Naavyaliilue mu Montreal, muzi ukata wa mu kalaale ka Quebec, kyalo kya Kanada. Neene pamo ni dada wane mukulu ni balabaane babili balalume, twaali twasuungilue na baviazi bali ni ntono mu nkutu iweeme saana ya Rosemont. Fwe bonse twaali twasekelela lwa pamo buikazi buli ni mutende.

 Lunaali mulumendo naali natona saana Bibilia. Nalanguluka naali na miaka 12, naali mukusoma Kipingo kya Leenu palua buikazi bwakue Yesu, kabili naali nasekelela saana busomi bobo. Paantu naakumiiziwe na ntono yakue ni nkumbu yakue palua bange, naatonene ngaluke nga weene. Kyabulanda ezio nkulu yaapuile lunaalukile mukulu, kabili naatendekele kwenda pamo ni bantu baali ni mibeele ibiipile yaansonseziizie.

 Baba wane waali fundi wa kulizia kiombo kya muziki kili kyakuutua saksafoni, kabili taampeelesie kiombo kya muziki, inzi kabili waankwasiizie nkile kutona muziki nga weene. Ni muziki waafikiile kwaluka buikazi bwane. Naatonene saana muziki ni keekio kyaalengiizie nsambilile kulizia kidaari. Musita umo naatendekeziizie kikundi kya muziki wa rock naali pamo ni benaane baniini, kabili twaali twaya komba ni kukinda mu fuasi paleepale. Bafundi kampanda ba mu biwanda bya kufumia miziki, baainikile bufundi bwane ni kuloomba tuye twabombela pamo. Naasiniizie kuya nabomba ni kiwanda kikata kya kukopiiziamo miziki. Miziki yane yatonenue na bantu bengi saana, kabili yaali yaliziiwa lingi ku ma radio mu Quebec.

 Kyaali kyamwenekele nangue nkwete kila kintu kinaali nakabiile. Mbanga naali musepuka, naali napata nfalanga ingi mukukita bintu binaali natonene. Koba naali nabeelezia mubili, kwipuziiwa biipuzio palua miziki, kusinia bintu bya bantu bane, ni kumoneka ku televizio. Busiku naali nasaapa miziki ni kuya ku maliila. Eevi nviinde kusaapa bila busoni, naatendekele kumina bualua nakili mulumendo inzi kabili naatendekele ni kubombia miti ili yakozia. Naali ni lwendo lubiipile kabili nsyali napoozako maano.

 Bange baali baunvuila bunkua buikazi bwane paantu naali namoneka naasaansamukile. Inzi, mukati mwane naali naiimwene wa mpuni, maka-maka lunaali bunke. Naali naiunvua kutioka mutima kabili naemene. Kya bulanda, lunamwenekele kuwiina, bakwasi bane babili baafwile na buluele bwa Sida. Keekio kyankisile! Atasie kine naali natonene miziki, naasuulile lwendo lwa bantu bali basaapa miziki.

 Anzia kine naawinine, naainikile nangue bintu kampanda te byaali byaya buino mu kyalo. Juu ya ki nsaambu yaali yabulile saana? Naali naaipuzia juu ya ki Leeza akokuele bila wakwata bupinguzi. Kakiine naali napepa saana eevi Leeza angasuke. Lunaatuziizie kisia musita wa bulendo, naatendekele kabili kusoma Bibilia. Anzia kine nsibanga naunvua byonse binaali nasoma, naainikile nangue kipalile mpela ya kyalo yapalama.

