13  அந்தியோகியாவில் இருந்த சபையில்+ பர்னபாவும், நீகர் என்று அழைக்கப்பட்ட சிமியோனும், சிரேனே ஊர்க்காரரான லூகியும், மாகாண அதிபதியான ஏரோதுவோடு படித்த மனாயீனும், சவுலும் தீர்க்கதரிசிகளாகவும் போதகர்களாகவும் இருந்தார்கள். ²  அவர்கள் யெகோவாவுக்கு* ஊழியம் செய்தும் விரதமிருந்தும் வந்தபோது, “பர்னபாவையும் சவுலையும் எந்த வேலைக்காக நான் தேர்ந்தெடுத்திருக்கிறேனோ+ அந்த வேலைக்காக அவர்களை எனக்கென்று ஒதுக்கிவையுங்கள்”+ என்று கடவுளுடைய சக்தி சொன்னது. ³  அவர்கள் விரதமிருந்து ஜெபம் செய்த பிறகு, அவர்கள் இரண்டு பேர்மேலும் கைகளை வைத்து அவர்களை அனுப்பினார்கள். ⁴  இப்படி, கடவுளுடைய சக்தியால் அனுப்பப்பட்ட அந்த இரண்டு பேரும் செலூக்கியாவுக்குப் போய், அங்கிருந்து சீப்புரு தீவுக்குக் கப்பல் ஏறினார்கள். ⁵  அவர்கள் சாலமி நகரத்துக்கு வந்தபோது, யூதர்களுடைய ஜெபக்கூடங்களில் கடவுளுடைய வார்த்தையை அறிவிக்க ஆரம்பித்தார்கள். யோவானும் ஓர் உதவியாளராக அவர்களோடு இருந்தார்.+ ⁶  அங்கிருந்து அந்தத் தீவு முழுவதும் பயணம் செய்து பாப்போ நகரம்வரை போனபோது, பர்யேசு என்ற பெயருடைய ஒரு யூதனைச் சந்தித்தார்கள்; அவன் ஒரு சூனியக்காரன், போலித் தீர்க்கதரிசி. ⁷  ரோம மாநில ஆளுநரான* செர்கியு பவுலோடு அவன் இருந்தான். அந்த ஆளுநர் புத்திக்கூர்மை உள்ளவராக இருந்தார்; கடவுளுடைய வார்த்தையைக் கேட்க அந்த ஆளுநர் ஆர்வமாக இருந்ததால் பர்னபாவையும் சவுலையும் தன்னிடம் வரவழைத்தார். ⁸  ஆனால், எலிமா என்று அழைக்கப்பட்ட அந்தச் சூனியக்காரன் (எலிமா என்ற பெயரின் அர்த்தமே சூனியக்காரன் என்பதுதான்) அவர்களை எதிர்த்துக்கொண்டும், எஜமான்மேல் அந்த ஆளுநர் நம்பிக்கை வைப்பதைத் தடுக்க முயற்சி செய்துகொண்டும் இருந்தான். ⁹  பவுல் என்ற சவுல் கடவுளுடைய சக்தியால் நிறைந்தவராக, அவனை உற்றுப் பார்த்து, ¹⁰  “எல்லா விதமான பித்தலாட்டமும் எல்லா விதமான அக்கிரமமும் நிறைந்தவனே, பிசாசின் மகனே,+ நீதியான எல்லாவற்றுக்கும் பகைவனே, யெகோவாவின்* நீதியான வழிகளைப் புரட்டிப்போடுவதை நிறுத்த மாட்டாயா? ¹¹  இதோ! யெகோவாவின்* கை உனக்கு எதிராக வந்திருக்கிறது; கொஞ்சக் காலத்துக்கு நீ குருடனாகி, சூரிய ஒளியைப் பார்க்காமல் இருப்பாய்” என்று சொன்னார். உடனே அவனுடைய கண் மங்கலாகி, இருண்டுபோனது. அதனால், தன்னுடைய கையைப் பிடித்துக் கூட்டிக்கொண்டு போவதற்கு ஆட்களை அவன் தேட ஆரம்பித்தான். ¹²  நடந்ததையெல்லாம் பார்த்த ஆளுநர் இயேசுவின் சீஷராக ஆனார். ஏனென்றால், அவர் யெகோவாவை* பற்றிய போதனையைக் கேட்டு மலைத்துப்போனார். ¹³  அதன் பின்பு, பவுலும் அவரோடு இருந்தவர்களும் பாப்போவிலிருந்து கப்பல் ஏறி பம்பிலியாவில் உள்ள பெர்கேவுக்கு வந்தார்கள். ஆனால், யோவான்+ அவர்களைவிட்டுப் பிரிந்து எருசலேமுக்குத் திரும்பிப்போனார்.