius 4:2 němahangsang si kitẹ gunang měkoạ apa?

¹⁰ Kerea i kau botonge měpakẹ pakapia tempo matěnang ini? (Basa 2 Timotius 4:2.) Pẹ̌tiněnạe apa i kau arau anggota kěluarganu botonge limembong masau měnginjilẹ̌, arau ěndịu lai makoạ perintis? Orasẹ̌ ini bal᷊inẹbe tempone gunang měnampung arětạ, ual᷊ingu manga hal᷊ẹ̌ ene tawe masal᷊amatẹ̌ sěngkasio dingangi kitẹ lumiu wọu kasasusah masaria.​—Amsal 11:4; Mat. 6:31-33; 1 Yoh. 2:15-17.

11. Apa seng nikoạ u organisasing Yehuwa gunang mẹ̌tul᷊ung měmahiạ habarẹ̌ mapia?

¹¹ Lawọ penyiar seng něngěndung bawera wuhu tadeạu botonge mẹ̌tul᷊ung taumata měngěndung soal i Yehuwa. Organisasing Yehuwa seng něnadia lawọ bahan gunang mẹ̌tul᷊ung si sire měnginjilẹ̌ su limembong lawọ bawera. Contone, su taung 2010, publikasing i kitẹ seng nasadia ěndịu su 500 bawera. Orasẹ̌ ini, ene seng natambah kụ seng nal᷊iu wọu 1.000 bawera!

12. Kerea taumata nakaěbạ gunane ual᷊ingu dimaringihẹ̌ habaru Kararatuang su werang i sire hala? Gělịko sěmbaụ contoh.

¹² Apa pěngarune su taumata su tempong i sire nakaringihẹ̌ soal i Yehuwa su bawerang i sire hala? Pẹ̌tiněna pengalaman sěngkatau saudari seng nakaěbạ gunane bọu kebaktian regional su Memphis, Tennessee, A.S. Kebaktian ene nikoạ su werang Kinyarwanda, ene kai bawera pẹ̌paketang su Rwanda, Kongo (Kinshasa), dingangu Uganda. Nasueng kebaktian ene, saudari měpẹ̌pakẹ bawera Kinyarwanda nẹ̌bera, ”Buhudeng ini iạ nakaěna kěbị acara kebaktian dongkeng iạ něngal᷊ing sarang Amerika Serikat 17 su taunge tamai.” Nal᷊ahẹ, saudari ini sěbạe mal᷊uasẹ̌ su tempong nakaringihẹ̌ acara kebaktian  su bawerane hala. Mạeng situasinu nẹ̌tatahino, apa i kau mapulu měngěndung bawera wal᷊inẹ gunang mẹ̌tul᷊ung taumata su tampạu? Apa taumata su daerah sidangu limembong mal᷊uasẹ̌ dumaringihẹ̌ habarẹ̌ mapia mạeng i kau mẹ̌bisara si sire měpakẹ bawerang i sire hala? Tawakal᷊inu sarung makakoạ si kau mal᷊uasẹ̌.

13. Kerea anạu sěmbaụ su Rusia něpakẹ pakapia tempo matěnang?

¹³ Tawe kěbị anạu sěmbaụ bebasẹ̌ měnginjilẹ̌. Su piram baụ negeri, anạu sěmbaụ tawe webasẹ̌ měnginjilẹ̌ ual᷊ingu pěměrenta nẹ̌sěding hal᷊ẹ̌ i kitẹ. Contone, kěnang pẹ̌tiněna soal u anạu sěmbaụ su Rusia. Su apang hal᷊ẹ̌ i kitẹ nisěding karěngụe pul᷊one su taunge, su wul᷊ang Maret taung 1991, i kitẹ nakaěbạ kawawebasẹ̌. Su tempo ene, piạ ěndịu 16.000 penyiar Kararatuang su Rusia. Duampul᷊o taung tuhụe, jumlah penyiar nakoạ nal᷊iu wọu 160.000 su kataune! Nal᷊ahẹ, anạu sěmbaụ i kitẹ něpakẹ pakapia kawawebasẹ̌ gunang měnginjilẹ̌. Katewe, tempo matěnang tawe turusẹ̌ ene. Maning kerene, pẹ̌bawal᷊ui ene tawe nakailang sěmangatu anạu sěmbaụ gunang ibadah si Yehuwa. I sire turusẹ̌ nẹ̌tawakal᷊i tadeạu botonge mẹ̌tahamawu si Yehuwa.

14-15. Kerea Yehuwa něpakẹ katatoghas’E gunang mẹ̌tul᷊ung si Asa?

¹⁴ Su zaman i Asa, tempo matěnang samurine nasue. Piạ pasukan gěguwạ dingangu matoghasẹ̌ diměnta bọu Etiopia. Těmbonange, i Zerah, mangimang i sie dingangu prajurite sarung makawatạ Yehuda. Katewe, Datu Asa mangimang si Yehuwa. Asa nẹ̌doa, ”Ambangeko i kami, oh Yehuwa Mawung kami, ual᷊ingu i kami měngẹ̌ngumbala si Kau, kụ dingangu areng’U i kami mělawang pasukan ini.”​—2 Taw. 14:11.

 ¹⁵ Maning pasukan Etiopia kai limembong mal᷊awọ, Asa masingkạ Yehuwa sěbạe matoghasẹ̌ dingangu sarung mẹ̌tul᷊ung manga ělang’E. Kụ Yehuwa kahěngang nẹ̌tul᷊ung manga ělang’E dingangu němatạ pasukan Etiopia.​—2 Taw. 14:8-13.

