பைபிள் உண்மையில் கடவுளால் கொடுக்கப்பட்டதா?
அதிகாரம் 5
பைபிள் உண்மையில் கடவுளால் கொடுக்கப்பட்டதா?
யெகோவா தேவன் தம்மைப் பற்றிய தகவலை நமக்குக் கொடுத்திருக்கிறாரா? தாம் செய்திருக்கிறவற்றையும் இனிமேலும் செய்யும்படி நோக்கங்கொண்டிருக்கிறவற்றையும் அவர் நமக்குச் சொல்லியிருக்கிறாரா? தன் பிள்ளைகளை நேசிக்கிற தகப்பன் அவர்களுக்குப் பல காரியங்களைச் சொல்லுகிறான். நாம் பார்த்திருக்கிறபடி யெகோவா நிச்சயமாகவே அன்புள்ள ஒரு தகப்பன்.
2 பூமியின் பல பாகங்களிலும் வெவ்வேறு காலப் பகுதிகளிலும் வாழ்ந்து வரும் மனிதருக்கு யெகோவா தகவலை எப்படிக் கொடுக்கக் கூடும்? ஒரு சிறந்த முறையானது அவர் ஒரு புத்தகம் எழுதப்படும்படி செய்து, பின்பு அந்தப் புத்தகம் எல்லோருக்கும் கிடைக்கச் செய்யும்படி பார்த்துக் கொள்வதாகும். பைபிள் கடவுளால் கொடுக்கப்பட்ட இவ்வகையான ஒரு புத்தகமா? அப்படியானால் இதை நாம் எப்படித் தெரிந்து கொள்ளக்கூடும்?
பைபிளைப் போல் வேறு எந்தப் புத்தகமும் இல்லை
3 பைபிள் உண்மையில் கடவுளால் கொடுக்கப்பட்டதென்றால், அது, எழுதப்பட்ட எந்தப் புத்தகத்தைப் பார்க்கிலும் மிக முதன்மையான புத்தகமாக இருக்கும்படி நாம் எதிர்ப்பார்க்க வேண்டும். அது அப்படியிருக்கிறதா? ஆம், பல காரணங்களினிமித்தமாக அப்படியிருக்கிறது. முதலாவதாக, அது வெகு பழமையானது; மனிதவர்க்கம் முழுவதற்கும் கொடுக்கப்படும் கடவுளுடைய வார்த்தை சொற்ப காலத்திற்கு முன்புதானே எழுதப்பட்டதாக இருக்கும்படி நீங்கள் எதிர்பார்க்க மாட்டீர்களல்லவா? ஏறக்குறைய 3,500 ஆண்டுகளுக்கு முன்பாக அது எபிரெயு மொழியில் எழுதப்படத் தொடங்கினது. பின்பு 2,200-க்கு மேற்பட்ட ஆண்டுகளுக்கு முன்பாக, அது மற்ற மொழிகளில் மொழிபெயர்க்கப்பட தொடங்கினது. இன்று பெரும்பாலும் பூமியிலிருக்கும் எல்லோருமே பைபிளைத் தங்கள் சொந்த மொழியில் வாசிக்கக் கூடும்.
4 மேலும் எடுக்கப்பட்டிருக்கிற நகல்களின் எண்ணிக்கையை, ஒப்பிடும்போது வேறு எந்தப் புத்தகமும் பைபிளுக்கு ஈடாக இல்லை. வெறும் ஆயிரக்கணக்கான பிரதிகள் மாத்திரமே அச்சடிக்கப்பட்டிருக்கும் ஒரு புத்தகம், “விற்பனையாகும் மிகச் சிறந்த நூல்” என்று அழைக்கப்படலாம். என்றபோதிலும் ஒவ்வொரு ஆண்டிலும் பல பத்து இலட்சம் பைபிள்கள் அச்சடிக்கப்பட்டிருக்கின்றன. நூற்றாண்டுகளினூடே பல நூற்றுக் கோடிக்கணக்கான பைபிள்கள் அச்சடிக்கப்பட்டிருக்கின்றன! ஓர் இடம் எவ்வளவு ஒதுக்கமாக தனியே இருந்தாலும் சரி, பூமியில் நீங்கள் பைபிளைப் பார்க்கமுடியாத இடமே இல்லை என்று சொல்லலாம். உண்மையில் கடவுள் கொடுத்த ஒரு புத்தகத்தைக் குறித்ததில் நீங்கள் எதிர்பார்ப்பது இதுவல்லவா?
5 மேலும் சத்துருக்கள் பைபிளை அழிக்க முயன்றிருக்கிற இந்த உண்மைதானே பைபிள் இவ்வளவு விரிவாய் விநியோகிக்கப்பட்டு வருவதை மேன்மைப்படுத்துகிறது. ஆனால் கடவுளால் கொடுக்கப்பட்ட ஒரு புத்தகமானது, பிசாசின் காரிய கர்த்தாக்களின் தாக்குதலுக்கு ஆளாகுமென்று நாம் எதிர்பார்க்க வேண்டுமல்லவா? இவ்வாறே நடந்திருக்கிறது. ஒரு காலத்தில் பைபிளை எரிப்பது சாதாரண காரியமாயிருந்தது. பைபிளை வாசிப்பதாகக் கண்டுபிடிக்கப்பட்டவர்கள் அடிக்கடி மரண தண்டனை அளிக்கப்பட்டனர்.