+ ¹⁴  அவர்களோ பெர்கேவிலிருந்து பிசீதியாவில் உள்ள அந்தியோகியாவுக்கு வந்துசேர்ந்தார்கள்; ஓய்வுநாளில் ஜெபக்கூடத்துக்குள்+ போய் உட்கார்ந்தார்கள். ¹⁵  அங்கே கூடியிருந்தவர்களுக்கு முன்னால் திருச்சட்டமும் தீர்க்கதரிசிகளின் புத்தகங்களும் வாசிக்கப்பட்டன.+ அதன் பின்பு, ஜெபக்கூடத் தலைவர்கள் இவர்களிடம் ஆள் அனுப்பி, “சகோதரர்களே, இங்கே இருப்பவர்களை உற்சாகப்படுத்துவதற்கு ஏதாவது சொல்ல விரும்பினால் சொல்லுங்கள்” என்று கேட்டுக்கொண்டார்கள். ¹⁶  அதனால் பவுல் எழுந்து, எல்லாரையும் அமைதியாக இருக்கும்படி சைகை காட்டிவிட்டுப் பேச ஆரம்பித்தார்: “இஸ்ரவேல் மக்களே, கடவுள்பயமுள்ள மற்றவர்களே, நான் சொல்வதைக் கேளுங்கள். ¹⁷  இஸ்ரவேல் மக்களின் கடவுள் நம்முடைய முன்னோர்களைத் தேர்ந்தெடுத்தார். எகிப்து தேசத்தில் அவர்கள் அன்னியர்களாகக் குடியிருந்தபோது, அவர்களை அவர் உயர்த்தினார்; தன்னுடைய கைபலத்தால் அங்கிருந்து அவர்களை வெளியே கூட்டிக்கொண்டு வந்தார்.+ ¹⁸  கிட்டத்தட்ட 40 வருஷங்கள் வனாந்தரத்தில் அவர்களைச் சகித்துக்கொண்டார்.+ ¹⁹  பின்பு, கானான் தேசத்திலிருந்த ஏழு இனத்தவர்களை ஒழித்து, அந்தத் தேசத்தை இஸ்ரவேலர்களுக்குச் சொத்தாகக் கொடுத்தார்.+ ²⁰  இவையெல்லாம் சுமார் 450 வருஷ காலப்பகுதியில் நடந்தன. இவற்றுக்குப் பின்பு, சாமுவேல் தீர்க்கதரிசியின் காலம்வரை, அவர்களுக்காக நியாயாதிபதிகளை ஏற்படுத்தினார்.+ ²¹  ஆனால், அதற்குப் பிறகு தங்களுக்கு ஒரு ராஜா வேண்டுமென்று அவர்கள் வற்புறுத்திக் கேட்டார்கள்;+ அதனால் கடவுள், பென்யமீன் கோத்திரத்தைச் சேர்ந்த கீசின் மகன் சவுலை+ 40 வருஷத்துக்கு ராஜாவாக அவர்களுக்குக் கொடுத்தார். ²²  பின்பு, அவரை நீக்கிவிட்டு தாவீதை ராஜாவாக நியமித்து,+ ‘ஈசாயின் மகன் தாவீது என் இதயத்துக்குப் பிடித்தமானவனாக இருப்பதைக் கண்டேன்;+ நான் விரும்பிய எல்லா காரியங்களையும் அவன் செய்வான்’ என்று அவரைப் பற்றிச் சாட்சி கொடுத்தார். ²³  தான் கொடுத்த வாக்குறுதியின்படியே, தாவீதின் சந்ததியிலிருந்து இயேசுவை இஸ்ரவேலின் மீட்பராக+ வர வைத்தார். ²⁴  இவர் வருவதற்கு முன்பே, மனம் திருந்தியதற்கு அடையாளமாக ஞானஸ்நானம் பெறும்படி இஸ்ரவேலர்கள் எல்லாருக்கும் யோவான் பிரசங்கித்துவந்தார்.+ ²⁵  ஆனால், யோவான் தன்னுடைய ஊழியத்தை முடிக்கப்போகும் சமயத்தில், ‘நான் யாரென்று நீங்கள் நினைக்கிறீர்கள்? நான் அவரல்ல. இதோ! எனக்குப் பின்பு ஒருவர் வரப்போகிறார். அவருடைய செருப்புகளை அவிழ்க்கக்கூட எனக்குத் தகுதியில்லை’+ என்று சொன்னார். ²⁶  சகோதரர்களே, ஆபிரகாமின் வம்சத்தில் வந்த மக்களே, இங்கே கூடியிருக்கும் கடவுள்பயமுள்ள மற்றவர்களே, மீட்பைப் பற்றிய இந்தச் செய்தி நமக்காக அனுப்பப்பட்டிருக்கிறது.