ஏசாயா 8:1-22
8 யெகோவா என்னிடம், “நீ ஒரு பெரிய பலகையை எடுத்து,+ அதில் ‘மகேர்-சாலால்-அஷ்-பாஸ்’* என்று எழுத்தாணியால்* எழுது.
2 நம்பிக்கைக்குரிய சாட்சிகளான யெபெரெகியாவின் மகன் சகரியாவும் குருவாகிய உரியாவும்+ இதை எழுத்தில் எழுதி எனக்கு உறுதிப்படுத்தட்டும்” என்று சொன்னார்.
3 அதன்பின், தீர்க்கதரிசனம் சொல்கிறவளான என் மனைவியோடு நான் உறவுகொண்டேன். அவள் கர்ப்பமாகி ஒரு மகனைப் பெற்றெடுத்தாள்.+ அப்போது யெகோவா என்னிடம், “அவனுக்கு மகேர்-சாலால்-அஷ்-பாஸ் என்று பெயர் வை.
4 ஏனென்றால், ‘அம்மா,’ ‘அப்பா’ என்று அவன் கூப்பிடுவதற்கு முன்பே அசீரியர்கள் தமஸ்குவின் சொத்துகளையும் சமாரியாவில் கைப்பற்றிய பொருள்களையும் தங்கள் ராஜாவுக்கு முன்பாகக் கொண்டுபோவார்கள்”+ என்று சொன்னார்.
5 யெகோவா திரும்பவும் என்னிடம்,
6 “லேசாக வழிந்தோடுகிற சீலோவாவின்* தண்ணீரை இந்த ஜனங்கள் ஒதுக்கிவிட்டார்கள்.+ரேத்சீனையும் ரெமலியாவின் மகனையும்+ சந்தோஷமாக ஏற்றுக்கொண்டார்கள்.
7 அதனால், இவர்களுக்கு எதிராக அசீரிய ராஜா படைபலத்தோடு வருவான்.+யெகோவாதான் அவனை வரச் செய்வார்.வேகமாகப் பாய்ந்து வரும் ஆற்றை* போல அவன் வருவான்.
அதன் எல்லா சிற்றாறுகளிலும் தண்ணீர் பெருக்கெடுக்கும்.அது எல்லா கரைகளிலும் புரண்டோடும்.
8 அது யூதாவுக்குள் காட்டாறாய்ப் பாயும்.
அதன் கழுத்துவரை எட்டும்,+ அதை வெள்ளக்காடாக்கும்.இம்மானுவேலே,*+அவன் தன்னுடைய சிறகுகளை விரித்து உன் தேசம் முழுவதையும் மூடுவான்” என்று சொன்னார்.
9 எதிரிகளே, தாக்குங்கள். ஆனால், நீங்கள்தான் படுதோல்வி அடைவீர்கள்.
தொலைதூரப் பகுதிகளைச் சேர்ந்தவர்களே, கேளுங்கள்!
போருக்குத் தயாராகுங்கள். ஆனால், நீங்கள்தான் படுதோல்வி அடைவீர்கள்!+
போருக்குத் தயாராகுங்கள். ஆனால், நீங்கள்தான் படுதோல்வி அடைவீர்கள்!
10 நீங்கள் என்னதான் சதி செய்தாலும் அது பலிக்காது.
என்னதான் கூடிப் பேசினாலும் அது நடக்காது.ஏனென்றால், கடவுள் எங்களோடு இருக்கிறார்!*+
11 யெகோவா தன்னுடைய பலமான கையை என்மேல் வைத்து, இந்த ஜனங்களின் வழியில் போகக் கூடாதென்று எச்சரித்தார். அவர் என்னிடம்,
12 “கூட்டுச் சேரலாம் என்று இந்த ஜனங்கள் சொன்னால் அவர்கள் சொல்வது போலக் கூட்டுச் சேரக் கூடாது!*
இவர்கள் எதற்குப் பயப்படுகிறார்களோ அதற்குப் பயப்படக் கூடாது.அதை நினைத்து நடுங்கக் கூடாது.
13 பரலோகப் படைகளின் யெகோவாவுக்கு மட்டுமே பயப்பட வேண்டும்.அவரை நினைத்துதான் நடுங்க வேண்டும்.+அவர் மட்டும்தான் பரிசுத்தமானவர்+ என்பதை மனதில் வைக்க வேண்டும்” என்று சொன்னார்.
