23  யெகோவா மறுபடியும் என்னிடம், ²  “மனிதகுமாரனே, ஒரு தாய்க்கு இரண்டு மகள்கள் இருந்தார்கள்.+ ³  அவர்கள் இரண்டு பேரும் எகிப்தில் விபச்சாரிகளாக இருந்தார்கள்.+ பருவ வயதிலிருந்தே விபச்சாரம் செய்துவந்தார்கள். தங்கள் கற்பை விற்று ஆண்களோடு உல்லாசமாக இருந்தார்கள். ⁴  பெரியவளின் பெயர் அகோலாள்.* சின்னவளின் பெயர் அகோலிபாள்.* அவர்கள் என்னுடையவர்களாக இருந்தார்கள். மகன்களையும் மகள்களையும் பெற்றெடுத்தார்கள். அகோலாள் என்பவள்தான் சமாரியா,+ அகோலிபாள் என்பவள்தான் எருசலேம். ⁵  அகோலாள் என்னுடையவளாக இருந்தபோது விபச்சாரம் செய்ய ஆரம்பித்தாள்.+ அவளுடைய ஆசைக் காதலர்களான அசீரியர்களை+ மோகத்தோடு தேடிப்போனாள்.+ ⁶  அவர்கள் நீல உடை உடுத்திய ஆளுநர்களாகவும் துணை அதிகாரிகளாகவும் இருந்தார்கள். குதிரைகளில் வந்த அழகான இளம் வீரர்களாக இருந்தார்கள். ⁷  அசீரியாவின் தலைசிறந்த ஆண்மகன்களோடு அவள் விபச்சாரம் செய்துகொண்டே இருந்தாள். ஆட்களை மோகத்தோடு தேடிப்போய், அவர்களுடைய அருவருப்பான* சிலைகளை வணங்கி தன்னைத் தீட்டுப்படுத்தினாள்.+ ⁸  எகிப்தில் செய்த விபச்சாரத்தை அவள் விடவில்லை. அவளுடைய பருவ வயதில் எகிப்தியர்கள் அவளோடு உல்லாசமாக இருந்து தங்கள் காமப்பசியைத் தீர்த்துக்கொண்டார்கள்.+ ⁹  அதனால், அவள் மோகத்தோடு தேடிப்போன அவளுடைய ஆசைக் காதலர்களான அசீரியர்களின் கையிலேயே நான் அவளைக் கொடுத்துவிட்டேன்.+ ¹⁰  அவர்கள் அவளை நிர்வாணமாக்கி,+ அவளுடைய மகன்களையும் மகள்களையும் பிடித்துக்கொண்டு போனார்கள்.+ நடத்தைகெட்டவள் என்ற பெயரெடுத்திருந்த அவளைத் தண்டித்து, வாளால் வெட்டிப்போட்டார்கள். ¹¹  அவளுடைய தங்கை அகோலிபாள் அதைப் பார்த்த பின்பு இன்னும் கேவலமாக நடந்துகொள்ள ஆரம்பித்தாள். விபச்சாரம் செய்வதில் அவளுடைய அக்காவையே மிஞ்சிவிட்டாள்.+ ¹²  அசீரியர்களை மோகத்தோடு தேடிப்போனாள்.+ அவர்கள் கம்பீரமாக உடை உடுத்திய ஆளுநர்களாகவும் துணை அதிகாரிகளாகவும் இருந்தார்கள். குதிரைகளில் வந்த அழகான இளம் வீரர்களாக இருந்தார்கள். ¹³  அவள் தன்னைத் தீட்டுப்படுத்திக்கொண்டாள். அக்காவும் தங்கையும் ஒரே போல நடந்துகொண்டார்கள்.+ ¹⁴  ஆனால், தங்கை விபச்சாரத்துக்குமேல் விபச்சாரம் செய்துவந்தாள். சுவரில் செதுக்கப்பட்ட ஆண்களின் உருவங்களைப் பார்த்தாள். அவை சிவப்பு நிறம் பூசப்பட்ட கல்தேயர்களின் உருவங்கள். ¹⁵  அந்த உருவங்களுக்கு இடுப்புவாரும், நீளமாகத் தொங்குகிற தலைப்பாகையும் இருந்தன. பார்ப்பதற்கு வீரர்களைப் போலவும், கல்தேயர்களின் தேசத்தில் பிறந்த பாபிலோனியர்களைப் போலவும் தெரிந்தன. ¹⁶  அவள் அவற்றைப் பார்த்ததுமே காமத் தீயில் பற்றியெரிய ஆரம்பித்தாள். உடனே, கல்தேயாவுக்குத் தூது அனுப்பினாள்.