Bantu bengi bali baendela lisaamo lya menda limanikile saana lili peepi ni muzi wa Pagsanjan, mu kyalo kya Ufilipino. Baba wane Nardo Leron, waakuliile kooko mu aali ya bupabi. Kumona kubula kwa bukisinka mu buteeko, ku bapolisi ni ku fuasi kwaali wabombela miilo, kwaamulengiizie aaluke ni kipuki ni mbikizi.

 Baviazi bane baali babomba saana eevi kukuzia baana babo munane. Lingi, baali bapua musita waleepele bali kule ni nsesi, eevi kusuunga makaba ku mpili. Lingi, neene ni kaka wane Rodelio, twaali twaiemenasie fwe beene, kabili lingi twaali twabulua byakulia. Anzia kine twaali baanike, twaali twaandua kupata musita wa kusaapa. Kutendekela miaka saba, fwe bonse baanike, twaali twabomba mu makaba, ni kutwama bifunda byafinine bya mikoli ya mazabo ali akuutua koko (coco) twali mukupita mu nzila ili mu mbali tuponga twa mpili. Kine twaandua kulendula kifunda juu ya kufina, twaali twakibulasie.

 Twaali twasipikizia kuumua na baba, inzi, lutwali twamumona wamuuma mama weetu, kyaali kyatukisia saana. Twaali twaezia kumukaania, inzi, te twaali na buviinde. Neene ni Rodelio, twaaunvuene mu kafiso nangue, kine twakula, twakaba kumwipaya baba weetu. Naali nakebele saana kuya nali ni baba atutonene!

 Mibeele ya kusasa yakue baba wane, yaalengiizie nvulunghane ni kwaluka ni kipuki. Pakaako, naafumine ku nsesi naali na miaka 14. Naapuile musita kampanda naikalasie mu misebo, kabili naatendekele kubombia libange. Kisia, naatendekele kubomba miilo ya kwenzia buato, naali mukutwala bantu ku nsaamo ya menda.

 Miaka iniini kisia paapo, naatendekele kusoma ku iniversite, mu muzi wa Manila. Inzi, paantu naali nabuela mu muzi wa Pagsanjan eevi kubomba ku mpela ya milungu, naali ni musita uniinisie wa kusoma. Buikazi bwane bwaali bwakolele kabili bila bwali na mana, ni libange te lyali lyakeefia kabili lyemo lyane. Naatendekele kubombia miti ili yakolana ikilile kusasa, ili yasonsezia bongo, kokaine, ni heroine. Miti ili yakolana pamo ni lwendo lwa bulalelale byaali byaendela pamo. Naali nazyungulukiilue na aali ya bupabi, kubula kwa nsaambu ni bukyuzi. Naasuulile buteeko ni kumona nangue bwene i bulengiizie. Naamwipuziizie eevi Leeza, “Juu ya ki buikazi buli eevi?” Inzi, nsyapatile byasuko mu ma diini paleepale munaingiile. Naakilile kubombia miti ili yakolana eevi kwipuuluzia ni lyemo lyane.

 Mu 1972, banafunzi ba mu kyalo kya Ufilipino, baapangile mandamano eevi kupiinga buteeko. Naaingiile mu mandamano amo ni azo mandamano afikiile kubiipa. Bantu bengi baakwetue, ni kisia miezi kampanda, basoda batendekele kuteeka kyalo kyonse.

 Naatendekele kabili kwikala mu misebo, inzi loonu, juu ya kutiina buteeko paantu naakwasiizieko bukisanguka. Eevi ntwalilile kupata miti ili yakolana, naatendekele kwiba, ni kupuako, naalukile mukambue wa bantu banoonkele ni baeni. Ibe ni kuya nakosele ao nafuile, ne nsyali namonapo kantu.

 Mu wenka ozo musita, mama wane pamo ni mwalawane, baatendekele kusambilila Bibilia pamo ni Bakasininkizia Bakue Yehova. Baba wane waafipilue saana kabili waaziziizie mpapulo yabo iswapiile Bibilia. Inzi, bonse babili baasipikiziizie ni kufikiila kubatiziiwa ni kwaluka Bakasininkizia.

 Busiku bumo, Kasininkizia umo waalandile ni baba wane palua bulayo buli mu Bibilia palua musita uli mukuiza, lukwakaba nsaambu ya kisinka pa kyalo kyonse. (Malumbo 72:12-​14) Bobo bulayo, bwaamusaansamusiizie saana baba wane mpaka waapinguile kutoosia ye muine. Mu Bibilia, taapatilemosie bulayo bwakue Leeza palua buteeko bwa nsaambu. Inzi kabili, waapatilemo ni bintu biloombelue balume ni ba baba kuya bakita, kuli Leeza. (Baefeso 5:28; 6:4) Kisia musita uniini, weene pamo ni bantu bange bonse ba mu lupua lwetu, baalukile Bakasininkizia. Paantu naali kule ni kwetu, nsyali na mpunda ya bebio byonse.

 Mu 1978, naakuukiile mu kyalo kya Australia. Inzi, atasie mu keekio kyalo kilimo mutende kabili kilimo buyantanzi, naandilue kupata mutende wa mu maano. Mibeele yane ya kumina bwalua ni kubombia miti ili yakolana, yaatwaliliile. Kisia, mu wenka ozo muaka, Bakasininkizia Bakue Yehova baangendeele. Naatonene bintu bibandangiliile mu Bibilia palua kyalo kilipo mutende, inzi naali natwisika kwiunga pamo nabo.

