1. Kawe nụe sipatẹ̌ egois bọu dunia ini piạ pěngarune su kasasanạu naung i kitẹ?

KAWE nụe masigěsạ měkoạ apa seng niěndungang su Hengetang u Mawu? Sěmbaụ alasange ute gunang měkoạ barang mapia, i kitẹ harusẹ̌ masanạ naung. Su ”ěllo pěngěnsuenge” ini, masigěsạ tatapẹ̌ masanạ naung, ual᷊ingu i kitẹ měbẹ̌biahẹ̌ su tal᷊oarang taumata ”makěndagẹ̌ su watangeng i sire, makěndagẹ̌ su roitẹ̌, masanang, mẹ̌pěndang watangeng limembong kapaelange,” dingangu ”tawe měkẹ̌kakědangu watangeng”. (2 Timotius 3:1-3) I kitẹ ělangu Mawu masingkạ manga kakanoạ ene dal᷊akị, katewe biahu taumata kerene kakělaěng kahěngang-hěngang mal᷊uasẹ̌. (Mazmur 37:1; 73:3) Aramanung i kitẹ nẹ̌tiněna, ’Apa piạ gunane mạeng iạ měngal᷊imona urusangu taumata wal᷊inẹ sul᷊ungu urusangku? Apa taumata wal᷊inẹ bědang měngadatẹ̌ si siạ mạeng iạ masanạ naung?’ (Lukas 9:48) Mạeng i kitẹ měmala sipatẹ̌ egois bọu dunia ini měngahạ kakanoạ i kitẹ, pẹ̌dal᷊ahapị  i kitẹ dingangu anạu sěmbaụ sarung marusa, kụ taumata wal᷊inẹ masigěsạ makakiral᷊a i kitẹ kai tau Sahani. Katewe, mạeng i kitẹ měngěndung kasasanạu naung manga ělangu Mawu, kụ mẹ̌těno si sire, ene sarung piạ hasile mapaelẹ̌.

2. Apa kaěndungang i kitẹ bọu manga ělangu Mawu su tempong tamai?

² Apa nakatul᷊ung manga ělangu Mawu su tempong tamai botonge nakoạ hapị u Mawu? Kerea i sire nakal᷊uasẹ̌ naung’E? Su apa i sire nakaěbạ katatoghasẹ̌ gunang měkoạ barang nihino? Mạeng i kitẹ mẹ̌basa soal i sire su Alkitapẹ̌ dingangu mẹ̌tiněna ene, pangangimang i kitẹ sarung kakatoghase.

3, 4. (a) Kerea Yehuwa něněntiro si kitẹ? (b) Gunang měnoghasẹ̌ pangangimang, kawe nụe kětạeng piạ kasingkạ ene bědang kurang?

³ Yehuwa něnadia barang makatul᷊ung si kitẹ piạ pangangimang matoghasẹ̌. I kitẹ nakatarimạ sasasa mapia dingangu pelatihan bọu Alkitapẹ̌, publikasi, situs web i kitẹ, JW Broadcasting, dingangu pěngangibadang lai kebaktian. Katewe Yesus nělahẹ, piạ kasingkạ ene bědang kurang. I sie naul᷊ị, ”Kaěngku ute kai měkoạ kapulung i Sie seng něndolohẹ̌ si siạ dingangu mapakasue hal᷊ẹ̌’E.”​—Yohanes 4:34.

⁴ Si Yesus, měkoạ kapulung Mawu ene mẹ̌sul᷊ungu kaěng. Kumaěng kaěng mal᷊awọ gizine makakoạ badang masehatẹ̌. Kerene lai měkoạ kapulung Mawu makatoghasẹ̌ pangangimang i kitẹ. Contone, apa i kau bọu nakapěndang nal᷊owe su tempong nakoạ sarang pertemuan dinas lapangan, katewe su tempong nawal᷊ị bọu něnginjilẹ̌ i kau mal᷊uasẹ̌?

