1. Cita-cita mapaelẹ̌ apa botonge koateng i kitẹ su tempong seng kakạgurange?

SU TEMPONG seng kakạgurange, i kitẹ ěndịu gụgěnggang i kitẹ sarung limembong mahal᷊i gunane si Yehuwa sul᷊ungu kangerẹ. Maning katatoghasi kitẹ seng bal᷊inẹ kere kangerẹ, i kitẹ botonge měpakẹ pelesa dingangu pengalaman nikaěbạ i kitẹ gunang mẹ̌tul᷊ung mangangudạ tadeạu měkoạ kapaelange su organisasing i Yehuwa dingangu měnarimạ limembong lawọ tugasẹ̌. Sěngkatau penatua nẹ̌bera, ”Su tempong iạ seng tawe makakoạ mal᷊awọ kere kangerẹ ual᷊ingu seng maghurang, iạ mẹ̌tarimakasẹ ual᷊ingu piạ manga saudara mangudạ memenuhi syarat botonge makakoạ hal᷊ẹ̌ ene.”

2. Apa sarung ěndungang i kitẹ su pěngangěndungang ini?

² Su pěngangěndungang kal᷊imona, i kitẹ seng něngěndung kerea mangangudạ makaěbạ lawọ gunane su tempong mědal᷊ahapị dingangu maghaghurang. Su pěngangěndungang ini, i kitẹ sarung měmanda kerea kasasanạu naung, bersahaja, mẹ̌tarimakasẹ, lai kal᷊aělugẹ̌ makatul᷊ung maghaghurang gunang měhal᷊ẹ̌ sěngkasio dingangu mangangudạ, kụ mẹ̌tul᷊ung kěbị anạu sěmbaụ su sidang.

3. Tumuhụ Filipi 2:3, 4, apa kasasanạu naung ene, kụ kerea ene makatul᷊ung tau Kristen?

³ Maghaghurang harusẹ̌ pakasanạ naung mạeng i sire mapulu mẹ̌tul᷊ung mangangudạ. Taumata masanạ naung měmanda taumata wal᷊inẹ limembong penting bọu i sie. (Basa Filipi 2:3, 4.) Maghaghurang apang něnodẹ sipatẹ̌ ene sadarẹ̌ kasauange piạ lawọ cara gunang měkoạ sěmbaụ hal᷊ẹ̌ kụ manga cara  ene nẹ̌tatahino dingangu Alkitapẹ̌. Hakị u ene, i sire tawe měharapẹ̌ kěbị taumata měkoạ hal᷊ẹ̌ kere carang i sire kangerẹ. (Pkh. 7:10) I sire botonge mẹ̌tul᷊ung mangangudạ mạeng maul᷊ị apa seng niěndungang i sire. Katewe, i sire lai masingkạ ”adegan dunia ini kapẹ̌bal᷊uine” kụ i sire ěndịu perlu měkoạ penyesuaian su situasi wuhu.​—1 Kor. 7:31, catatan kaki.

4. Kerea pengawas wilayah měnodẹ kakanoạ mẹ̌sul᷊ung kere tau Lewi?

⁴ Maghaghurang apang masanạ naung sadarẹ̌ su tempong seng kakạgurange, i sire seng tawe makakoạ mal᷊awọ kere kangerẹ. Contone, pẹ̌tiněna soal u pěngawas wilayah. Su tempong umuri sire seng 70 su taunge, i sire makaěbạ undangan gunang hal᷊ẹ̌ wal᷊inẹ. Ěndịu ene masulitẹ̌. I sire sěbạe mal᷊uasẹ̌ nẹ̌tul᷊ung anạu sěmbaụ. I sire puluang su tugasẹ̌ ene, kụ bědang mapulu měkoạ ene. Katewe i sire nakaěna kapaelange saudara apang limembong mangudạ měkoạ tugasẹ̌ ene. Hakị u ene, i sire něnodẹ kakanoạ mẹ̌sul᷊ung dingangu tau Lewi su Israel kangerẹ. I sire harusẹ̌ měngědo měhal᷊ẹ̌ su tabernakel su tempong umuri sire natimu 50 su taunge. Maghaghurang tau Lewi tatapẹ̌ mal᷊uasẹ̌ maning apa tugasi sire. I sire dingangu masěmangatẹ̌ měkoạ apa wotonge ikakoạ i sire kụ mẹ̌tul᷊ung si sire apang limembong mangudạ. (Bil. 8:25, 26) Orasẹ̌ ini, su tempong umuru pengawas wilayah natimu 70 su taunge, i sire měngědo mẹ̌tiwo lawọ sidang, katewe měgělị lawọ tul᷊umang dingangu měmahangsang sidang tampạ i sire nẹ̌gabung.

