4  யெகோவா மோசேயிடமும் ஆரோனிடமும், ²  “லேவியின் வழிவந்த கோகாத்தியர்களை+ அவரவர் வம்சத்தின்படியும், தந்தைவழிக் குடும்பத்தின்படியும் கணக்கெடுக்க வேண்டும். ³  சந்திப்புக் கூடார வேலைகளுக்கு நியமிக்கப்பட்ட எல்லாரையும், அதாவது 30+ வயதுமுதல் 50 வயதுவரை+ உள்ள எல்லாரையும், கணக்கெடுக்க வேண்டும்.+ ⁴  சந்திப்புக் கூடாரம் சம்பந்தமாக கோகாத்தியர்களுக்கு நியமிக்கப்பட்ட மிகப் பரிசுத்தமான வேலை+ இதுதான்: ⁵  இஸ்ரவேலர்கள் புறப்படும்போது, ஆரோனும் அவனுடைய மகன்களும் வந்து திரைச்சீலையைக்+ கீழே இறக்கி, அதை வைத்து சாட்சிப் பெட்டியை+ மூட வேண்டும். ⁶  பின்பு, அதன்மேல் கடல்நாய்த் தோல் விரிப்பைப் போட்டு, அதை நீல நிறத் துணியால் மூட வேண்டும். அதைச் சுமப்பதற்குப் பயன்படுத்தப்படும் கம்புகள்+ அதனதன் இடத்தில் இருக்க வேண்டும். ⁷  படையல் ரொட்டிகளுக்கான மேஜைமேல்+ நீல நிறத் துணியை விரிக்க வேண்டும். அதன்மேல் தட்டுகள், கோப்பைகள், கிண்ணங்கள், திராட்சமது காணிக்கைக்கான கூஜாக்கள்+ ஆகியவற்றை வைக்க வேண்டும். தவறாமல் செலுத்தப்படுகிற ரொட்டிகளும்+ அதன்மேல் இருக்க வேண்டும். ⁸  அவற்றைக் கருஞ்சிவப்புத் துணியால் போர்த்தி, பின்பு கடல்நாய்த் தோல் விரிப்பால் மூட வேண்டும். அதைச் சுமப்பதற்குப் பயன்படுத்தப்படும் கம்புகள்+ அதனதன் இடத்தில் இருக்க வேண்டும். ⁹  பின்பு நீல நிறத் துணியை எடுத்து, விளக்குத்தண்டையும்,+ அதன் அகல் விளக்குகளையும்,+ இடுக்கிகளையும், தீய்ந்துபோன திரிகளை எடுத்து வைப்பதற்கான கரண்டிகளையும்,+ குத்துவிளக்குக்கான எண்ணெய்ப் பாத்திரங்களையும் மூட வேண்டும். ¹⁰  குத்துவிளக்கையும் அதற்கான எல்லா சாமான்களையும் கடல்நாய்த் தோல் விரிப்பில் சுற்றி, சுமப்பதற்கான ஒரு கோலில் இணைத்துக்கட்ட வேண்டும். ¹¹  தங்கப் பீடத்தை+ நீல நிறத் துணியால் போர்த்தி, கடல்நாய்த் தோல் விரிப்பால் அதை மூட வேண்டும். அதைச் சுமப்பதற்குப் பயன்படுத்தப்படும் கம்புகள்+ அதனதன் இடத்தில் இருக்க வேண்டும். ¹²  பரிசுத்த இடத்தில் தவறாமல் சேவை செய்யப் பயன்படுத்தப்படும் பாத்திரங்கள்+ எல்லாவற்றையும் எடுத்து நீல நிறத் துணியில் வைக்க வேண்டும். அதைக் கடல்நாய்த் தோல் விரிப்பால் மூடி, சுமப்பதற்கான ஒரு கோலில் இணைத்துக்கட்ட வேண்டும். ¹³  பலிபீடத்திலிருந்து+ சாம்பலை எடுத்துவிட்டு, அதை ஊதா நிற கம்பளியால் போர்த்த