எது தலைசிறந்த கட்டளை என்று இயேசுவிடம் ஒருவர் கேட்டார். அதற்கு அவர், “உன் கடவுளாகிய யெகோவாமீது உன் முழு இருதயத்தோடும் உன் முழு மூச்சோடும் உன் முழு மனதோடும் அன்பு காட்ட வேண்டும்” என்றார். (மத்தேயு 22:37) ஆனால், கடவுள்மீது மக்கள் அன்பு காட்ட வேண்டுமென்றால் முதலாவது அவரைப் பற்றி திருத்தமாக அறிந்துகொள்ள வேண்டும். (யோவான் 17:3) அப்படியென்றால், அவரை அறிந்துகொள்ள எல்லா மக்களுக்கும் ஒரேமாதிரியான வாய்ப்பு கிடைக்குமா?

கடவுளைப் பற்றிய அறிவைப் பெற உதவும் முக்கிய நூல் பைபிள். (2 தீமோத்தேயு 3:16) இன்று அநேகருக்கு பைபிள் சுலபமாகக் கிடைக்கிறது. அதோடு, கடவுளைப் பற்றித் திருத்தமாக அறிந்துகொள்ள, அதாவது பைபிளைப் பற்றி கற்றுக்கொள்ள, அவர்கள் ஒவ்வொருவருக்கும் அடிக்கடி உதவி கிடைக்கலாம். (மத்தேயு 28:19) இன்னும் சிலருக்கு அன்பான கிறிஸ்தவ பெற்றோரால் கடவுளைப் பற்றி அறிந்துகொள்ள தினமும் வாய்ப்பு கிடைக்கிறது.—உபாகமம் 6:6, 7; எபேசியர் 6:4.

என்றாலும், சிலருக்கு இப்படிப்பட்ட சாதகமான சூழல் அமைவதில்லை. உதாரணமாக, சிலர் துளியும் அன்பின் வாசம் இல்லாத வீடுகளில் வளர்ந்திருக்கலாம், ஆம் பெற்றோரின் பந்தபாசத்தையே பெறாமல் இருந்திருக்கலாம். (2 தீமோத்தேயு 3:1-5) இதுபோன்ற சூழலில் வளர்ந்தவர்களுக்கு கடவுளை ஓர் அன்புள்ள தகப்பனாக பார்ப்பது கடினமாக இருக்கலாம். இன்னும் அநேகருக்குப் போதுமான கல்வியறிவு கிடைக்காததால் பைபிளை வாசிக்க முடியாமல் போகலாம். இன்னும் சிலர் பொய் மதத்தினால் கடவுளைப் பற்றி தவறாகக் கற்பிக்கப்பட்டிருக்கலாம்; அல்லது பைபிள் போதனைகளை ஏற்றுக்கொள்ளாத குடும்பத்திலோ சமுதாயத்திலோ நாட்டிலோ அவர்கள் பிறந்திருக்கலாம். (2 கொரிந்தியர் 4:4) கடவுளைப் பற்றி அறிந்துகொள்வதற்கும் அவர்மீது அன்பு காட்டுவதற்கும் இவையெல்லாம் தடைக்கற்களா?

கடவுளை நேசிப்பதற்கும் அவருக்குக் கீழ்ப்படிந்து நடப்பதற்கும் சிலருடைய சூழ்நிலைகள் தடையாக இருக்கலாம் என்பதை இயேசுவும் ஒத்துக்கொண்டார். (மத்தேயு 19:23, 24) ஆனால், சில தடைகள் மனித பார்வையில் மலைபோல் தோன்றினாலும் “கடவுளால் எல்லாமே முடியும்” என்றும் தம் சீடர்களுக்கு நினைப்பூட்டினார்.—மத்தேயு 19:25, 26.

இதைக் கொஞ்சம் யோசித்துப் பாருங்கள்: உலகில் எந்த மூலையில் வாழ்ந்தாலும் எல்லாருக்கும் பைபிள் கிடைக்க யெகோவா தேவன் ஏற்பாடு செய்திருக்கிறார். கடவுளைப் பற்றி... சீக்கிரத்தில் பூமியைப் பூஞ்சோலையாக அவர் மாற்றப்போவதைப் பற்றி... “உலகெங்கும்” உள்ள மக்களுக்கு அறிவிக்கப்படும் என்று பைபிள் முன்பே சொல்லியிருக்கிறது. (மத்தேயு 24:14) மனதுக்கு இதமளிக்கும் இந்தச் செய்தியை இன்று 230-க்கும் அதிகமான நாடுகளில் யெகோவாவின் சாட்சிகள் அறிவித்து வருகிறார்கள்; அதோடு, சுமார் 500 மொழிகளில் பைபிள் அடிப்படையிலான புத்தகங்களையும் வெளியிடுகிறார்கள். பைபிளை வாசிக்க முடியாதவர்களும்கூட உண்மை கடவுளைப் பற்றி அறிந்துகொள்ள முடியும். எப்படி? கடவுளுடைய படைப்புகளை கண்ணார காண்பதன் மூலம்.—ரோமர் 1:20.

அதுமட்டுமல்ல, ‘யெகோவாவுக்கு ஒவ்வொருவரின் மனதில் என்ன இருக்கிறது என்பது தெரியும். நீ நினைக்கிற அனைத்தையும் யெகோவா புரிந்துகொள்வார். நீ உதவிக்கு யெகோவாவிடம் போனால், அவர் பதில் தருவார்’ என்று கடவுளுடைய வார்த்தை சொல்கிறது. (1 நாளாகமம் 28:9, ஈஸி டு ரீட் வர்ஷன்) எனவே, தம்மைப் பற்றி அறிந்துகொள்ள ஒவ்வொருவருக்கும் யெகோவா ஒரேமாதிரியான வாய்ப்பை அளிப்பதாக வாக்குறுதி அளிக்கவில்லை; ஆனால் நல்ல இதயம் படைத்தவர்களுக்கு நிச்சயம் ஒரு வாய்ப்பு கிடைக்கும்படி செய்வதாக உறுதியளிக்கிறார். அதுமட்டுமா, தம்மைப் பற்றி ஒன்றுமே தெரியாமல் இறந்துபோனவர்களுக்கும்கூட யெகோவா வாய்ப்பு அளிப்பார்; ஆம், நீதி தவழும் புதிய உலகில் அவர்களை உயிரோடு எழுப்பி தம்மைப் பற்றி அறிந்துகொள்ள வாய்ப்பு கொடுப்பார்.—அப்போஸ்தலர் 24:15. (w10-E 08/01)