+ ²⁷  ஏனென்றால், எருசலேமின் குடிமக்களும் அவர்களுடைய தலைவர்களும் அவர் யார் என்பதைப் புரிந்துகொள்ளவில்லை. அதற்குப் பதிலாக, அவருக்கு அவர்கள் தீர்ப்பு கொடுத்தபோது, ஒவ்வொரு ஓய்வுநாளிலும் தீர்க்கதரிசிகளின் புத்தகங்களிலிருந்து சத்தமாக வாசிக்கப்படுகிற வார்த்தைகளையே+ நிறைவேற்றினார்கள். ²⁸  மரண தண்டனைக்கேற்ற குற்றம் எதையும் அவரிடம் கண்டுபிடிக்காதபோதிலும்,+ அவரைக் கொலை செய்யும்படி பிலாத்துவை வற்புறுத்தினார்கள்.+ ²⁹  அவரைப் பற்றி எழுதப்பட்ட எல்லாவற்றையும் நிறைவேற்றிய பின்பு, அவரை மரக் கம்பத்திலிருந்து* இறக்கி, கல்லறையில்* வைத்தார்கள்.+ ³⁰  ஆனால், கடவுள் அவரை உயிரோடு எழுப்பினார்.+ ³¹  கலிலேயாவிலிருந்து எருசலேமுக்குத் தன்னோடு வந்திருந்தவர்கள்முன் பல நாட்களாக அவர் தோன்றினார். அவர்கள்தான் இப்போது மக்கள் முன்னால் அவருடைய சாட்சிகளாக இருக்கிறார்கள்.+ ³²  அதனால், முன்னோர்களுக்குக் கொடுக்கப்பட்ட வாக்குறுதியைப் பற்றிய நல்ல செய்தியை நாங்கள் உங்களுக்குச் சொல்கிறோம். ³³  இயேசுவைக் கடவுள் உயிரோடு எழுப்பியதன் மூலம், அவர்களுடைய பிள்ளைகளான நமக்கு அந்த வாக்குறுதியை முழுமையாக நிறைவேற்றியிருக்கிறார்.+ இவரைப் பற்றித்தான் இரண்டாம் சங்கீதத்தில், ‘நீ என்னுடைய மகன், இன்று நான் உனக்குத் தகப்பனாக ஆனேன்’ என்று எழுதப்பட்டிருக்கிறது.+ ³⁴  அவர் இனி ஒருபோதும் அழிந்துபோகாதபடி கடவுள் அவரை உயிரோடு எழுப்பினார். இதைப் பற்றித்தான், ‘நான் தாவீதுக்கு வாக்குறுதி கொடுத்தபடியே உங்கள்மேல் மாறாத அன்பைக் காட்டுவேன், என் வாக்குறுதி நம்பகமானது’ என்று தெரிவித்திருக்கிறார்.+ ³⁵  வேறொரு சங்கீதத்தில், ‘உங்களுக்கு உண்மையாக* இருப்பவரின் உடல் அழிந்துபோக விடமாட்டீர்கள்’ என்றும் சொல்லியிருக்கிறார்.+ ³⁶  தாவீது தன்னுடைய வாழ்நாள் காலத்தில் கடவுளுக்குச் சேவை செய்துவிட்டு* கண்மூடினார். பின்பு, தன்னுடைய முன்னோர்களோடு அடக்கம் செய்யப்பட்டார், அவருடைய உடல் அழிந்துபோனது.+ ³⁷  ஆனால், கடவுளால் உயிரோடு எழுப்பப்பட்டவரின் உடல் அழிந்துபோகவில்லை.+ ³⁸  அதனால் சகோதரர்களே, இதைத் தெரிந்துகொள்ளுங்கள்: அவர் மூலம்தான் உங்களுக்குப் பாவ மன்னிப்பு கிடைக்கும் என்பதை அறிவிக்கிறோம்.+ ³⁹  நீங்கள் விசுவாசம் வைத்தால், எந்தக் காரியங்களில் மோசேயின் திருச்சட்டம் உங்கள் குற்றங்களை நீக்க முடியவில்லையோ+ அந்தக் காரியங்களிலெல்லாம் அவர் மூலமாக உங்கள் குற்றங்கள் நீக்கப்படும்.