வேண்டும். ¹⁴  பலிபீடத்தில் சேவை செய்யப் பயன்படுத்தும் பாத்திரங்கள் எல்லாவற்றையும், அதாவது தணல் அள்ளும் கரண்டிகள், முள்கரண்டிகள், சாம்பல் அள்ளும் கரண்டிகள், கிண்ணங்கள் போன்ற எல்லாவற்றையும்+ அதன்மேல் வைத்து கடல்நாய்த் தோல் விரிப்பால் மூட வேண்டும். பலிபீடத்தைச் சுமப்பதற்குப் பயன்படுத்தப்படும் கம்புகள்+ அதனதன் இடத்தில் இருக்க வேண்டும். ¹⁵  இஸ்ரவேலர்கள் புறப்படும்போது, பரிசுத்த இடத்துக்கான எல்லா பொருள்களையும் ஆரோனும் அவனுடைய மகன்களும் போர்த்திவைக்க வேண்டும்.+ அதன்பின், கோகாத்தியர்கள் வந்து அவற்றை எடுத்துக்கொண்டு போக வேண்டும்.+ ஆனால், பரிசுத்த இடத்துக்கான பொருள்களை அவர்கள் தொடக் கூடாது. அப்படித் தொட்டால் அவர்கள் செத்துப்போவார்கள்.+ இவைதான் சந்திப்புக் கூடாரம் சம்பந்தமாக கோகாத்தியர்களிடம் ஒப்படைக்கப்பட்ட பொருள்களாகும். ¹⁶  விளக்குகளுக்கான எண்ணெய்,+ தூபப்பொருள்,+ தவறாமல் செலுத்தப்படும் உணவுக் காணிக்கை, அபிஷேகத் தைலம்+ ஆகியவற்றுக்கு குருவாகிய ஆரோனின் மகன் எலெயாசார்தான்+ பொறுப்பு. வழிபாட்டுக் கூடாரத்துக்கும் அதிலுள்ள எல்லா பொருள்களுக்கும், பரிசுத்த இடத்துக்கும் அதிலுள்ள எல்லா சாமான்களுக்கும் அவர்தான் பொறுப்பு” என்று சொன்னார். ¹⁷  பின்பு யெகோவா மோசேயிடமும் ஆரோனிடமும், ¹⁸  “லேவியர்களில் கோகாத் வம்சத்தார்+ அழிந்துபோகாதபடி பார்த்துக்கொள்ளுங்கள். ¹⁹  அவர்கள் மகா பரிசுத்தமான பொருள்களின் பக்கத்தில் வந்து சாகாதபடி இப்படிச் செய்யுங்கள்.+ ஆரோனும் அவனுடைய மகன்களும் வழிபாட்டுக் கூடாரத்துக்குள்ளே போக வேண்டும். பின்பு, கோகாத்தியர்கள் ஒவ்வொருவரும் என்னென்ன வேலைகளைச் செய்ய வேண்டும் என்றும், என்னென்ன பொருள்களைச் சுமக்க வேண்டும் என்றும் சொல்ல வேண்டும். ²⁰  கோகாத்தியர்கள் கூடாரத்துக்குள் போய் பரிசுத்த பொருள்களை ஒரு நொடிகூட பார்க்கக் கூடாது. அப்படிப் பார்த்தால், அவர்கள் செத்துப்போவார்கள்”+ என்றார். ²¹  பின்பு யெகோவா மோசேயிடம், ²²  “கெர்சோனியர்களை+ அவரவர் வம்சத்தின்படியும், தந்தைவழிக் குடும்பத்தின்படியும் கணக்கெடுக்க வேண்டும். ²³  சந்திப்புக் கூடாரம் சம்பந்தமான வேலைகளுக்கு நியமிக்கப்பட்ட எல்லாரையும், அதாவது 30 வயதுமுதல் 50 வயதுவரை உள்ள எல்லாரையும், கணக்கெடுக்க வேண்டும். ²⁴  கெர்சோன் வம்சத்தாரின் பொறுப்பிலுள்ள பொருள்களும் அவர்கள் சுமக்க