1-2. (a) Tumuhụ Amsal 16:31, kerea i kitẹ harusẹ̌ měmanda maghaghurang apang masatia? (b) Manga kakiwal᷊o apa sarung simbaheng i kitẹ su pěngangěndungang ini?

PIẠ sěmbaụ taman su Amerika Serikat, su ěntanane piạ berlian. Katewe, berlian ene bědang tawe niwurěsi. Hakị u ene, lawọ taumata tawe sadarẹ̌ apa pẹ̌pandaěng i sire ene kai berlian, kụ i sire tawe mẹ̌pandung.

² Kere berlian kanini, anạu sěmbaụ i kitẹ apang maghurang lai kere arětạ maarěga. Hengetangu Mawu napẹ̌sul᷊ung owang i sire kere mahkota. (Basa Amsal 16:31; 20:29) Maning kerene, i kitẹ gampang tawe mẹ̌pandung manga arětạ maarěga kerene. Su tempong i sire apang limembong mangudạ makaěna maghaghurang ene maarěga, i sire sarung makaěbạ sěmbaụ hal᷊ẹ̌ limembong maarěga bọu kakakalạ. Su pěngangěndungang ini, i kitẹ sarung sumimbahẹ̌ tatělu kakiwal᷊o ini: Kawe nụe i Yehuwa němanda maghaghurang kere arětạ? Kawe nụe maghaghurang penting su organisasing Yehuwa? Apa wotonge koateng i kitẹ gunang měngěndung bọu maghaghurang?

3. Kere nilahẹ su Mazmur 92:12-15, kawe nụe maghaghurang apang masatia maarěga si Yehuwa?

³ Maghaghurang apang masatia ene maarěga si Yehuwa. Yehuwa masingkạ i sire taumata kerea, kụ měngẹ̌ngarěga manga sipati sire mapaelẹ̌. I Sie mal᷊uasẹ̌ su tempong maghaghurang měmahiạ pelesa taunge nikaěbạ i sire su pelayanan gunang  i sire apang limembong mangudạ. (Ayb. 12:12; Amsal 1:1-4) Yehuwa lai měngẹ̌ngarěga kasasatiang i sire. (Mal. 3:16) I sire lai timatěngo masalah su pěbawiahẹ̌, katewe pangangimang i sire si Yehuwa tatapẹ̌ matoghasẹ̌. Pělaharapẹ̌ i sire sauneng kakạtoghase sul᷊ungu humotong i sire něngěndung katěngadẹ̌. Kụ i Yehuwa makěndagẹ̌ si sire ual᷊ingu i sire turusẹ̌ mělẹ̌habarẹ̌ areng’E ”sarang su tempong maghurang”.​—Basa Mazmur 92:12-15.

4. Apa makawahangsang anạu sěmbaụ i kitẹ apang maghurang?

⁴ Mạeng i kau seng kakạgurange, pangimangke i Yehuwa mang mẹ̌tahěndung hal᷊ẹ̌ seng nikoạ u su tempong tamai. (Ibr. 6:10) I kau masěmangatẹ̌ nẹ̌tul᷊ung hal᷊ẹ̌ měnginjilẹ̌, kụ ene nakal᷊uasẹ̌ si Amang i kitẹ su sorga. I kau seng timatěngo haghing masalah, nasuẹ̌ lai manga hal᷊ẹ̌ nakakoạ i kau sěbạe nasusah naung. I kau seng timuhụ dingangu timatawang prinsipẹ̌ nihino bọu Alkitapẹ̌, satia někoạ manga tugasẹ̌ su organisasing Yehuwa, kụ nělatih taumata wal᷊inẹ. I kau seng někoạ sěngapang botonge gunang tumol᷊e lawọ pẹ̌bawal᷊ui su organisasing Yehuwa. I kau seng němahangsang si sire apang melayani sepenuh waktu. Yehuwa sěbạe makěndagẹ̌ si kau ual᷊ingu i kau masatia. I Sie nẹ̌diandi, ”I Sie tawe měněntang manga ělang’E apang masatia.” (Mz. 37:28) I Sie něgělị si kau diandi ini: ”Sarang i kau měngowang, Iạ sarung turusẹ̌ mẹ̌tul᷊ung si kau.” (Yes. 46:4) Maning kerene, ual᷊ingu seng kakạgurange abe mẹ̌pikirẹ̌ i kau seng tawe maarěga su organisasing Yehuwa. I kau sěbạe maarěga!

