15  சகோதரர்களே, நான் சொன்ன நல்ல செய்தியை+ உங்களுக்கு ஞாபகப்படுத்துகிறேன்; அதை நீங்கள் ஏற்றுக்கொண்டதோடு அதன்படி நடந்தும் வருகிறீர்கள். ²  அந்த நல்ல செய்தியை உறுதியாகப் பிடித்துக்கொண்டால், அதன் மூலம் மீட்புப் பெறுவீர்கள்; இல்லையென்றால், நீங்கள் கிறிஸ்துவின் சீஷர்களாக ஆனதே வீணாக இருக்கும். ³  நான் பெற்றுக்கொண்டதும் உங்களிடம் ஒப்படைத்ததுமாகிய மிக முக்கியமான செய்தி இதுதான்: வேதவசனங்களில் எழுதப்பட்டிருக்கிறபடி, கிறிஸ்து நம்முடைய பாவங்களுக்காக இறந்தார்.+ ⁴  பின்பு அடக்கம் செய்யப்பட்டார்;+ ஆம், வேதவசனங்களில் எழுதப்பட்டிருக்கிறபடி,+ மூன்றாம் நாளில்+ உயிரோடு எழுப்பப்பட்டார்.+ ⁵  பின்பு கேபாவுக்கும்,*+ அதன் பின்பு பன்னிரண்டு பேருக்கும்+ தோன்றினார். ⁶  பின்பு, ஒரே நேரத்தில் 500-க்கும் அதிகமான சகோதரர்களுக்குத் தோன்றினார்;+ அவர்களில் பெரும்பாலோர் இன்னமும் உயிரோடு இருக்கிறார்கள், சிலரோ இறந்துவிட்டார்கள்.* ⁷  பின்பு யாக்கோபுக்கும்,+ அதன் பின்பு எல்லா அப்போஸ்தலர்களுக்கும் தோன்றினார்;+ ⁸  கடைசியாக, குறைமாதத்தில் பிறந்தவனைப் போலிருக்கிற எனக்கும் தோன்றினார்.+ ⁹  அப்போஸ்தலர்கள் எல்லாரிலும் நான் அற்பமானவன்; கடவுளுடைய சபையைக் கொடுமைப்படுத்தியதால்+ அப்போஸ்தலன் என்று அழைக்கப்படுவதற்குக்கூட தகுதியில்லாதவன். ¹⁰  ஆனாலும், கடவுளுடைய அளவற்ற கருணையால் இப்போது இந்த நிலையில் இருக்கிறேன்; அவர் எனக்குக் காட்டிய அளவற்ற கருணை வீண்போகவில்லை; அவர்கள் எல்லாரையும்விட நான் அதிகமாகவே உழைத்தேன்; இருந்தாலும், நானாக உழைக்கவில்லை, என்னிடம் இருக்கிற கடவுளுடைய அளவற்ற கருணையே என்னை அப்படி உழைக்க வைத்தது. ¹¹  நானும் சரி, அவர்களும் சரி, இதைத்தான் பிரசங்கிக்கிறோம், இதைத்தான் நீங்களும் நம்பினீர்கள். ¹²  கிறிஸ்து உயிரோடு எழுப்பப்பட்டிருக்கிறார் என்று பிரசங்கிக்கப்பட்டு வரும்போது,+ இறந்தவர்கள் உயிரோடு எழுப்பப்பட மாட்டார்கள் என்று உங்களில் சிலர் எப்படிச் சொல்லலாம்? ¹³  இறந்தவர்கள் உயிரோடு எழுப்பப்பட மாட்டார்கள் என்றால், கிறிஸ்துவும் உயிரோடு எழுப்பப்படவில்லை என்றாகிவிடும். ¹⁴  கிறிஸ்து உயிரோடு எழுப்பப்படவில்லை என்றால், நாம் பிரசங்கிப்பது நிச்சயமாகவே வீணாக இருக்கும், நம்முடைய விசுவாசமும் வீணாக இருக்கும். ¹⁵  அதுமட்டுமல்ல, கடவுளுக்கு விரோதமாகப் பொய் சாட்சி சொல்கிறவர்களாகவும் ஆகிவிடுவோம்.