 Musita uniini kisia paapo, naabuelele mu Ufilipino eevi kupuamo milungu iniini. Bantu ba mu lupua lwane baambuilile nangue baba wane wakikwinda saana eevi kwaluka muntu aweeme, inzi mutima wane waali wasiele wali ni mbikizi saana, kabili naaikwindile eevi tekuti ndanziane nakue ata limo.

 Mwalawane mwanakazi waabombiizie Bibilia eevi kumbuila kilengiizie buikazi buye bwaizuzimo maavia saana ni kubula kwa nsaambu. Naapapile kumona muana muniini mwanakazi asimanine bintu bingi mu buikazi, waviinda kwasuka biipuzio byane. Ntaanzi ya kunti mbuelemo, baba wane waampeele kitabu Unaweza Kuishi Milele Katika Paradiso Duniani. a Waalandile eevi: “Lekela kwemoka. Keeki kitabu, kyakaba kukukwasia kupata keelia kiuli mukukeba.” Waankinkiziizie kukeba Bakasininkizia Bakue Yehova kine nabuelamo mu Australia.

 Naakoonkele masoke akue baba wane ni kupata Nsesi ya Bukolo ya Bakasininkizia Bakue Yehova, peepi ni nsesi yane mu muzi wa Brisbane. Naaitabiile kuya nasambilila lyonse Bibilia. Bukabika bwa Bibilia nga bolia buli mu Danieli katue ka 7 ni Isaya katue ka 9, bwaandangiliile nangue buteeko bwakue Leeza, busiliimo kubula kwa nsaambu ata kumo, bwakaba kututeeka mu musita uli mukuiza. Naasambiliile nangue twakaba kusekelela aali iweeme mu Paradiso pa kyalo. Naatonene kwitabilua na Leeza, inzi naainikile nangue, mpalile kulekela kuya nasasile, kulekela kubombia miti ili yakolana ni bwalua, ni kulekela buikazi bwane bwa bulalelale. Naalekeene ni mwanakazi unaali naikala nakue, ni kulekela mibeele yane ya buzia. Paantu naakilile kumuswapila Yehova, naapepele kuli weene eevi ankwasie kukita bupilibuko bunge.

 Bukebuke, naafikiile kwinika nangue, bintu binaali nasambilila, kunti byaviinda kakiine kumwalulula muntu. Bibilia ili yalanda nangue, kine twaikwinda, kunti twaviinda kuvuala bumuntu bwa leenu. (Bakolosai 3:9, 10) Lunaikwindile kukita evio, naainikile nangue bintu binaunvuile palwakue baba wane, nangue waakyalulula bumuntu bwakue, kunti byaya byalisie bya kisinka. Kuliko kumunvuila kipuki ni kumumona kuya wali muluani, naatonene kukita nakue mutende. Kupuako, naamweleele baba wane ni kulekela kumusuula, nga vinaali namusuulile ntangia ku bwanike.

 Lunaali mulumendo, lingi naali nakoonka bange mu mibeele ili yainoona ao ili yaleetelana buavia. Masoke a Bibilia aalukile a kisinka mu aali yane​—babibuza babiipile baanzeziizie. (1 Bakorinto 15:33) Inzi, nakipata babibuza baswapiilue pakati ka Bakasininkizia Bakue Yehova, kabili bakinkwasia kwaluka muntu aweeme. Kabili pakati kabo, nakipata mukazi wane aweeme, Loretta. Fwe bonse pamo, tuli mukubakwasia bange bamane Bibilia viili kuviinda kubakwasia.

 Kupitila Bibilia, naakimona baba wane waaluka muntu olia unaali namwene nangue takaviinda kwalukapo, i kulanda, mulume amutonene mama wane, Mukristu ekefiizie kabili ali watona mutende. Lutwamonene kisia kubatiziiwa kwane ni kwaluka umo wa Bakasininkizia Bakue Yehova mu 1987, baba wane waankumbatiile, kabili leelio i lyali lya kuanza kukumbatilua na weene mu buikazi bwane!

 Baba pamo ni mama wane, baakipua miaka ikilile pa 35, batwaliliile kubombela pamo mu kukwasia bange bamane kiswapilo kya Bibilia. Baba wane waalukile muntu ali ni mute kabili ali waemenana, kabili amanikile kuya wali muntu ali wakwasia bange. Mu ezio miaka yonse, nakisambilila kumukindika ni kumutona. Naakiba naitoneena kuya namanikile nangue ndi muana wakue! Wakifua mu 2016, inzi ndi namulanguluka nali ni ntono saana palwakue, paantu manine nangue weene pamo ni neene, twakikita bupilibuko bukata mu bumuntu bwetu, lutwakiba twabombia mafunde a Bibilia. Nsisiele na mbikizi ata kaniini palwakue. Kabili ndinatasia saana paantu nakimupata Baba wane wa ku muulu, Yehova Leeza, alaile nangue wakaba kupuisia bintu byonse bili byalengia lupua mu fuasi yonse luye lwaema.