+ ¹⁷  அதனால், பாபிலோனியர்கள் அவளுடைய படுக்கைக்கு வந்து, தங்கள் காமப்பசியைத் தீர்த்துக்கொள்ள ஆரம்பித்தார்கள். அவர்கள் அவளைத் தீட்டுப்படுத்திய பின்பு அவள் அருவருப்போடு அவர்களைவிட்டு விலகினாள். ¹⁸  அவள் மட்டுக்குமீறிய துணிச்சலோடு விபச்சாரம் செய்துகொண்டும் ஆபாசமாக நடந்துகொண்டும் இருந்தாள்.+ அதனால், நான் அருவருப்போடு அவளுடைய அக்காவைவிட்டு விலகியது போலவே அவளைவிட்டும் விலகினேன்.+ ¹⁹  அவள் விபச்சாரத்துக்குமேல் விபச்சாரம் செய்துவந்தாள்.+ பருவ வயதில் எகிப்து தேசத்தில் செய்த விபச்சாரத்தை ஏக்கத்தோடு நினைத்துப் பார்த்தாள்.+ ²⁰  தன் காதலர்களை மோகத்தோடு தேடிப்போனாள். கழுதையையும் குதிரையையும் போலக் காமவெறி பிடித்து அலைகிற ஆண்களுடைய வைப்பாட்டிகளைப் போல நடந்துகொண்டாள். ²¹  பருவ வயதில் எகிப்திய ஆண்களோடு வாழ்ந்த உல்லாச வாழ்க்கைக்காக ஏங்கினாள்.+ மறுபடியும் அவர்களோடு ஆபாசமாக நடக்கத் துடித்தாள்.+ ²²  அதனால் அகோலிபாளே, உன்னதப் பேரரசராகிய யெகோவா சொல்வது இதுதான்: ‘நீ அருவருப்போடு விட்டுவிலகிய உன் காதலர்களை நான் தூண்டிவிடுவேன்.+ அவர்கள் உனக்கு எதிராக எல்லா பக்கத்திலிருந்தும் வரும்படி செய்வேன்.+ ²³  பேகோடு,+ சோவா, கோவா என்ற இடங்களைச் சேர்ந்தவர்களையும் பாபிலோனியர்களையும்+ கல்தேயர்களையும்+ அசீரியர்களையும் உனக்கு எதிராக வர வைப்பேன். அவர்கள் எல்லாரும் குதிரைகளில் வரும் அழகான இளம் போர்வீரர்கள். ஆளுநர்களாகவும் துணை அதிகாரிகளாகவும் முக்கிய ஆலோசகர்களாகவும் இருப்பார்கள். ²⁴  அவர்கள் ஏராளமான போர் ரதங்களோடும் படைகளோடும் பெரிய கேடயங்களோடும் சிறிய கேடயங்களோடும்* தலைக்கவசங்களோடும் வந்து உன்னைத் தாக்குவார்கள். உன்னைச் சுற்றிவளைப்பார்கள். உன்னைத் தண்டிக்க நான் அவர்களுக்கு அதிகாரம் தருவேன். அவர்கள் தங்களுக்கு இஷ்டமானபடி உனக்குத் தண்டனை கொடுப்பார்கள்.+ ²⁵  நான் உன்மேல் என் கோபத்தைக் கொட்டித்தீர்ப்பேன். அவர்களும் உன்மேல் இருக்கிற ஆத்திரத்தைத் தீர்த்துக்கொள்வார்கள். உன்னுடைய மூக்கையும் காதுகளையும் அவர்கள் அறுத்துவிடுவார்கள். உன்னில் மிச்சமிருக்கிறவர்களை வாளால் வெட்டிச் சாய்ப்பார்கள். உன்னுடைய மகன்களையும் மகள்களையும் பிடித்துக்கொண்டு போவார்கள். மிச்சமிருக்கிறவர்கள் நெருப்புக்குப் பலியாவார்கள்.