1. I kitẹ botonge mẹ̌kui apa si Yehuwa?

SU RAL᷊UNGU kěluargang i Yehuwa piạ i Yesus ”diadikang kahumotongange”, dingangu lawọ malaekatẹ̌. (Kol. 1:15; Mz. 103:20) Su tempong i Yesus su dunia, i sie něnodẹ taumata masatia botonge mẹ̌kui si Yehuwa i Amang i sire. Su tempong nẹ̌bisara dingangu manga murite, Yesus nẹ̌sěbạ, ”I Amangku lai i Amang i kamene.” (Yoh. 20:17) Kụ su tempong i kitẹ měgělị watangeng si Yehuwa kụ nibaptisẹ̌, i kitẹ nakoạ bageang sěngkasio dingangu anạu sěmbaụ su keluarga měkẹ̌kakěndagẹ̌.​—Mrk. 10:29, 30.

2. Apa sarung ěndungang i kitẹ su pěngangěndungang ini?

² Piạ masigěsạ měnarimạ i Yehuwa kai Amang makěndagẹ̌. Sěnggạ lai ěndịu běga kerea carane měnodẹ kakěndagẹ̌ su anạu sěmbaụ. Su pěngangěndungang ini, i kitẹ sarung měngěndung kerea i Yesus mẹ̌tul᷊ung si kitẹ měmanda i Yehuwa kai Amang makěndagẹ̌, kụ i kitẹ botonge mẹ̌těngkarani si Sie. I kitẹ lai sarung měngěndung kerea měkoạ anạu sěmbaụ kere cara i Yehuwa.

3. Kerea contoh daroa mapakaraning i kitẹ dingangi Yehuwa?

³ Yehuwa kai Amang makěndagẹ̌. Yesus mapulu i kitẹ měmanda si Yehuwa kere cara i sie měmanda, bal᷊inẹ sěngkatau kětạeng měpẹ̌parenta, katewe matimadẹ̌ mapia dingangu makěndagẹ̌ kụ maning kange botonge paringaneng mẹ̌bisara. Ene nal᷊ahẹ bọu apa nitěntirong i Yesus su manga murite soal u mẹ̌doa. Su tětạu contoh daroa nitěntirong i Yesus, i sie nẹ̌bera, ”I Amang i kami.” (Mat. 6:9) Yesus botonge měněntiro si kitẹ gunang mẹ̌kui i Yehuwa ”Makawasa”, ”Měndariadi”, arau ”Datu Kěkalẹ̌”, kụ sěběnarẹ̌e kěbị ene nẹ̌tatahino dingangu Alkitapẹ̌. (Kej. 49:25; Yes. 40:28; 1 Tim. 1:17, catatan kaki.) Maning kerene, i Yesus něngoro si kitẹ mẹ̌kui si Yehuwa ”Amang”.

4. Kerea i kitẹ nakasingkạ i Yehuwa mapulu i kitẹ mẹ̌těngkarani si Sie?

 ⁴ Apa i kau masulitẹ̌ měmanda i Yehuwa kai Amang makěndagẹ̌? Pirang katau bọu i kitẹ nẹ̌pěndang kerene. Mạeng papạ i kitẹ tawe makěndagẹ̌, i kitẹ ěndịu masulitẹ̌ mẹ̌tiněna sěngkatau papạ makěndagẹ̌ si kitẹ. Katewe, i kitẹ nahiborẹ̌ ual᷊ingu i Yehuwa sěbạe masingkạ kerea pěndang i kitẹ. I Sie mapulu mẹ̌těngkarani si kitẹ. Ene alasange Hengetang’E naul᷊ị, ”Pẹ̌těngkaranịe su Mawu, kụ i Sie sarung mẹ̌těngkarani si kamene.” (Yak. 4:8) Yehuwa makěndagẹ̌ si kitẹ, kụ naul᷊ị i Sie sarung makoạ Amang kapiange si kitẹ.

