31  பின்பு யெகோவா மோசேயிடம், ²  “இஸ்ரவேலர்களுக்காக மீதியானியர்களை+ நீ பழிவாங்கு.+ அதன்பின், நீ இறந்துபோவாய்”*+ என்றார். ³  அதனால் மோசே ஜனங்களிடம், “யெகோவாவின் சார்பாக மீதியானியர்களை நீங்கள் பழிவாங்க வேண்டும். அவர்களோடு போர் செய்வதற்காக ஆட்களைத் தயார்படுத்துங்கள். ⁴  ஒவ்வொரு கோத்திரத்திலிருந்தும் 1,000 பேரை நீங்கள் போருக்கு அனுப்ப வேண்டும்” என்றார். ⁵  அதன்படியே, லட்சக்கணக்கில் இருந்த இஸ்ரவேலர்களின்+ ஒவ்வொரு கோத்திரத்திலிருந்தும் 1,000 பேர் தேர்ந்தெடுக்கப்பட்டார்கள். மொத்தம் 12,000 பேர் போருக்காகத் தயார்படுத்தப்பட்டார்கள். ⁶  ஒவ்வொரு கோத்திரத்திலிருந்தும் 1,000 பேரை மோசே போருக்கு அனுப்பினார். அவர்களுடன் குருவாகிய எலெயாசாரின் மகன் பினெகாசை+ அனுப்பினார். இவர் பரிசுத்த பாத்திரங்களையும் போர் எக்காளங்களையும்+ கையில் எடுத்துக்கொண்டு போனார். ⁷  மோசேக்கு யெகோவா கட்டளை கொடுத்தபடியே மீதியான் தேசத்துக்கு எதிராக இஸ்ரவேலர்கள் போர் செய்து, எல்லா ஆண்களையும் கொன்றுபோட்டார்கள். ⁸  மீதியான் தேசத்தின் ஐந்து ராஜாக்களான ஏவி, ரெக்கேம், சூர், ஹூர், ரேபா ஆகியவர்களையும் வெட்டி வீழ்த்தினார்கள். பெயோரின் மகன் பிலேயாமையும்+ வாளால் வெட்டிப்போட்டார்கள். ⁹  ஆனால், மீதியானியப் பெண்களையும் பிள்ளைகளையும் பிடித்துக்கொண்டு போனார்கள். மீதியானியர்களின் எல்லா மந்தைகளையும் எல்லா பொருள்களையும் சூறையாடினார்கள். ¹⁰  அவர்கள் குடியிருந்த எல்லா நகரங்களையும் முகாம்களையும் தீ வைத்துக் கொளுத்தினார்கள். ¹¹  பின்பு, தாங்கள் பிடித்துவந்த ஆட்களையும் மிருகங்களையும் கூட்டிக்கொண்டு, ¹²  சூறையாடிய பொருள்களை எடுத்துக்கொண்டு மோசேயிடமும் எலெயாசாரிடமும் ஜனங்களிடமும் வந்தார்கள். அதாவது, எரிகோவுக்குப் பக்கத்தில் யோர்தானை ஒட்டியுள்ள மோவாப் பாலைநிலத்தில் இருந்த முகாமுக்கு+ வந்தார்கள். ¹³  அப்போது, மோசேயும் குருவாகிய எலெயாசாரும் ஜனங்களின் தலைவர்கள் எல்லாரும் அவர்களைச் சந்திக்க முகாமுக்கு வெளியே போனார்கள். ¹⁴  போரிலிருந்து திரும்பி வந்த படைத் தலைவர்களைப் பார்த்து, அதாவது 1,000 வீரர்களுக்குத் தலைவர்களையும் 100 வீரர்களுக்குத் தலைவர்களையும் பார்த்து, மோசே கோபப்பட்டார். ¹⁵  மோசே அவர்களிடம், “பெண்கள் எல்லாரையும் உயிரோடு விட்டுவிட்டீர்களா? ¹⁶  பேயோரின் விஷயத்தில்,+ இவர்கள்தானே பிலேயாமின் பேச்சைக் கேட்டு இஸ்ரவேலர்களை யெகோவாவுக்கு விரோதமாகத் துரோகம் செய்ய வைத்தார்கள்!+ இவர்கள்தானே யெகோவாவின் ஜனங்கள்மேல் கொள்ளைநோயை வர வைத்தார்கள்!