6 கடவுள் கொடுத்திருக்கும் ஒரு புத்தகம் நாம் எல்லோரும் தெரிந்து கொள்ள விரும்ப வேண்டிய முக்கியமான காரியங்களை விவாதித்துப் பேசும்படி நீங்கள் எதிர்பார்ப்பீர்கள். ‘உயிர் எங்கிருந்து வந்தது?’ ‘நாம் ஏன் இங்கே இருக்கிறோம்?’ ‘எதிர்காலம் என்ன கொண்டுவரும்?’ ஆகியவை பைபிள் பதிலளிக்கிற கேள்விகளில் சில. தன்னிடம் காணப்படும் தகவல்கள் யெகோவா தேவன் கொடுத்தவை என்று தெளிவாய் நேரடியாகச் சொல்லுகிறது. பைபிள் எழுத்தாளன் ஒருவன் பின்வருமாறு கூறினான்: “யெகோவாவின் ஆவியே என் மூலமாய்ப் பேசினது, அவருடைய வார்த்தை என் நாவில் இருந்தது.” (2 சாமுவேல் 23:2, NW) “வேத வாக்கியங்களெல்லாம் தேவ ஆவியினால் அருளப்பட்டிருக்கிறது,” என்று மற்றொருவன் எழுதினான். (2 தீமோத்தேயு 3:16) அது கடவுளுடைய வார்த்தை என்று பைபிள் அவ்வளவு திட்டவட்டமாய்ச் சொல்வதனால், அது அப்படியிருக்கிறதா என்று ஆராய்ந்து பார்ப்பது ஞானமாய் இருக்குமல்லவா?
பைபிள் எப்படி எழுதப்பட்டது?
7 ‘என்றபோதிலும் பைபிள் மனிதரால் எழுதப்பட்டிருக்க அது கடவுளால் கொடுக்கப்பட்டதாக எப்படி இருக்கக்கூடும்?’ என்று நீங்கள் ஒருவேளை கேட்கலாம். ஏறக்குறைய 40 மனிதர் பைபிளை எழுதுவதில் பங்கெடுத்தார்கள் என்பது மெய்யே. இந்த மனிதர், பத்துக் கற்பனைகளைத் தவிர, பைபிளை உண்மையில் எழுதினார்கள். இந்தப் பத்துக் கற்பனைகளைக் கடவுள் தாமே, தம்முடைய பரிசுத்த ஆவியின் நேரடியான செயலால் கற்பலகைகளின் மேல் எழுதினார். (யாத்திராகமம் 31:18) என்றபோதிலும், இது அவர்கள் எழுதினதைக் கடவுளுடைய வார்த்தைக்குக் குறைவு பட்டதாக்கி விடுகிறதில்லை. “மனுஷர் பரிசுத்த ஆவியினாலே ஏவப்பட்டுப் பேசினார்கள்” என்று பைபிள் விளக்குகிறது. (2 பேதுரு 1:21) ஆம், வானங்களையும் இந்தப் பூமியையும், உயிருள்ள எல்லாவற்றையும் படைக்கக் கடவுள் தம்முடைய வல்லமை வாய்ந்த பரிசுத்த ஆவியைப் பயன்படுத்தினதைப் போலவே, பைபிள் எழுதுவதை வழிநடத்தவும் அவர் அதைப் பயன்படுத்தினார்.
8 இது, யெகோவா தேவன் மாத்திரமே பைபிளின் ஒரே ஒரு நூலாசிரியராயிருக்கிறார் என்றர்த்தங்கொள்ளுகிறது. ஓர் அலுவல் அதிகாரி ஒரு கடிதத்தை எழுத ஒரு செயலாளனைப் பயன்படுத்துவதைப் போலவே, யெகோவா தேவன் இந்தத் தகவலை எழுதி வைக்க மனிதரைப் பயன்படுத்தினார். அந்தச் செயலாளன் அந்தக் கடிதத்தை எழுதுகிறான், என்றாலும் அந்தக் கடிதம் அந்த அலுவல் அதிகாரியின் எண்ணங்களும் ஆலோசனைகளுமே அடங்கியதாய் இருக்கிறது. ஆகவே அது அவருடைய கடிதம், அந்தச் செயலாளனுடையதல்ல, அவ்வாறே பைபிளும் கடவுளுடைய புத்தகமே, அதை எழுதுவதற்குப் பயன்படுத்தப்பட்ட அந்த மனிதரின் புத்தகமல்ல.
9 மனதைக் கடவுள் படைத்ததனால், எழுதுவதற்குத் தகவலை அளிக்க தமது ஊழியரின் மனதுடன் தொடர்பு கொள்வதை அவர் நிச்சயமாகவே கடினமாகக் காணவில்லை. இன்றும் ஓர் ஆள் தன்னுடைய வீட்டில் உட்கார்ந்து, ரேடியோ அல்லது டெலிவிஷன் கருவி அமைப்பின் மூலமாய்த் தூர இடத்திலிருந்து செய்திகளைப் பெற்றுக் கொள்ளக்கூடும். அந்தக் குரல்கள் அல்லது படங்கள், கடவுள் படைத்த இயற்கைச் சட்டங்களைப் பயன்படுத்துவதன் மூலம் தொலை தூரங்கள் பயணப்படுகின்றன. ஆகையால், யெகோவா, மிகத் தொலை தூரத்தில் பரலோகங்களிலுள்ள அவருடைய இடத்திலிருந்து, மனித குடும்பம் அறிய வேண்டுமென்று தாம் விரும்பின அந்தக் தகவலை எழுதி வைக்கும்படி மனிதரை வழிநடத்தக் கூடுமென்பதை விளங்கிக்கொள்வது சுலபமாயிருக்கிறது.