5. Tumuhụ Lukas 10:22, kerea i Yesus mẹ̌tul᷊ung si kitẹ mẹ̌těngkarani si Yehuwa?

⁵ Yesus botonge mẹ̌tul᷊ung si kitẹ mẹ̌těngkarani si Yehuwa. Yesus sěbạe masingkạ-singkạ si Yehuwa kụ nẹ̌těno manga sipat’E dingangu nasukụ. Ual᷊ingu alasang ene i sie naul᷊ị, ”I saing seng nakasilo si siạ lai seng nakasilo si Amang.” (Yoh. 14:9) Kere sěngkatau tuhang esẹ, i Yesus něněntiro si kitẹ kerea měngarěga lai tumuhụ si Amang, carane tadeạu tawe makatědụ naung’E, lai makal᷊uasẹ̌ si Sie. Katewe lembone i Yesus mẹ̌tul᷊ung si kitẹ makaěna i Yehuwa kai sěbạe mapia dingangu makěndagẹ̌. (Basa Lukas 10:22.) Mahịe měmanda piram baụ contone.

6. Gělịko contoh kerea i Yehuwa dụdaringihẹ̌ si Yesus.

⁶ Yehuwa dụdaringihẹ̌ manga anạ’E. Pěmanda kerea cara i Yehuwa dụdaringihẹ̌ anạ’E iakang. Su tempong Ahus’E su dunia, Yehuwa masau dụdaringihẹ̌ daroane. (Luk. 5:16) I Sie dụdaringihẹ̌ daroang i Yesus soal u měkoạ putusang penting kere su tempong měmile 12 rasule. (Luk. 6:12, 13) Yehuwa lai dimaringihẹ̌ daroang i Yesus su tempong i sie sěbạe stres. Maraning i sie dikhianati, Yesus nẹ̌doa si Amange soal u manga hal᷊ẹ̌ sarung mariadi si sie. Yehuwa bal᷊inẹ kětạeng dimaringihẹ̌ daroang i Yesus, katewe lai něndolohẹ̌ sěmbaụ malaekatẹ̌ gunang měnoghasẹ̌ Ahus’E ikẹ̌kěndagẹ̌.​—Luk. 22:41-44.

7. Kerea pěndangu nakasingkạ i Yehuwa dụdaringihẹ̌ daroang i kitẹ?

⁷ Orasẹ̌ ini, i Yehuwa lai dụdaringihẹ̌  daroang i kitẹ, kụ i Sie sumimbahẹ̌ su tempo nẹ̌tatahino dingangu cara kapaelange. (Mz. 116:1, 2) Pěmanda kerea sěngkatau saudari su India nakapěndang hal᷊ẹ̌ enẹ. I sie nasigěsạ ual᷊ingu sěbạe gụgěnggang, kụ i sie nẹ̌doa si Yehuwa ual᷊ingu hal᷊ẹ̌ ene. I sie nẹ̌běke, ”Acara JW Broadcasting^® wul᷊ang Mei 2019 nělahẹ soal u kerea tumatěngo kaghaghěnggang, sěbạe nẹ̌tatahino dingangu kebutuhanku. Ene sasimbahu manga daroaku.”

8. Kerea i Yehuwa něnodẹ kakěndag’E si Yesus?

⁸ Yehuwa něnodẹ kakěndag’E si kitẹ kere i Sie něnodẹ kakěndag’E si Yesus su tempong su dunia. (Yoh. 5:20) I Sie něnadia kěbị kebutuhan rohani, emosi, dingangu jasmaning i Yesus. Kụ Yehuwa naul᷊ị i Sie makěndagẹ̌ dingangu mal᷊uasẹ̌ su Ahus’E. (Mat. 3:16, 17) Ual᷊ingu i Amange sěntiniạ kapěngumbalaěng, i Yesus tawe pernah nẹ̌pěndang sẹ̌sane.​—Yoh. 8:16.

9. Apa buktine i Yehuwa makěndagẹ̌ si kitẹ?

⁹ Kere i Yesus, i kitẹ kěbị bọu nakapěndang kakěndagi Yehuwa su haghing cara. Kěnang pẹ̌tiněna ini: Yehuwa němol᷊eng si kitẹ sarang i Sie kụ něgělị keluarga rohani makěndagẹ̌ lai nasěmbaụ tadeạu mal᷊uasẹ̌ dingangu měmahangsang si kitẹ su tempong stres. (Yoh. 6:44) Yehuwa lai něgělị kěbị kebutuhan rohani tadeạu pangangimang i kitẹ tatapẹ̌ matoghasẹ̌. I Sie lai nẹ̌tul᷊ung něngurusẹ̌ kebutuhan matering i kitẹ ěllo-ěllo. (Mat. 6:31, 32) Su tempong mẹ̌tiněna kakěndagi Yehuwa si kitẹ, kakěndagi kitẹ si Sie sarung tumuwo.