5. Apa gunane mạeng i kitẹ matahuěna?

⁵ Mạeng i kitẹ měkoạ apa dẹ̌dorongang i Yehuwa, i kitẹ matahuěna. (Mazmur 107:43) Taumata matahuěna sarung makaěbạ lawọ gunane. ”Kěbị apa ikẹ̌kapulunu tawe makasul᷊ung ene. . . . [Katatahuěna] kai kalung pěbawiahẹ̌ si sire apang měnẹ̌něngal᷊ẹ̌ ene, kụ taumata apang měnẹ̌něngal᷊ẹ̌ ene matoghasẹ̌ sarung isěbạ mal᷊uasẹ̌.” (Amsal 3:13-18) Yesus naul᷊ị, ”Orasẹ̌ ini i kamene masingkạ manga hal᷊ẹ̌ ene, katewe i kamene sarung mal᷊uasẹ̌ mạeng měkoạ manga halẹ̌ ene.” (Yohanes 13:17) Manga muriti Yesus sarung mal᷊uasẹ̌ mạeng i sire turusẹ̌ měkoạ apa niorong i Yesus. Tumol᷊e těntirone dingangu kakanoạe nakoạ dal᷊engu wiahi sire.

6. Kawe nụe i kitẹ harusẹ̌ turusẹ̌ měkoạ apa seng niěndungang i kitẹ?

⁶ Orasẹ̌ ini, i kitẹ lai harusẹ̌ turusẹ̌ měkoạ apa seng niěndungang. Kěnang pẹ̌tiněna soal u basẹ̌ u oto. Aramanung si sie piạ lawọ alatẹ̌ dingangu kasingkạ soal u masina. Ene botonge makakoạ si sie makoạ basẹ̌ mapaelẹ̌. Aramanung si sie seng piạ lawọ pengalaman, katewe i sie harusẹ̌ turusẹ̌ měpakẹ alatẹ̌ dingangu kasingkạ ene, tadeạu tatapẹ̌ makoạ basẹ̌ mapaelẹ̌. Kerene lai, su tempong buhudeng něngěndung těntiro nihino, i kitẹ mal᷊uasẹ̌ ual᷊ingu někoạ apa seng niěndungang. Katewe tadeạu tatapẹ̌ mal᷊uasẹ̌, i kitẹ harusẹ̌ turusẹ̌ měkoạ těntirong i Yehuwa su pěbawiahẹ̌ ěllo-ěllo.

7. Apa harusẹ̌ koateng i kitẹ gunang mẹ̌těno manga contoh su Alkitapẹ̌?

⁷ Su pěngangěndungang ini, i kitẹ sarung měngěndung piram baụ situasi makasigěsạ si kitẹ měnodẹ kasasanạu naung. I kitẹ sarung měngěndung kerea manga ělangu Mawu su tempong tamai tatapẹ̌ masanạ naung. Katewe, kětạeng mẹ̌basa běkene, ene bědang kurang. I kitẹ harusẹ̌ mẹ̌tiněna soal u ene dingangu měkoạ ene su pěbawiahi kitẹ.

8, 9. Apa kaěndungang i kitẹ soal u kasasanạu naung i Paulus kere niwohẹ su Kisah 14:8-15? (Pěmanda gambarẹ̌ humotong su pěngangěndungang ini.)

⁸ Mawu mapulu kěbị taumata ”masal᷊amatẹ̌ dingangu makaěbạ kasingkạ nihino soal u katěngadẹ̌”. (1 Timotius 2:4) Kerea pěndangu su taumata apang bědang tawe něngěndung těntiro nihino? Rasul Paulus něnginjilẹ̌ su tau Yahudi seng masingkạ soal i Yehuwa. Katewe i sie lai něnginjilẹ̌ si sire apang měnẹ̌němbah mahan duata. Su tempong něnginjilẹ̌ si sire, piạ barang nakasal᷊ukạ kasasanạu naung i Paulus. Apa ene?