5. Apa tahěndungangu maghaghurang?

⁵ Maghaghurang piạ gunane su organisasing Yehuwa su haghing hal᷊ẹ̌. Maning katatoghasi sire bal᷊inẹ kere kangerẹ, i sire piạ lawọ pengalaman. Yehuwa botonge turusẹ̌ měpakẹ si sire su haghing hal᷊ẹ̌, kere contoh su tempong tamai dingangu orasẹ̌ ini sarung ěndungang i kitẹ.

6-7. Gělịko contoh maghaghurang niwěke su Alkitapẹ̌ apang nakatarimạ al᷊amatẹ̌ ual᷊ingu satia mělẹ̌hal᷊ẹ̌ gunang i Yehuwa.

⁶ I kitẹ měngěndung contoh mapaelẹ̌ su Alkitapẹ̌ soal i sire apang satia něhal᷊ẹ̌ gunang i Yehuwa maning seng maghurang. Contone, i Musa něnětạ melayani  si Yehuwa nakoạ nabi dingangu wakil i Yehuwa gunang tau Israel, su tempong umure ěndịu 80 su taunge. Su tempong i Daniel umure seng nal᷊iu bọu 90 su taunge, Yehuwa bědang něpakẹ si sie nakoạ nabi. Kụ i Rasul Yohanes lai su tempong umure nal᷊iu bọu 90 su taunge, i sie nipakẹ i Yehuwa gunang měmohẹ bukẹ̌ Wahyu.

⁷ Lawọ taumata masatia tawe terkenal, kụ i sire kurang pandungang. Katewe, Yehuwa nẹ̌pandung dingangu něngal᷊amatẹ̌ kasasatiang i sire. Contone, i Simeon esẹ ”nihino dingangu matul᷊idẹ̌” kětạeng mahal᷊i niwěke su ral᷊ungu Alkitapẹ̌, katewe i Yehuwa masingkạ i sai i sie dingangu něgělị kesempatan gunang makasilo si Yesus bědang kadodọ, kụ něněbal᷊ẹ̌ soal u anạ ene lai mamạe. (Luk. 2:22, 25-35) Pẹ̌tiněna lai soal i Nabiah Hana. Umure 84 su taunge, katewe ”i sie masau duměnta su bait”. Yehuwa něngal᷊amatẹ̌ si sie ual᷊ingu marading duměnta su bait dingangu něgělị si sie kesempatan nakasilo si Yesus bědang kadodọ. Simeon dingangi Hana maarěga si Yehuwa.​—Luk. 2:36-38.

8-9. Apa turusẹ̌ kẹ̌koatengu manga wawine wal᷊u su organisasing Yehuwa?

⁸ Orasẹ̌ ini, lawọ maghaghurang masatia nakoạ pẹ̌tatěnoěng mapaelẹ̌ si sire apang limembong mangudạ. Pěmanda pengalaman Saudari Lois Didur. I sie něnětạ nakoạ perintis istimewa su Kanada su tempong umure bědang 21 su taunge. Bọu ene, i sie dingangu kawinge, i John, taunge melayani su hal᷊ẹ̌ keliling. Samurine, i rẹ̌dua melayani su Betel Kanada nal᷊iu bọu 20 su taunge. Su tempong umuri Lois 58 su taunge, i sie dingangi John nakaěbạ tugasẹ̌ su Ukraina. Apa nikoạ i sire? Apa i sire nẹ̌pikirẹ̌ tumanịu maghurang gunang melayani su negeri wal᷊inẹ? I rẹ̌dua něnarimạ tugasẹ̌ ene, kụ i John nakoạ anggota Panitia Cabang. Su apang seng pitu taung i John nate, i Lois němutusẹ̌ gunang tatapẹ̌ su tugase. Orasẹ̌ ini, i Lois umure seng 81 su taunge. I sie bědang satia melayani si Yehuwa su Betel Ukraina, kụ i sire kěbị sěbạe makěndagẹ̌ si sie.

⁹ Manga wawine wal᷊u kere i Lois ěndịu kurang pandungang bal᷊inẹ kere su tempong kawing i sire bědang biahẹ̌, katewe i sire sěbạe maarěga. Yehuwa sěbạe měngẹ̌ngarěga su manga saudari taunge nẹ̌tul᷊ung kawing i sire kụ orasẹ̌ ini turusẹ̌ melayani si Sie dingangu satia. (1 Tim. 5:3) I sire lai němahangsang si sire apang limembong mangudạ.