வேண்டிய பொருள்களும் இவைதான்:+ ²⁵  சட்டங்களின் மேலுள்ள நாரிழை விரிப்பு,*+ அதற்கு மேலுள்ள கம்பளி,* அதற்கும் மேலுள்ள விரிப்பு, அதற்கும் மேலுள்ள கடல்நாய்த் தோல் விரிப்பு,+ சந்திப்புக் கூடார வாசலின் திரை,+ ²⁶  வழிபாட்டுக் கூடாரத்தையும் பலிபீடத்தையும் சுற்றியுள்ள பிரகாரத்தின் மறைப்புகள்,+ பிரகார நுழைவாசலின் திரை,+ கூடாரக் கயிறுகள், வழிபாட்டுக் கூடாரச் சேவைக்குப் பயன்படுத்தப்படுகிற பாத்திரங்கள் மற்றும் வேறு சில பொருள்கள். இவைதான் அவர்களுடைய பொறுப்பில் இருக்கின்றன. ²⁷  ஆரோனும் அவனுடைய மகன்களும் கெர்சோனியர்கள்+ செய்கிற எல்லா வேலைகளையும் அவர்கள் சுமக்கிற சுமைகளையும் மேற்பார்வை செய்ய வேண்டும். இந்த எல்லா சுமைகளையும் சுமக்கும் பொறுப்பை நீங்கள் அவர்களுக்குத் தர வேண்டும். ²⁸  இதுதான் சந்திப்புக் கூடாரம் சம்பந்தமாக கெர்சோனியர்கள் செய்ய வேண்டிய சேவை.+ குருவாகிய ஆரோனின் மகன் இத்தாமாரின் தலைமையில் அவர்கள் தங்களுடைய பொறுப்புகளை நிறைவேற்ற வேண்டும்.+ ²⁹  மெராரியர்களை+ அவரவர் வம்சத்தின்படியும், தந்தைவழிக் குடும்பத்தின்படியும் நீ பெயர்ப்பதிவு செய்ய வேண்டும். ³⁰  சந்திப்புக் கூடார வேலைகளுக்கு நியமிக்கப்பட்ட எல்லாரையும், அதாவது 30 வயதுமுதல் 50 வயதுவரை உள்ள எல்லாரையும், பெயர்ப்பதிவு செய்ய வேண்டும். ³¹  மெராரியர்கள் சுமக்க வேண்டிய சந்திப்புக் கூடாரப் பொருள்கள் இவைதான்:+ வழிபாட்டுக் கூடாரத்தின் சட்டங்கள்,+ கம்புகள்,+ தூண்கள்,+ பாதங்கள்,+ ³²  பிரகாரத்தைச் சுற்றியுள்ள கம்பங்கள்,+ அவற்றின் பாதங்கள்,+ கூடார ஆணிகள்,+ கூடாரக் கயிறுகள், மற்றும் வேறு சில கருவிகள். அதனுடன் சம்பந்தப்பட்ட எல்லா வேலைகளையும் அவர்கள் செய்ய வேண்டும். யார் யார் எதை எதைச் சுமந்துகொண்டு போக வேண்டுமென்று நீங்கள் சொல்ல வேண்டும். ³³  இதுதான் சந்திப்புக் கூடாரம் சம்பந்தமாக மெராரியர்கள்+ செய்ய வேண்டிய வேலை. குருவாகிய ஆரோனின் மகன் இத்தாமாரின் தலைமையில் அவர்கள் தங்களுடைய பொறுப்புகளை நிறைவேற்ற வேண்டும்”+ என்றார். ³⁴  பின்பு, கோகாத்தியர்களை+ அவரவர் வம்சத்தின்படியும் தந்தைவழிக் குடும்பத்தின்படியும் மோசேயும் ஆரோனும் ஜனங்களின் தலைவர்களும்+ பெயர்ப்பதிவு செய்தார்கள். ³⁵  சந்திப்புக் கூடார வேலைகளுக்கு நியமிக்கப்பட்ட எல்லாரையும், அதாவது 30 வயதுமுதல் 50 வயதுவரை உள்ள எல்லாரையும்,+ அப்படிப் பெயர்ப்பதிவு செய்தார்கள். ³⁶  அவரவர் வம்சங்களின்படி பெயர்ப்பதிவு செய்யப்பட்டவர்கள் மொத்தம் 2,750 பேர்.