14 அவர் புகலிடமாக இருப்பார்.ஆனால், இஸ்ரவேலின் இரண்டு ராஜ்யங்களுக்கும்அவர் தடுக்கி விழ வைக்கும் கல்லாகவும்,மோதி விழ வைக்கும் கற்பாறையாகவும் இருப்பார்.+எருசலேம் குடிமக்களுக்குஒரு கண்ணியாகவும் வலையாகவும் இருப்பார்.
15 அவர்களில் நிறைய பேர் தடுக்கி விழுந்து படுகாயம் அடைவார்கள்.கண்ணியில் சிக்கிப் பிடிபடுவார்கள்.
16 இதையெல்லாம் சுருளில் எழுதி முடித்தபின் அதைக் கட்டி வை.என் சீஷர்களுக்கான இந்தச் சட்டத்தை* முத்திரை போடு.
17 யாக்கோபின் வம்சத்தாருக்கு யெகோவா தன்னுடைய முகத்தை மறைத்திருக்கிறார்;+ ஆனாலும் நான் அவருக்காக ஆவலோடு காத்திருப்பேன்,+ அவர்மேல் நம்பிக்கையாக இருப்பேன்.
18 யெகோவா சீயோன் மலையில் வீற்றிருக்கிறார். பரலோகப் படைகளின் யெகோவா என்னையும் எனக்குத் தந்த பிள்ளைகளையும்+ இஸ்ரவேலில் அடையாளங்களாகவும்+ அற்புதங்களாகவும் வைத்திருக்கிறார்.
19 அவர்கள் உங்களிடம், “ஆவிகளோடு பேசுகிறவர்களிடம் அல்லது குறிசொல்கிறவர்களிடம் போய் விசாரியுங்கள், அவர்கள் முணுமுணுப்பதையும் கிசுகிசுப்பதையும் கேளுங்கள்” என்று சொல்வார்கள். ஆனால், அந்த ஜனங்கள் தங்களுடைய கடவுளிடம்தானே விசாரிக்க வேண்டும்? உயிரோடு இருக்கிறவர்களுக்காகச் செத்தவர்களிடம் விசாரிப்பது சரியா?+
20 அவர்கள் கடவுளுடைய சட்டங்களையும் அவர் எழுதி வைத்திருக்கிற சான்றுகளையும்தானே ஆராய்ந்து பார்க்க வேண்டும்?
இவற்றின்படி அவர்கள் பேசாவிட்டால், அவர்களுக்கு விடிவு காலமே வராது.+
21 வேதனையோடும் பசியோடும்தான் தேசத்தில் அலைந்து திரிவார்கள்.+ பசி தாங்காமல் கோபத்தில் ராஜாவைச் சபிப்பார்கள். மேலே பார்த்து கடவுளையும் சபிப்பார்கள்.
22 பின்பு பூமியைப் பார்ப்பார்கள். அங்கு இக்கட்டும் இருட்டுமே இருக்கும். அது இருண்டுபோன கொடிய காலமாக இருக்கும். எங்குமே வெளிச்சம் இருக்காது, கும்மிருட்டுதான் இருக்கும்.
அடிக்குறிப்புகள்
^ ஒருவேளை இதன் அர்த்தம், “பொருள்களைக் கைப்பற்றுவதற்கு வேகமாக வருதல்.”
^ நே.மொ., “சாதாரண மனிதனுடைய எழுத்தாணியால்.”
^ சீலோவா என்பது ஒரு வாய்க்கால்.
^ அதாவது, “யூப்ரடிஸ் ஆற்றை.”
^ ஏசா 7:14-ஐப் பாருங்கள்.
^ “கடவுள் எங்களோடு இருக்கிறார்” என்பதற்கான எபிரெய வார்த்தை இம்மானுவேல். ஏசா 7:14; 8:8-ஐப் பாருங்கள்.
^ நே.மொ., “இந்த ஜனங்கள் சதித்திட்டம் என்று சொல்வதையெல்லாம் நீங்கள் சதித்திட்டம் என்று சொல்லாதீர்கள்!”
^ வே.வா., “அறிவுரையை.”