⁹ Su perjalanan utusan injil kahumotongange, i Paulus dingangi Barnabas nakoạ sarang Listra. Tau Likaonia nẹ̌pěndang i Paulus dingangi Barnabas kai taumata matoghasẹ̌ kụ nẹ̌sěbạ si rẹ̌dua dingangu arengu mahan duatang i sire Zeus dingangi Hermes. Apa i Paulus dingangi Barnabas mal᷊uasẹ̌ nikoạ kerene? Apa i rẹ̌dua nẹ̌tiněna ene limembong kapaelange sul᷊ungu darihang kere su darua soa wal᷊inẹ seng nitiwong i rẹ̌dua? Apa i rẹ̌dua nẹ̌pěndang ene makakoạ limembong mal᷊awọ taumata makaringihẹ̌ habarẹ̌ mapia? Tala! I rẹ̌dua sěbạe nasusah naung kụ naul᷊ị, ”Kawe i kamene někoạ manga hal᷊ẹ̌ ini? I kami lai taumata piạ kurange kere i kamene.”​—Kisah 14:8-15.

10. Kawe nụe i Paulus dingangi Barnabas tawe nẹ̌pěndang i rẹ̌dua limembong kapaelange bọu tau Likaonia?

¹⁰ Su tempong i Paulus dingangi Barnabas naul᷊ị i rẹ̌dua lai taumata, ene mangal᷊ene i rẹ̌dua tawe nasukụ. I sire bal᷊inẹbe maul᷊ị cara i rẹ̌dua měngibadah mẹ̌sul᷊ung dingangu tau Likaonia. Paulus dingangi Barnabas kai utusan injil nirolohu Mawu. (Kisah 13:2) I rẹ̌dua nilanisẹ̌ dingangu rohkẹ̌ masusi kụ piạ pělaharapẹ̌ sěbạe mapaelẹ̌. Katewe, ene tawe makoạ alasang si rẹ̌dua gunang mẹ̌pěndang i rẹ̌dua limembong kapaelange. I rẹ̌dua masingkạ taumata sene lai botonge makaěbạ pělaharapẹ̌ měbiahẹ̌ su sorga mạeng i sire měnarimạ habarẹ̌ mapia.

11. Kerea i kitẹ botonge mẹ̌těno kasasanạu naung i Paulus su tempong měnginjilẹ̌?

¹¹ Ini sěmbaụ cara i kitẹ měnodẹ kasasanạu naung kere i Paulus. I kitẹ tawe mẹ̌pěndang i kitẹ limembong kapaelange ual᷊ingu nakaěbạ tugasẹ̌ gunang měnginjilẹ̌ arau ual᷊ingu apa seng nikakoạ i kitẹ dingangu tul᷊umang i Yehuwa. I kitẹ botonge mẹ̌kiwal᷊o su watangeng i kitẹ, ’Kerea pěndangku su taumata apang su tampạku? Apa iạ berprasangka su taumata bọu kelompok bal᷊inẹ?’ Su patikụ dunia, Sahiding Yehuwa mětẹ̌tawakal᷊i mědeạ taumata apang mapulu dumaringihẹ̌ habarẹ̌ mapia. Piạ u nẹ̌tawakal᷊i něngěndung bawera arau kebudayaan suku arau bangsa tawe lẹ̌arěgangu taumata. Katewe i sire tawe nẹ̌pěndang limembong kapaelange bọu taumata apang lẹ̌habareng i sire. I sire kai nẹ̌tawakal᷊i makaěna pěndangu taumata tadeạu botonge makatul᷊ung si sire měnarimạ habaru Kararatuang.