10 இதன் பலன்தான், ஓர் அதிசய புத்தகம். உண்மையில் பைபிள் 66 சிறு புத்தகங்களாலாகியது. “பைபிள்” என்ற இந்தப் பதம் பிப்ளியா என்ற கிரேக்கப் பதத்திலிருந்து வருகிறது, இதன் அர்த்தம் “சிறு புத்தகங்கள்” என்பதாகும். இந்தப் புத்தகங்கள், அல்லது கடிதங்கள் 1,600 ஆண்டுகளுக்கு மேற்பட்ட காலப் பகுதியில், அதாவது, பொ.ச.மு 1513-லிருந்து பொ.ச. 98 வரையாக எழுதப்பட்டு வந்தன. என்றபோதிலும், ஒரே நூலாசிரியரை மட்டுமே உடையதாக இருப்பதனால், இந்தப் பைபிள் புத்தகங்கள் எல்லாம் ஒன்றோடொன்று ஒத்திசைந்திருக்கின்றன. பைபிள் முழுவதும் ஒரே பொருளையே உடையதாய் இருக்கிறது. அதாவது, யெகோவா தேவன் தம்முடைய ராஜ்யத்தின் மூலமாய் நீதியுள்ள நிலைமைகளைத் திரும்பக் கொண்டுவருவார் என்பதே. முதல் புத்தகமாகிய ஆதியாகமம், கடவுளுக்கு எதிரான கலகத்தின் காரணமாக ஒரு பரதீஸ் வீடு எப்படி இழக்கப்பட்டதென்பதைப் பற்றிச் சொல்லுகிறது; கடைசி புத்தகமாகிய வெளிப்படுத்தின விசேஷம் கடவுளுடைய ஆட்சியின் மூலமாய் இந்தப் பூமி எப்படி மறுபடியும் ஒரு பரதீஸாக்கப்படும் என்பதை விவரிக்கிறது.—ஆதியாகமம் 3:19, 23; வெளிப்படுத்துதல் 12:10; 21:3, 4.
11 பைபிளில் முதல் 39 புத்தகங்கள் பெரும்பாலும் எபிரெய மொழியிலும், வெகு சிறிய பகுதிகள் அரமேயிக்கிலும் எழுதப்பட்டன. கடைசி 27 புத்தகங்கள், இயேசுவும் அவரைப் பின்பற்றின கிறிஸ்தவர்களும் பூமியில் இருந்தபோது மக்களின் பொது மொழியாக இருந்த கிரேக்கில் எழுதப்பட்டன. பைபிளின் இந்த இரண்டு பெரிய பிரிவுகள் “எபிரெய வேத எழுத்துக்கள்” என்றும் “கிரேக்க வேத எழுத்துக்கள்” என்றும் சரியாகவே அழைக்கப்படுகின்றன. இவை ஒன்றுக்கொன்று ஒத்திருப்பதைக் காட்டுவதாய், கிரேக்க வேத எழுத்துக்கள் எபிரெய வேத எழுத்துக்களிலிருந்து 365 தடவைகளுக்கு மேலாக மேற்கோள்களை எடுத்துக் காட்டுகின்றன, அதோடுகூட எபிரெய வேத எழுத்துக்களிலிருந்து 375 கூடுதல் குறிப்புகளையும் மேற்கோளாகக் காட்டுகின்றன.
பைபிளை எல்லோருக்கும் கிடைக்கச் செய்தல்
12 மூல எழுத்துக்கள் மாத்திரமே இருந்தால், எல்லோரும் எப்படி கடவுளுடைய வார்த்தையை வாசிக்க முடியும்? முடியாது. எனவே மூல எபிரெய எழுத்துக்களின் நகல்கள் எடுக்கப்படும்படியாக யெகோவா ஏற்பாடு செய்தார். (உபாகமம் 17:20) உதாரணமாக எஸ்றா, “இஸ்ரவேலின் தேவனாகிய கர்த்தர் [யெகோவா] அருளிய மோசேயின் நியாயப்பிரமாணத்திலே தேறின வேதபாரகன் [நகல் எழுதுபவன்],” என்று அழைக்கப்பட்டிருக்கிறான். (எஸ்றா 7:6) கிரேக்க எழுத்துக்களிலும் ஆயிரக்கணக்கான நகல்கள் எடுக்கப்பட்டன.
13 நீங்கள் எபிரெய அல்லது கிரேக்க மொழியை வாசிப்பீர்களா? இல்லையென்றால், கையினால் எழுதப்பட்ட பூர்வ பைபிள் நகல்களை நீங்கள் வாசிக்க முடியாது, அவற்றில் சில இன்னும் இருந்து கொண்டிருக்கின்றன. ஆகையால், நீங்கள் பைபிளை வாசிப்பதற்கு, உங்களுக்குத் தெரிந்த மொழியில் எவராவது அந்த வார்த்தைகளை மொழி பெயர்த்து எழுத வேண்டும். ஒரு மொழியிலிருந்து மற்றொன்றுக்கு மொழிபெயர்க்கும் இக்காரியம் மேலுமதிகமான ஆட்கள் கடவுளுடைய வார்த்தையை வாசிப்பதைக் கூடிய காரியமாக்கியிருக்கிறது. உதாரணமாக, இயேசு பூமியில் வாழ்ந்த காலத்துக்கு ஏறக்குறைய 300 ஆண்டுகளுக்கு முன்பாக, கிரேக்கு மிகப் பெரும்பாலர் பேசத் தொடங்கின மொழியாயிற்று. ஆகவே, பொ.ச.மு 280 முதல் எபிரெய வேத எழுத்துக்கள் கிரேக்கில் மொழிபெயர்க்கப்பட்டன. இந்தத் தொடக்கக் கால மொழிபெயர்ப்பு “செப்டுவஜின்ட்” என்றழைக்கப்பட்டது.