+ ¹⁷  அதனால் ஆண் பிள்ளைகள் எல்லாரையும், ஆணோடு உறவுகொண்ட பெண்கள் எல்லாரையும் கொன்றுபோட வேண்டும். ¹⁸  ஆனால், எந்த ஆணோடும் உறவுகொள்ளாத பெண்கள் எல்லாரையும் உயிரோடு விட்டுவிடலாம்.+ ¹⁹  நீங்கள் ஏழு நாட்கள் முகாமுக்கு வெளியே தங்க வேண்டும். போரில் கொலை செய்தவர்களும் கொலை செய்யப்பட்டவர்களின் உடலைத் தொட்டவர்களும்+ தங்களை மூன்றாம் நாளிலும் ஏழாம் நாளிலும் தூய்மைப்படுத்த வேண்டும்.+ நீங்கள் பிடித்துக்கொண்டு வந்தவர்களும் நீங்களும் இப்படிச் செய்ய வேண்டும். ²⁰  எல்லா உடைகளையும், தோல் பொருள்களையும், வெள்ளாட்டு மயிரில் செய்யப்பட்ட பொருள்களையும், மரச் சாமான்களையும் தூய்மைப்படுத்த வேண்டும்” என்றார். ²¹  பின்பு, குருவாகிய எலெயாசார் போரிலிருந்து திரும்பி வந்த ஆட்களைப் பார்த்து, “யெகோவா மோசேக்குக் கொடுத்த சட்டம் என்னவென்றால், ²²  ‘நெருப்பைத் தாக்குப்பிடிக்கிற எல்லாவற்றையும், அதாவது தங்கம், வெள்ளி, செம்பு, இரும்பு, தகரம், ஈயம் போன்ற எல்லாவற்றையும், ²³  நீங்கள் நெருப்பில் போட வேண்டும். அப்போது அவை சுத்தமாகும். அதேசமயத்தில், அவற்றைச் சுத்திகரிப்பு நீராலும்+ தூய்மைப்படுத்த வேண்டும். ஆனால், நெருப்பைத் தாக்குப்பிடிக்காத எல்லாவற்றையும் தண்ணீரில் கழுவ வேண்டும். ²⁴  ஏழாம் நாளில் உங்களுடைய உடைகளைத் துவைக்க வேண்டும், அப்போது நீங்கள் சுத்தமாவீர்கள். அதன்பின் முகாமுக்குள் வரலாம்’”+ என்றார். ²⁵  பின்பு யெகோவா மோசேயிடம், ²⁶  “பிடித்துக்கொண்டு வந்த மனுஷர்களையும், மிருகங்களையும் நீ கணக்கெடுக்க வேண்டும். குருவாகிய எலெயாசாருடனும் தந்தைவழிக் குடும்பத் தலைவர்களுடனும் சேர்ந்து இதைச் செய்ய வேண்டும். ²⁷  பின்பு, அந்த மனுஷர்களையும் மிருகங்களையும் இரண்டு பங்காகப் பிரித்து, போருக்குப் போனவர்களுக்கு ஒரு பங்கும் ஜனங்களுக்கு ஒரு பங்கும் கொடுக்க வேண்டும்.+ ²⁸  போருக்குப் போன வீரர்களுக்குக் கொடுக்கிற மனுஷர்களிலும், மாடுகளிலும், கழுதைகளிலும், ஆடுகளிலும் 500-க்கு ஒன்றைப் பிரித்தெடுத்து யெகோவாவுக்காகக் கொடுக்க வேண்டும். ²⁹  அவர்களுக்குக் கிடைத்த பாதிப் பங்கிலிருந்து இந்த மனுஷர்களையும் மிருகங்களையும் பிரித்தெடுத்து யெகோவாவுக்குக் காணிக்கையாகக் குருவாகிய எலெயாசாரிடம் கொடுக்க வேண்டும்.+ ³⁰  இஸ்ரவேல் ஜனங்களுக்குக் கிடைத்த பாதிப் பங்கில், அதாவது மனுஷர்களிலும் மாடுகளிலும் கழுதைகளிலும் ஆடுகளிலும் வீட்டு விலங்குகளிலும், 50-க்கு ஒன்றைப் பிரித்தெடுத்து லேவியர்களுக்குக் கொடுக்க வேண்டும்.