10. Apa wotonge kaěndungang i kitẹ bọu cara i Yehuwa měkoạ anạu sěmbaụ?

¹⁰ Yehuwa makěndagẹ̌ su anạu sěmbaụ. Katewe tawe sěntiniạ gampang kuměndagẹ̌ lai měnodẹ kakěndagẹ̌ si sire. Ual᷊ingu i kitẹ kěbị piạ latar belakang dingangu budaya nẹ̌tatěntang. Kụ i kitẹ kěbị měkẹ̌koạ pẹ̌sasal᷊a makakoạ taumata wal᷊inẹ matědụ naung dingangu lusiang. Maning kerene, i kitẹ botonge měnoghasẹ̌ kakěndagẹ̌ su keluarga rohaning i kitẹ. Kerea carane? Mẹ̌těno si Amang i kitẹ su tempong měnodẹ kakěndagẹ̌ su anạu sěmbaụ. (Ef. 5:1, 2; 1 Yoh. 4:19) Mahịe měmanda apa kaěndungang i kitẹ bọu i Yehuwa.

11. Kerea i Yesus nẹ̌těno ”tatal᷊ěntụ” i Yehuwa?

¹¹ Yehuwa něnodẹ ”tatal᷊ěntụ”. (Luk. 1:78) Sěngkatau matal᷊ěntụ madiri makasilo taumata wal᷊inẹ masigěsạ, kụ i sie mědeạ cara gunang mẹ̌tul᷊ung lai měhiborẹ̌. Bọu cara i Yesus měkoạ taumata, i sie nẹ̌těno tatal᷊ěntụ i Yehuwa. (Yoh. 5:19) Piạ su sěngsul᷊ẹ i Yesus nakasilo komol᷊angu taumata, kụ i sie ”timal᷊ěntụ si sire, ual᷊ingu i sire sẹ̌sědạkeng dingangu niwala kere domba tawẹ měngangahạe”. (Mat. 9:36) Yesus bal᷊inẹ kětạeng timal᷊ěntụ, katewe lai nẹ̌tul᷊ung si sire. I sie napakapia taumata masakị lai nẹ̌tul᷊ung taumata ”nal᷊owe dingangu nawěhạu bawawaěng”.​—Mat. 11:28-30; 14:14.

12. Gělịko contoh kerea i kitẹ měnodẹ tatal᷊ěntụ.

¹² Těntal᷊ang tawe něnodẹ tatal᷊ěntụ su anạu sěmbaụ, i kitẹ perlu masingkạ apa sasal᷊ukạ tẹ̌tatěngong i sire. Contone, ěndịu sěngkatau saudari nasakị mawěhạ. I sie tawe mẹ̌běke hal᷊ẹ̌ ene, katewe i sie ěndịu mal᷊uasẹ̌ mạeng piạ u mẹ̌tul᷊ung. Apa i sie botonge makasadia kebutuhan jasmaning kěluargane? Apa i kitẹ botonge mẹ̌tul᷊ung měnasạ gunang i sie arau měmurěsi wal᷊ene? Arau sěngkatau saudara ěndịu nikailangengu hal᷊ẹ̌. I kitẹ botonge měgělị hadiah kadodọ kere doitẹ̌ kụ tawe maul᷊ị ene bọu i sai, gunang mẹ̌tul᷊ung sarang i sie makaěbạ hal᷊ẹ̌.

13-14. Kerea i kitẹ botonge maělugẹ̌ kere i Yehuwa?

¹³ Yehuwa kai maělugẹ̌. (Mat. 5:45)  Gunang měnodẹ tatal᷊ěntụ, i kitẹ tawe měngampal᷊ẹ̌ anạu sěmbaụ mẹ̌dorong tul᷊ung si kitẹ. Kere i Yehuwa, i kitẹ botonge měkoạ sěmbaụ hal᷊ẹ̌ těntal᷊ang i sire bědang tawe nẹ̌dorong tul᷊ung. I Sie někoạ matangěllo siměbang ěllo-ěllo kụ tawe harusẹ̌ dorongang. Kěbị taumata nakaěbạ gunane bọu matangěllo, bal᷊inẹ kětạeng i sire apang mětẹ̌tarimakasẹ. Su tempong něgělị manga hal᷊ẹ̌ nakoạ kebutuhan i kitẹ, Yehuwa něnodẹ i Sie makěndagẹ̌ si kitẹ. I kitẹ sěbạe makěndagẹ̌ si Yehuwa ual᷊ingu i Sie sěbạe mapia dingangu maělugẹ̌.