10. Contoh mapaelẹ̌ apa kaěndungang i kitẹ bọu i Tony?

¹⁰ Lawọ maghaghurang masatia mětẹ̌tanạ su panti jompo lai maarěga. Contone Saudara Tony, orasẹ̌ ini i sie mětẹ̌tanạ su tampạ kerene. I sie nibaptisẹ̌ su Pennsylvania, AS, su wul᷊ang Agustus 1942, su tempong umure 20 su taunge. Tawe nararěna bọu ene i sie timatěngo sasal᷊ukạ soal u kenetralan, kụ hasile i sie nipěnjara dua stengah taung. I sie dingangu kawinge, i Hilda,  něhiking darua anạ i rẹ̌dua su ral᷊ungu katěngadẹ̌. Taunge i Tony melayani nakoạ pengawas umum (orasẹ̌ ini nisěbạ koordinator badan penatua) su tatělu sidang dingangu nakoạ pengawas pertemuan wilayah. I sie nẹ̌tiwo sěmbaụ penjara kụ něngahạ pěngangěndungang Alkitapẹ̌ lai pěngangibadang. Su tempong umuri Tony seng 98 su taunge, i sie tawe něngědo melayani si Yehuwa. I sie tatapẹ̌ někoạ kapaelange gunang melayani si Yehuwa sěngkasio dingangu anạu sěmbaụ su sidang.

11. Kerea měnodẹ i kitẹ měngẹ̌ngarěga maghaghurang apang mětẹ̌tanạ su panti jompo?

¹¹ Kerea měnodẹ i kitẹ měngẹ̌ngarěga maghaghurang apang mětẹ̌tanạ su panti jompo? Mạeng botonge manga penatua mẹ̌tawakal᷊i mẹ̌tul᷊ung si sire gunang duměnta arau dumaringihẹ̌ pěngangibadang lai gunang měnginjilẹ̌. I kitẹ měnodẹ i kitẹ mapadul᷊i si sire carane mẹ̌tiwo arau měnelpon si sire měpakẹ video call. I kitẹ mapulu mẹ̌pandung su maghaghurang apang mětẹ̌tanạ su panti jompo kụ marau bọu sidang asal᷊i sire. I kitẹ abe sarang miwul᷊e i sire apang maghurang. Pirang katau ěndịu tawe gampang mẹ̌běke soal u watangeng i sire arau hal᷊ẹ̌ ene tawe harusẹ̌ běkeěng. Katewe, i kitẹ sarung sěbạe mawahangsang mạeng mẹ̌kiwal᷊o dingangu dumaringihẹ̌ pakapia su tempong i sire mẹ̌běke karal᷊uasẹ̌ nikapěndangeng su organisasing Yehuwa.

12. Anạu sěmbaụ kerea kaěbakeng i kitẹ su sidang?

¹² I kitẹ ěndịu huměkosẹ̌ nakasingkạ piạ contoh mapaelẹ̌ bọu maghaghurang masatia su sidang i kitẹ. Sěngkatau saudari arenge Harriette, seng taunge melayani si Yehuwa su sidange su New Jersey, AS. Samurine, i sie něngal᷊ing kụ nẹ̌tanạ dingangu anạe. Anạu sěmbaụ su sidang buhu mapulu makasingkạ mal᷊awọ soal i sie, kụ i sire nẹ̌pěndang i sie sěbạe maarěga. I sie němahangsang si sire kụ nẹ̌běke soal u hal᷊ẹ̌ měnginjilẹ̌ su tempong humotong i sie něngěndung katěngadẹ̌, ěndịu taung 1925. Su pira taung ene, i sie masau mẹ̌bawa sikatu isi su tempong měnginjilẹ̌ ual᷊ingu masingkạ i sie ěndịu samẹkang kụ ipěnjara. Sěběnarẹ̌e, su taung 1933, piạ duang sul᷊ẹ pẹ̌sěngkamisa i sie nipěnjara. Kawinge bal᷊inẹ Sahiding Yehuwa, katewe mendukung si sie. Su tempong i sie nipěnjara, kawinge něngurusẹ̌ tatělu anạe bědang kadodọ. Nal᷊ahẹ, maghaghurang apang masatia kere i Harriette harusẹ̌ arěgang.