+ ஆம், இறந்தவர்கள் உண்மையில் உயிரோடு எழுப்பப்பட மாட்டார்கள் என்றால், இறந்துபோன கிறிஸ்துவைக் கடவுள் உயிரோடு எழுப்பியதாக நாம் சாட்சி சொல்லும்போது+ அவருக்கு விரோதமாகப் பொய் சாட்சி சொல்கிறவர்களாக ஆகிவிடுவோம். ¹⁶  இறந்தவர்கள் உயிரோடு எழுப்பப்பட மாட்டார்கள் என்றால், கிறிஸ்துவும் உயிரோடு எழுப்பப்படவில்லை என்றாகிவிடும். ¹⁷  கிறிஸ்து உயிரோடு எழுப்பப்படவில்லை என்றால், உங்கள் விசுவாசம் வீணாக இருக்கும்; நீங்கள் இன்னும் உங்கள் பாவங்களில்தான் இருப்பீர்கள்.+ ¹⁸  சொல்லப்போனால், கிறிஸ்துவின் சீஷர்களாயிருந்து இறந்தவர்களும் அழிந்துபோனவர்களாகத்தான் இருப்பார்கள்.+ ¹⁹  இன்றுள்ள வாழ்க்கைக்காக மட்டுமே கிறிஸ்துமேல் நாம் நம்பிக்கை வைத்தால், மற்ற எல்லாரையும்விட நாம்தான் மிகவும் பரிதாபத்திற்குரியவர்களாக இருப்போம். ²⁰  ஆனாலும், இறந்தவர்களில் முதல் நபராக* கிறிஸ்து உயிரோடு எழுப்பப்பட்டிருக்கிறார்.+ ²¹  ஒரே மனிதனால் மரணம் வந்தது,+ அதேபோல் ஒரே மனிதனால் உயிர்த்தெழுதலும் வருகிறது.+ ²²  ஆதாமினால் எல்லாரும் சாகிறதுபோல்,+ கிறிஸ்துவினால் எல்லாரும் உயிரோடு எழுப்பப்படுவார்கள்.+ ²³  ஆனால், ஒவ்வொருவரும் அவரவர் வரிசையில் உயிரோடு எழுப்பப்படுவார்கள்; முதல் நபராக* உயிரோடு எழுப்பப்பட்டவர் கிறிஸ்து;+ பின்பு, கிறிஸ்துவுக்குச் சொந்தமானவர்கள் அவருடைய பிரசன்னத்தின்போது உயிரோடு எழுப்பப்படுவார்கள்.+ ²⁴  அதன் பின்பு, முடிவில், அவர் எல்லா அரசாங்கத்தையும் எல்லா அதிகாரத்தையும் எல்லா வல்லமையையும் ஒழித்துவிட்டு,+ அவருடைய கடவுளாகவும் தகப்பனாகவும் இருப்பவரிடமே ஆட்சியை* ஒப்படைப்பார். ²⁵  ஆனால், எல்லா எதிரிகளையும் அவருடைய காலடியில் கடவுள் வீழ்த்தும்வரை அவர் ராஜாவாக ஆட்சி செய்ய வேண்டும்.+ ²⁶  ஒழிக்கப்படும் கடைசி எதிரி மரணம்.+ ²⁷  கடவுள் “எல்லாவற்றையும் அவருடைய காலடியில் கீழ்ப்படுத்தினார்.”+ ஆனால், ‘எல்லாமே அவருக்குக் கீழ்ப்படுத்தப்பட்டது’ என்று சொல்லும்போது,+ எல்லாவற்றையும் அவருக்குக் கீழ்ப்படுத்தியவர் அவருக்குக் கீழ்ப்படுத்தப்படவில்லை என்பது தெளிவாக இருக்கிறது.+ ²⁸  எல்லாமே மகனுக்குக் கீழ்ப்படுத்தப்பட்ட பின்பு, எல்லாவற்றையும் அவருக்குக் கீழ்ப்படுத்திய கடவுளுக்கு மகனும் கீழ்ப்பட்டிருப்பார்.+ அப்போது, கடவுள்தான் எல்லாருக்கும் எல்லாமுமாக இருப்பார்.+ ²⁹  இறந்தவர்கள் உயிரோடு எழுப்பப்பட மாட்டார்கள் என்றால், இறந்தவர்களாய் இருப்பதற்காக ஞானஸ்நானம் பெறுகிறவர்களுக்கு என்ன பிரயோஜனம்?