14 பின்னால், லத்தீன் பல ஆட்களின் பொது மொழியாயிற்று. ஆகவே பைபிள் லத்தீனில் மொழிபெயர்க்கப்பட்டது. ஆனால், நூற்றாண்டுகள் செல்லச்செல்ல லத்தீன் பேசும் ஆட்கள் குறைந்து கொண்டே வந்தனர். பெரும்பான்மையர், அராபிக், பிரென்ஞ், ஸ்பானிஷ், போர்த்துகீஸ், இத்தாலியன், ஜெர்மன், ஆங்கிலம் ஆகியவற்றைப் போன்ற மற்ற மொழிகளைப் பேசினர். பொதுமக்களின் மொழியில் பைபிள் மொழிபெயர்க்கப்படாதபடி வைத்துக்கொள்ள கத்தோலிக்க மதத் தலைவர்கள் சில காலம் போராடினர். பைபிளை வைத்திருந்த ஆட்களைக் கழுமரத்தில் எரித்தும் கொன்றார்கள். பைபிள் அவர்களுடைய பொய்ப் போதகங்களையும் தீயச் செயல்களையும் வெளிப்படுத்திக் காட்டினதனால் அவர்கள் இவ்வாறு செய்தார்கள். ஆனால் காலப் போக்கில் இந்த மதத் தலைவர்கள் இந்தப் போராட்டத்தில் தோல்வி அடைந்தனர். பைபிள் பல மொழிகளில் மொழிபெயர்க்கப்பட்டு பெரும் எண்ணிக்கைகளில் எங்கும் பரவலாக வழங்கப்பட்டது. இன்று பைபிள் அதன் முழுமையிலோ, அல்லது பகுதியிலோ 1,700-க்கு மேற்பட்ட மொழிகளில் வாசிக்கப்படக் கூடியதாய் இருக்கிறது!
15 ஆண்டுகள் செல்லச் செல்ல ஒரே மொழியிலேயே பைபிளின் பல வெவ்வேறுபட்ட மொழிபெயர்ப்புகள் உண்டு பண்ணப்பட்டன. உதாரணமாக, ஆங்கிலத்தில் மாத்திரமே வித்தியாசமான பல பைபிள் மொழிபெயர்ப்புகள் இருக்கின்றன. ஏன்? வெறும் ஒரு மொழிபெயர்ப்பு போதுமானதாக இராதா? ஆண்டுகள் செல்லச் செல்ல ஒரு மொழி பேரளவாய் மாறிக் கொண்டு வரும். ஆகவே பழைய பைபிள் மொழிபெயர்ப்புகளைப் புதிய மொழிபெயர்ப்புகளோடு ஒத்துப் பார்ப்பீர்களானால், மொழிநடையில் மாற்றங்கள் இருப்பதை நீங்கள் கவனிப்பீர்கள். அவை எல்லாம் அநேகமாய் எப்பொழுதும் ஒரே கருத்தையே கொடுக்கிறபோதிலும் மிக சமீப ஆண்டுகளில் அச்சடிக்கப்பட்ட மொழிபெயர்ப்புகள், விளங்கிக் கொள்வதற்கும் பொதுவாய் எளிதாக இருக்கின்றன என்பதை நீங்கள் கவனிக்கலாம். ஆகவே புதிய பைபிள் மொழிபெயர்ப்புகள், கடவுளுடைய வார்த்தையைப் பொதுவான, எளிதில் விளங்கிக் கொள்ளக்கூடிய தற்போதைய மொழிநடையில் கொடுப்பதனால் அவற்றிற்கு நாம் நன்றியுள்ளவர்களாக இருக்கலாம்.
பைபிள் மாற்றப்பட்டிருக்கிறதா?
16 ஆனால், நீங்கள் ஒருவேளை பின்வருமாறு கேட்கலாம்: ‘பைபிள் எழுத்தாளர்கள் கடவுளிடமிருந்து பெற்ற அதே தகவலை இன்று நம்முடைய பைபிள்கள் கொண்டிருக்கின்றனவென்று நாம் எப்படி நிச்சயமாய் இருக்கக் கூடும்?’ நூற்றுக்கணக்கான, மேலும் ஆயிரக்கணக்கான ஆண்டுகளினூடேயும் பைபிள் புத்தகங்களை நகல்கள் எடுப்பதும் நகல்களிலிருந்து நகல்கள் எடுப்பதுமாக இருந்து வந்திருக்க, பிழைகள் ஏற்பட்டிருக்கவில்லையா? ஆம், ஆனால் இந்தப் பிழைகள் கண்டுபிடிக்கப்பட்டு தற்கால பைபிள் மொழிபெயர்ப்புகளில் திருத்தப்பட்டிருக்கின்றன. பைபிளை முதல் எழுதினவர்களுக்குக் கடவுள் கொடுத்த அதே தகவலை இன்று பைபிள் கொண்டிருக்கிறது. இதற்கு என்ன நிரூபணம் இருக்கிறது?
17 1947-க்கும் 1955-க்கும் இடையில் சவக்கடல் சுருள்கள் என்று அறியப்பட்டவை கண்டுபிடிக்கப்பட்டன. இந்தப் பழைய சுருள்களோடு எபிரெய வேத எழுத்துக்களின் புத்தகங்களுடைய நகல்களும் அடங்கியிருக்கின்றன. இவை இயேசு பிறப்பதற்கு முன்னான 100-க்கும் 200-க்கும் இடையேயுள்ள ஆண்டுகளுக்குரியவை. இந்தச் சுருள்களில் ஒன்று ஏசாயா புத்தகத்தின் ஒரு நகலாக இருக்கிறது. இது கண்டுபிடிக்கப்படுவதற்கு முன்பாக எபிரெயுவில் கிடைக்கக்கூடியதாயிருந்த ஏசாயா புத்தகத்தின் மிகப் பழைய நகலானது இயேசு பிறந்து ஏறக்குறைய 1,000 ஆண்டுகளுக்குப் பின்பு எடுக்கப்பட்டிருந்த ஒன்றாகும். ஏசாயா புத்தகத்தின் இந்த இரண்டு நகல்களையும் ஒப்பிட்டுப் பார்த்தபோது அவற்றில் வெகு சின்னஞ் சிறிய வேறுபாடுகள் மாத்திரமே இருந்தன, இவற்றில் பெரும்பாலும் எழுத்துக்கூட்டுதல் சம்பந்தப்பட்ட சிறிய வேறுபாடுகளே! இது, 1,000-க்கும் மேற்பட்ட ஆண்டுகளில் நகல்கள் எழுதியெடுக்கப்பட்டு வந்தபோதிலும் உண்மையான மாற்றம் எதுவும் செய்யப்பட்டிருக்கவில்லை என்பதைக் குறிக்கிறது!