13. Apa kaěndungang i kitẹ soal u anạu sěmbaụ apang maghurang su organisasing Yehuwa?

¹³ Anạu sěmbaụ apang maghurang sěbạe penting si Yehuwa dingangu su organisasi-Ne. I sire seng nakasilo kerea i Yehuwa něngal᷊amatẹ̌ si sire dingangu organisasi-Ne su haghing cara. I sire něngěndung hal᷊ẹ̌ penting bọu pẹ̌sasal᷊a nikoạ i sire. Panda i sire kere ”simbul᷊u pelesa”, kụ pěngěndung bọu i sire. (Amsal 18:4) Mạeng i kau mẹ̌tawakal᷊i makasingkạ soal i sire, pangangimangu sarung kakạtoghase kụ i kau sarung měngěndung mal᷊awọ bọu i sire.

14. Ulangan 32:7 němahangsang si sire apang limembong mangudạ gunang měkoạ apa?

¹⁴ I kitẹ hala perlu mẹ̌bisara kal᷊imona dingangu maghaghurang. (Basa Ulangan 32:7.) Matang i sire ěndịu seng marěndung, dumal᷊eng seng mal᷊ongge, kụ limembong masikome mẹ̌bisara. Katewe su ral᷊ungu naung, i sire bědang mangudạ, kụ i sire seng někoạ ”areng mapia” su těngong i Yehuwa. (Pkh. 7:1) Pẹ̌tahěndung kawe nụe i Yehuwa měngẹ̌ngarěga si sire. Turusẹ̌ pěngadatẹ̌ si sire. Pẹ̌těno si Elisa. Maraning i sire mẹ̌tal᷊ei, i sie mapulu marěduhẹ̌ dingangi Elia. Tělung sul᷊ẹ i Elisa nẹ̌bera, ”Iạ tawe měněntang si Tuang.”​—2 Raj. 2:2, 4, 6.

15. Manga kakiwal᷊o apa botonge kiwal᷊ongu su maghaghurang?

 ¹⁵ Todẹ i kau mapadul᷊i su maghaghurang carane dingangu mahimumu mẹ̌kiwal᷊o si sire. (Amsal 1:5; 20:5; 1 Tim. 5:1, 2) Pěgělị kakiwal᷊o kere, ”Su tempong bědang mangudạ, apa nakakoạ i kau mangimang i kau seng nakaěbạ katěngadẹ̌?” ”Kerea pengalaman nikaěbạu nakakoạ i kau limembong marani dingangi Yehuwa?” ”Apa nakatul᷊ung si kau tatapẹ̌ mal᷊uasẹ̌ su pelayanan si Yehuwa?” (1 Tim. 6:6-8) Bọu ene daringihẹ̌ su tempong i sire mẹ̌běke.

16. Kerea mẹ̌bawěke ene piạ gunane su maghaghurang dingangi sire apang limembong mangudạ?

¹⁶ Su tempong i sire apang maghurang dingangi sire apang limembong mangudạ nẹ̌bawěke, i sire sarung makaěbạ gunane. (Rm. 1:12) I kau apang mangudạ sarung limembong mangimang i Yehuwa měngurusẹ̌ manga ělang’E, kụ maghaghurang sarung mẹ̌pěndang kẹ̌kěndageng. Maghaghurang sarung mal᷊uasẹ̌ maul᷊ị kerea i Yehuwa něngal᷊amatẹ̌ si sire.

17. Kawe nụe i kitẹ botonge maul᷊ị maghaghurang apang masatia nakoạ limembong masadadạ?

¹⁷ Karal᷊ěnggihu wadang kakạrěngụe mailang, katewe i sire apang satia si Yehuwa kakạrěngụe makoạ limembong masadadạ su těngo-Ne. (1 Tes. 1:2, 3) Kawe nụe ene kahěngang? Ual᷊ingu taunge i sire němala rohkẹ̌ masusi nělatih dingangu nẹ̌tul᷊ung si sire tadeạu piạ manga sipatẹ̌ mapaelẹ̌. Kakạl᷊awọe i kitẹ nakasingkạ soal u anạu sěmbaụ apang maghurang, měngadatẹ̌, dingangu měngěndung bọu i sire, i kitẹ sarung limembong měngarěga si sire.

18. Apa sarung ěndungang i kitẹ su pěngangěndungang tuhụe?

¹⁸ Sidang sauneng kakạtoghase bal᷊inẹ kětạeng su tempong i sire apang limembong mangudạ měngarěga maghaghurang, katewe lai su tempong maghaghurang měngarěga i sire apang limembong mangudạ. Su pěngangěndungang tuhụe, i kitẹ sarung měngěndung kerea maghaghurang měnodẹ i sire měngẹ̌ngarěga si sire apang limembong mangudạ su sidang.