+ இறந்தவர்கள் உயிரோடு எழுப்பப்படவே மாட்டார்கள் என்றால், அப்படி இறந்தவர்களாய் இருப்பதற்காக அவர்கள் ஏன் ஞானஸ்நானம் பெறுகிறார்கள்? ³⁰  அதோடு, நாம் ஏன் எந்நேரமும் ஆபத்தில் இருக்கிறோம்?+ ³¹  தினமும் நான் சாவை எதிர்ப்படுகிறேன்; சகோதரர்களே, நம் எஜமானாகிய கிறிஸ்து இயேசுவின் சீஷனாகிய நான் உங்களை நினைத்து சந்தோஷப்படுவது உண்மையாக இருப்பதுபோல் இதுவும் உண்மைதான். ³²  நான் எபேசுவில் கொடிய மிருகங்களோடு போராடினேனே,+ மற்றவர்களைப் போலவே* நானும் போராடியிருந்தால், எனக்கு என்ன நன்மை? இறந்தவர்கள் உயிரோடு எழுப்பப்பட மாட்டார்கள் என்றால், “சாப்பிடுவோம், குடிப்போம், நாளைக்குச் சாவோம்”+ என்று இருக்கலாமே! ³³  ஏமாந்துவிடாதீர்கள்; கெட்ட சகவாசம் நல்ல பழக்கவழக்கங்களை* கெடுத்துவிடும்.+ ³⁴  அதனால், மனத்தெளிவு அடையுங்கள்; நீதியின்படி நடங்கள்; பாவம் செய்துகொண்டே இருக்காதீர்கள். உங்களில் சிலருக்குக் கடவுளைப் பற்றிய அறிவே இல்லை; உங்களை வெட்கப்படுத்துவதற்காக இதைச் சொல்கிறேன். ³⁵  ஆனாலும், “இறந்தவர்கள் எப்படி உயிரோடு எழுப்பப்படுவார்கள்? எப்படிப்பட்ட உடலோடு வருவார்கள்?”+ என்று ஒருவன் கேட்கலாம். ³⁶  புத்தியில்லாதவனே! நீ விதைக்கிற விதை செத்தால் தவிர உயிர் பெறாது. ³⁷  நீ விதைக்கிறபோது, முளைத்த பயிரை விதைக்காமல், வெறும் விதையைத்தான் விதைக்கிறாய்; அது கோதுமை விதையாகவோ வேறொரு விதையாகவோ இருக்கலாம். ³⁸  ஆனால், கடவுள் தனக்குப் பிரியமானபடி அதற்கு ஓர் உடலைக் கொடுக்கிறார்; ஒவ்வொரு விதைக்கும் அதற்குரிய உடலைக் கொடுக்கிறார். ³⁹  எல்லா உடலும் ஒரே விதமான உடல் கிடையாது; மனிதர்களுடைய உடல் வேறு, மிருகங்களுடைய உடல் வேறு, பறவைகளுடைய உடல் வேறு, மீன்களுடைய உடல் வேறு. ⁴⁰  பரலோகத்துக்குரிய உடல்களும் இருக்கின்றன,+ பூமிக்குரிய உடல்களும் இருக்கின்றன;+ பரலோகத்துக்குரிய உடல்களின் மகிமை ஒரு விதம், பூமிக்குரிய உடல்களின் மகிமை ஒரு விதம்; ⁴¹  சூரியனின் மகிமை ஒரு விதம், சந்திரனின் மகிமை ஒரு விதம்,+ நட்சத்திரங்களின் மகிமை ஒரு விதம்; சொல்லப்போனால், மகிமையில் நட்சத்திரத்துக்கு நட்சத்திரம் வேறுபடுகிறது. ⁴²  இறந்தவர்களுடைய உயிர்த்தெழுதலும் அப்படியே இருக்கும்; அழிவுள்ளதாக விதைக்கப்படுவது அழிவில்லாததாக உயிர்த்தெழுப்பப்படும்.+ ⁴³  மதிப்பில்லாததாக விதைக்கப்படுவது மகிமையுள்ளதாக உயிர்த்தெழுப்பப்படும்;+ பலவீனமுள்ளதாக விதைக்கப்படுவது பலமுள்ளதாக உயிர்த்தெழுப்பப்படும்.