5. Apa kaěndungangu bọu i Dan dingangi Katie?

 ⁵ Pěmanda pengalaman i Dan, seng melayani nakoạ pengawas wilayah karěngụe 23 su taunge. Su tempong umure natimu 70 su taunge, i sie dingangu kawinge, i Katie, nakaěbạ tugasẹ̌ makoạ perintis istimewa. Kerea i sire někoạ penyesuaian su situasi buhu? Dan naul᷊ị i sie tawe pernah sěbạe sibukẹ̌ kere orasẹ̌ ini. I sie něngurusẹ̌ manga tugasẹ̌ su sidang, nẹ̌tul᷊ung manga saudara tadeạu memenuhi syarat gunang makoạ hamba pelayanan, dingangu nělatih taumata wal᷊inẹ gunang měnginjilẹ̌ su kota lai penjara. Maghaghurang, tawẹ soale i kau melayani sepenuh waktu arau tala, i kau botonge měgělị lawọ tul᷊umang su taumata wal᷊inẹ. Kerea carane? Pěngěndung gunang mal᷊uasẹ̌ su tugasẹ̌ buhu, pěkoạ cita-cita buhu, dingangu fokus su manga hal᷊ẹ̌ botonge ikakoạu bal᷊inẹ su hal᷊ẹ̌ tawe ikakoạu.

6. Kawe nụe mapelesa mạeng makoạ bersahaja? Gělịko sasihinge.

⁶ Taumata bersahaja sadarẹ̌ i sie piạ kurange. (Amsal 11:2) Ual᷊ingu bersahaja, i sie tawe měharapẹ̌ watangenge měkoạ limembong mal᷊awọ bọu apa botonge ikakoạe. Hasile, i sie sarung tatapẹ̌ mal᷊uasẹ̌ dingangu turusẹ̌ měhal᷊ẹ̌ masěghadẹ̌. I kitẹ botonge mapẹ̌sul᷊ung sěngkatau bersahaja dingangu sěngkatau sopirẹ̌ měngẹ̌ngul᷊ing oto su ral᷊eng sumaka. Sopirẹ̌e harusẹ̌ mělintụ gigi tadeạu botonge turusẹ̌ sumaka. Tantu, i sie ěndịu sumaka diọ mal᷊awa, katewe i sie sarung turusẹ̌ sumaka. Kerene lai, sěngkatau bersahaja masingkạ kange tempone i sie ”mělintụ gigi” tadeạu botonge turusẹ̌ melayani si Yehuwa dingangu mẹ̌tul᷊ung taumata wal᷊inẹ.​—Flp. 4:5.

7. Kerea i Barzilai něnodẹ sipatẹ̌ bersahaja?

⁷ Pẹ̌tiněna contoh soal i Barzilai, su tempong umure 80 su taunge, i sie nakaěbạ undangan bọu i Datu Daud gunang makoạ bageang bọu keluarga kerajaan. Ual᷊ingu bersahaja, i Barzilai tawe něnarimạ undangan bọu datu. Barzilai masingkạ i sie seng tawe makakoạ mal᷊awọ ual᷊ingu seng maghurang, hakị u ene i sie něgělị těgu tadeạu i Khimham, sěngkatau esẹ limembong mangudạ měngal᷊ạ posisi ene. (2 Sam. 19:35-37) Kere i Barzilai, saudara seng maghurang mal᷊uasẹ̌ měgělị kesempatan su saudara limembong mangudạ gunang melayani.

