Naavyelue mu San Juan Chancalaito, muzi uniini uli wasaangua mu kalaale ka Chiapas, kyalo kya Meksiko. Lupua lwane lufumine ku bantu bali bakuutua ba Chol, kikundi kifumine ku ba Maya. Baviazi bane baali na baana 12, ni pakati kaabo neene i wa busano. Lunaali nakili mwanike, neene pamo ni baana bange mu lupua, twali twasambilila Bibilia pamo ni Bakasininkizia Bakue Yehova. Kya bulanda, nsyabombiizie masoke a mu Bibilia mu miaka yane ya bumusepuka.

 Lunaalukile na miaka 13, naatendekele kubombia miti ili yakozia ao droge ni kubeebila bange. Mu enka ezio miaka, naafumine ku nsesi ni kutendeka kukuuka-kuuka. Lunaalukile na miaka 16, naatendekele kubomba mu bukaba mwaali mwabyalua libange. Naapuile muaka umo eevi nali mukubomba mu bobo bukaba. Inzi, busiku bumo, lutwali twatweme bifunda bikata bya mabange na boti, twaasaukiilue na kikundi kyali kyatweme mabunduki kyaali kyabombia ni kyene libange. Naaipoozele pa mutooni eevi tekuti bandase bunduki, ni kuya kutumpukila ku seemu ya kule ya mutooni. Ni kisia paapo, naabutukiile ku États-Unis.

 Mu États-Unis, naatwaliliile kupisia miti ili yakozia ni kukila kwiingizia mu maavia. Lunaalukile na miaka 19, naakwetue ni kupoozua mu buloko nasitakilue bukabooko ni kwezia kwipaana. Mu buloko, naaiungile ni kikundi kya bipopoosi, ni kukita kabili bintu binge bya bungipaani. Ni keekio kyaalengiizie bakulu bankusiizie ku buloko bunge busuungikile saana bwa mu muzi wa Lewisburg, Pennsylvania.

 Mu buloko bwa Lewisburg, lwendo lwane lwaakilile kubiipa. Paantu naali nailamikile ku mpapa tulangi twa keekio kikundi kya bipopoosi, naaiungile nabo nalengeelue mu bobo buloko. Naakilile kusasa ni kuya naumana kila musita. Musita umo, naaingiziizie mu lizibo lya kikundi kya bipopoosi kyali kyaluana mu musolo wa buloko. Lyaali lizibo lyasasile, twabombiizie mipini ya musaapo wa baseball ni byuma bili byalendulua musita wa kubeelezia mubili. Eevi kupuisia lizibo, basungi ba buloko baabombiizie ma gaze ali afumia mensozi. Kisia paapo, bakulu ba buloko baambikile mu seemu inge iibeleele ili yasuungiluamo bantu bakakilue bakolele. Naali nasasile saana kabili naali nabombia bulanzi bwa matuka. Kibanga kyaleengelesie kuli neene kuma bantu. Kulanda kisinka, naali naunvua buino kukita evio. Nsyali naiunvuapo ata ovio juu ya ezio mibeele.

 Mu ezio seemu iibeleele munabiikilue, naali napua peepi ni busiku bonse bwalingi nakakiliilue bunke mu kiumba kyane. Pakaako, naatendekele kusoma Bibilia eevi kupisia musita. Kisia paapo, musuungi wa buloko, waampeele kitabu Unaweza Kuishi Milele Katika Paradiso Duniani. a Lunaali nasoma keekio kitabu, naalangulukile bintu bingi binasambiliile nakili mwanike lunaali nasambilila Bibilia pamo ni Bakasininkizia. Kisia paapo, naatontonkaniizie buikazi bwane vibwainoonekele saana juu ya mibeele yane ya kusasa. Naatontonkaniizie ni palua lupua lwane. Paantu babili pakati ka bankazi bane baalukile Bakasininkizia Bakue Yehova, naatontonkaniizie eevi, ‘Bene bakaba kwikala loonse.’ Kisia naaiipuziizie eevi, ‘Ale neene ndekwandiluaki?’ Keekio, kyaalengiizie mpingule kakiine kwaluluka.

