பைபிள் புத்தக எண் 64—3 யோவான்
பைபிள் புத்தக எண் 64—3 யோவான்
எழுத்தாளர்: அப்போஸ்தலன் யோவான்
எழுதப்பட்ட இடம்: எபேசு, அல்லது அருகில்
எழுதி முடிக்கப்பட்டது: ஏ. பொ.ச. 98
யோவான் அதிகம் நேசித்த உண்மை கிறிஸ்தவரான காயுவுக்கு எழுதப்பட்டிருக்கிறது இந்த நிருபம். காயு என்ற இந்தப் பெயர், ஆரம்ப கால சபையில் பொதுவாக நன்கு அறியப்பட்ட பெயர். கிறிஸ்தவ கிரேக்க வேதாகமத்தில் இன்னும் நான்கு இடங்களில் இப்பெயர் காணப்படுகிறது. குறைந்தது மூன்று அல்லது ஒருவேளை நான்கு பேர் அப்பெயரில் இருந்ததைக் குறிப்பிடுகிறது. (அப். 19:29; 20:4; ரோ. 16:23; 1 கொ. 1:15) யோவான் இந்த நிருபத்தைக் காயுவுக்கு எழுதினபோதிலும் அவர் மேற்குறிப்பிடப்பட்டவர்களில் ஒருவர் என திட்டமாய் சொல்வதற்கு எந்த ஆதாரமும் இல்லை. காயுவைப் பற்றி நமக்குத் தெரிந்ததெல்லாம் இதுவே: அவர் கிறிஸ்தவ சபையின் அங்கத்தினர், யோவானின் பிரத்தியேக நண்பர், இந்த நிருபம் தனிப்பட்ட விதத்தில் அவருக்காகவே எழுதப்பட்டது. அதன் காரணமாகவே இந்நிருபத்தில் எப்போதும் “நீ” என்பதாக ஒருமையில் சொல்லப்படுகிறது.
2தொடக்க வார்த்தைகளும், முடிவான வாழ்த்துதல்களும் இரண்டு யோவானில் காணப்படுவதைப் போன்றே உள்ளன; எழுத்தாளர் தன்னை ‘மூப்பர்’ என மறுபடியுமாக அடையாளம் காட்டுவதால், இந்த நிருபத்தின் எழுத்தாளரும் அப்போஸ்தலனாகிய யோவானே என்பதில் எந்தச் சந்தேகமும் இல்லை. (2 யோ. 1) பொருளடக்கத்திலும் மொழிநடையிலும் ஒத்திசைவு காணப்படுகிறது. எனவே, மற்ற இரண்டு நிருபங்களைப் போலவே இதுவும் எபேசுவில் அல்லது அதன் சுற்றுவட்டாரத்தில் ஏறக்குறைய பொ.ச. 98-ல் எழுதப்பட்டதைத் தெரிவிக்கிறது. இது சுருக்கமாக இருப்பதால், ஆரம்ப கால எழுத்தாளர்கள் இதிலிருந்து மிக அரிதாகவே மேற்கோள் காட்டினர். ஆனால், தேவாவியால் ஏவப்பட்ட வேதவாக்கியங்களின் ஆரம்ப கால புத்தகப் பெயர் பட்டியல்களில் இரண்டு யோவானுடன் இந்த நிருபமும் காணப்படுகிறது. a