8. Su tempong i Datu Daud mapulu měmangung bait, kerea i sie něnodẹ sipatẹ̌ bersahaja?

⁸ Datu Daud lai nakoạ pẹ̌tatěnoěng mapaelẹ̌ soal u bersahaja. I sie sěbạe mapulu měmangung wal᷊e gunang i Yehuwa. Katewe su tempong i Yehuwa naul᷊ị hal᷊ẹ̌ ene sarung gělịkang si Salomo limembong mangudạ, i Daud něnarimạ putusang i Yehuwa kụ mendukung proyek ene dingangu kaguwạu naunge. (1 Taw. 17:4; 22:5) Daud tawe nẹ̌pěndang i sie limembong cocokẹ̌ makaěbạ tugasẹ̌ ene ual᷊ingu i Salomo ”bědang mangudạ kụ mahal᷊i pengalaman”. (1 Taw. 29:1) Daud masingkạ bait botonge darisikang ual᷊ingu i Yehuwa něngal᷊amatẹ̌ proyek ene, bal᷊inẹ ual᷊ingu umurẹ̌ arau pengalaman bọu i sire apang bertanggung jawab su proyek ene. Gunang mẹ̌těno si Daud, maghaghurang orasẹ̌ ini turusẹ̌ něhal᷊ẹ̌ masěghadẹ̌ gunang i Yehuwa su tempong tugasi sire nẹ̌bal᷊ui. Kụ i sire masingkạ i Yehuwa sarung měngal᷊amatẹ̌ mangangudạ apang někoạ tugasẹ̌ kangerẹ kẹ̌koateng i sire.

9. Kerea sěngkatau anggota Panitia Cabang něnodẹ sipatẹ̌ bersahaja?

⁹ Sěngkatau saudara arenge Shigeo něnodẹ i sie bersahaja. Su taung 1976, su tempong umure 30 su taunge, i sie nipile nakoạ anggota Panitia Cabang. Su taung 2004, i sie nakoạ koordinator Panitia Cabang. Samurine, i sie sadarẹ̌ katatoghase seng bal᷊inẹ kere kangerẹ kụ harusẹ̌ limembong marěngụ měkoạ tugase. I sie nẹ̌doa soal u ene kụ nẹ̌tiněna apa limembong  mapaelẹ̌ mạeng sěngkatau limembong mangudạ makoạ koordinator. Su apang seng tawe nakoạ koordinator, i Shigeo turusẹ̌ melayani sěngkasio dingangu anggota Panitia Cabang wal᷊inẹ. Kere i Barzilai, i Datu Daud, dingangi Shigeo, sěngkatau masanạ naung lai bersahaja sarung fokus bal᷊inẹ su pengalaman mangangudạ ene kětạeng mahal᷊i, katewe su katatoghasi sire. I sie tawe měmanda i sire kere sědụ, katewe hapị sěngkapěhal᷊ẹ̌.​—Amsal 20:29.

10. Kerea maghaghurang měmanda mangangudạ su sidang?

¹⁰ Maghaghurang němanda mangangudạ ene kai hadiah bọu i Yehuwa kụ i sire mẹ̌tarimakasẹ su apa seng nikoạ u mangangudạ. Su tempong i sie seng kakạl᷊omene, maghaghurang mẹ̌tarimakasẹ su mangangudạ apang mapulu měkoạ tugasẹ̌ dingangu melayani su sidang.

11. Kerea Rut 4:13-16 něnodẹ maghaghurang sarung makaěbạ gunane su tempong měnarimạ tul᷊umang bọu mangangudạ?

¹¹ Su Alkitapẹ̌, i Naomi nakoạ contoh mapaelẹ̌ su maghaghurang gunang mẹ̌tarimakasẹ ual᷊ingu tul᷊umangu mangangudạ. Humotong, i Naomi něngoro si Rut, anạe mantu seng nakoạ wawine wal᷊u gunang pẹ̌bal᷊ị sarang kěluargane. Katewe, i Rut madiri mapul᷊ẹ. Kụ su tempong i Rut mapulu měndingang si Naomi mẹ̌bal᷊ị sarang Betlehem, i Naomi něnarimạ tul᷊umange. (Rut 1:7, 8, 18) Kụ ene nakoạ al᷊amatẹ̌ si rẹ̌dua. (Basa Rut 4:13-16.) Kasasanạu naung makakoạ maghaghurang mapulu mẹ̌těno si Naomi.