+ ²⁶  அவர்கள் உன்னுடைய உடைகளையும்,+ அழகான நகைகளையும் பிடுங்கிக்கொள்வார்கள்.+ ²⁷  எகிப்து தேசத்தில் ஆரம்பமான+ உன்னுடைய வெட்கங்கெட்ட விபச்சாரத்துக்கு நான் முடிவுகட்டுவேன்.+ நீ இனி எகிப்தியர்களை ஏறெடுத்துப் பார்க்க மாட்டாய். எகிப்தை நினைத்துக்கூடப் பார்க்க மாட்டாய்.’ ²⁸  உன்னதப் பேரரசராகிய யெகோவா சொல்வது இதுதான்: ‘நீ யாரை வெறுக்கிறாயோ, யாரைவிட்டு அருவருப்போடு விலகினாயோ, அவர்களுடைய கையிலேயே உன்னைக் கொடுக்கப்போகிறேன்.+ ²⁹  அவர்கள் உன்னை வெறுப்பார்கள். நீ கஷ்டப்பட்டு சம்பாதித்த எல்லாவற்றையும் பிடுங்கிக்கொண்டு,+ உன்னை நிர்வாணமாக்கிவிட்டுப் போவார்கள். அப்போது, உன்னுடைய வெட்கக்கேடும் ஆபாசமும் மானங்கெட்ட நடத்தையும் விபச்சாரமும் வெளிச்சத்துக்கு வரும்.+ ³⁰  நீ ஒரு விபச்சாரியைப் போலத் தேசங்களின் பின்னால் அலைந்தாய்.+ அவர்களுடைய அருவருப்பான சிலைகளை வணங்கி உன்னைத் தீட்டுப்படுத்தினாய்.+ அதனால்தான், உனக்கு இந்தக் கதி வரும். ³¹  உன்னுடைய அக்காவைப் போலவே நீ நடந்துகொண்டாய்.+ அதனால், அவளுடைய கிண்ணத்தை உன் கையில் கொடுப்பேன்.’+ ³²  உன்னதப் பேரரசராகிய யெகோவா சொல்வது இதுதான்: ‘நீ உன் அக்காவுடைய பெரிய கிண்ணத்திலிருந்து குடித்து,+கேலி கிண்டலுக்கு ஆளாவாய்; அந்தக் கிண்ணம் அவற்றால் நிறைந்திருக்கிறது.+ ³³  உன் அக்காவான சமாரியாவின் கிண்ணம்கோரமான முடிவையும் சீரழிவையும் கொண்டுவருகிற கிண்ணம்.நீ அதைக் குடித்துப் போதையில் தள்ளாடுவாய், சோகத்தில் வாடுவாய். ³⁴  ஒரு சொட்டு விடாமல் குடித்துவிட்டு,+ அந்த மண் கிண்ணத்தை மெல்லுவாய்.அதன்பின், உன் மார்பகங்களை அறுத்தெறிவாய்.* “இதை நானே சொல்கிறேன்” என்று உன்னதப் பேரரசராகிய யெகோவா சொல்கிறார்.’ ³⁵  அதனால், உன்னதப் பேரரசராகிய யெகோவா சொல்வது இதுதான்: ‘நீ என்னை மறந்துவிட்டு, என்னை ஒதுக்கிவிட்டு,+ ஆபாசமாக நடந்தாய்; விபச்சாரம் செய்தாய். அதன் விளைவுகளை நீ அனுபவித்தே தீருவாய்’” என்றார். ³⁶  பின்பு யெகோவா என்னிடம், “மனிதகுமாரனே, நீ அகோலாளுக்கும் அகோலிபாளுக்கும்+ தீர்ப்பு சொல்வாயா? அவர்களுடைய அருவருப்பான பழக்கவழக்கங்களை அவர்களுடைய முகத்துக்கு நேராகச் சொல்வாயா? ³⁷  அவர்கள் எனக்குத் துரோகம் செய்துவிட்டார்கள்.+ அவர்களுடைய கையில் இரத்தக்கறை படிந்திருக்கிறது. அவர்கள் அருவருப்பான சிலைகளை வணங்கி எனக்குத் துரோகம் செய்தது மட்டுமல்லாமல், எனக்குப் பெற்றெடுத்த பிள்ளைகளை நெருப்பில் பலி கொடுத்து,* அந்தச் சிலைகளுக்கு இரையாக்கினார்கள்.