12. Kerea i Epafras něnodẹ i sie kahěngang-hěngang mapadul᷊i su taumata wal᷊inẹ?

¹² Cara wal᷊inẹ měnodẹ i kitẹ masanạ naung ute mẹ̌doa gunang anạu sěmbaụ ”apang seng nakaěbạ pangangimang mẹ̌sul᷊ung kaarěgane dingangu pangangimang i [kitẹ]”. (2 Petrus 1:1) Ene nikoạ i Epafras. Alkitapẹ̌ kětạeng tělung sul᷊ẹ nẹ̌bisara soal i sie. Su tempong i Paulus nakoạ tahanan u wal᷊e su Roma, i sie němohẹ su tau Sahani su Kolose soal  i Epafras, ”I sie dingangu kaguwạu naung sěntiniạ mědẹ̌doa gunang i kamene.” (Kolose 4:12) I Epafras masingkạ kahěngang kerea anạu sěmbaụ, kụ i sie sěbạe mapadul᷊i si sire. I Paulus naul᷊ị, i Epafras ”niselẹ̌ sěngkasio ringangku”, ene mangal᷊ene i Epafras lai piạ masalane hala. (Filemon 23) Katewe i sie měpẹ̌padul᷊i kebutuhan taumata wal᷊inẹ. I Epafras nẹ̌doa gunang anạu sěmbaụ, kụ i kitẹ lai botonge mẹ̌těno si sie. I kitẹ lai botonge mẹ̌sěbạ areng i sire. Daroa kerene gěguwạ kawasane.​—2 Korintus 1:11; Yakobus 5:16.

13. Kerea i kau botonge mẹ̌těno si Epafras su tempong mẹ̌doa?

¹³ Pẹ̌tiněna i sai botonge sěbạkengu su ral᷊ungu daroanu. Aramanung i kau botonge mẹ̌tiněna soal u hapị su sidang arau keluarga apang tụtatěngo haghing sigěsạ. Ěndịu i sire harusẹ̌ měkoạ putusang arau harusẹ̌ lumawang sasal᷊ukạ. I kau lai botonge mẹ̌doa gunang anạu sěmbaụ apang areng i sire kạbawohẹ su artikel jw.org ”Saksi-Saksi Yehuwa yang Dipenjarakan Karena Iman Mereka”. (Pěmanda su bageang RUANG BERITA > BERITA HUKUM.) I kau lai botonge mẹ̌doa gunang i sire apang nitěntangu taumata ikẹ̌kěndagẹ̌ ual᷊ingu papate, i sire apang nakahombang bencana arau pẹ̌sasekẹ, dingangu i sire apang biahe masusah. Piạ lawọ anạu sěmbaụ membutuhkan daroang i kitẹ! Su tempong i kitẹ mẹ̌doa gunang i sire, ene něnodẹ i kitẹ bal᷊inẹ kětạeng nẹ̌tiněna soal i kitẹ hala katewe lai nẹ̌tiněna soal u kebutuhan taumata wal᷊inẹ. (Filipi 2:4) Yehuwa dụdaringihẹ̌ daroa kerene!

14. Kerea Yehuwa nakoạ dumararingihẹ̌ kapaelange?

¹⁴ Cara wal᷊inẹ lai měnodẹ i kitẹ masanạ naung ute makoạ dumararingihẹ̌ mapia. Yakobus 1:19 naul᷊ị i kitẹ harusẹ̌ ”masahawụ dumaringihẹ̌”. Yehuwa kai dumararingihẹ̌ kapaelange. (Kejadian 18:32; Yosua 10:14) Contone, kěnang pẹ̌basa apa kạbawohẹ su Keluaran 32:11-14. (Basa.) Maning tawe harusẹ̌ mẹ̌dorong těgu wọu i Musa, Yehuwa  němala si Musa mělahẹ apa nikapěndangenge. Apa i kau masabarẹ̌ dumaringihẹ̌ su tau měkẹ̌koạ pẹ̌sasal᷊a su tempong tamai, bọu ene tumol᷊e těgune? Yehuwa masabarẹ̌ dụdaringihẹ̌ daroang taumata apang mědẹ̌doa si Sie dingangu pangangimang.

15. Kerea i kitẹ mẹ̌těno si Yehuwa měngadatẹ̌ taumata wal᷊inẹ?

¹⁵ Pẹ̌kiwal᷊o su watangengu, ’Mạeng i Yehuwa masabarẹ̌ dimaringihẹ̌ si Abraham, Rakhel, Musa, Yosua, Manoah, Elia, dingangi Hizkia, bal᷊inẹbe iạ lai harusẹ̌ kerene? Apa iạ botonge limembong měngadatẹ̌ su kěbị anạu sěmbaụ kụ dumaringihẹ̌ dingangu sěngapang botonge tumol᷊e těgung i sire? Apa su sidang arau su keluarga, piạ u harusẹ̌ limembong pandungangku? Apa botonge koatengku gunang i sire?’​—Kejadian 30:6; Hakim-Hakim 13:9; 1 Raja-Raja 17:22; 2 Tawarikh 30:20.