12. Kerea i Rasul Paulus něnodẹ tatarimakasẹ?

¹² Rasul Paulus nẹ̌tarimakasẹ ual᷊ingu tul᷊umang seng nitarimạe. Contone, i sie nẹ̌tarimakasẹ su tau Kristen su Filipi ual᷊ingu manga hal᷊ẹ̌ materi seng nighělị i sire si sie. (Flp. 4:16) I sie nẹ̌tarimakasẹ ual᷊ingu  i Timotius nẹ̌tul᷊ung si sie. (Flp. 2:19-22) Kụ i Paulus nẹ̌tarimakasẹ su Mawu ual᷊ingu i sire apang diměnta něnoghasẹ̌ su tempong i sie nial᷊ing sarang Roma nakoạ tahanan. (Kis. 28:15) Paulus kai taumata masěmangatẹ̌ kụ i sie seng dimal᷊eng marau gunang měnginjilẹ̌ lai měnoghasẹ̌ manga sidang. Katewe, i sie masanạ naung kụ něnarimạ tul᷊umang bọu anạu sěmbaụ.

13. Kerea maghaghurang měnodẹ tatarimakasẹ su mangangudạ?

¹³ Maghaghurang, i kau botonge měnodẹ tatarimakasẹ su mangangudạ su sidangu dingangu haghing cara. Mạeng i sire mapulu mẹ̌tul᷊ung si kau gunang měngal᷊ạ, mẹ̌bělanja, arau mẹ̌tul᷊ung dingangu cara wal᷊inẹ, tarimạ tul᷊umang ene. Pẹ̌tahěndung tul᷊umang bọu i sire ene něnodẹ kakěndagi Yehuwa si kau. I kau botonge makoạ hapị mapia dingangi sire apang nẹ̌tul᷊ung si kau. Pakasau mẹ̌tul᷊ung hapịu limembong mangudạ tadeạu makoạ limembong marani dingangi Yehuwa, kụ paul᷊ị i kau mal᷊uasẹ̌ nakasilo mangangudạ někoạ kapaelange gunang mẹ̌tul᷊ung sidang. Kụ pakẹ tempo dingangi sire gunang mẹ̌běke pengalaman soal u pěbawiahu. Su tempong měkoạ ene, i kau sarung ’turusẹ̌ mẹ̌tarimakasẹ’ si Yehuwa ual᷊ingu mangangudạ seng niwol᷊eng’E sarang sidang.​—Kol. 3:15; Yoh. 6:44; 1 Tes. 5:18.

14. Kerea i Datu Daud něnodẹ kal᷊aěluge?

¹⁴ Contoh bọu i Datu Daud něnodẹ sipatẹ̌ penting wal᷊inẹ botonge těnoěngu maghaghurang ene kai kal᷊aělugẹ̌. I sie něgělị sumbangan mal᷊awọ bọu arětạe gunang mendukung proyek měndarisị bait. (1 Taw. 22:11-16; 29:3, 4) I sie někoạ ene maning samurine ene sarung isěbạ bait Salomo. Su tempong i kitẹ seng tawe makamampo tumol᷊e proyek pembangunan teokratis, i kitẹ botonge turusẹ̌ mendukung proyek ene carane měgělị sumbangan bọu doiti kitẹ. Kụ i kitẹ botonge makatul᷊ung mangangudạ bọu pengalaman seng taunge nikaěbạ i kitẹ.