18 எபிரெய வேத எழுத்துக்களினுடைய வெவ்வேறு பகுதிகளின் 1,700-க்கும் மேற்பட்ட பூர்வ நகல்கள் கிடைக்கக்கூடியவையாக இருக்கின்றன. இந்த மிகப் பழமையான பல நகல்களைக் கவனமாய் ஒப்பிட்டுப் பார்ப்பதன் மூலம், நகல் எழுதியெடுத்தவர்கள் செய்த அந்த ஒரு சில பிழைகளையுங்கூட கண்டுபிடித்து திருத்திக் கொள்ளலாம். மேலும் கிரேக்க வேத எழுத்துக்களின் மிகப் பழமையான நகல்கள் ஆயிரக்கணக்கில் இருக்கின்றன. இந்த நகல்களில் சில, ஏறக்குறைய, இயேசுவும் அவருடைய அப்போஸ்தலரும் இருந்த அக்காலத்திய நகல்களாக இருக்கின்றன. இதனால், சர் பிரெட்ரிக் கெனியன் பின்வருமாறு கூறினார்: “வேத எழுத்துக்கள் பெரிய அளவு மாறுதலில்லாமல், அவை எழுதப்பட்டபடியே, நமக்கு வந்துசேர்ந்திருக்கின்றன என்பதைச் சந்தேகிப்பதற்கு இருந்த அந்தக் கடைசி அடிப்படையும் இப்பொழுது நீக்கப்பட்டுவிட்டது.”—பைபிளும் புதைபொருள் ஆராய்ச்சியும் (ஆங்கிலம்), பக்கம் 288, 289.
19 இது கடவுளுடைய வார்த்தையை மாற்றுவதற்கான முயற்சிகள் எடுக்கப்பட்டிருக்கவில்லை என்று அர்த்தங் கொள்ளுகிறதில்லை. அப்படிப்பட்ட முயற்சிகள் எடுக்கப்பட்டிருக்கின்றன. கவனிக்கத்தக்க ஓர் உதாரணமானது 1 யோவான் 5:7 ஆகும். தமிழ் யூனியன் மொழிபெயர்ப்பு பைபிளில் இது பின்வருமாறு கொடுக்கப்பட்டிருக்கிறது: “பரலோகத்திலே சாட்சியிடுகிறவர்கள் மூவர், பிதா, வார்த்தை, பரிசுத்த ஆவி என்பவர்களே, இம்மூவரும் ஒன்றாயிருக்கிறார்கள்.” என்றபோதிலும் இந்த வார்த்தைகள் பைபிளின் மிகப் பூர்வ நகல்கள் எவற்றிலும் காணப்படுகிறதில்லை. இவை திரித்துவ போதகத்தை ஆதரிக்க முயன்றுகொண்டிருந்த எவரோ ஒருவரால் கூட்டப்பட்டிருக்கின்றன. இவ்வார்த்தைகள் உண்மையில் கடவுளுடைய வார்த்தையின் பாகமானவையல்லவென்பது தெளிவாக இருப்பதனால் திருத்தங்கள் செய்யப்பட்டிருக்கின்றன. புதிய பைபிள் மொழிபெயர்ப்புகளில் இவ்வார்த்தைகள் காணப்படுகிறதில்லை.
20 பைபிள், அது முதன்முதல் எழுதப்பட்டபோது கொண்டிருந்த அதே தகவலைக் கொண்டதாக இல்லை என்று எவனாவது சொல்லுகிறானென்றால் அவன் வெறுமென உண்மைகளை அறியாதவனாக இருக்கிறான். தம்முடைய வார்த்தை, நகல் எழுதுபவர்களின் பிழைகளிலிருந்து மட்டுமல்லாமல், அதோடு கூடுதலானவற்றைச் சேர்க்க முயன்றவர்களின் முயற்சிகளிலிருந்துங்கூட பாதுகாக்கப்பட்டு வரும்படி யெகோவா தேவன் பார்த்து வந்திருக்கிறார். அவருடைய வார்த்தை, இன்று நமக்காக, கலப்படமில்லாமல் தூய்மையான நிலையில் பாதுகாத்து வைக்கப்பட்டிருக்குமென்ற கடவுளுடைய வாக்கை பைபிள்தானேயும் தன்னிலே கொண்டிருக்கிறது.—சங்கீதம் 12:6, 7; தானியேல் 12:4; 1 பேதுரு 1:24, 25; வெளிப்படுத்துதல் 22:18, 19.
பைபிள் உண்மையில் சத்தியமாய் இருக்கிறதா?
21 “உமது வார்த்தையே சத்தியம்” என்று இயேசு கிறிஸ்து கடவுளிடம் ஜெபத்தில் சொன்னார். (யோவான் 17:17, தி.மொ.) ஆனால் உண்மையான காரியங்கள் இதை ஆதரிக்கின்றனவா? பைபிளைக் கவனமாய் ஆராய்கையில், அது உண்மையில் சத்தியமே என்று நாம் காண்கிறோமா? பைபிளைப் படித்திருக்கிற சரித்திர ஆராய்ச்சியாளர், அது நுட்பமான குறிப்புகளிலும் திருத்தமாக இருப்பதில் ஆச்சரியப்படுகின்றனர். உண்மை உறுதி செய்யப்படக்கூடிய திட்டவட்டமான பெயர்களும் நுட்ப விவரங்களும் பைபிளில் அடங்கியிருக்கின்றன. சில உதாரணங்களைக் கவனியுங்கள்.