¹⁴ Anạu sěmbaụ nẹ̌těno si Yehuwa kụ maělugẹ̌ su taumata wal᷊inẹ. Contone, su taung 2013, piạ Topan Super Haiyan nakakoạ Filipina sěbạe narusa. Lawọ anạu sěmbaụ nikailangengu wal᷊e dingangu arětạ i sire. Katewe keluarga rohaning i sire bọu patikụ dunia masahawụ nẹ̌tul᷊ung si sire. Tawe nakaěbạ sěntaung karěngụe, lawọ něgělị doitẹ̌, saụ někoạ, arau němangung maraning 750 wal᷊e. Su kanandụu pandemi COVID-19, Sahiding Yehuwa něhal᷊ẹ̌ masěghadẹ̌ gunang mẹ̌tul᷊ung anạu sěmbaụ. Mạeng i kitẹ masahawụ mẹ̌tul᷊ung keluarga rohaning i kitẹ, ene něnodẹ i kitẹ makěndagẹ̌ si sire.

15-16. Tumuhụ Lukas 6:36, apa harusẹ̌ koateng gunang mẹ̌těno si Amang i kitẹ su sorga?

¹⁵ Yehuwa matal᷊ěntụ dingangu puluang měgělị ampung. (Basa Lukas 6:36.) Ěllo-ěllo i kitẹ makapěndang i Amang i kitẹ su sorga matal᷊ěntụ. (Mz. 103:10-14) Manga tumatol᷊eng i Yesus tawe nasukụ, katewe i Yesus matal᷊ěntụ kụ něgělị ampung si sire. I sie sarang lai mapulu měgělị pěbawiahe tadeạu i kitẹ botonge ampungang. (1 Yoh. 2:1, 2) Tatal᷊ěntụ dingangu ampungang i Yehuwa lai i Yesus nakakoạ i kitẹ botonge mẹ̌těngkarani si Yehuwa.

¹⁶ I kitẹ makatoghasẹ̌ kakěndagẹ̌ su ral᷊ungu keluarga rohaning i kitẹ su tempong ”měgělị ampung dingangu kaguwạu naung”. (Ef. 4:32) Tantu, měgělị ampung su taumata wal᷊inẹ pẹ̌sěngsul᷊ẹ ene tawe gampang, hakị u ene i kitẹ perlu mẹ̌tawakal᷊i měkoạ ene. Piạ sěngkatau saudari nẹ̌basa sěmbaụ artikel su Menara Pengawal tatěmbọe ”Ampunilah Satu Sama Lain dengan Lapang Hati” kụ ene nakatul᷊ung  si sie. * I sie nẹ̌běke, ”Artikel ini nakatul᷊ung si siạ nakaěna kerea měgělị ampung su taumata wal᷊inẹ ene makatul᷊ung si siạ. Sene nilahẹ su tempong i kau měgělị ampung su taumata wal᷊inẹ ene bal᷊inẹ mangal᷊ene kakanoạ nẹ̌sal᷊a nikoạ i sire ene nihino arau tawe nakatědụ naung. Katewe su tempong i kau měgělị ampung si sire, i kau seng tawe mẹ̌pědu si sire kụ makapěndang dame su naung.” Su tempong i kitẹ měgělị ampung su anạu sěmbaụ dingangu kaguwạu naung, ene něnodẹ i kitẹ makěndagẹ̌ si sire kụ nẹ̌těno si Amang i kitẹ, i Yehuwa.

17. Tumuhụ Matius 5:16, kerea i kitẹ měngadatẹ̌ si Amang i kitẹ su sorga?

¹⁷ I kitẹ sěbạe mẹ̌tarimakasẹ ual᷊ingu nakoạ bageang bọu kěluargang i Yehuwa su patikụ dunia. I kitẹ mapulu lawọ taumata měněmbah su Mawung i kitẹ. Hakị u ene, abe měkoạ hal᷊ẹ̌ kụ makakoạ taumata mẹ̌pikirẹ̌ dal᷊akị soal i Yehuwa arau manga ělang’E. I kitẹ mẹ̌tawakal᷊i měkoạ hal᷊ẹ̌ mapia tadeạu taumata mapulu měngěndung habarẹ̌ mapia.​—Basa Matius 5:16.