+ ⁴⁰  அதனால், தீர்க்கதரிசிகளின் புத்தகத்தில் எழுதப்பட்டிருப்பது உங்களுக்கு நடக்காதபடி பார்த்துக்கொள்ளுங்கள். ⁴¹  அதில், ‘ஏளனம் செய்பவர்களே, பாருங்கள், ஆச்சரியப்படுங்கள், ஒழிந்துபோங்கள்; ஏனென்றால், உங்களுடைய காலத்தில் நான் ஒரு செயலைச் செய்யப்போகிறேன். அதைப் பற்றி யாராவது உங்களுக்கு விவரமாகச் சொன்னால்கூட நீங்கள் அதை ஒருபோதும் நம்ப மாட்டீர்கள்’ என எழுதப்பட்டிருக்கிறது”+ என்று சொன்னார். ⁴²  பின்பு அவர்கள் வெளியே வந்தபோது, அடுத்த ஓய்வுநாளிலும் இந்த விஷயங்களைப் பற்றித் தங்களிடம் பேசும்படி அங்கிருந்த மக்கள் கேட்டுக்கொண்டார்கள். ⁴³  ஜெபக்கூடத்துக்கு வந்திருந்த கூட்டம் கலைந்த பின்பு, நிறைய யூதர்களும் யூத மதத்துக்கு மாறிய பக்தியுள்ள ஆட்களும் பவுலுக்கும் பர்னபாவுக்கும் பின்னால் போனார்கள். பவுலும் பர்னபாவும் அவர்களோடு பேசியபோது கடவுளுடைய அளவற்ற கருணையைப் பெற எப்போதும் தகுதியுள்ளவர்களாக இருக்கும்படி அவர்களை உற்சாகப்படுத்தினார்கள்.+ ⁴⁴  அடுத்த ஓய்வுநாளின்போது, யெகோவாவின்* வார்த்தையைக் கேட்பதற்காக கிட்டத்தட்ட நகரவாசிகள் எல்லாரும் கூடிவந்தார்கள். ⁴⁵  யூதர்கள் அந்தக் கூட்டத்தைப் பார்த்தபோது பொறாமையால் பொங்கியெழுந்தார்கள். பவுல் சொன்ன விஷயங்களுக்கு முரணாகப் பேசி, கடவுளை நிந்தித்தார்கள்.+ ⁴⁶  அதனால், பவுலும் பர்னபாவும் தைரியமாக அவர்களிடம், “கடவுளுடைய வார்த்தையை உங்களுக்குத்தான் நாங்கள் முதலில் சொல்ல வேண்டியிருந்தது.+ ஆனால் நீங்கள் அதை உதறித்தள்ளி, முடிவில்லாத வாழ்வுக்கு உங்களைத் தகுதியற்றவர்களாக ஆக்கிக்கொள்கிறீர்கள்! அதனால், இப்போது நாங்கள் மற்ற தேசத்து மக்களிடம் போகிறோம்.+ ⁴⁷  ஏனென்றால், ‘பூமியெங்கும் இருக்கிறவர்களுக்கு மீட்புக்கான வழியைக் காட்டுவதற்காக உன்னைத் தேசங்களுக்கெல்லாம் ஒளியாக நியமித்திருக்கிறேன்’ என்ற வசனத்தில் யெகோவாவே* எங்களுக்குக் கட்டளை கொடுத்திருக்கிறார்”+ என்று சொன்னார்கள். ⁴⁸  மற்ற தேசத்து மக்கள் இதைக் கேட்டபோது மிகவும் சந்தோஷப்பட்டு, யெகோவாவின்* வார்த்தையை மகிமைப்படுத்த ஆரம்பித்தார்கள். முடிவில்லாத வாழ்வைப் பெறுவதற்கேற்ற மனப்பான்மையோடு இருந்தவர்கள் இயேசுவின் சீஷர்களானார்கள். ⁴⁹  அதோடு, யெகோவாவின்* வார்த்தை அந்தப் பகுதி முழுவதும் தொடர்ந்து அறிவிக்கப்பட்டு வந்தது. ⁵⁰  ஆனால் யூதர்கள், கடவுளை வணங்கிவந்த பிரபலமான பெண்களையும் நகரத்திலிருந்த முக்கியமான ஆண்களையும் தூண்டிவிட்டு, பவுலையும் பர்னபாவையும் துன்புறுத்தி,+ தங்களுடைய நகரத்துக்கு வெளியே தள்ளிவிட்டார்கள். ⁵¹  அப்போது அவர்கள் இரண்டு பேரும், தங்கள் பாதத்தில் படிந்த தூசியை அவர்களுக்கு எதிராக உதறிவிட்டு,+ இக்கோனியாவுக்குப் போனார்கள். ⁵²  சீஷர்கள் சந்தோஷத்தாலும்+ கடவுளுடைய சக்தியாலும் நிரப்பப்பட்டு வந்தார்கள்.