22 எகிப்தில் கர்னாக்கிலுள்ள ஆலய மதிலில் படங்களையும் எழுத்துக்களையும் அடுத்தப் பக்கத்தில் பாருங்கள். இவை, சுமார் 3,000 ஆண்டுகளுக்கு முன்பாக, பார்வோன் ஷிஷாக், சாலொமோனின் குமாரனாகிய ரெகொபெயாம் ஆட்சி செய்த காலத்தின்போது யூதா ராஜ்யத்தின் மீது அடைந்த வெற்றியைப் பற்றிச் சொல்லுகின்றன. பைபிள், இதே சம்பவத்தைப் பற்றிச் சொல்லுகிறது.—1 இராஜாக்கள் 14:25, 26
23 அந்த மோவாபிய கல்லையும் பாருங்கள். பிரான்ஸில், பாரிஸிலுள்ள லூவர் பொருட்காட்சிசாலையில் இந்த அசல் கல்லைப் பார்க்கலாம். இது, மோவாபின் அரசனாகிய மேசா இஸ்ரவேலுக்கு எதிராகக் கலகஞ் செய்ததைப் பற்றிக் குறிப்பிடுகிறது. இந்தச் சம்பவம் பைபிளிலும் அறிவிக்கப்பட்டிருக்கிறது.—2 இராஜாக்கள் 1:1; 3:4-27.
24 சீலோவாம் குளமும் எருசலேமிலுள்ள 1,749-அடிகள் (533 மீட்டர்கள்) நீளமான தண்ணீர் கால்வாய் சுரங்கத்தின் நுழை வாயிலும் இங்கே வலதுபுற ஒதுக்கில் காணப்படுகின்றன. தற்காலத்தில் எருசலேமைப் பார்க்கப் போகிறவர்கள் பலர் இந்தச் சுரங்கத்தின் வழியாய்த் தண்ணீரில் நடந்து சென்றிருக்கின்றனர். இது இருந்து வருவது பைபிள் சத்தியமானதென்பதற்கு மேலுமான நிரூபணமாய் இருக்கிறது. எப்படி? ஏனென்றால், 2,500 ஆண்டுகளுக்கு முன்பாக அரசனாகிய எசேக்கியா எருசலேமைப் பிடிக்க வந்து கொண்டிருந்த ஒரு சேனைக்கு எதிராகத் தன்னுடைய தண்ணீர் வசதியைப் பாதுகாத்துக் கொள்ள ஒரு தண்ணீர் சுரங்கம் கட்டப்படும்படி செய்தான் என்று பைபிள் விளக்குகிறது.—2 இராஜாக்கள் 20:20; 2 நாளாகமம் 32:2-4, 30.
25 பிரிட்டிஷ் பொருட்காட்சி சாலையைப் பார்க்கப் போகிற ஒருவர் அங்கே நபோனிடஸ் செய்திப் பட்டியலைக் காணலாம், அதன் ஒரு நகல் வலது புறத்தில் காணப்படுகிறது. இது, பைபிளுங்கூட விவரிக்கிற பிரகாரம், பூர்வ பாபிலோனின் வீழ்ச்சியை விவரிக்கிறது. (தானியேல் 5:30, 31) ஆனால் பைபிள் பெல்ஷாத்சார் அப்பொழுது பாபிலோனின் அரசனாக இருந்தான் என்று சொல்லுகிறது. என்றபோதிலும் நபோனிடஸ் செய்திப் பட்டியல் பெல்ஷாத்சாரின் பெயரையுங்கூட குறிப்பிடுகிறதில்லை. உண்மையில் ஒரு சமயத்தில் அப்பொழுது அறியப்பட்டிருந்த எல்லா பூர்வ எழுத்துக்களும், நபோனிடஸே பாபிலோனின் கடைசி அரசன் என்று குறிப்பிட்டன. ஆகவே பைபிள் சத்தியமானதல்ல என்று சொன்னவர்கள் பெல்ஷாத்சார் என்ற இவன் ஒருபோதும் இருந்திருக்கவில்லை, பைபிள் பிழையானது என்று வாதாடினர். ஆனால் சமீப ஆண்டுகளில் பூர்வ எழுத்துக்கள் கண்டுபிடிக்கப்பட்டிருக்கின்றன. இவை பெல்ஷாத்சாரை நபோனிடஸின் குமாரன் எனவும், அந்தச் சமயத்தில் பாபிலோனில் தன் தகப்பனோடுகூட ஆளும் அரசனாக இருந்தான் எனவும் அடையாளங் காட்டுகின்றன! ஆம், அத்தனை மிக மிகப் பல உதாரணங்கள் நிரூபிக்கிற பிரகாரம் பைபிள் உண்மையில் சத்தியமே.
26 என்றபோதிலும் பைபிள் உண்மையான சரித்திரம் மாத்திரமே அடங்கியதாயில்லை. அது சொல்லுகிற எல்லாம் சத்தியமே. விஞ்ஞான காரியங்களைப் பற்றிக் குறிப்பிடுகையிலுங்கூட அது அதிசயமான வண்ணமாய்த் திருத்தமாக இருக்கிறது. வெறும் இரண்டு உதாரணங்கள்5 எடுத்துக்கொள்வோம். இந்தப் பூமிக்கு அதைத் தாங்கும் காணக்கூடிய ஏதோ ஒரு ஆதாரம் இருந்ததென்றும், அது, ஒரு இராட்சதன் மேல் இருப்பதைப் போன்று ஏதோ ஒன்றின்மேல் தங்கினதென்றும் பூர்வ காலங்களில் பொதுவாய் நம்பப்பட்டது. என்றபோதிலும் விஞ்ஞான அத்தாட்சியுடன் முழுவதும் ஒத்திருப்பதாய், பைபிள், கடவுள் “பூமியை அந்தரத்திலே தொங்க வைக்கிறார் [ஆதாரம் ஒன்றுமில்லை, தி.மொ.],” என்று அறிவிக்கிறது. (யோபு 26:7) மேலும் கடந்த காலத்தில் பலர் நம்பினபடி, இந்தப் பூமி தட்டையாக இருக்கின்றதென்று சொல்வதற்கு மாறாக, பைபிள், கடவுள் “பூமி உருண்டையின் மேல் வீற்றிருக்கிறவர்,” என்று சொல்லுகிறது.—ஏசாயா 40:22.