+ ⁴⁴  பூமிக்குரிய உடலாக விதைக்கப்படுவது பரலோகத்துக்குரிய உடலாக எழுப்பப்படும்; பூமிக்குரிய உடல் இருக்கிறதென்றால் பரலோகத்துக்குரிய உடலும் இருக்கிறது. ⁴⁵  பூமிக்குரிய உடலைப் பெற்ற “முதல் ஆதாம் உயிருள்ளவன் ஆனான்” என்று எழுதப்பட்டிருக்கிறது;+ பரலோகத்துக்குரிய உடலைப் பெற்ற கடைசி ஆதாம் உயிர் கொடுக்கிறவர் ஆனார்.+ ⁴⁶  இருந்தாலும், பரலோகத்துக்குரிய உடல் முந்தினதல்ல, பூமிக்குரிய உடல்தான் முந்தினது; பரலோகத்துக்குரிய உடல் பிந்தினது. ⁴⁷  முதல் மனிதன் பூமியிலிருந்து வந்தவன், மண்ணால் உண்டானவன்;+ இரண்டாம் மனிதரோ பரலோகத்திலிருந்து வந்தவர்.+ ⁴⁸  மண்ணால் உண்டான மனிதனைப் போலவே மண்ணால் உண்டான மற்றவர்களும் இருப்பார்கள்; பரலோகத்துக்குரியவரைப் போலவே பரலோகத்துக்குரிய மற்றவர்களும் இருப்பார்கள்.+ ⁴⁹  நாம் மண்ணால் உண்டானவனுடைய சாயலில் இருப்பதுபோல்,+ பரலோகத்துக்குரியவருடைய சாயலிலும் இருப்போம்.+ ⁵⁰  ஆனாலும் சகோதரர்களே, நான் சொல்வது இதுதான்: மனித உடலோடு* கடவுளுடைய அரசாங்கத்துக்குள் போக முடியாது; அழிவுள்ளது அழியாமையைப் பெற முடியாது. ⁵¹  இதோ! உங்களுக்குப் பரிசுத்த ரகசியம் ஒன்றைச் சொல்கிறேன்: நாம் எல்லாரும் மரணத்தில் தூங்கப்போவதில்லை. ⁵²  ஆனால் கடைசி எக்காளம் முழங்கும்போது, ஒரே நொடியில், கண்ணிமைக்கும் நேரத்தில், நாம் எல்லாரும் மாற்றம் அடைவோம்.+ எக்காளம் முழங்கும்;+ அப்போது, இறந்தவர்கள் அழிவில்லாதவர்களாக உயிரோடு எழுப்பப்படுவார்கள்; நாமும் மாற்றம் அடைவோம். ⁵³  ஏனென்றால், அழிவுக்குரியது அழியாமையுள்ளதாக மாற வேண்டும்;+ சாவுக்குரியது சாவாமையுள்ளதாக மாற வேண்டும்.+ ⁵⁴  அழிவுக்குரியது அழியாமையுள்ளதாகவும், சாவுக்குரியது சாவாமையுள்ளதாகவும் மாறும்போது, எழுதப்பட்டிருக்கிற இந்த வார்த்தைகள் நிறைவேறும்: “மரணம் அடியோடு ஒழிக்கப்பட்டது.”+ ⁵⁵  “மரணமே, உன் வெற்றி எங்கே? மரணமே, உன் கொடுக்கு எங்கே?”+ ⁵⁶  மரணத்தை உண்டாக்குகிற கொடுக்கு பாவம்,+ பாவத்துக்குப் பலம் தருவது திருச்சட்டம்.+ ⁵⁷  ஆனால், நம் எஜமானாகிய இயேசு கிறிஸ்துவின் மூலம் நமக்கு வெற்றி தருகிற கடவுளுக்கு நன்றி!+ ⁵⁸  அதனால், என் அன்பான சகோதரர்களே, நம் எஜமானுக்காக நீங்கள் உழைப்பது வீண்போகாதென்று அறிந்து,+ உறுதியானவர்களாகவும்+ அசைக்க முடியாதவர்களாகவும் எந்நேரமும் நம் எஜமானுடைய வேலையை அதிகமதிகமாகச் செய்கிறவர்களாகவும் இருங்கள்.+