+ ஏனென்றால், யெகோவாவின் கூடாரத்தில் செய்ய வேண்டிய வேலைகளை அவர்கள் செய்கிறார்கள்”+ என்றார். ³¹  யெகோவா கட்டளை கொடுத்தபடியே, மோசேயும் குருவாகிய எலெயாசாரும் செய்தார்கள். ³²  போரிலிருந்து திரும்பியவர்கள் பயன்படுத்தியது தவிர மீதியிருந்தவை இவைதான்: 6,75,000 ஆடுகள், ³³  72,000 மாடுகள், ³⁴  61,000 கழுதைகள். ³⁵  எந்த ஆணுடனும் உறவுகொள்ளாத பெண்கள்+ மொத்தம் 32,000 பேர். ³⁶  போருக்குப் போனவர்களுக்குக் கிடைத்த பாதிப் பங்கில் 3,37,500 ஆடுகள் இருந்தன. ³⁷  அவற்றில் யெகோவாவுக்கான பங்கு 675. ³⁸  அவர்களுடைய பங்கில் 36,000 மாடுகள் இருந்தன. அவற்றில் யெகோவாவுக்கான பங்கு 72. ³⁹  அவர்களுடைய பங்கில் 30,500 கழுதைகள் இருந்தன. அவற்றில் யெகோவாவுக்கான பங்கு 61. ⁴⁰  அவர்களுடைய பங்கில் 16,000 மனிதர்கள் இருந்தார்கள். அவர்களில் யெகோவாவுக்கான பங்கு 32 பேர். ⁴¹  யெகோவாவுக்கான பங்கை குருவாகிய எலெயாசாரிடம் மோசே கொடுத்தார்.+ இப்படி, யெகோவா கட்டளை கொடுத்தபடியே செய்தார். ⁴²  போர் செய்யப் போனவர்களுக்குப் பிரித்துக் கொடுத்தது தவிர, இஸ்ரவேல் ஜனங்களுக்கு மோசே, ⁴³  3,37,500 ஆடுகளையும், ⁴⁴  36,000 மாடுகளையும், ⁴⁵  30,500 கழுதைகளையும், ⁴⁶  16,000 மனிதர்களையும் பிரித்துக் கொடுத்தார். ⁴⁷  பின்பு, இஸ்ரவேலர்களுக்குக் கொடுத்த பாதிப் பங்கில், அதாவது மனிதர்களிலும் மிருகங்களிலும், 50-க்கு ஒன்றைப் பிரித்தெடுத்து, யெகோவாவின் கூடாரத்தில் வேலை செய்த+ லேவியர்களுக்கு மோசே கொடுத்தார்.+ யெகோவா கட்டளை கொடுத்தபடியே அவர் செய்தார். ⁴⁸  அதன்பின் படைப்பிரிவுகளின்* தலைவர்களான 1,000 வீரர்களுக்குத்+ தலைவர்களும் 100 வீரர்களுக்குத் தலைவர்களும் மோசேயிடம் வந்து, ⁴⁹  “எங்களுக்குக் கீழுள்ள வீரர்களை உங்கள் ஊழியர்களாகிய நாங்கள் கணக்கெடுத்தோம், அவர்களில் ஒருவர்கூட குறையவில்லை.+ ⁵⁰  அதனால், நாங்கள் ஒவ்வொருவரும் கைப்பற்றிய தங்கச் சாமான்கள், கொலுசுகள், காப்புகள், முத்திரை மோதிரங்கள், தோடுகள், மற்ற நகைகள் எல்லாவற்றையும் யெகோவாவுக்குக் காணிக்கையாகத் தருகிறோம். யெகோவாவின் முன்னிலையில் எங்களுக்குப் பாவப் பரிகாரமாக இவற்றைத் தருகிறோம்” என்றார்கள். ⁵¹  அவர்கள் கொடுத்த தங்க நகைகளை மோசேயும் குருவாகிய எலெயாசாரும் வாங்கிக்கொண்டார்கள். ⁵²  1,000 வீரர்களுக்குத் தலைவர்களும் 100 வீரர்களுக்குத் தலைவர்களும் யெகோவாவுக்குக் காணிக்கையாகக் கொடுத்த தங்கத்தின் எடை மொத்தம் 16,750 சேக்கல்.* ⁵³  போருக்குப் போன வீரர்கள் ஒவ்வொருவருக்கும் கைப்பற்றப்பட்ட பொருள்களிலிருந்து ஒரு பங்கு கிடைத்தது. ⁵⁴  1,000 வீரர்களுக்குத் தலைவர்களும் 100 வீரர்களுக்குத் தலைவர்களும் கொடுத்த தங்கத்தை மோசேயும் குருவாகிய எலெயாசாரும் சந்திப்புக் கூடாரத்துக்குள் கொண்டுவந்தார்கள். இஸ்ரவேல் ஜனங்களுக்கு ஒரு நினைப்பூட்டுதலாக இருக்கும்படி அந்தத் தங்கத்தை யெகோவாவுக்கு முன்னால் வைத்தார்கள்.