27 ஆனால் பைபிள் உண்மையில் கடவுளால் கொடுக்கப்பட்டதென்பதற்கு மிகப் பெரிய நிரூபணமானது அதன் பரிபூரண பதிவு எதிர்காலத்தை முன்னறிவிப்பதாகும். மனிதரால் எழுதப்பட்ட எந்தப் புத்தகமும் சரித்திரத்தை அது நடப்பதற்கு முன்பாகவே திருத்தமாக அறிவிக்கிறதில்லை; என்றபோதிலும் பைபிள் அவ்வாறு அறிவிக்கிறது. ஆம், அது உண்மையில் நடப்பதற்கு முன்னதாகவே எழுதப்பட்டிருக்கிற இனிவரும் சரித்திரத்தைப் பற்றிய திருத்தமான தீர்க்கதரிசனங்களால் நிரம்பியிருக்கிறது. இவற்றில் குறிப்பிடத்தக்க சில காரியங்கள், கடவுளுடைய குமாரன் பூமிக்கு வருவதைப் பற்றியவையாகும். வாக்குத்தத்தம் பண்ணப்பட்ட இவர் பெத்லெகேமில் பிறப்பார், கன்னியின் கர்ப்பத்திலிருந்து பிறப்பார். 30 வெள்ளிக்காசுகளுக்கு காட்டிக்கொடுக்கப்படுவார், பாவிகளில் ஒருவராக எண்ணப்படுவார், உடலின் ஒரு எலும்பாகிலும் முறிக்கப்படாது, அவருடைய உடையின்பேரில் சீட்டுப் போடப்படும் என்பவற்றையும் இன்னும் மிகப் பல நுட்ப விவரங்களையும் பல நூற்றாண்டுகளுக்கு முன்னதாகவே எபிரெய வேத எழுத்துக்கள் திருத்தமாய் முன்னறிவித்தன.—மீகா 5:2; மத்தேயு 2:3-9; ஏசாயா 7:14; மத்தேயு 1:22, 23; சகரியா 11:12, 13; மத்தேயு 27:3-5; ஏசாயா 53:12; லூக்கா 22:37, 52; 23:32, 33; சங்கீதம் 34:20; யோவான் 19:36; சங்கீதம் 22:18; மத்தேயு 27:35.
28 இந்தப் புத்தகத்தின் முதல் அதிகாரத்தில் சொன்னபடியே, இந்தப் பழைய காரிய ஒழுங்குமுறை சீக்கிரத்தில் முடிவடையும் என்றும் நீதியுள்ள ஒரு புதிய ஒழுங்குமுறை அதனிடத்தை எடுத்துக் கொள்ளும் என்றுங்கூட பைபிள் முன்னறிவிக்கிறது. (மத்தேயு 24:3-14; 2 பேதுரு 3:7, 13) இனிமேல் நிறைவேறப் போகிறவையாக இருக்கிற இப்படிப்பட்ட தீர்க்கதரிசனங்களின் பேரில் நாம் நம்பிக்கை வைக்கலாமா? யாரோ ஒருவர் நூறு தடவைகள் உங்களிடம் உண்மையையே பேசியிருந்து, அவர் உங்களுக்குப் புதிய ஒன்றைச் சொல்லுகையில், நீங்கள் திடீரென்று அவரைச் சந்தேகிப்பீர்களா? அவர் தவறாக இருப்பதாய் நீங்கள் ஒருபோதும் கண்டதில்லையென்றால், அவரை இப்பொழுது சந்தேகிக்கத் தொடங்குவீர்களா? இது எவ்வளவு நியாயமற்றதாய் இருக்கும்! இதைப்போலவே, கடவுள் பைபிளில் வாக்கு கொடுக்கிற எவற்றையாவது சந்தேகிப்பதற்கு நமக்கு எவ்வித காரணமுமில்லை. அவருடைய வார்த்தையை உறுதியாக நம்பலாம்! (தீத்து 1:2) பைபிளைத் தொடர்ந்து படித்து வருவதன் மூலம், பைபிள் உண்மையில் கடவுளால் கொடுக்கப்பட்டதென்பதற்கான உண்மைகளைக் கண்டு நீங்கள் திட நம்பிக்கை கொள்வீர்கள்.
[கேள்விகள்]
1. கடவுள் தம்மைப் பற்றிய தகவலை நமக்குக் கொடுப்பார் என்று நம்பவுது ஏன் நியாயமாய் இருக்கிறது?
2. (எ) யெகோவா தம்மைப் பற்றி நமக்குச் சொல்வதற்கு அவர் பயன்படுத்தக்கூடிய சிறந்த முறை என்ன? (பி) இது என்ன கேள்விகளை எழுப்புகிறது?
3. எந்த ஒரு முறையில் பைபிள் மிக முதன்மையான ஒரு புத்தகமாக இருக்கிறது?
4. அச்சடிக்கப்பட்ட பைபிள்களின் எண்ணிக்கை மற்ற புத்தகங்களின் எண்ணிக்கையோடு ஒப்பிட எவ்வாறு இருக்கிறது?
5. பைபிளை அழித்துப்போட என்ன முயற்சிகள் எடுக்கப்பட்டிருக்கின்றன?