15. Hadiah maarěga apa nighělị i Rasul Paulus si Timotius?

¹⁵ Pẹ̌tiněna contoh kal᷊aělugẹ̌ bọu i Rasul Paulus. I sie němaringang si Timotius gunang tumol᷊e tugasẹ̌ utusan injil, kụ i Paulus naul᷊ị si Timotius carane i sie měnginjilẹ̌ dingangu měněntiro. (Kis. 16:1-3) Paulus nělatih si Timotius tadeạu makoạ měnganginjilẹ̌ dingangu měnaněntiro mapaelẹ̌. (1 Kor. 4:17) Bọu ene, i Timotius něpakẹ apa seng nitěntirong i Paulus gunang melatih taumata wal᷊inẹ.

16. Kawe nụe i Shigeo nělatih taumata wal᷊inẹ?

¹⁶ Maghaghurang orasẹ̌ ini tawe guměnggang makoạ tawẹ gunane mạeng melatih mangangudạ měkoạ hal᷊ẹ̌ su sidang kangerẹ kẹ̌koateng i sire. Contone, su kanandụu pira taung, i Shigeo, seng nisěbạ kanini, nělatih anggota Panitia Cabang limembong mangudạ. I sie někoạ ene gunang mẹ̌tul᷊ung hal᷊ẹ̌u Kararatuang su negeri tampạ i sie melayani. Hasile, su tempong i sie seng tawe makoạ koordinator, piạ saudara wal᷊inẹ seng nilatih botonge měkoạ tugase. Shigeo seng nakoạ anggota Panitia Cabang nal᷊iu bọu 45 su taunge, kụ i sie turusẹ̌ něpakẹ apa seng niěndungange gunang mẹ̌tul᷊ung saudara limembong mangudạ. Manga saudara kere i Shigeo sěbạe nakatul᷊ung ělangu Mawu.

17. Kere nilahẹ su Lukas 6:38, apa botonge gělịkangu maghaghurang su taumata wal᷊inẹ?

¹⁷ I kamene anạu sěmbaụ apang seng maghurang kai bukti melayani si Yehuwa dingangu pangangimang lai kasasatia ene dal᷊engu pěbawiahẹ̌ kapaelange. Bọu pengalaman nikaěbạu, i kau něnodẹ měngěndung manga prinsip Alkitapẹ̌ kụ měkoạ ene su pěbawiahẹ̌ kai piạ lawọ gunane. I kau masingkạ kerea carane měkoạ manga hal᷊ẹ̌ nikoạ u su tempong tamai, katewe i kau lai masingkạ i kau perlu měkoạ pẹ̌bawal᷊ui tuhụ situasi.  Maghaghurang apang seng bọu nibaptisẹ̌ lai botonge mẹ̌tul᷊ung taumata wal᷊inẹ su haghing cara. I kau lai botonge maul᷊ị si sire kerea nakasingkạ si Yehuwa nakakoạ pěbawiahu mal᷊uasẹ̌. Mangangudạ sarung mal᷊uasẹ̌ dumaringihẹ̌ manga pengalaman dingangu tatěntiro nikaěbạu. Mạeng i kau ’turusẹ̌ měgělị’ carane mẹ̌běke pengalaman seng nikaěbạu, Yehuwa sarung měgělị lawọ al᷊amatẹ̌ si kau.​—Basa Lukas 6:38.

18. Kerea maghaghurang dingangu mangangudạ mẹ̌tatul᷊ung sěmbaụ su wal᷊inẹ?

¹⁸ Su tempong maghaghurang limembong marani dingangu mangangudạ, i kamene botonge mẹ̌tatul᷊ung sěmbaụ su wal᷊inẹ. (Rm. 1:12) Pẹ̌sěngkatau piạ barang maarěga kụ tawẹ apa su taumata wal᷊inẹ. Maghaghurang piạ pelesa dingangu pengalaman nikaěbạ su kanandụu pěbawiahi sire. Mangangudạ piạ katatoghasẹ̌. Su tempong mangangudạ dingangu maghaghurang nědal᷊ahapị kụ sěngkapěhal᷊ẹ̌, i sire makarěntang daralo si Amang i kitẹ makěndagẹ̌ su sorga, lai al᷊amatẹ̌ gunang kěbị su sidang.