3பயணிகளாக வரும் சகோதரர்களை காயு உபசரித்தார்; அதற்கான போற்றுதலை அவருக்கு யோவான் தன் நிருபத்தில் குறிப்பிடுகிறார். முதன்மையாயிருக்க விரும்பிய தியோத்திரேப்பு என்பவனின் தொல்லையையும் குறிப்பிடுகிறார். தெமேத்திரியு என பெயர் குறிப்பிடப்பட்டவரே இந்த நிருபத்தைக் காயுவுக்கு எடுத்துச் சென்றதாக தோன்றுகிறது. எனவே, இவர் யோவானால் அனுப்பப்பட்டவராகவும் அவருடைய பயணத்தின்போது காயுவின் உபசரிப்பு தேவைப்பட்டவராகவும் இருந்திருக்கலாம். காயுவின் உபசரிப்பை பெற இந்த நிருபம் தெமேத்திரியுவுக்கு நிச்சயம் உதவியிருக்கும். காயுவைப் போலவே இந்தத் தியோத்திரேப்புவையும் தெமேத்திரியுவையும் பற்றி இங்கே நாம் வாசிப்பதற்கும் அதிகமாக வேறு எதுவும் தெரியாது. எனினும், ஆரம்ப கால கிறிஸ்தவர்களிடம் நிலவிய நெருங்கிய சர்வதேச சகோதரத்துவத்தைப் பற்றி கருத்தைக் கவரும் காட்சியை இந்த நிருபம் அளிக்கிறது. மற்ற விஷயங்களோடு, ‘அவருடைய நாமத்தினிமித்தம்’ பயணம் செய்து வருவோரை உபசரிக்கும் பழக்கமும் இதில் உட்பட்டிருந்தது. விருந்தினரைத் தனிப்பட்ட விதமாய் அறிந்திராத போதிலும் அவர்கள் உபசரித்தனர்.—வச. 7.
மூன்று யோவானின் பொருளடக்கம்
4உபசரிக்கும்படியும் நற்கிரியைகளை செய்யும்படியும் அப்போஸ்தலன் அறிவுரை கூறுகிறார் (வச. 1-14). காயு இன்னும் ‘சத்தியத்தில் நடக்கிறார்’ என்பதைக் கேள்விப்பட்டதில் யோவான் அகமகிழ்கிறார். சந்திக்க வரும் சகோதரர்களை அன்போடு கவனிப்பதன் மூலம் உண்மையுள்ள ஊழியம் செய்துவரும் காயுவை அவர் பாராட்டுகிறார். “நாம் சத்தியத்துக்கு உடன் ஊழியராகும்படி அப்படிப்பட்டவர்களை உபசரிக்கக் கடமைப்பட்டிருக்கிறோம்” என்று யோவான் சொல்கிறார். முன்பு யோவான் சபைக்கு எழுதினார்; ஆனால் தன்னை எல்லாருக்கும் மேலாக உயர்த்திக்கொள்ளும் மனம்படைத்த தியோத்திரேப்பு யோவானிடமிருந்தோ பொறுப்புள்ள மற்றவர்களிடமிருந்தோ வரும் எதையும் மதிப்புடன் ஏற்பதில்லை. எனவே, யோவான் வருகையில், ‘பொல்லாத வார்த்தைகளை அலப்பிவருவதற்காக’ அவன் பதில் சொல்லியாக வேண்டும். பிரியத்திற்குரிய காயு, “தீமையானதையல்ல நன்மையானதையே பின்பற்று”ம்படி அறிவுரை பெறுகிறார். போற்றத்தக்க முன்மாதிரி வைப்பவராய் தெமேத்திரியு குறிப்பிடப்படுகிறார். பல விஷயங்களை எழுதுவதைப் பார்க்கிலும், சீக்கிரத்தில் காயுவை நேரில் காணும் வாய்ப்பிருப்பதை யோவான் வெளிப்படுத்துகிறார்.—வச. 4, 8, 10, 11, தி.மொ.