16. Kerea i kitẹ masingkạ tempo matěnang tawe sarung turusẹ̌ ene?

¹⁶ Maning i kitẹ běga apa sarung mariadi si kitẹ sěngkatau-sěngkatau su tempo mahi, i kitẹ masingkạ tempo matěnang nikapěndangengu manga ělang i Yehuwa ene kětạeng sementara. Pẹ̌tahěndung, Yesus seng něněbal᷊ẹ̌ su ěllo pěngěngsuenge ”manga wangsa sarung mawěngsing [su manga murite]”. (Mat. 24:9) Bọu ene lai, Rasul Paulus naul᷊ị, ”Kěbị apang mětẹ̌tahamawu su Mawu dingangu nakoạ tumatol᷊eng Kristus Yesus lai sarung darihang.” (2 Tim. 3:12) Setang ”sěbạe pědu” kụ i kitẹ tawe makatal᷊ang bọu pědune.​—Why. 12:12.

17. Ěndịu kerea i kitẹ makahombang sasal᷊ukạ su pangangimang?

¹⁷ Seng mal᷊ighạ tempone, i kitẹ kěbị sarung makahombang sasal᷊ukạ su pangangimang. Sarung piạ ”kasasusah masaria kụ bědang tawe pernah nariadi dongkeng tětạu dunia sarang orasẹ̌ ini”. (Mat. 24:21) Su kanandụu tempo ene, anggota keluarga ěndịu sarung mẹ̌pědu si kitẹ kụ hal᷊ẹ̌ i kitẹ lai ěndịu sarung sědingang. (Mat. 10:35, 36) Apa i kitẹ pẹ̌sěngkatau sarung makoạ kere i Asa, kụ mangimang Yehuwa sarung mẹ̌tul᷊ung dingangu měndiagạ si kitẹ?

18. Tumuhụ Ibrani 10:38, 39, apa makatul᷊ung si kitẹ mạeng tempo matěnang seng masue?

¹⁸ Yehuwa seng někoạ si kitẹ sadia tumatěngo apa sarung mariadi mahi. I Sie něngahạ ”ělang masatia dingangu matahuěna” gunang měnadia ”kaěng nẹ̌tatahino su tempone” tadeạu i kitẹ tatapẹ̌ matoghasẹ̌. (Mat. 24:45) Katewe, i kitẹ harusẹ̌ měkoạ bageang i kitẹ dingangu měnoghasẹ̌ pangangimang si Yehuwa.​—Basa Ibrani 10:38, 39.

19-20. Su apang bọu nẹ̌basa 1 Tawarikh 28:9, kakiwal᷊o apa harusẹ̌ tiněnang i kitẹ, kụ kawe nụe i kitẹ harusẹ̌ mẹ̌tiněna ene?

¹⁹ Kere Datu Asa, i kitẹ lai harusẹ̌ ”mědeạ si Yehuwa”. (2 Taw. 14:4; 15:1, 2) I kitẹ něnětạ nědeạ si Yehuwa su tempong i kitẹ něngěndung soal i Sie kụ nibaptisẹ̌. Bọu ene, i kitẹ harusẹ̌ měpakẹ haghing  kesempatan gunang měnoghasẹ̌ kakěndagi kitẹ si Yehuwa. Hakị u ene, i kitẹ harusẹ̌ mẹ̌tiněna, ’Apa iạ marading duměnta su pěngangibadang?’ Su pěngangibadang, i kitẹ nakaěbạ katatoghasẹ̌ gunang turusẹ̌ mẹ̌tahamawu si Yehuwa, kụ i kitẹ lai nitoghasengu anạu sěmbaụ. (Mat. 11:28) I kitẹ lai botonge mẹ̌tiněna, ’Apa iạ piạ kebiasaan měngěndung Alkitapẹ̌ ěllo-ěllo?’ Mạeng i kau mětẹ̌tanạ dingangu keluarga, apa i kau něnadia tempo sabang misa gunang ibadah keluarga? Arau, mạeng i kau mětẹ̌tanạ sẹ̌sanu, apa i kau měkẹ̌koạ pěngangěndungang Alkitapẹ̌ hala? Bọu ene lai, apa i kau nẹ̌tawakal᷊i měnginjilẹ̌ dingangu měněntiro?

²⁰ Kawe nụe i kitẹ harusẹ̌ mẹ̌tiněna manga kakiwal᷊o ene? Alkitapẹ̌ naul᷊ị Yehuwa měmẹ̌marikěsa tiněna dingangu naung i kitẹ, hakị u ene i kitẹ lai harusẹ̌ měkoạ hal᷊ẹ̌ mẹ̌sul᷊ung. (Basa 1 Tawarikh 28:9.) Mạeng i kitẹ nakasingkạ cita-cita, kakanoạ, arau tiněnang i kitẹ harusẹ̌ bal᷊uiang, i kitẹ harusẹ̌ makitul᷊ung si Yehuwa gunang měkoạ pẹ̌bawal᷊ui ene. Ini kai tempone gunang mẹ̌sasadia tumatěngo sasal᷊ukạ sarung mariadi. Abe wala hal᷊ẹ̌ wal᷊inẹ makakoạ si kau tawe měpakẹ pakapia tempo matěnang ini!