 Inzi, naainikile nangue, naali nakabiile kukwasiiwa eevi ngaluluke. Pakaako, kya mambo, naapelele kuli Yehova ni kumupapaata ankwasie. Kisia, naleembeele mukanda biro ya ku musambo wa Bakasininkizia Bakue Yehova wa mu États-Unis, eevi kuloomba lisambililo lya Bibilia. Biro ya musambo ni yeene yaakwete mipaango eevi kilonghaano kili peepi ni neene kinkuute. Mu ozo musita, nsyali napeelue nsaambu ya kwendelua na bantu basili ba mu lupua lwane. Pakaako, Kasininkizia umo wa keekio kilonghaano waatendekele kuntumina mikanda ya kunkoselezia, ni mpapulo iswapiile Bibilia, yaalengiizie nkile kwaluka ni nkulu ya kwaluluka.

 Kintu kimo kikata kinakitile, ni bupinguzi bwa kufuma mu keekio kikundi kya bipopoosi kinakitilemo miaka ingi. Mukulu wa keekio kikundi, ni weene abanga wali mu ezio seemu iibeleele ya kusuungiluamo. Pakaako, naamupaleeme ni kumulanda nangue nkebele kwaluka umo wa Bakasininkizia Bakue Yehova. Kyakupapia, waandandile nangue: “Kine upinguile kukita evio, kita evio. Nsiviinda kwingilila bintu byakue Leeza. Inzi, kine ukebele kukita evio juu ya kufumasie mu kikundi kyetu, umanine byakaba kufumamo.”

 Kisia miaka ibili, basungi ba buloko baamwene bupilibuko mu mibeele yane. Keekio kyaalengiizie bakile kunkitila bintu mu buwaame. Kwa mufuano, basungi ba buloko baalekeele kunkaka musita wa kufuma mu kiumba kyane kya buloko eevi kuya ku kusamba. Atasie umo pakati ka basungi, waampaleeme ni kunkoselezia ntwalilile kukita bupilibuko. Kakiine, bakulu ba buloko baantwele ku seemu inge isyali yasuungikile saana peepi ni buine buloko eevi nkite muaka wane wa kupeleezia nakakilue. Kisia kupua miaka likumi nali mu buloko, naakakwilue mu 2004, ni kutwalua ku Meksiko na bis ya ku buloko.

 Musita uniini kisia kufika ku Meksiko, naapatile kwali Nsesi ya Bukolo ya Bakasininkizia Bakue Yehova. Lya kuanza kulonghaana, naali navuele iniforme ya ku buloko. Kabili, ezio i yaali ngubo sie bunke ya mukinzi inaali nakwete. Anzia monekelo yane, Bakasininkizia baampokeleele basaansamukile. Lunamwene buwaame bwabo, naaiunvuile kuya nali pakati ka Bakristu ba kisinka. (Yoane 13:35) Ku kooko kulonghaana, bakote ba kilonghaano baapaangile ngie nali ni muntu wa kunsambilizia Bibilia. Kisia kupua muaka umo, naabatiziiziwe nga umo wa Bakasininkizia Bakue Yehova, pa nsiku 03, Muezi wa 09, 2005.

 Muezi wa 01, 2007, naatendekele kubomba nali mubombi wa nsita yonse, napisia nsa 70 kila muezi nali mukusambilizia bange Bibilia. Mu 2011, naapatile diplome ya Masomo a Bibilia Palua Balupua Basimbe (loonu ali akuutua Masomo a Bakabilambila ba Bukolo). Aza masomo, aankwasiizie saana eevi nviinde kufikilizia miilo yane mu kilonghaano.

 Naupeene ni mukazi wane Pilar mu 2013. Ali walanda wasekele nangue, kikolele kuzumina bintu bindi namubuila palua buikazi bwane bwa kale. Nsinabuelepo ata limo mu buikazi bwane bwa kale. Neene pamo ni mukazi wane tuzumiine nangue mibeele yane ya leenu, isininkiziizie nangue Bibilia ili ni buviinde bwa kwalulula buikazi bwa bantu.​—Baroma 12:2.

 Mwene nangue, milandu yakue Yesu ili mu Luka 19:10 ibombele kuli neene. Moomo waalandile nangue: ‘Waaizile kukeba ni kupusia keelia kizeezele.’ Nsikiyunvuile kabili nazeezele mu buikazi. Kabili nsikiizi kabili kupita naboma bantu. Kupitila Bibilia, buikazi bwane bwakyaluka ni mana, ndi ni mutende pamo ni bange, kabili, kintu kya mana saana, ndi ni bukibuza buweeme pamo ni Kabumba wane, Yehova.