+ ³⁸  அதுமட்டுமல்ல, அந்த நாளில் என்னுடைய ஆலயத்தைத் தீட்டுப்படுத்தினார்கள், என்னுடைய ஓய்வுநாட்களின் புனிதத்தைக் கெடுத்தார்கள். ³⁹  அருவருப்பான சிலைகளுக்குத் தங்கள் பிள்ளைகளை நரபலி கொடுத்த+ அதே நாளில் என்னுடைய ஆலயத்துக்கு வந்து அதைத் தீட்டுப்படுத்தினார்கள்.+ என்னுடைய வீட்டுக்குள்ளேயே வந்து அதைத் தீட்டுப்படுத்தினார்கள். ⁴⁰  அதோடு, தூரத்திலிருந்த ஆட்களை வரச் சொல்லி தூது அனுப்பினார்கள்.+ அகோலிபாளே, அந்த ஆட்கள் வந்துகொண்டிருந்த சமயத்தில் நீ நன்றாகக் குளித்து, உன் கண்களுக்கு மை தீட்டி, நகைகளால் உன்னை அலங்காரம் செய்துகொண்டாய்.+ ⁴¹  நீ ஆடம்பரமான கட்டிலில் உட்கார்ந்தாய்.+ உன்முன் ஒரு மேஜையைப் போட்டு,+ அதில் என்னுடைய தூபப்பொருளையும்+ எண்ணெயையும் வைத்துக்கொண்டாய்.+ ⁴²  கூத்தும் கும்மாளமும் அடிக்கிற ஒரு கும்பலின் சத்தம் அங்கே கேட்டது. வனாந்தரத்திலிருந்து வரவழைக்கப்பட்ட குடிகாரர்களும் அந்தக் கும்பலில் இருந்தார்கள். அந்த ஆட்கள் இந்த இரண்டு பெண்களுடைய கைகளிலும் காப்புகளைப் போட்டுவிட்டார்கள், அவர்களுடைய தலைகளில் அழகான கிரீடங்களை வைத்தார்கள். ⁴³  விபச்சாரம் செய்து* களைத்துப்போனவளைப் பற்றி நான், ‘இவள் விபச்சாரம் செய்வதை விடவே மாட்டாள்’ என்று சொன்னேன். ⁴⁴  விபச்சாரியிடம் போவதைப் போல அவர்கள் அவளிடம் போய்க்கொண்டே இருந்தார்கள். மானங்கெட்ட பெண்களான அகோலாளிடமும் அகோலிபாளிடமும் இப்படித்தான் அவர்கள் போய்க்கொண்டே இருந்தார்கள். ⁴⁵  ஆனால், விபச்சாரம் செய்ததற்காகவும்*+ கொலை செய்ததற்காகவும்+ நீதிமான்கள் அவர்களுக்குத் தண்டனை கொடுப்பார்கள். அவர்கள் விபச்சாரிகள்,* கொலைகாரிகள்.+ ⁴⁶  உன்னதப் பேரரசராகிய யெகோவா சொல்வது இதுதான்: ‘உங்களுக்குக் கோரமான முடிவைக் கொண்டுவருவதற்காகவும் உங்களைச் சூறையாடுவதற்காகவும் ஒரு படை வரவழைக்கப்படும்.+ ⁴⁷  அந்தப் படைவீரர்கள் உங்கள்மேல் கல்லெறிந்து,+ உங்களை வாளால் வெட்டிப்போடுவார்கள். உங்களுடைய மகன்களையும் மகள்களையும் கொன்று,+ உங்களுடைய வீடுகளைத் தீ வைத்துக் கொளுத்துவார்கள்.+ ⁴⁸  இந்தத் தேசத்தில் உங்களுடைய வெட்கங்கெட்ட நடத்தைக்கு நான் முடிவுகட்டுவேன். எல்லா பெண்களுக்கும் அது ஒரு பாடமாக இருக்கும். உங்களைப் போல ஆபாசமாக நடந்துகொள்ளக் கூடாது என்று அவர்கள் தெரிந்துகொள்வார்கள்.+ ⁴⁹  ஆபாசமான நடத்தைக்கும் அருவருப்பான சிலைகளை வணங்கிய பாவத்துக்கும் தகுந்த தண்டனையை அந்தப் படைவீரர்கள் உங்களுக்குக் கொடுப்பார்கள். அப்போது, நான் உன்னதப் பேரரசராகிய யெகோவா என்று தெரிந்துகொள்வீர்கள்’”+ என்றார்.