ஏன் பயனுள்ளது
5தீங்குண்டாக்கும் செல்வாக்குகளிலிருந்து சபையைப் பாதுகாக்கும் ஆர்வமுடைய, முன்மாதிரியான கண்காணி என அப்போஸ்தலனாகிய யோவான் தன்னை வெளிக்காட்டுகிறார். சபையில் நிலவிய அன்பும் உபசரிக்கும் பண்பும் பாராட்டுக்குரியது. இந்தச் சந்தோஷமான சூழ்நிலைமையைப் பாதுகாப்பது உண்மையிலேயே அவர்களுடைய கடமை. அப்போதுதான், அந்த இடத்திலுள்ள சகோதரரும், அவர்களுக்குள் வந்த “அந்நியரும்,” (கிறிஸ்தவ உபசரிப்பாளர்கள் முன்பின் அறிந்திராதோர்) ‘சத்தியத்துக்கு உடன் ஊழியராக’ ஒன்றுசேர்ந்து சேவிக்க முடியும். (வச. 5, 8, தி.மொ.) எனினும், தியோத்திரேப்பு மேட்டிமை கண்ணனாய் இருந்தான்; இது யெகோவா அருவருக்கும் குணங்களில் ஒன்று. மேலும் அவன் தேவராஜ்ய அதிகாரத்தை மதிக்காதவன்; ஏன், அப்போஸ்தலன் யோவானைப் பற்றியும் பொல்லாதவற்றை அலப்பிக் கொண்டிருந்தானே. (நீதி. 6:16, 17, தி.மொ.) சபையார் காட்டிய கிறிஸ்தவ உபசரிப்புக்கு இடைஞ்சலாய் இருந்தான். சபையில் இருந்த இந்த கெட்ட செல்வாக்கை யோவான் தைரியமாய் கண்டிக்கிறார். அதே சமயம், உண்மையான கிறிஸ்தவ அன்பை ஆதரித்து அதற்கு சாதகமாக, ஒளிவுமறைவின்றி யோவான் பேசுகிறார். இன்று நாம், மனத்தாழ்மையைக் காத்துவருவதற்கும், சத்தியத்தில் நடப்பதற்கும், கடவுளின் அன்பையும் தயாளத்தையும் பழக்கமாய் செயல்படுத்துவதற்கும் ஆர்வமுள்ளோராய் இருக்க வேண்டும். இது, யோவான் குறிப்பிட்ட இந்த நியமத்துக்கு இசைவாய் இருக்கிறது: “நன்மை செய்கிறவன் கடவுளுக்குரியவன்; தீமை செய்கிறவன் கடவுளைக் கண்டதேயில்லை.”—3 யோ. 11, தி.மொ.
[அடிக்குறிப்பு]
a பக்கம் 303-ல், “கிறிஸ்தவ கிரேக்க வேதாகமத்தின் முதன்மையான பூர்வ புத்தகப் பெயர் பட்டியல்கள்” என்ற அட்டவணையைக் காண்க.
[கேள்விகள்]
1. மூன்று யோவான் யாருக்கு எழுதப்பட்டது, அவரைப் பற்றி நாம் என்ன அறிந்திருக்கிறோம்?
2. மூன்று யோவானின் எழுத்தாளர், எழுதப்பட்ட காலம், இடம் ஆகியவற்றை எது அடையாளம் காட்டுகிறது?
3. மூன்று யோவானின் மூலம் யோவான் எதை குறிப்பிடுகிறார், ஆரம்ப கால கிறிஸ்தவர்களின் சகோதரத்துவத்தைப் பற்றி ஆர்வத்திற்குரிய என்ன காட்சியை நாம் பெறுகிறோம்?
4. யோவான் எதற்காக காயுவைப் பாராட்டுகிறார், என்ன கீழ்ப்படியாத பண்பை அவர் கண்டிக்கிறார், என்ன நல்ல அறிவுரையை அவர் கொடுக்கிறார்?
5. (அ) முன்மாதிரியான கண்காணியாக தன்னை யோவான் எவ்வாறு வெளிக்காட்டினார், என்ன நிலைமையைப் பாதுகாத்து வருவது முக்கியமாயிருந்தது? (ஆ) தியோத்திரேப்புக்கு எதிராக யோவான் ஏன் ஒளிவுமறைவின்றி பேசினார்? (இ) நாம் இன்று எதற்கு ஆர்வமுள்ளோராக இருக்க வேண்டும், யோவான் குறிப்பிட்ட எந்த நியமம் இதற்கு இசைவாக உள்ளது?
