உங்களை நீங்களே மதிப்பது ஏன் முக்கியம்?

• ஆராய்ச்சிகள் என்ன காட்டுகிறது என்றால், யாருக்கெல்லாம் அவர்கள்மீதே மரியாதை இல்லையோ அவர்களால் சரியாக சாப்பிட முடிவதில்லை. கவலையும் மன அழுத்தமும் சீக்கிரமாக அவர்களைத் தொற்றிக்கொள்கிறது. அதுமட்டுமல்ல, குடிப் பழக்கத்துக்கும் போதைப் பொருளுக்கும் அவர்கள் அடிமை ஆவதற்கு நிறைய வாய்ப்புகள் இருக்கின்றன.

• தன்னையே மதிக்கிறவர்கள், மற்றவர்களோடு தன்னை ஒப்பிட்டுப் பார்க்க மாட்டார்கள். அதனால், சுற்றியிருக்கிறவர்களோடு அவர்களால் ஒத்துப்போக முடியும். நல்ல நண்பர்களைக் கண்டுபிடிக்கவும் முடியும். ஆனால், தன்னையே மதிக்காதவர்கள் பெரும்பாலும் மற்றவர்களிடம் குறை கண்டுபிடித்துக்கொண்டே இருப்பார்கள். அதனால், இருக்கிற நண்பர்களையும் இழந்துவிடுவார்கள்.

• தன்னையே மதிக்கிறவர்கள், எவ்வளவு பிரச்சினைகள் வந்தாலும் அதைத் தாக்குப்பிடித்து நிற்பார்கள். அவர்களுடைய குறிக்கோளை அடைவதற்கு என்ன தடை வந்தாலும் அதையெல்லாம் தாண்டி போய்க்கொண்டே இருப்பார்கள். ஆனால், தன்னையே மதிக்காதவர்களுக்கு சின்ன சின்ன பிரச்சினைகள்கூட, தாண்ட முடியாத பெரிய மலை மாதிரி தெரியும். அதனால், சீக்கிரத்திலேயே அவர்கள் விட்டுக்கொடுத்து விடுவார்கள்.

 நீங்கள் என்ன செய்யலாம்

தோள் கொடுக்கும் தோழர்களைக் கண்டுபிடியுங்கள். மரியாதையோடு நடந்துகொள்கிற, உங்கள்மேல் உண்மையிலேயே அக்கறை வைத்திருக்கிற, உங்களுக்குத் தோள் கொடுக்கிற நண்பர்களோடு பழகுங்கள்.

மற்றவர்களுக்கு உதவி செய்யுங்கள். மற்றவர்களிடம் அன்பாக நடந்துகொள்ளும்போது, அவர்களுக்காக ஏதாவது செய்யும்போது அதுவும், திரும்ப எதுவும் செய்ய முடியாதவர்களுக்காக ஏதாவது செய்யும்போது உங்களால் உண்மையிலேயே சந்தோஷமாக இருக்க முடியும். நீங்கள் செய்வதைப் பார்த்து யாரும் உங்களைப் பாராட்டவில்லை என்றாலும் சந்தோஷமாக இருப்பீர்கள்.

தன்னையே மதிக்க பிள்ளைகளுக்கு உதவுங்கள். அதை செய்வதற்கு ஒரு வழி, பிள்ளைகளுக்கு வருகிற பிரச்சினைகளை முடிந்தவரைக்கும் அவர்களே சமாளிக்க விடுவதுதான். அப்படிச் செய்தால் பிரச்சினைகளைத் தாங்கிக்கொள்ளவும் அதை சமாளிக்கவும் அவர்கள் கற்றுக்கொள்வார்கள். அப்படிக் கற்றுக்கொண்டால் இப்போதும் சரி, வளர்ந்த பிறகும் சரி, பிள்ளைகள் சுயமரியாதையோடு இருப்பார்கள்.