18. Apa makatul᷊ung si kitẹ bahani měnginjilẹ̌?

¹⁸ Pẹ̌sěngsul᷊ẹ, piạ měheghesẹ̌ arau měndariha si kitẹ ual᷊ingu tụtuhụ si Amang i kitẹ su sorga. Apa koateng i kitẹ mạeng gugupẹ̌ su tempong mẹ̌bisara dingangu taumata wal᷊inẹ soal u apa pẹ̌pangimangeng i kitẹ? I kitẹ mangimang i Yehuwa dingangu Ahus’E sarung mẹ̌tul᷊ung si kitẹ. Yesus naul᷊ị su manga murite i sire tawe harusẹ̌ guměnggang soal u kerea carane maul᷊ị arau apa harusẹ̌ ul᷊ịkang. Kawe nụe kerene? Yesus nělahẹ, ”Apa harusẹ̌ paul᷊ịkang i kamene sarung gělịkang si kamene su tempo ene, ual᷊ingu nẹ̌bisara bal᷊inẹ kětạeng i kamene, katewe rohkẹ̌ masusi bọu i Amang i kamene nẹ̌bisara limiung i kamene.”​—Mat. 10:19, 20.

19. Gělịko sěmbaụ contoh sěngkatau dingangu bahani něnginjilẹ̌.

¹⁹ Pẹ̌tiněna contoh i Robert. Kangerẹ su tempong i sie bědang buhu něngěndung Alkitapẹ̌ kụ mahal᷊i kasingkạe soal u Alkitapẹ̌,  i sie harusẹ̌ tumol᷊e pengadilan militer su Afrika Selatan. I sie bahani kụ naul᷊ị su pengadilan i sie mapulu tatapẹ̌ netral ual᷊ingu makěndagẹ̌ su anạu sěmbaụe. I sie měngẹ̌ngarěga bageange su keluarga rohani. Sěngkělěndịu hakim nẹ̌kiwal᷊o, ”I sai anạu sěmbaụu?” Tawe napikirẹ̌ si Robert nighělịkang kakiwal᷊o kerene, katewe i sie nakatahěndung ayat harian gunang sahěllo ene. Ayate su Matius 12:50, sene niul᷊ị, ”I saing měkẹ̌koạ kapulung i Amangku su sorga kai anạu sěngkatauku esẹ, anạu sěngkatauku wawine, dingangu imamạku.” Maning i Robert bědang buhu něngěndung Alkitapẹ̌, rohkẹ̌ i Yehuwa nẹ̌tul᷊ung si sie simimbahẹ̌ kakiwal᷊o ene dingangu manga kakiwal᷊o wal᷊inẹ kụ tawe napikirẹ̌ si sie. Yehuwa tantu sěbạe mal᷊uasẹ̌ si Robert! Kụ i Yehuwa lai mal᷊uasẹ̌ su tempong i kitẹ měngumbala si Sie tadeạu bahani měnginjilẹ̌ su tempo masigěsạ.

20. I kitẹ mapulu mẹ̌tawakal᷊i měkoạ apa? (Yohanes 17:11, 15)

²⁰ I kitẹ sěbạe mẹ̌tarimakasẹ ual᷊ingu ene su keluarga rohani makěndagẹ̌. I kitẹ piạ Amang kapiange dingangu lawọ anạu sěmbaụ makěndagẹ̌ si kitẹ. I kitẹ harusẹ̌ sěntiniạ mẹ̌tarimakasẹ ual᷊ingu hal᷊ẹ̌ ene. Setang dingangu manga tumatol᷊ene dal᷊akị mẹ̌tawakal᷊i měkoạ i kitẹ ragu su kakěndagi Amang i kitẹ su sorga dingangu mẹ̌tawakal᷊i měndusa kasasěmbaụ i kitẹ. Maning kerene, i Yesus nẹ̌doa si Amange gunang měndiagạ si kitẹ tadeạu tatapẹ̌ masěmbaụ dingangu kěluargang i kitẹ. (Basa Yohanes 17:11, 15.) Yehuwa simimbahẹ̌ daroa ene. Kere i Yesus, karimạko i kitẹ tawe ragu su kakěndagẹ̌ dingangu tul᷊umang i Amang i kitẹ su sorga. Mahịe i kitẹ mẹ̌tawakal᷊i gunang turusẹ̌ mẹ̌těngkarani su keluarga rohaning i kitẹ.