 Lumbanga nasoma Bibilia, naainikile nangue musita umo Yesu lwabanga waali mu kaseeba, waapuile nsiku 40 waizilikile. (Mateo 4:1, 2) Natendekele kutontonkania nangue, kine nakita nga weene, paange Leeza wakaba kwilangilila kuli neene, pakaako naatantikile musita wa kwizilika. Milungu ibili ntaanzi ntendeke kwizilika, Bakasininkizia babili baakokuele ku muliango wane, kabili naabakupile bengile mu kati, kusia ne waali waswapiile nangue bali kufika. Umo wa Bakasininkizia ali wakuutua Jacques, naamwipuziizie namukeentele ku lukebu, “Kunti twamana siani nangue twikeele mu nsiku ya mpela ya keenu kyalo?” Eevi kwasuka, waaizuile Bibilia ni kusoma 2 Timoteo 3:1-5. Naabepuziizie binge biipuzio bingi bonse babili, kabili naapapiiziwe na byasuko bipateene ni maano kabili byaantekamaniizie, byaali byaswapiile maleembo. Kisia kwendelua, naainikile nangue nsibanga napalile kwizilika.

 Naatendekele kusambilila Bibilia na mute pamo ni Bakasininkizia. Kisia paapo naatebuile misisi yaane yaali yaleepele, ni kutendeka kusaanguako ku kulonghaana konse kwaali kwakitika ku Nsesi ya Bukolo. Paantu naapokeleelue kwa nsaansa ku kulonghaana, keekio kyalengele nkile kwinika nangue kakiine nakipata kisinka.

 Kakiine, eevi kubombia beelia binaali nasambilila, naali napalile kukita bupilibuko kampanda bukata mu buikazi bwane. Kintu kimo kinaali napalile kukita, ni kulekela kubombia miti ili yakozia ni kulekela buikazi bwa lwendo lubiipile. Kabili naali napalile kwalulula aali ya kuya naimwene kuya naali wa mana saana, inzi kutendeka kubapoozako saana maano bange. Paantu naalisie bunke muviazi, naasambiliile kupoza maano ku aali ya baana bane babili ni kubeemena kimupasi. Naalekeele miilo yaane ya miziki ni kukeba miilo isili ya nfalanga ingi.

 Kukita bobo bupilibuko bonse te kwali kwaleengele. Lunaali naikwinda eevi kulekela kubombia miti ili yakolana, yaloombele kuluisia maavia ali asaangua mukulekela kubombia ezio miti. Unge musita naali nabombia kabili. (Baroma 7:19, 21-​24) Kulekela lwendo lwane lubiipile kwaali kwakolele. Miilo yane ya leenu yaali yantopia, kabili ndipilo yaali yantiona mutima. Yaloombele mpue miezi itatu, eevi kupata makuta ambanga napata mu nsa ibilisie ya miilo ya kulizia muziki.

 Lipepo lyaankwasiizie ntwalilile kukita bobo bupilibuko bwali bwakolele. Kabili namwene nangue kusoma Bibilia kila musita ni kwa mana. Milongo iibeleele ya mu Bibilia yaankoseleziizie kakiine. Nga evelia lileembo lya 2 Bakorinto 7:1, lili lya balanda Bakristu besambe bo beene mu bintu byonse bili byafiisia mubili ni mupasi. Lileembo linge lyaansininkiziizie nangue kunti nalekela mibeele yaane ibiipile, ni Bafilipi 4:13, lilandile nangue ndi ni maka kupitila olia ali wampeela maka. Yehova waasukile mapepo ane, ni ku mpela, waankwasiizie nginike ni kubombia kisinka kya mu Bibilia. Keekio kyaansonseziizie mupeele buikazi bwane. (1 Petro 4:1, 2) Naabatiziiziwe ni kwaluka umo wa Bakasininkizia Bakue Yehova mu 1997.

 Loonu ndi ni kisinka nangue ntwalililenge ni buikazi bwane bwa lwendo lubiipile, nga naafuile kale. Inzi loonu, kakiine ndi ni buikazi bwa nsaansa! Mukazi wane aweeme saana Elvie, wakyaluka mpaalo ya kisinka. Fwe bonse tuli mukubomba miilo ya nsita yonse kabili tuli mukusekelela kusambilizia bange Bibilia. Keekio kili mu kundeetela nsaansa ikata ni kuya nateekameene. Natasia saana kuli Yehova paantu waankuliile kuli weene.​—Yoane 6:44.