+ ³⁷  இவர்கள்தான் கோகாத் வம்சத்தில் சந்திப்புக் கூடார வேலைக்காகப் பெயர்ப்பதிவு செய்யப்பட்டவர்கள். மோசேக்கு யெகோவா கொடுத்த கட்டளைப்படியே, மோசேயும் ஆரோனும் இவர்களைப் பெயர்ப்பதிவு செய்தார்கள்.+ ³⁸  பின்பு, கெர்சோனியர்கள்+ அவரவர் வம்சத்தின்படியும் தந்தைவழிக் குடும்பத்தின்படியும் பெயர்ப்பதிவு செய்யப்பட்டார்கள். ³⁹  சந்திப்புக் கூடார வேலைகளுக்கு நியமிக்கப்பட்ட எல்லாரும், அதாவது 30 வயதுமுதல் 50 வயதுவரை உள்ள எல்லாரும், பெயர்ப்பதிவு செய்யப்பட்டார்கள். ⁴⁰  வம்சத்தின்படியும் தந்தைவழிக் குடும்பத்தின்படியும் பெயர்ப்பதிவு செய்யப்பட்டவர்கள் மொத்தம் 2,630 பேர்.+ ⁴¹  இவர்கள்தான் கெர்சோன் வம்சத்தில் சந்திப்புக் கூடார வேலைகளுக்காகப் பெயர்ப்பதிவு செய்யப்பட்டவர்கள். யெகோவாவின் கட்டளைப்படியே, மோசேயும் ஆரோனும் இவர்களைப் பெயர்ப்பதிவு செய்தார்கள்.+ ⁴²  மெராரியர்கள் அவரவர் வம்சத்தின்படியும் தந்தைவழிக் குடும்பத்தின்படியும் பெயர்ப்பதிவு செய்யப்பட்டார்கள். ⁴³  சந்திப்புக் கூடார வேலைகளுக்கு நியமிக்கப்பட்ட எல்லாரும், அதாவது 30 வயதுமுதல் 50 வயதுவரை உள்ள எல்லாரும்,+ பெயர்ப்பதிவு செய்யப்பட்டார்கள். ⁴⁴  அவரவர் வம்சங்களின்படி பெயர்ப்பதிவு செய்யப்பட்டவர்கள் மொத்தம் 3,200 பேர்.+ ⁴⁵  இவர்கள்தான் மெராரி வம்சத்தில் பெயர்ப்பதிவு செய்யப்பட்டவர்கள். மோசேக்கு யெகோவா கொடுத்த கட்டளைப்படியே, மோசேயும் ஆரோனும் இவர்களைப் பெயர்ப்பதிவு செய்தார்கள்.+ ⁴⁶  இந்த எல்லா லேவியர்களையும் அவரவர் வம்சத்தின்படியும் தந்தைவழிக் குடும்பத்தின்படியும் மோசேயும் ஆரோனும் ஜனங்களின் தலைவர்களும் பெயர்ப்பதிவு செய்தார்கள். ⁴⁷  30 வயதுமுதல் 50 வயதுவரை உள்ள அந்த ஆட்கள் எல்லாரும் சந்திப்புக் கூடார வேலைகளுக்கும் அதன் பொருள்களைச் சுமக்கிற வேலைகளுக்கும் நியமிக்கப்பட்டார்கள்.+ ⁴⁸  பெயர்ப்பதிவு செய்யப்பட்டவர்கள் மொத்தம் 8,580 பேர்.+ ⁴⁹  மோசேக்கு யெகோவா கொடுத்த உத்தரவுப்படி, அவர்கள் ஒவ்வொருவரும் தங்களுடைய வேலையைச் செய்யவும் சுமையைச் சுமக்கவும் நியமிக்கப்பட்டு, பெயர்ப்பதிவு செய்யப்பட்டார்கள். யெகோவா மோசேக்குக் கட்டளை கொடுத்தபடியே அவர்கள் பெயர்ப்பதிவு செய்யப்பட்டார்கள்.