16. Apa nikoạ u Datu Daud su tempong i Syimei něhinakang si sie?

¹⁶ Kasasanạu naung lai makatul᷊ung si kite mẹ̌kakědangu watangeng su tempong piạ u měkoạ barang dal᷊akị si kitẹ. (Efesus 4:2) I kitẹ nakasilo contoh mapaelẹ̌ kạbawohẹ su 2 Samuel 16:5-13. (Basa.) I Syimei, anạu sěngkataung Datu Saul, něhinakang lai něndariha si Daud dingangu manga ělange. I Daud botonge mẹ̌sěding si Syimei, katewe i sie němile nẹ̌kakědang timatěngo lahinakang i Syimei. Kerea sarang i Daud botonge nẹ̌kakědangu watangenge? I kitẹ makaěbạ sasimbahe su Mazmur katělune.

17. Apa nakatul᷊ung si Daud nẹ̌kakědangu watangenge, kụ kerea i kitẹ mẹ̌těno si sie?

¹⁷ I Daud němohẹ Mazmur katělune su tempong i Absalom mětẹ̌tawakal᷊i měmate si sie. Su tempo ene lai i Syimei něndariha si Daud, katewe i Daud tatapẹ̌ matěnang. Apa nakatul᷊ung si sie? Su Mazmur 3:4, Daud němohẹ, ”Iạ sarung mẹ̌kui si Yehuwa, kụ i Sie sarung sumimbahẹ̌ si siạ bọu bul᷊ud’E masusi.” Su tempong i kitẹ sẹ̌sigěsạkeng, i kitẹ harusẹ̌ mẹ̌doa kere i Daud. Bọu ene, Yehuwa sarung měgělị rohkẹ̌’E masusi tadeạu i kitẹ botonge mẹ̌tatahang. Su tempong piạ u měnigěsạ, apa i kau botonge mẹ̌kakědangu watangeng arau mapulu měgělị ampung si sie? Apa i kau mangimang Yehuwa mapadul᷊i su kasasigěsạu kụ sarung mẹ̌tul᷊ung dingangu měngal᷊amatẹ̌ si kau?

18. Apa gunane mạeng i kitẹ tumol᷊e laahạ i Yehuwa?

¹⁸ Su tempong měkoạ barang nihino, i kitẹ sarung matahuěna arau mapelesa, kụ Yehuwa sarung měngal᷊amatẹ̌ si kitẹ. Su Amsal 4:7, Alkitapẹ̌ naul᷊ị, ”Pelesa kai hal᷊ẹ̌ limembong penting.” Maning pelesa dasare bọu kasingkạ, kětạeng piạ kasingkạ ene bědang kurang. Pelesa mal᷊ahẹ bọu putusang nikoạ i kitẹ. Sarang kahěmisẹ̌ lai něnodẹ pelesa, ual᷊ingu i sire něndesọ kaěng gunang musim dingin. (Amsal 30:24, 25) I Kristus, nisěbạ ”pelesang Mawu”, sěntiniạ měkẹ̌koạ apang makal᷊uasẹ̌ naung i Amange. (1 Korintus 1:24; Yohanes 8:29) Mawu lai sarung měngal᷊amatẹ̌ si kitẹ mạeng i kitẹ měnodẹ pelesa kụ měkoạ barang nihino dingangu tatapẹ̌ masanạ naung. (Basa Matius 7:21-23.) Hakị u ene turusẹ̌e pẹ̌tawakal᷊ị tadeạu kěbị taumata su sidang botonge mẹ̌tahamawu si Yehuwa dingangu kasasanạu naung. Memang tawe gampang měkoạ barang nihino, kụ i kitẹ lai harusẹ̌ masabarẹ̌. Katewe, mạeng měkoạ barang nihino, ene něnodẹ i kitẹ masanạ naung, kụ kasasanạu naung sarung makakoạ si kitẹ mal᷊uasẹ̌ orasẹ̌ ini dingangu sarang karěngụe.