6. (எ) என்ன முக்கியமான கேள்விகளுக்குப் பைபிள் பதிலளிக்கிறது? (பி) பைபிள் எழுத்தாளர்கள் எங்கிருந்து தங்கள் தகவலைப் பெற்றதாக உரிமை பாராட்டுகிறார்கள்?
7. (எ) பைபிளை எழுதினவர்கள் யார்? (பி) அப்படியானால், அது கடவுளுடைய வார்த்தை என்று எப்படிச் சொல்லப்படக்கூடும்?
8, 9. (எ) கடவுள் எப்படிப் பைபிள் எழுதப்படும்படி செய்தார் என்பதை விளங்கிக் கொள்வதற்கு இன்றைய என்ன உதாரணங்கள் நமக்கு உதவி செய்யக்கூடும்?
10. (எ) எத்தனை புத்தகங்கள் பைபிளை உண்டுபண்ணுகின்றன, அவை எவ்வளவு நீடித்தக் காலப் பகுதியில் எழுதப்பட்டன? (பி) பைபிள் முழுவதும் அடிப்படையாகக் கொண்டுள்ள முக்கிய பொருள் என்ன?
11. (எ) பைபிளை எழுதுவதற்குப் பயன்படுத்தப்பட்ட மொழிகள் யாவை? (பி) பைபிள் எந்த இரண்டு பெரும் பகுதிகளாக பிரிக்கப்பட்டிருக்கிறது, ஆனால் அவை ஒன்றுபட்டிருப்பதை எது காட்டுகிறது?
12. யெகோவா ஏன் பைபிள் நகல்கள் எடுக்கப்படும்படி செய்தார்?
13. (எ) பெரும்பான்மையான மக்கள் பைபிளை வாசிக்க என்ன தேவைப்பட்டது? (பி) பைபிளின் முதல் மொழிபெயர்ப்பு எப்பொழுது செய்யப்பட்டது?
14. (எ) பைபிள் மொழிபெயர்க்கப்படாதபடி தடுத்து வைக்கும்படியாக சில மதத்தலைவர்கள் ஏன் போராடினர்? (பி) இவர்கள் தங்கள் போராட்டத்தில் தோல்வியடைந்தனர் என்று என்ன காட்டுகிறது?
15. புதிய பைபிள் மொழிபெயர்ப்புகளைக் கொண்டிருப்பது ஏன் நல்லது?
16. பைபிள் மாற்றப்பட்டிருக்கிறதென்று சில மக்கள் ஏன் நம்புகின்றனர்?
17. பைபிள் மாற்றப்படவில்லை என்பதற்கு என்ன அத்தாட்சி இருக்கிறது?
18. (எ) நகல் எடுத்தவர்களின் பிழைகள் எப்படித் திருத்தப்பட்டிருக்கின்றன? (பி) கிரேக்க வேதவார்த்தைகளின் திருத்தமான தன்மையைப் பற்றி என்ன சொல்லப்படலாம்?
19. (எ) பைபிளோடு கூட்ட முயன்றதற்கு ஓர் உதாரணம் என்ன? (பி) பைபிள் மொழிபெயர்ப்புகள் சிலவற்றில் காணப்படுகிறபடி 1 யோவான் 5:7 ஏன் பைபிளின் ஒரு பாகமல்ல?
20. பைபிள் கலப்படமில்லாமல் தூய்மையான நிலையில் பாதுகாத்து வைக்கப்பட்டிருக்கிறதென்று நாம் ஏன் நிச்சயமாய் இருக்கலாம்?
21. இயேசு கடவுளுடைய வார்த்தையை எப்படிக் கருதினார்?
22-25. பைபிள், உண்மையாய் நடந்த சரித்திரம் அடங்கியதாய் இருக்கிறதென்று காட்டுகிற ஒரு சில உதாரணங்கள் யாவை?
26. பைபிள் விஞ்ஞானப்படி திருத்தமாய் இருக்கிறதென்பதற்கு என்ன அத்தாட்சி இருக்கிறது?
27. (எ) பைபிள் கடவுளால் கொடுக்கப்பட்டதென்பதற்கு மிக உறுதியான நிரூபணம் என்ன? (பி) கடவுளுடைய குமாரனைப் பற்றிய என்ன காரியங்களை எபிரெய வேத எழுத்துக்கள் உண்மையாய் முன்னறிவித்தன?
28. (எ) இன்னும் நிறைவேறாத பைபிள் தீர்க்கதரிசனங்களுங்கூட நிச்சயமாய் நிறைவேற்றமடையுமென்று நாம் ஏன் திடநம்பிக்கையுடன் இருக்கலாம்? (பி) பைபிளைத் தொடர்ந்து படித்துவருவது எதைக் குறித்து நீங்கள் திடநம்பிக்கையடையும்படி செய்யும்?
[பக்கம் 49-ன் படம்]
ஓர் அலுவலக அதிகாரி கடிதம் எழுத செயலாளரைப் பயன்படுத்துவதுபோல, கடவுள், பைபிளை எழுத மனிதரைப் பயன்படுத்தினார்
[பக்கம் 50-ன் படம்]
பொது மக்கள் பைபிளை அறியாதபடி இருக்க சில மதத் தலைவர்கள் போராடினர், பைபிளை வைத்திருந்தவர்களைக் கழுமரத்தில் உயிரோடு எரித்து கொன்றனர்
[பக்கம் 52, 53-ன் படம்]
ஏசாயா புத்தகத்தின் சவக்கடல் சுருள்
[பக்கம் 54, 55-ன் படங்கள்]
எகிப்தில், கர்னாக்கிலுள்ள ஆலய மதில்
மோவாபிய கல்
நபோனிடஸ் செய்திப் பட்டியல்
எசேக்கியாவின் தண்ணீர் சுரங்கத்தின் நுழைவாயிலும் சீலோவாம் குளமும்
